اؤنجه آتادان يئتيم قالان کيچيک حسن آناسي دا اؤلونجه اوزاق قوهوملاري و قونوم قونشونون يارديمييلا خالاسي‌نين يانينا فلسطينين اوجقار بير قصبه‌سينه گؤندريليردي.حسن گميده اَيلندي؛ قير-قير ايشله‌ين بوجورقادلارا، اوستلري يازيلي تعجيلي يارديم سيميتلرين، قورودولاجاق پالتارلار کيمي ايپلره آسيلي قاييقلارا، نؤوبه دييشديريلرکن چالينانان زنگه باخاراق چوخ اَيلندي. 

بئش ياشيندا ايدي پلتک، شيرين دانيشمالارييلا دا گؤيرته‌ده يولچولاري چوخ اَيلنديرميشدي. فقط گمي، اورايا بورا اوغراييب بير چوخ يولچو بوراخديقدان سونرا ايستي مملکتلره ياخينلاشينجا اؤزونو بير دورغونلوق آلدي. 

قالانلار بيلمه‌ديگي بير ديلدن "حسن گل! حسن گئت!" دئميرديلر؛ آدي دييشر کيمي اولموشدو. حسسن شکلينه گيرميشدي."تعال هنا يا حسسن!" دئييرديلر. يانلارينا گئديردي."روح يا حسسن…"دئيرلرسه اوزاقلاشيردي.

حئيفايا يئتيشديلر و اونو بير قاتارا مينديرديلر.    آرتيق آنا ديلي بوسبوتون ائشيديلمز اولموشدور. حسن بوجاغا بوزولدو؛ بير شئيلر سوروشان اولسا دا سوسوردو، ياناقلاري پنجه-پنجه، آل آل اولاراق سوسوردو. 

پورتاغال باغچالارينا دالميش، کؤکسونده بير قاتيليق، قيرتلاغيندا لوخماسيني اودا بيلمه‌ميش کيمي بير سرت دويون، هميشه سوسوردو. آنجاق هم بوتونو ايله چيچک آچميش، هم يئميشلرله بزه‌نميش گؤزل، ايسلاق باغچالار دا توکندي؛ زئيتونلوقلار دا سئيرکلشدي.

ياماجلاريندا کئچيلر اوتلايان قورو، يالچين، چيلپاق داغلار آراسيندان کئچيرديلر. بو کئچيلر قاپقارا، خالسيز قارا ايدي؛ توکلري يئني آوتوموبيل بوياسي کيمي آينامسي بير جيلا ايله قيزغين گونش آلتيندا، فيريل فيريل يانيردي.    بونلار دا بيتدي؛ گؤز آلا بيلديگينه اوزانان بير دوزلوگه چيخميشلار ايدي؛ نه آغاج واردي، نه دره، نه ائو! يالنيز آرا سيرا قوجامان-قوجامان حئيوانلارا راست گليرديلر. 

چوخ اوزون قيچلي چوخ اوزون بويلو، کورَکلري قاباريق، دونقار حئيوانلار قاتارا باخميرديلار بئله… آغيزلاريندا آغيمتيل بير کؤپوک چئينه‌يه‌رک، دالغين و کوسکون آرخا آرخايا، آغير-آغير يومشاق يومشاق، ايز بوراخمادان و توز چيخارمادان گئديرديلر.

چوخ صبر ائتدي، دؤزه بيلمه‌دي، يانينداکي عسگره بارماغيني گؤستره‌رک سوروشدو؛ او گولدو:"جَمَل! جَمَل!" دئدي.حسني بير ستانسييادا ائنديرديلر. بويونوندان، آلينيندان، قوللاريندان و قولاقلاريندان بيچيم-بيچيم، سورو-سورو قيزيللار ساللانان قارا چارشافلي، قارا چاتيق قاشلي، قارا ايري خاللي بير قادين کؤکسونه باسديردي. 

آناسي‌نين‌کينا بنزه‌مه‌ين، غريبه قوخولو، چوخ يومشاق، ايچينه باسديريلان جانسيز بير کؤکس…"يا حبيبي! يا عيني!"    خالاسي‌نين يانينداکي قادينلار دا ساريلديلار، اؤپدولر، سؤيلشديلر، گولوشدولر. 

بير چوخ اوشاق دا گلميشدي؛ کؤينکلري‌نين اوستونه خيرقا يئرينه پئنجک گئيميش، ساچلاري پرچملي، باشلاري ترليکلي اوشاقلار…حسن دورغون، تيخانيق‌دي؛ سوسور، سوسوردو. ائله هفته‌لرجه سوسدو.

آنلاماغا باشلاديغي عربجه‌ني کيچيک بئينينده مئيدانا چيخان بير عينادلا دانيشماياراق سوسدو. داها بؤيوک بير تهلوکه‌دن قورخاراق دنيز آلتيندا نفس آلماماغا چاليشان بير آدام کيمي تيخانديغيني دويوردو، يئنه سوسوردو. هميشه سوسدو.

ايندي اونون دا قورشاقلي کؤينگي، پئنجگي ترليگي، قيرميزي پاپيشلاري واردي. ساچلاري‌نين اورتاسي، ال آياسي قدر صيفير نؤمره ماشين ايله کسيلميش، آلينينا پرچملر اوزاديلميشدي. 

دري کيمي سرت، ياستي تندير چؤرگينه آليشميشدي؛ يئر سوفره‌سينده بونو قاشيق ايله چنگل يئرينه تيکه‌له‌يه‌رک ايستيفاده ائتمه‌ني باجاريردي.بير گون خالاسي کوچه‌دن قيشقيراراق کئچن بير ساتيجيني چاغيردي.

ائوين حَيَطينه کورگينده چووال قابلي بير ياستي توربا، الينده بير کيچيجيک ستول و اوزون بير دمير پارچاسي، داغينيق قيليقلي بير آدام گيردي. تورباسيندا دا موقووا کيمي بوکولموش بير تومار دوروردو. دانيشديلار، سونرا اؤنونه بير چوخ پارتلاق سؤکوک، پارچا پارچا آياققابي دوزدولر. 

ساتيجي ستولونا اوتوردو؛ حسن ده ماراقلا قارشيسينا کئچدي. بو دؤرد ياني ديوارلي، تک قات، باسيق و تورپاق ائوده ائله جاني سيخيليردي کي… چاشاراق، اَيلنه‌رک سئير ائديردي: موقووايا بنزتديگي قالين دريني ايکي طرفي ايتي اينجه‌جيک ساپسيز بيچاقي ايله کسيشين، آغيزينا بير اوووج ميسمار دولدوروشونا، سونرا بونلاري بير-بير ايستانبولدا گؤردويو مئيمون کيمي اوووردوندان چيخاريب آياققابيلارين آلتينا تئزتئز ميخلاييشينا دري پارچالاريني پيس بير سويا قويوب ايسلاتيشينا، موندار چاناقداکي معجونا بارماغيني ساليب دابانلارينا سوروشون، هاميسينا باخيردي. سوسور و باخيردي.

بير آراليق هارادا و کيملرله اولدوغونو ياددان چيخارتدي، دالغينليغيندان آنا ديلي ايله سوروشدو:"ميسمارلار آغيزينا باتمازمي سنين؟"پينه‌چي باشيني حئيرتله ايشيندن قالديردي. 

اوزون اوزون حسنين اوزونه باخدي:"تورک اوشاغي‌سانمي به؟""ايستانبولدان گلديم.""من ده او طرفلردن… ايزميتدن!" پينه‌چي ده ساچ ساققال داغينيق، کؤکس، باغير آچيق، شالواري ديزلردن ياماقلي، ديشلري اسکيک و صيفتي ساري، ساپساري ايدي؛ گؤزلري‌نين آغينا قدر ساري ايدي. 

تورکجه بيلديگي و ايستانبول طرفلريندن گلديگي اوچون، حسن ايندي اونون ساده ايشينه دئييل، اوزونه ده ديقتله باخميشدي.

کؤکسونون اورتاسيندا، عئينيله چنه‌سينده‌کي ساققالي خاطيرلادان قيرجيل، سئيرک بير توتام قيل واردي.ديشسيزليکدن پلتک چيخان بير سسله تکرار سوروشدو:"نه دئيه دوشدون بو جهننمين اورتاسينا سن؟"حسن آنلاديغي قدر ايضاح ائتدي. 

سونرا کانلي‌جاداکي ائولريني تصوير ائتدي، قونشوسونون اوغلو ماحمودلا باليق توتدوقلاريني، آناسي دوکتورا گئدرکن تونئله مينديکلريني، بير کره ده قاپييا آغ بويالي خسته آوتوموبيلي گلديگيني، ايچينده ياتاق سريلي اولدوغونو سؤيله‌دي. بير آراليق دا اؤزو سوروشدو:

"سن نييه بوراداسان؟"او بيري باشيني و اليني بئله يئلله‌دي: اوزون ايش معناسينا… و ميريلداندي:"بير قباحت ايشله‌ديک ده قاچديق!" اصل دانيشان حسن ايدي، آلتي آيدان بري سوسان حسن… دايانمادان، دينلنمه‌دن، نفس آلمادان، ياناقلاري سئوينجيندن گول-گول، دوداقلاري تيتره‌يه‌رک تزه، کؤوره‌ک، بوللور سسييله دورمادان دانيشيردي. 

عاغيلينا نه گليرسه سؤيله‌ييردي. پينه‌چي هم چاليشير، هم ده هردنبير "ها! يا! ائله‌مي؟…" کيمي دينله‌ديگيني بيلديرن سؤزلرله اونو سؤيله‌ديردي آرتيق چاتا بيلمه‌يه‌جگي يوردونون بير دره‌سيني بير کولگيني، بير تورکوسونو دينله‌ييرميش کيمي هم ذؤوقلو، هم ياسلي دينله‌ييردي؛ کئچميش گونلري، ايتيرديگي يئرلري دوشونه‌رک منليگي سارسيلا - سارسيلا دينله‌ييردي.

داها چوخ دينله‌مک اوچون ده اليني آغير توتوردو. آنجاق سونوندا بوتون آياققابيلار تعمير ائديلميش، ايش بيتميشدي. دميريني تورپاقدان چکدي، کوسالاسيني بوکدو، ميسمار قوتوسونو باغلادي، چيريش چاناغيني سارمالادي. بونلاري هاميسيني آغير- آغير ائتدي.حسن، اورگي بورخولاراق سوروشدو:"گئديرسنمي؟""گئديرم يا، ايشيمي بيتيرديم." 

او زامان گؤردو کي کيچيک اوشاق هميئرليسي، بالاجيغاز آغلايير… سس‌سيزجه تيتره‌يه -تيتره‌يه آغلايير. 

ياناقلاريندان گؤزياشلاري بير-بيري آرخاسينا، تميز واقون پنجره‌لرينده‌کي ياغيش داملالاري؛ چؤلون رنگيني کئچيرن منظره‌لري ايچينه آلاراق نئجه تله‌سيک- تله‌سيک، سارسيلا چارپيشا تؤکولسه ائله، باغري‌نين سارسينتيلارييلا يئرلريندن اويناياراق ووروشاراق ايچلرينده گونشلي ماوي گؤي پيريل- پيريل آخير.

"آغلاما به!.. آغلاما به!" پينه‌چي باشقا سؤز تاپا بيلمه‌ميشدير. بونو ائشيدن اوشاق هيچقيراهيچقيرا، قاتيلا-قاتيلا آغلاماقدادير. بير داها تورکجه دانيشاجاق آدام تاپا بيلمه‌يه‌جگينه آغلاماقدادير.

"آغلاما دئييرم سنه! آغلاما!.." بونلاري دئيرکن اونون دا قاتي، برکيميش اورگي يومشالميش شيشميشدي. 

قاباغينا کئچمه‌يه چاليشدي، آنجاق ائده بيلمه‌دي، اؤزونو توتا بيلمه‌دي، گؤزلري‌نين دولدوغونو و ساققاللاريندان آخان ياشلارين عربيستان ايستيسي ايله يانان قيزغين کؤکسونه بير منبع سيزينتيسي قدر سرين، اورپرديجي تؤکولدويونو دويدو.