بولگه لر سرويسي:»اوزسوزلوخدي آدؤهتور. دوز بير آيدي بيزيم ائودن ائله قان گئدير، آدام دئيير بس بطنينده باش کسيبلر.« ائلات خانيمين أري سؤيله‌دي. اؤز- اؤزومه دئديم: »بوُيور..! ائودن قان گئدير! آخي نييه بَه سني آيري ناخوش‌نان بيرگه ايچري گؤندرنده لال اولدون؟ نييه بَه هميشه‌‌کي کيمي اعتراض ائله‌مه‌دين؟!«بعضي مطب‌لرده ناخوشلاري جوت- جوت، يا اوچ- اوچ ايچري گؤندرمک دَب اولوب. من هميشه بونا اعتراض ائله‌ينلرين بيري اولموشام. آمما بويون بير ائلات قاديني و اونون أريله بيرليکده ماينا اوتاغينا گؤندريلنده، ندنسه ديليم قيفيللاندي. بهداشت وزارتخاناسينين اعلانينا گؤره هر ناخوشون 20 دقيقه ويزيت حاقّي هله کناردا قالسين، ناخوشون اينساني حاقلاريني بئله تکلي- ديبلي اونوتدوم. ناخوشلوق مگر هر اينسان بدنينين اؤزل سيرّي دئييل؟ اؤزوم ده بيلمه‌ديم نييه قويون کيمي باشيمي آشاغي ساليب، اوْ أر-آروادين داليسيجا ايچري گيرديم. – »نئچه ياشي وار؟ دؤکتور سوروشدو.– سيجيلليده قيرخ بئشدي.دئمک منيمله ياشيددي!، اوره‌ييمده دئديم. اوتوردوغوم صندلدن ياناکي چؤنوب، قادينا باخديم. قادينين ياشماق آلتيندان گؤرونن چؤهره‌سينده يالنيز خوش‌تراش بورنو، آلما کيمي ياناقلاري، بير ده گؤزونون ايسلاق آغيندا بير جوت شَوه کيمي قاپ‌قارا شار گؤرونوردو.يقين حوضوردن دوشه‌جک، دؤکتور دئدي.–هه آدؤهتور، ائويميز دئيير ائله قان گئدير کي، ائله بيل قويون باشي کسيبلر اوره‌ييمده دئديم:هئش گؤر او چيراق کيمي يانان ياناقلارا ياراشير!؟قادين ياشماغيني دوداغي اوسته برکيديب، گؤزونو يئره زيلله‌دي. دؤکتور دئدي: «دئنه جنگ مغلوبه‌دي داااا اوره‌ييمده دئديم:لاپ منيم کيمي!کيشي دئدي: آي دئدين ها..! يورولوب يورقان- دؤشک يوماخدان. چؤل يئرينده اؤزو ده جانا گليب. دئييرم آخي بير بئله قان بو آروادين جورو جانينين هاراسيندان سوزور باااا کيشي بير باشا دانيشيردي. دؤکتور ساعاتينا باخيب، قاشلاريني ييغيب، دئدي:– کيشي سن بير ديلمانجليغي بوراخ، مجال وئر اؤزو اؤز درديني دئسين، من ده گؤروم چاره‌سي ندي؟ مگر يوز ايل قاباقدي، آرواد ديليني قيسيب، باخسين!»کيشي دئدي: بيزيم ائل- اوبادا عادت بئله‌دي داينا..! جاوانلار ده‌ييشيلير، آمما بيزي داي ده‌ييشمک اولماز.دؤکتور اوزونو صندل اوسته اوتورموش قادينا توتوب، سوروشدو:باجي اؤزون بير دئه گؤرم نئچه واختدي قان گئدير؟ آخير دفه نه واخت آي‌باشي اولموسان؟قادين گئنه ياشماغيني برکيديب، أرينه باخدي. أري ايسه باشيني ترپه‌ديب اشاره ائتدي کي دئسين.اوزسوزلوخدو قاغا، چوخداندي بئله‌يم. ايندي باش‌گيجللنمه‌سي داي مجال وئرمير قويونلاري ساغيم.قادين أليني تپه‌سينه قويوب آرتيردي:نه واختي ائله بيل تپه‌مه بوُز قويوبلار.قانسيزلاميسان دااا دؤکتور دئدي.اوزسوزلوخدو. نه واختي آي‌باشيدان کسيلميرم. کسيليرم ها، بئش گون باشيمي يوواندان سورا گئنه ده آي‌باشي اولورام.آز قالدي قادينين سؤزونون آراسينا آتيليب، دئييم: لاپ منيم کيمي!دؤکتور سوروشدو: لاختا- لاختا قان گئدير؟اوزسوزلوخدي، بير ايکي گون اوّلده ائله بيل قوش اوزومونون گيله‌لريدي گيله- گيله قوپوب، دسمالا تؤکولور. ايکي گون سورا گيله‌لر لاختالانير«اوره‌ييمده دئديم:لاپ منيم کيمي، يقين اونون دا ميوم عاريضه‌سي وار.آمما قادينسل عاريضه‌لريميزين علامت‌لرينين اوخشارليغي بير يانا، ائلات قادينين شاعيرانه وصف ائتمه‌سينه کئف ائله‌ديم. مين ايل ده قالسايديم، ميوم عاريضه‌سيني بئله شاعيرانه توصيف ائده بيلمزديم. قادينسل عاريضه‌ني بو گؤزلليکده تمثيل ائتمک اؤزو بؤيوک بير هنردي.قادين آرتيردي:– ها گؤزله کي قورتولسون. باشيمي يويوب، بو آي‌باشيدان او بيري آي باشينا هفته چه‌مير، گئنه باشلانير. مه‌ير قورتولماخ بيلير؟! اوزسوزلوخدي، سفري‌لريمين هئش بيرينده بئله قان گئتمه‌ميشدي. دئييرلر ساراطان توتموسان.آرواد سؤزونو قورتارماقدا، ياش گيله‌لري گؤزوندن دامجيلادي. بير آن نظريمه گلدي قادينين گؤزوندن دامجيلايان گيله‌لر قوش اوزومونون کال گيله‌لري‌دير.دؤکتور دئدي:قورخما، سرطان دئييل، حوضوردن دوشوسن. يازيم گئت سونوگرافي ائله‌سينلر، جوابيني گتيرنده داوا يازارام.قادين أرينين آرخاسيجا قاپيدان چيخاندا، کئچيب اونون قالخديغي صندلده اوتوردوم. دؤکتور بيمه دفترچه‌مي آچيب، خودکاري آچيق صفحه‌نين اوستونه قويوب، سوروشدو: سيزين موشکولوز ندي؟دئديم: قوش اوزومونون گيله‌لري..!
بولگه لر سرويسي:»اوزسوزلوخدي آدؤهتور. دوز بير آيدي بيزيم ائودن ائله قان گئدير، آدام دئيير بس بطنينده باش کسيبلر.« ائلات خانيمين أري سؤيله‌دي.