بولگه لر سرويسي:قوناقليق مجلسينده اوتورموشام بيرده گؤردوم نه جاندا بيري؛ قد قواره ؛ هئيکل ده منيم هئچ اولماسا اوچ برابريم قول قاناد آچميش؛ منه ساري گلير. مات- مات ائله باخيرام اونون لاخلايا- لاخلايا گليشينه؛ بيردن سونامي‌کيمين بير شئي بورودو جانيمي. گؤزونوزدن ايراق پرس اولموشام؛ نفسيم چيخمير.بير ايکي ديقادان سونرا چکيلدي؛ بوغولموش من؛ اوره‌کدن بير اکسيژن آلديم. اوندان گوببولتويله اؤزون سالدي منيم اؤنومده کي صندلين اوستونه؛ ائله کي دئديم ايندي سينار صندل. – ويييي افروز خانيم نئيه مات- مات باخيرسان؛ تانيمادين؟!– يوخ مگر قراريدي سيزي تانييام؟!– حقين واردااا. بؤيوبسن. ائشيتميشم بؤيوک يازارلا زادلا داها اوتوروب دورورسان، داي بيزي بينمزسن کي.– باخين موضوع بينمک يوخسا بينمه‌مک دئييل. ائله دوغرودان تانيماديم.– مگر سن رحمتليک زينت خانيمين قيزي دئييلسنمي، اصل‌لريده تبريزدن بيزيم شهره کؤچموش؟( خئيره بو دئيه سن منيم آبا و اجداديمي‌کؤکدن تانيير)– نئيه اؤزومم – ياخچي منيم خالام اري سنين بي‌بي‌نين قيزينين نتيجه‌سينين نوه‌سيدير. باخما ايندي گئت- گل يوخدو؛ اؤزگه اولموشيق.– دوغرودان بوندان ياخين فامئلليق اولماز. ائله لاپ آرازدان گئچنده مختصر گ..گ دئيميشيک. گولمگيمي‌ده زورلا اوددوم.– ياخشي اينديکي تانيدين غرض مزاحيمليکدن، منيم بو خالام اري انتخاباتا شرکت ائده‌جک، بودا کارتي. بونون تبليغ مجلسلرينه گل؛ دانيش؛ شعر اوخو؛ اليندن گلن.بونودا دئييم خالام ارينين دونيا ماليندا زاددا گؤزو يوخ‌هااا.اونون غرضي يالنيز خيدمتدير. يوخسا اؤزو ديپلمات‌دير؛ ايل اونيکي آي آمريکادا؛ آوروپادا گزير.قالديم نه دئييم؛ دوزو ايللردير بو تووبازلار هر دؤرد ايلدن بير گليب بيز يازيغ يازارلارين جيريغ ياخاسين تاپيرلار. منه شعر اوخو. منه سخنراني ائله. سنده اوزدن اوتانيب گئديرسن بير چاققال باشين ائله شير باشينا اوخشاديرسان اؤزوده عجب ده قالير ياللعجب من کيميميشم اؤزوم بيلميرميشم. داي دئمير شاعيرين ايشي اغراقدير و قلمينين قدرتين اوزه چکير. اؤزوده کي اونلار شعر يا هونري اثر دئييللر؛ شعارديلار و شاعيره يالنيز وقت تلف ائله‌مک. هله درد بوردادير انتخاباتدا چيخالار يا چيخمايالار؛ رأي گونونون دوز صاباحيسي بئله ايليم- ايليم ايتيرلر ايينه ساماندا ايتن کيمين. هئچ آدامي‌سانکي تانيميرلاردا.ائله بيل همن بلدييه‌لرين آلنين؛ فهله‌لرين الين آياقين اؤپن دئييللر. بلي بونلارين‌هاميسي دئمه نمايش‌دير يازيغ کوتله‌نين رأيين ييغماغا.نه چوخ قوزولار؛ نه چوخ تويوغ- جوجه‌لر بو يوللاردا ناکام اولور. نه چوخ دوگو تليسلري بوشالير و نه چوخ منيم کيمين قويونلار يئنه قوردلارا آلدانير. آمما بو دؤنه آييلميشام بو قوردلارين هئچ بيرينين فئلينه اويو‌ميياجاغام.– فيکره گئتدين افروز خانيم؟لاپدان اؤزومه گلديم.– من بو دؤنه هئچ کيمسه‌ني تبليغ ائتمييه‌جم، بير رأي واريم اونودا يا وئره‌جم يا وئرمييه‌جم.بو دؤنه او مات- مات منه باخدي.– کي بئله. چوخ اؤزونو توتورسان افروز خانيم!– سيز بئله فرض ائدين؛ گئدين داها بوندان سونرا وئرديگيز روزوني دا؛ مندن کسين لوطفن.– دئميشديلر خبيث آدامسان اه…اه حيرصلي صندليدن قالخدي سويو سوزولموش، مندن اوزاقلاشدي. قوي جهنم اولسون‌هاراي بو باشدان من ده خلقين موفته حامبال نؤکري دئييلم کي آخي. يورولدوم موفته‌سينه اونا بونا جان آتماقدان.هله يولدادا گلنده ماجراني حيات يولداشيما دئديم. باشين تولاييب دئدي:-افروز ياديندادي آداخلي اولاندا سنه نه وعده‌لر وئريرديم اؤزومو شيرين سالماغا؟ زيارت؛ خاريجه سفري؛ بوللو سوللو قيزيل؛ کيتابينين چاپي و….و….-يئنه ياراما دوز سپدين کي؛ نئجه؟!– هئچ؛ بو فئلباز؛ کانديدلرينده وعده‌لري بيزه؛ منيم آداخليقداکي وعده‌لريمه اوخشايير. نامزد نامزددير نه فرق ائدير. رنگلي بزکلي، آمما يالان و ايچي بوش وعده‌لر
قوناقليق مجلسينده اوتورموشام بيرده گؤردوم نه جاندا بيري؛ قد قواره ؛ هئيکل ده منيم هئچ اولماسا اوچ برابريم قول قاناد آچميش؛ منه ساري گلير.