اؤلوم تيتولو

بولگه لر سرويسي: قبريستانليقدا ازدحامدير. اؤلونو مزارا تاپشيرماغا ييغيشيبلار. اؤله‌نين کيم اولدوغونو بيلميرم، آنجاق اينسانلارين آخينيندان بللي‌دير، اؤلن تانينميش آدام‌دير. آرادا دوست-تانيشلاريمي گؤرورم. ياخينلاشيب، سالاملاشيرام. سايمازيانا مندن اؤتوشورلر. گول چلنگلري مزارليقدا اولان سکي‌نين اؤن يئرينده گؤز اوخشايير. »نه گؤزل چلنگلردير…«

ائليار پولاد

بولگه لر سرويسي: قبريستانليقدا ازدحامدير. اؤلونو مزارا تاپشيرماغا ييغيشيبلار. اؤله‌نين کيم اولدوغونو بيلميرم، آنجاق اينسانلارين آخينيندان بللي‌دير، اؤلن تانينميش آدام‌دير. آرادا دوست-تانيشلاريمي گؤرورم. ياخينلاشيب، سالاملاشيرام. سايمازيانا مندن اؤتوشورلر. گول چلنگلري مزارليقدا اولان سکي‌نين اؤن يئرينده گؤز اوخشايير. »نه گؤزل چلنگلردير…«
قادينلارين احاطه‌سينده، آرواديمي و باجيلاريمي گؤرورم.»اونلارين بورادا نه ايشي؟« ياد قادينلارين احاطه‌سينده اولدوقلاري اوچون اونلارا ياخينلاشميرام. بوتون جاماعات آياق اوسته دير. ايکي-اوچ، اوچ-دؤرد صحبتله‌شيرلر. »يقين اؤلن ايمکانلي و وارلي آدام اولوب، هله گؤر گول چلنگلرينه نقدر پول وئريليب…«.
نئچه جاوان سکي‌نين اوستوندن آشاغي-يوخاري حرکت ائديرلر. سکي‌نين اورتاسينا دانيشيق ماساسي و ماسانين اوستونه قرنفيل بوکئتي و ميکروفون قويورلار. سس آرتيران جهازلاري دا دانيشيق ماساسيندان ايکي آدديم کناردا، ساغ و سول طرفده يئرلشديريرلر. »يوخ!.. اؤلن هر کيمسه، تانينميش و قابليتلي اينسان اولوب! من نييه بو آدامي تانيماميشام. من نئجه بورا گلميشم؟ اؤله‌نين کيم اولدوغونو بيلميرمسه، منيم بورادا نه ايشيم؟«
اطرافا بويلانيرام. آرا-بير گلنلر ده وار. »اودور با منيم دوستوم…« دوستلاريم چوخ اولوب، آنجاق منه صاديق قالان و آرخا دوران بيريسي، او اولوب. اجتماعي يئرلره و ادبي ييغينجاقلارا بير يئرده گئتميشيک. توي-نيشان و ياس مراسيملرينده بير يئرده اولموشوق. »بس ايندي مندن خبرسيز نييه بورادادير… اوندان سوروشوم. يقين اؤله‌نين کيم اولدوغونو منه دئير…« اونا ياخينلاشيرام. ائله‌بيل مني گؤرمور. اورتاق دوستلاريميزلا مباحثه‌ده‌دير. کئچيب آرخادان چيينلرينه توخونورام. اللريمين تماسيني دويمور. قولوندان ياپيشيرام. بارماقلاريم هاواني ايچينه آلير. »بو نئجه اولان ايشدير…« وار گوجومله چيغيريرام: »بو منم!.. نييه مني سايميرسان؟ هر يئره بير يئرده گئتميشيک، منه نييه خبر ائله‌مه‌ميسن؟!.«سانکي سسيمي ائشيتمير. منه طرف هئچ گؤز اوجو ايله ده باخمير. دوستلارلا شيرين صحبت ائدير. اونونلا صحبت ائدنلرده مني سايميرلار. »دلي اولماغيما آز قاليب.«
کناردان ازدحامين اورتاسينا، سکي ايله اوز به اوز اوتوراجاقلار گتيريرلر. اوجا بوي، اورتا ياشلي بير کيشي آراليقي بوشالتماغا سسله‌يير:
– خانيملار و جنابلار… لطفن آراني بوشالدين. اجازه وئرين اوشاقلار ايشلريني راحات گؤرسونلر.
دقتله اوتوراجاقلاري سيرايا دوزورلر. هارداسا ايکي يوز، بلکه ده اوچ يوزه ياخين اوتوراجاق، ايکي سيرا و هر سيرا دا آلتي اوتوراجاق قويورلار. امللي-باشلي آچيق هاوادا زال يارانير. اورتا ياشلي يئني دن جاماعاتا مراجعت ائدير:
– خانيملار و جنابلار… بويورون اوتوراجاقلاردا ايلشين…
اينسانلار اوتوراجاقلارا ياخينلاشيب و يئرلريني توتورلار. گلنلرين سايي اوتوراجاقلاردان قات-قات آرتيق اولدوغوندان کناردا آياق اوسته دورماق مجبوريتينده اولورلار. مني سايان يوخدور. ائله‌بيل هئچ بورادا يوخام. اؤزوندن کوسن اينسانا تاي بير چينار آغاجي‌نين گؤوده‌سينه سؤيکه‌نيب، کناردان مراسيمي ايزله‌مه‌يه باشلاييرام.
همن او اورتا ياشلي کيشي، تريبون آرخاسينا کئچيب، ميکروفون داليندان مراجعت ائدير:
– خانيملار و جنابلار… بو آندان تدبيري آچيق اعلان ائديرم. حؤرمتلي رسّاميميز جناب »ب«دان خواهيش ائديرم، پورترئتي گتيريب، زالا قويسون.
جناب »ب« جاماعاتي يارا-يارا پيلله‌لردن سکي‌يه قالخير و اللريني باغرينا باساراق جاماعاتا باش اَيير. ايکي جاوان اوغلان، اوستو قيرميزي مخمر پارچاسي ايلا اؤرتولموش پورترئتين ايکي طرفيندن توتاراق اونون آرخاسينجا سکي‌يه قالخيب و پورترئتي تريبون ماساسي‌نين اؤنونه، اينسانلار اوتوران سمته، گول چلنگلري‌نين اورتاسينا قويورلار. اورتا ياشلي ميکروفون آرخاسيندان:
– دوستلار… زحمت چکيب گلديينيز اوچون، هامينيزا تشکر ائديرم. خواهيش ائديرم، آلقيش و ال چالماقدان امتناع ائتمکله اولدوغوموز يئرين حؤرمتيني ساخلاياق و تدبيريميزين گئديشاتينا شرايط ياراداق. بورادان هامينيزدان تشکر ائديب و پورترئتين اؤرتويونون گؤتورولمه‌سيني ايسترديم.
يئني-يئتمه بير اوغلان، اؤنجه‌دن اؤيرديلميش بير اوصوللا، زالا باش اَيه‌رک و متانتله اؤرتويو پورترئتين اوزريندن گؤتوروب، سکي‌دن ائنيب، جاماعاتين ايچينده گؤزدن ايتير. آلقيش صداسي اطرافا ياييلير. اورتاياشلي تريبون آرخاسيندان:
– خواهيش ائديرم، اولدوغوموز يئرين هارا اولدوغونو اونوتمايين….
«… آهوو… بو منيم شکيليم‌دير… گؤر نه گؤزل ايشله‌نيب! بلکه مندن خبرسيز منه يوبلئي توتوبلار. مني سورپرايز ائتمک ايسته‌ييرلرميش… آنجاق بس بورادا نييه؟ شهرده زال يوخ ايدي؟!.»
– دوستلار… بو گون بورادا اولانلارلا برابر بوتون اؤلکه ياس ايچينده‌دير. من بو مجليس ده اولانلار طرفيندن بوتون اؤلکه‌يه باش ساغليغي وئره‌رک، مرحومون عائله‌سينه تسليت دئييرم.
» آي داد… ائله‌بيل اؤلن من ايميشم. من اؤلموشمسه، بس نه اوچون بورادايام. ايندي گرگ من کفنده، قبير ايچينده اولارديم«
تريبون آرخاسيندا اولان، اطرافا گؤز گزديررک:
– دوستلار… بو ضايعه هاميميزي کدرلنديريب، عموميتله مدني حياتيميزي غم و کدره سوروکله‌ييب، اونو ايتيرديکده بير اينسان يوخ، کيمليک، دوشونجه و معارفچيلييميزي ايتيرميشيک. بلکه نئچه ايلده ياشاسايدي، اونون اثرلري و يازيلاري، جاوان يازار و اديبلره يول گؤسترجيسي اولاردي، اونوتماياق کي بو گونوموزه قدر اونون يارارلي اثرلري، ادبيات و معارفيمزده ايللرله گوندمده اولان اثرلر سيراسيندا يئر توتاجاق. دوستلار… اجازه‌نيزله مرحومون ياخين دوستو، عؤمور بويو اونون اثرلري‌نين ايلک اوخوجوسو و مرحومون ادبي اثرلريني ياراتماغا امکان يارادان جناب فلانکسي تريبون آرخاسينا دعوت ائديرم. تريبون آرخاسينا گلنلردن خواهيش ائديرم واختين آزليغيني نظره آلاراق قيسا و ييغجام شکيلده اورک سؤزلريني پايلاشسينلار. بويورون…
ازدحامدا سکوت ياراندي. بوتون اورادا اولانلارين باخيشي سکي‌يه ديکيلدي. قالين بوغلو بيريسي کناردان سکي‌يه طرف آديملاييب، پلله‌لري قالخاراق، بوغونو سيغاللاييب، ايره‌لي‌له‌دي. تريبون آرخاسيندا يئر توتدوقدان سونرا ميکروفونا طرف اَييلرک:
– بوتون بورادا اولانلارا، مرحومون ياخين دوست و قوهوم-اقره‌بالارينا باش ساغليغي وئريب، تسليت دئييرم. بؤيوک بير وارليغي الدن وئردييميز اوچون هاميميز ماتم ايچينده‌ييک. مرحومون ياخين دوست و يولداشي اولدوغوم اوچون هميشه اونونلا فخر دويموشام. اونون روحونون قارشيسيندا باش اَيَرک، بوتون ملّتميزه تسليت دئييرم. اونون اثرلري آرتيق سرحدلردن کناردا، قونشو اؤلکه‌لرده ياييليب و اوخوجو رغبتيني منيمسه‌ييب، ادبي مسابقه‌لرده اودول قازانميشدير. او هميشه ملّتي اوچون ياشاييب و ياراتدي. ايندي آراميزدان کؤچسه‌ده، اثرلري هميشه بيزيمله اولوب و گنج ادبياتچي‌لاريميزين ماراق دايره‌سينده اولاجاق. او، اؤلمزدير… دنيا وارديرسا، او دا اثرلري ايله ياشاياجاق… روحو شاد و يولو داواملي اولسون. –دئييب، تريبونو ترک ائتدي.»آهوو… بو کي، منيم ياريلاريمي پيسله‌ييب، اونون-بونون يازيلاريندان گؤتوروب، اثر آدي ايلا جاماعاتا سيريير. –دئييردي. نئجه اولدو بير گئجه‌ده بو قدر فيکريندن دؤندو…« سکي‌دن دوشر-دوشمز اونا ياخينلاشيرام: » اَيه سن نه آغ گؤز آدامسان؟ دونه‌نه کيمي مني تخريب ائديردين، منيم يازيلاريمي اوغورلوق حسابلاييردين، نه اولدو، بيردن-بيره منيم يازيلاريمي مؤهورله‌ييب، اونلاري اثر آدلانديريرسان؟« ائله‌بيل سسمي ائشيتمير، مني گؤرمور. سايمازيانا مندن اوزاقلاشيب، کناردا توپلاشان بير دسته‌يه طرف گئدير.
آرا-بير اينسانلاردان قالخير و تريبون آرخاسيندا، او کي وار مندن تعريفله‌ييب، خوش سؤزلر و شعرلر سؤيله‌ييرلر. حتي سازلا ماهني اوخوياندا اولدو. سوندا ساريشين بير خانيم تريبون آرخاسينا کئچدي. عمللي-باشلي اوز-گؤزونه يئتيشيب، تاخديغي صنعي کيپريکلري کناردان هر کس‌ده ماراق اوياديردي. ال تلفونوندان دنيانين وفاسيزليغي حاقدا شعريني اوخويوب، آشاغي ائندي.
بو زامان اؤزومده بيلمه‌دن آرواديمين يانيندا دايانميشديم. آرواديم اوز-گؤزونو تورشوداراق، »گورباگور!.. ايندي بيلديم گئجه‌لر صبحه‌ کيمي کيمينله تلفوندا يازيشيردين. هله آرادا گئجه‌لرده سحره ياخين گلردين. بونلارين هاميسي بو عفريته ايله باغلي ايميش« دوداق‌آلتي ميزيلدانيردي.
اؤزومو ساخلايا بيلميرم:» آي آرواد!.. والله-بالله… من بو قاديني تانيميرام. سنين ده الينه ياخشي فورصت دوشدو. بهتان وورماغا، دليل-ثبوت کيمي بو قاديني منيم گؤزومه سوخما!.. من نه بيليم بو کيمدير. بلکه‌ده او مني تانيير، آنجاق من اونو هئچ واخت-هئچ يئرده خاطيرلاميرام. انصافين اولسون نه‌قدر شر-بهتان وورسان دوزرم، آنجاق بونا يوخ!!! اينان کي من بونو تانيميرام…«
****
پنجره‌دن اوتاغا آغيمسوو ايشيق دوشور. اطرافي دينشه‌ديکدن، ياتاقدا اولدوغومو آنلاديم. مطبخه گئديب، بير استکان سو ايچديم. پنجره‌ني آچيب، سيگارت يانديرديم. مطبخين پنجره‌سينده اولدوزلار سايريشيردي. دان يئري سؤکولوردو… اؤلمک ايسته‌ييرديم…

منبع :