بولگه لر سرويسي: بو افسانه‌ده دونـيانـين ان سويوق، بوزلو و بورانلي اؤلكه‌لريندن دانـيشيلـير. بو يـئرلرده ياي فصلي چوخ گوده و قـيش فصلي چوخ اوزون‌دور و گونش بوتون قـيشي، اؤزونو گؤزلردن گيزله‌دير. بو افسانه ايسكيمولارين حـياتـي‌نـين بير حيصّه‌سيندن سؤز آچـير و اونلارين يوردلارينـين، گوندوزلرينين ايشيق اولان زامانـينـي و قارانليقلارينـي تصوير ائدير. ايسكيمولار باره‌سينده و بو گونكو وضعيت‌لريندن بير قـيسا معلومات آشاغـيدا اوخوجولار اوچون قلمه آلينـيب‌دير.ايسكيمولار، گروئنلندده، كانادانـين شيمال حيصّه‌سينين اوجقارلاريندا، آلاسكادا و هابئله كئچميش شورالار اؤلكه‌لرينده ياشايـيرلار. الده اولان احصاييه‌لره گؤره اونلارين عمومي سايـي تخمينن 90مين نفردن آرتـيق دئييل. اونلار اؤزلريني حقيقي اينسانلار آدلانديريرلار. اونلارين بير چوخو عيسوي و بير قيسمي ده عنعنه‌وي دين‌لريني ساخلاميشلار. بعضي تاريخچي‌لر احتيمال ائديرلر كي، ايسكيمولارين و هيندي‌لرين (آمريكانـين قـيرميزي دري) اهاليسي‌نين تاريخي 30- 20 مين اول‌دن باشلايـير، احتمال كي، اونلارين اجدادي شيمال شرقي آسيادان برينت بوغازي واسيطه‌سيله آمريكايا كؤچوب گلميشلر و مين ايللر عرضينده اورادا مسكونلاشميشلار. اونلارين ديلي پاله‌آسيا ديللرينين ايسكيمو آله‌اوت گوروهونا داخيل‌دير. بو ديلده تخمينن 90 مين نفر دانـيشير و بو ديل قايدا- قورولوش باخيميندان التصاقي بير ديل‌دير. شورالاردا ياشايان ايسكيمولارين اليفبالاري كيريل ايدي و الده اولان معلوماتلارا گؤره اونلارين آراسيندا ساوادسيز يوخدور و ضيالي‌لارينـين سايـي نيسبتن چوخدور و خالق صنعتكارليغـي چوخ اينكيشاف ائتمشدير.

چوخ اسكي زامانلاردا گونشين ايشيغـي هر بير يـئره ساچيردي. بير گون گونش بيردن گؤزلردن ايتدي. آنجاق يالنـيز گئجه‌لر، اولدوزلار گؤيده سايريشيب اؤز ايشيقلارينـي عالمه سپديلر. اينسانلار‌هامي يوخسول و كاسيب اولدولار. يـئر اوزونو قار، كولك و چوغون بورودو. اوتلار، بيتگي‌لر بوزلارين آلتـيندا دونوب آرادان گئتديلر و اوره‌ك يانديريجي، كده‌رلي و اوزونتولو بير وضعيت قاباغا گلدي. اووسونچولار، سئحيربازلار و جادي‌گرلر بوتون قودرت و طيليسيم‌لري ايله الـلشديلر، آمما گونشي قايتاريب, دونيانـي نورلانديريب، ايشيقلانديرماغا قادير اولماديلار.قوزئي قوطبينده يـئرلشن بير كندده، بير اوغلانجيغاز ياشايـيردي. او آتا- آناسينـي الدن وئريب يئتيم قالميشدي. او كندده اونون‌هايـينا قالان و قايغـي‌سينـي چكن هئچ بير كيمسه يوخ ايدي. بو اوغلانجيغاز باشقا يوخسول و كيمسه‌سيز اوغلانلار ايله كندين يول قـيراغـيندا عؤمور كئچيريردي و آوارا- سرگردان كوچه- بازاري دولانـيردي. اونو گؤرن هر بير شخص اونا خور باخيردي، بيردن گؤزو ائويندن چيخان بير جادي‌گره ساتاشدي. اونا طرف يؤنه‌لدي و اوزونو سئحيربازا توتوب دئدي:– سيز جادي‌گر و اووسونچولار گونشي بيزيم سويوق و دونموش اؤلكه‌ميزه قايتارا بيلمه‌ديز، آمما من بو ايشي گؤره‌جه‌يم، ايندي اونو تاپيب گتيرمه‌يه گئديرم.جادي‌گر اوغلانجيغـين بو سؤزلريندن چوخ جين‌لندي و اونا ساري يويوروب اونو دؤيوشله‌مه‌يه باشلادي و چوخ بير غضب‌له دئدي: «تئز اول، ايتيل جهننمه! داها سني بو طرف‌لرده گؤرمه‌ييم بو كنددن قوي گئت و هئچ واخت بورايا دؤنمه!».

اوغلان بو كنددن آيريلماغا و گونشي تاپماق قرارينا گلدي. آنجاق اؤز- اؤزونه دوشوندو كي، ياخشي اولار كي، كنددن چيخمادان قاباق، ياشلي و تجروبه‌لي و دونيا گؤرموش بير كيشي‌نين يانـينا گئتسين و اوندان ايشيغـين يئريني سوروشسون. اوغلانجيغاز، قوجامان، دونيانـين ايستي- سويوغوندان چيخان و باش‌بيلن و دونيا گؤرموش بير كيشي‌نين يانـينا گئتدي و اوندان ايشيغـين يئريني سوروشدو و خاهيش ائله‌دي كي، اونا دئسين كي، گونش‌هارا گئديب‌دير، اونو نئجه تاپمالي‌دير و ايشيغـي نئجه بو كنده قايتارماق اولار. بو قوجا و تجروبه‌لي كيشي بو اوغلانجيغازا نظر ساليب، اونون سيماسيندا سارسيلمايان بير ايراده گؤروب، جاواب وئردي:– اوغلوم، اگر سن حقيقت‌ده ايسته‌ييرسن ايشيغـي تاپاسان، گئت قار باشماقلارينـي گئي و گونئيه دوغرو يولا دوش.

اوغلانجيغاز بو تجروبه‌لي و مهربان كيشي‌نين سؤزونو ائشيديب، قار باشماقلارينـي گئيدي و يولا دوشدو. او يورولمادان و آردي كسيلمه‌دن اؤز يولونو داوام ائتديردي. آنجاق بوتون يول اوزونو، قارانليق و ظولمت‌دن باشقا بير شئي گؤزونه چارپمادي، آمما او مأيوس اولمادي، ايشيغـي تاپماغا تله‌سيردي.بير گون بيردن چوخ اوزاق‌لاردان، ايشيغـين شوعالاري گؤزونه ديدي، آمما بو شوعآلار آرديجيل اولمايـيب، گيزله‌نيب و تزه‌دن اؤزونو قاباق‌كـيندان داها نورلو و داها ايشيق‌لي گؤستريردي.اوغلان آجليغـي و يورغونلوغو اونوتدو و يـئيين- يـئيين آدديملاريلا اؤزونو تپه‌نين آياغـينا يئتيردي. تپه‌نين اوچ طرفي قاپ- قارا قارانليق ايدي، آمما يالنـيز بير طرفي نورا غرق اولموشدو. بير آز قاباغا گئتدي، تپه‌نين ائنيش‌لييينده گؤزو بير داخماجيغا ساتاشدي، اوردا بير قوجا كيشي گؤردو كي، بئل ايله قارلاري اويان- بويانا سپه‌له‌يير و بو قار دنه‌جيك‌لري گؤيده بولودا چئوريليب، ايشيغـين قاباغـينـي كسيرديلر و كيشي‌نين آرخاسيندا داخماجـيغـين ياخـين‌لـيغـيندا بير بؤيوك ايشيغـين  نورو، يـئر اوزونه سپه‎لنميشدي و بو بؤيوك ايشيق توپلوسو هر بير يـئري ايشيقلانديريردي.اوغلانجيغاز درحال داليسيندا اولان و آختارديغـي شئـيين تاپماسينـي دويدو. او بو قوجا كيشي‌نين يانـينا گليب و اونا دئدي:– قوي بو نور و ايشيق منيم كنديمي ده ايسينديرسين، ايشيقلانديرسين، سن نييه بئل ايله قارلاري گؤيه سپه‌له‌ييرسن، قارانليق و ظولمت ياراديرسان!اوغلانجيغاز سونرا بئله سؤزه باشلادي:– من قارانليقدا ياشاماقدان داها بئزميشم و ايسته‌ييرم بورادا، سنين يانـيندا، ايشيغـين ياخينليغـيندا قالام، ايشيق‌دا ياشايام.

قوجا كيشي جاواب وئردي:»‌ايسته‌سن منيم يانـيمدا قالا بيلرسن«. هر ايكيسي راضي‌لاشديلار. قوجا اونو داخماجيغا آپاردي و اوغلانجيغازا اؤز آرخاسي طرفده دار بير جيغـيرين آلتـيندا يـئرله‌شن بير چؤكوك گؤستردي. چوخ كئچمه‌دن اوغلانجيغاز قوجاغـيندا بير ايشيق توپلوسو، تله‌سه- تله‌سه داخماجيغـيندان ديشاري‌يا دوغرو يورويوب و اورادان اوزاقلاشدي. بير نئچه دقيقه‌دن سونرا قوجا بايـيرا چيخيب گؤردو، اوغلانجيغاز ايشيق توپلوسونو قوجاغـينا آليب، قاچا- قاچا بوردان اوزاقلاشير. او قـيشقـيردي،‌هاراي چكدي، «قايـيت» «قايـيت» باغـيردي، آمما اوغلانجيغاز هئچ بير شئيه اعتنا ائتمه‌دن بوتون قودرتيله قاچيب و اورادان اوزاقلاشيردي. اوغلانجيغازين تله‌سه- تله‌سه قاچديغـينا گؤره آياغـي بودره‌دي و بيردن يـئره يـيخيلدي و بونا گؤره بو ايشيق توپلوسو يـئره ديدي و كيچيك حيصّه‌جيك‌لره بؤلوندو. هر تيكه بير يـئره داغـيلدي. اوغلانجيغاز بو نورلو و ايشيقلانديريجي شار? شكلينده اولان تيكه‌لر ايله اؤز دوغما كندينه قايـيتدي.اوزون، يوروجو و حئيرت‌لنديريجي بير سفردن سونرا، بو اوغلانجيغاز اؤز يـئرلي‌لرينه، بئله بير ديرلي و قيمت‌لي ارمغان گتيرميشدي. كندلي‌لر بير بولاق كيمي آخان و دايما اونلارين اودالارينـي و داخماجيقلارينـي ايشيقلانديران و ايسيندير‌ن بو نور يـيغـينـيندان چوخ سئوينديلر و شادليق ائتديلر.او زاماندان خالقـين آراسيندا بو افسانه آغـيزدان- آغـيزا، سينه‌دن- سينه‌يه گزير و بو كندين اهالي‌سي گئجه- گوندوزون باشلانماسينـي او زاماندان حساب ائدير و بو يئتيم اوشاغـين آدي خالق قهرمانـي كيمي ديللرده دولاشير.