بولگه لر سرويسي:روان‌شناس دؤهتوروم دئدي:»هر شئي تلقيندي. اؤزون اؤزووه تلقيين ائلييه‌جاخسان« دئديم: تلقيح يا تلقين؟ قاشلاريني يوخاري چکيب دئدي:مگر روح روان واکسندي تلقيح ائلييه‌سن؟ ت َ ل ق ي ن… تلقين!اولمايان بير شئيي نئجه تلقين ائله‌ييم آخي؟! –تلقين، تيکرارينان اولار. نه قدر چوخ تيکرار ائله‌سن بير او قدر ذهنين تئز قبول ائلر. دئديم:خانيم دؤهتور، بعضي واختلار وار کي، نرود ميخ آهنين بر سنگ… ، أييلَر آمما داخيل اولماز. دئدي :اَه ه ههههه، من دئيرم أليف، سن دئيرسن ب، سن ده مادّي عنصرلري آت قيراغا گؤراخ سونرا أليني قويدو گيژگاهينا، دئدي: بوراني گؤروسن، بورا فقط تلقين ايش وئرر. دئديم: خانيم دؤهتور،بير فيلسوف وار، دئييب اليف ياني ائله همان ب ديخانيم دؤهتور حيرصيندن پؤرتوشدو. عصبانيت ايله دئدي: او فيلسوف دا غلط ائليير من‌نن. خانيم دؤهتورون عکس‌العملينه توموخدوم. او ايسه اؤزونو أله آليب، دئدي:دئييرم ياني اليف‌نن ب‌يين يئردن گؤيه فرقي وار. فيلسوف دي دا، دئييب، دئمه‌ميش.دئديم :اؤلوب، 17جي قرنده اؤلوب.ساعاتينا باخيب، دئدي: 45 دقيقه ويزيت واختين قورتولدي. آمما منه دئمه‌ميشدين ها بو جور مزخرفاتدا اوخويورسان. اونا گؤره دا ائله بئينين داش کيمدي دا! قول ساعاتيما باخديم. هله 45 دقيقه تامام اولماميشدي. حيس ائله‌ديم خانيم دؤهتور آز قالير داشسين. آياغا قالخديم. او دا يئريندن قالخيب، أليني منه ساري اوزالديب، گوله- گوله دئدي: منيم سؤزومه باخ. لاپ ائله ايندي مطبدن چيخدين، گئت بير دنه»من چه قد خوشبختم« آل، گونده 20- 30 دفه قولاق وئر، اوخو، اونون هاواسيينان اوينا، گؤروه‌جکسن، نه قدر اميد به زندگي سنده آرتاجاق!گؤزلريم آز قالدي تپه‌مه چيخسين. دئديم: مگر ساتيرلار؟ دئدي:ائشيتمه‌ميسن؟مات مات اوزونه باخديم. خانيم دؤهتور بيردن بيره أل- قولونو اوينادا- اوينادا باشلادي اوخوماغا:»همه چي آرومه، من چه‌قد خوشبختم…همه‌چي آرومه… من چه قد خوشبختم…« خانيم دؤهتورون احوالينا دوداغيم قاچدي. دئدي: گؤردون، اينديدن سنه تاثير ائله دي باااا… سونرا ادب- ارکانلي دؤهتورلر کيمي أليمي سيخيب، اتاغينين قاپيسينا جان مني قارشيلادي. مطب قاپيسيندان چيخاندا اؤزومدن ياشلي بير خانيم، اينتظار اتاغيندا ناقّيشلي گئديردي. ياشلي بير کيشي اونون قولوندان توتوب دالبادال تيکرار ائليردي:»نازيم، گؤزليم، بوردا يوخ کي، ساخلا اؤز حيطيميزه، بورا دؤهتور مطّبيدي آخي« اؤز- اؤزومه دئديم: »شوکورلر اولسون کي نه نازام نه ده گؤزلم. لاپ ائله بو دقيقه‌دن، تلقيني باشليياجاغام«.سي‌دي ساتانلارين بير به بيريندن »من چه قد خوشبختم«ي سوروشا- سوورشا آبرساندان ساعات مئيدانينا ساري يولا دوشدوم. آغا، من چه‌قد خوشبختم واريزدي؟– تازا قئيم دي؟آغا، من چه‌قد خوشبختم واريزدي؟هله سينمالاردا، سي‌دي‌سي ده بويون صاباح چيخار… آغا، من چه‌قد خوشبختم واريزدي؟ بويون آخشام يئتيشر. صاباح گل وئريم.ساعات مئيدانيندا بير سي‌دي‌ساتان توکانا گئچديم. ياشا دولموش بير کيشي عصبانيت ايله تئلفوندا دانيشيردي کيم دئيير دولميياجام، بابا سن کي يئددي آييليخ دَييلدين! سن اؤل ايکي گون سورا حسابيندادي. سن اؤل دئديم… مني گؤرجک سؤزونو کسيب دئدي:هن نمنه ايستيسن؟دئديم: من چه‌قد خوشبختم واريزدي؟ دئدي:قادام خوشبخت لييه‌ده، خوشبخت‌ليين جد آبادينا دا… مجال وئرمه‌دي من سؤزونون جوابيني وئريم. اوجا سس‌ايله دئدي:خئير، يوخوموزدي، بويور خوش‌گلدين! کور- پئشمان توکاندان چيخديم. سسي خيابانا جان گليردي: بابا سنه دئميرم کي، مشتري‌‌يه جاواب وئريرم.يورقون آرقين، باغ قاباغيندا بير پاساژا گئچيب، باشيمي اوزالتديم بيرينجي توکانا. توکانچي، جوان بير مشتري‌‌له دانيشيردي:آغا، من چه‌قد خوشبختم واريزدي؟ياشلي توکانچي عينکيني بورنونون اوجونا چکيب، آشاغيدان يوخاري، يوخاريدان آشاغي مني آناليز ائله‌ييب، دئدي: حاج‌خانيم، پيس ايشدي! سنين ياشينداکي خانيملارين يئري ختم‌أنامدي، قرائت جلسه‌لريدي، پيس ايشدي حاج‌خانيم، پيس ايشدي! جوان اوغلان گوله- گوله دئدي:خانيم، يوتيوبدا وار. يازجاقسان من چقدر خوشبختم…. آبرساندان باغ قاباغينا پيادا گلديييمين يورقونلوغو قالسين بير يانا، توکانچي‌نين پيس ايش دئمه‌يي صبريمي داشيتدي. دئديم: »قادام تلقينه ده، خوشبخت‌لييه ده، يو تيوبا داااا« توکانچي، جوان اوغلاندان سوروشدو:بَه بو نييه بئله ائلير؟ شانسيما باخ هاااا
بولگه لر سرويسي:روان‌شناس دؤهتوروم دئدي:»هر شئي تلقيندي. اؤزون اؤزووه تلقيين ائلييه‌جاخسان«