قولپلي پوللار

بولگه لر سرويسي:جيليتقادان پول کسيب خرجله‌مک، چوخ آغير گلردي. نادر حالدا اوز وئرردي. نئجه دئيرلر، پيجاق سومويه داياناندا، قيز اوشاغي‌نين يا ائو قاديني‌نين ثروتينه ال اوزاتماق، کاسيب کتدي کيشي‌يه چوخ چتين، هم ده اوتانديريجي اولاردي.بونودا دئمه‌لييم کي، پوللو جيليتقا، تکي کاسيب قادينلارا، قيزلارا مخصوص دئييلدي. ارباب يا خان قيزلاري دا او جيليتقادان گئيرديلر.

بولگه لر سرويسي:جيليتقادان پول کسيب خرجله‌مک، چوخ آغير گلردي. نادر حالدا اوز وئرردي. نئجه دئيرلر، پيجاق سومويه داياناندا، قيز اوشاغي‌نين يا ائو قاديني‌نين ثروتينه ال اوزاتماق، کاسيب کتدي کيشي‌يه چوخ چتين، هم ده اوتانديريجي اولاردي.بونودا دئمه‌لييم کي، پوللو جيليتقا، تکي کاسيب قادينلارا، قيزلارا مخصوص دئييلدي. ارباب يا خان قيزلاري دا او جيليتقادان گئيرديلر.

آنجاق اولارين جيليتقاسي ان قيمتلي رايج سکّه، بعضاًده بير ايکي دنه گوموش يا حتي قيزيل پهلوي سکّه‌سي ايله بزه‌نردي.»حبيب« معلليم قولپلي پوللاري ساغ اووجونا تؤکوب، بير کؤکس اؤتوردو. دئدي: »فلانکس سن اؤزون او گونلري گؤرموشدون. تحصيل ايلي بيتنده، کند اوشاقلاري‌نين کارنامه‌سين وئرن زامان، جوجه‌دن تويوق‌دان گتيريب معلليمه وئررديلر. من نه قدرده امتناع ائله‌سئيديم، اولار قبول ائتمزديلر. من او کتدن گئدن زامان، بو پوللاري گؤزومون اؤنونده، »افروز خانيم« قيزي‌نين جيليتقاسيندان کسيب منه وئردي. »بولاري بيزدن يادگار ساخلا معلليم« اونون حزين سسله ديليندن ائشيتديگيم سون سؤزلري ايدي. اؤتن ايل اؤلوم خبرين ائشيتديم. چوخ کدرلنديم. مچيدينه گئتديم. اَري، »قوربانعلي« کيشي بوينومو قوجاخلادي. آغلييا-آغلييا دئدي: »آلله سنه انصاف وئرسين معلليم. افروز بو سون گونلر، اؤله‌نه‌جن سندن دانيشيردي. دئييردي يقين کي حبيب معلليم منيم ناخوشلوغومدان خبرسيزدي. خبري اولسايدي مطلق گلردي.«بللي دير کي »حبيب فرشباف«، جوان ياشيندان هانسي کنده بير معلليم کيمي قدم قويوب، خالقين اعتمادين، درين حؤرمتين قازانيب. شاگردلردن علاوه، آتا آنالاري دا اونون عزيز خاطيره‌سين عؤمورلوک يادداشلاريندا ياشاديرلار.پوللاري اووجوما تؤکوب، اوزون دؤندردي کي گويا چاي گتيرمک اوچون گئدير. آرخادان دا، اونون کؤوره‌ک اوره‌ييندن کئچنلري آنلاماق چتين دئييلدي.قولپلي پوللار مني دوز 23 ايل اوّله آپاردي. »شوجيلي« کندينده شاعر »ستار گول محمدي«5 ايله بير بايرام گئجه‌سي‌نين گؤروشونه. »ستار« اؤزو او گئجه 48 – 49 نجي ايللردن بير خاطيره سؤيله‌دي:»آيلي ايشيقلي بير ياي گئجه‌سيدي. گون اوزونو پامبيق سوواريب حسابي يورولموشدوم. بيليرسن دا! بو اَت تورپاقلارين درين تراختور شوخومون سووارماق نئجه چتين اولار. شام يئييب، ايواندا باغلامييا سؤيکه‌نيب، چاي ايچيرديم. بيردن ايت هوردي. دوردوم گئتديم سس گلن طرفه. گؤردوم ايکي نفر ايتين هورمه‌سينه لاقيد، صؤحبت ائليه- ائليه ياخينلاشيرلار. اوجا بويوندان، دولو هئيکليندن، »بهمن«6ي آي ايشيغيندا در حال تانيديم. هاما يانينداکي آريغ اوغلاني هئچ بير تانيشا اوخشادا بيلمه‌ديم. قوناخلاري قارشيلاديم. حال- احوالدان سورا، »بهمن« مني دوستو ايله تانيش ائله‌دي. -»آدي حبيب فرشباف دي. آز گؤردوغون ناز اوغلانلارداندي. بو ياخين کندلرده معلليمدي.« »حبيب« قيز کيمي حيالي، آز دانيشان، چوخ متين بير اوغلان ايدي. بو گؤزل قوناخلاري گؤزلريم دولو گؤروم دئيه، گئديب»مشهدي عوض«گيلين تور چيراغين آليب گتيرديم. اوندا بيزيم کتده، تکجه »مشهدي عوض«7ين تور چراغي واريدي. تزه‌دن سيماواري آليشديرديم. بوتون يورقونلوغوم او گئجه‌نين شيرين صؤحبتلري ايچينده ايتدي. »بهمن« دئدي: »حبيب« هم ده گؤزل شاعردي. »حبيب« اوتانا- اوتانا بير ايکي شعر اوخودي. »حبيب«ين قولپلي پوللار آدلي گؤزل بيرشعري وار. آنجاق ياديمدا دئييل کي قولپلي پوللاري او گئجه اوخودي يا سورالار ائشيتديم…«شاعر »ستار«، قولپلي پوللاردان يادداشيندا قالان نئچه مصراعني اوخودو. يامانجا اوره‌ييمه ياتدي. او نئچه مصراعدا، اعجازلي شاعرانه تشبيه‌لر، حيس‌لر، ايدراکيمي احاطه ائله‌ميشدي. گؤرمزه تانيمازا، »حبيب فرشباف« ين محبتي کؤنلومه هوپدو. او شعرين کاميلين تاپماقدا، بير آرزويا چئوريلدي. سورالار تهراندا اونون باشقا بير شعري اليمه چاتدي. »حبيب فرشباف« خط واحد اتوبوسوندا قيز گؤروشوندن گلن ايکي قادين‌ين دانشيغين ائشيديب، او گؤزل شعري يازميشدي.ائلچي ليکدن قاييديردي ايکي قادين/گؤردوکلري قيزجيغازين سئوميشديلر هر بير زادين…من نئچه توي مجليسينده او شعري اوخويوب، گور آلقيشلارلا تشويق اولموشدوم. سورالار بيلديم کي ماي بايرامي آدلي ايشچي‌لر گونو مناسبتينه يازيلان او قودرتلي شعر ده، »حبيب فرشباف« ين شعري ايميش. ايلک دفعه او شعري رحمتليک «عاشيق حسين اسدي»8دن ائشيتميشديم. ساز سينه‌سينده »کرم کؤچدي«هاواسي چالا- چالا گؤزل ديکلمه ائله‌دي.ايللر کئچدي، موبايل آلا بيلديم. وبلاگ‌لار، سايت‌لار، باشقا مجازي فضالار ياراندي. اونون يازيلارين اوخويوب حظ آلارديم. آنجاق اؤزون ايلک دفعه، تهرانپارس‌دا بير ادبي انجمنده گؤردوم. »رحيم زماني«9 بيزي تانيش ائله‌دي. خواهيش ائله‌ديم اوردان بيرباشا بيزه گئدک. گوزل بير گئجه اولدي. »خودو « آدلي خاطيره‌سي ن،الينده کي مجلله دن اوخودو. »مراد«ين سازي دا او گئجه‌ميزي آرتيق ساز ائله‌دي. »حبيب« معلليمي، اوزون ايللر حسرتيندن سورا تاپديمسا دا، اوز اوزه گؤروشوموز بو سون ايللره قده‌ر اوزاندي. مختلف ان.جي.او لاردا، خئيريه ايشلرده، ادبي ساحه‌لرده يورولمادان چاليشماسي، بير سؤزله چوخلارينا گره‌ک اولماسي، اونو ال چاتماز ائله‌ميشدي. هر گؤروشده اوندان خواهيش ائلرديم کي قولپلي پوللاري منه اوخوسون. »والله هئچ بيلميرم هاردادي او شعر«، دئيردي. من ده مناسيب زامان، او شعر تاپيلان چاغ عشقينه انتظار چکرديم.اووجومداکي قولپلي پوللاري اؤزونه قايتاريب، تاکيدله خواهيش ائله‌ديم هاراني آختارير آختارسين، »قولپلي پوللار« شعريني تاپيب منه وئرسين. نهايت کي بو گون زنگ ائله‌ييب دئدي: »کيتابي هله کي تاپيلماييب. آنجاق يازيسين منه تلگرام ائله‌ييبلر. بوردا آنتن اولمادان تلگراملا ايشله‌مک مومکون دئييل. آنتن خط وئرن کيمي سنه تلگرام ائله‌رم.«آخير کي 23 ايل آختارديغيم قولپلي پوللارا چاتديم. 1348نجي ايلين مردادآيي‌نين ايکيسي شعرين اياغيندا يازيلان تاريخدي.  سون

منبع :