قولپلي پوللار

بولگه لر سرويسي:ياي گونو، ايکيندي چاغي ايدي. نئجه دئيرلر، سانکي گؤيدن اود ياغيردي. ائله کي کولر ده يئترينجه ائوي سرينلده بيلميردي.

علي تقي‌زاده لاريجان

بيرنجي بولوم

 بولگه لر سرويسي:ياي گونو، ايکيندي چاغي ايدي. نئجه دئيرلر، سانکي گؤيدن اود ياغيردي. ائله کي کولر ده يئترينجه ائوي سرينلده بيلميردي.

موبايليم زنگ چالدي. آدين گؤرنده سئوينديم؛ عينيم آچيلدي؛ سالاملاشديق. بيربيريميزين احوالين، هم ده کرونا آزاريلا نئجه داورانماغيميزي سوروشدوق. دئدي: «ائله بو ويروسون اليندن مني قاچيرماق اوچون، مصلحت بيلديلر تهراندان چيخام، سيزين ياخينليغيزا گلم.» چوخ سئوينديم. بيليرديم کي بيزدن 20 کيلومتر مسافه ده کي شهرکده بير آپارتماني وار. درحال بو مصراع ياديما دوشدو:»عدو شود سبب خير اگر…« فيکرلشديم کي يئر اوزونده اؤلومجول ويروسدان خئير قازانان نادر انسانلاردانام. البته کي منيم قازانجيم آمازون يا گوگل کيمي شيرکت‌لرين مادي قازانجيندان تام فرقلي اولان، معنوي قازانج ايدي. بير شريف انساني، بير عزيز دوستو تئز – تئز گؤرمک امکانيم يارانيردي. او گونون صاباحينا گؤروش قراري قويدوق. دئدي: »دويو ايسلاديب، باليق دا قاتيغا ياتيرداجام.»معصومه خانيم« فقط بيشيرمک زحمتين چکر. سيز هئچ نه گتيرمه‌يين!» سون جومله‌ني نئچه دفعه تکرار ائله‌دي. چوخدانيدي اوز- اوزه گؤروش ايمکاني اولماميشدي. سون گؤ روشوموزدن بير ايله ياخين زامان کئچميشدي. اونو،بيلدير ياي »از کرانه‌هاي ارس« آدلي شکيل سرگيسينده قوجاقلاديغيم، سانکي چوخ اوزاقدا قالميشدي. بئش آي اوندان سونرادا بو کرونا پاندوميسي اؤلکه‌ميزه يول آچيب، هره‌ني اؤز داخماسيندا محبوس ائله‌ميشدي.
سحرينه، ايکيندي چاغي يولا دوشدوک. ياي گونونون هنيرتيسي اوزو قارسيردي. ايکي دفعه زنگ ائله‌ييب، سرراست يولو، هاردان هارا دؤنمه‌يي، خاطيرلاتميشدي. بيز يولو آزماياق دئيه، اوزون مسافه ده ائودن آرالانيب قارشيلاماغا گلميشدي. باشيندا بير گوننوکلي پاپاخ، آرتيق ساغ الينده، گوننويينه سايه‌بان ائدن کيمي، خياوانين قيراغيندا آريق بير کيشي، ايستي‌نين دالغالاريندا انتظار چکيردي.
ماشيني يانيندا ساخلاديم. دوشوب سالاملاشديق. گؤروشمک، قوجاقلاشماق، مصلحت اولمادان، ژاپونلي‌لار کيمي اوزاقدان اييليب دوزلديک!
ائوينه چاتينجا، »آي سيزه قوربان اولوم! سيزي يامان زحمته سالميشام« جومله‌لرين، دفعه‌لرله دئدي. هميشه کي کيمي حدسيز مهربان، تواضعکار، هم ده صميمي ايدي. دوستلاردان، قوهوملاردان، ان.جي.او.لاردان، خياوان اوشاقلاريندان، هرطرفدن صؤحبت ائله‌دي. او قده‌ر ائشيتمه‌لي سؤزلري واريدي کي، آدام زامانين او ساياق سرعتلي گئديشيندن آجيخلانيردي. اوردا نئجه تکليکدن يئترلي فايدالانماق حاقدا دانيشسادا، دوغروسو اونون تکليگي اوره‌ييمي يامان سيخدي. من اؤزوم چوخ زامان تکليک اوچون جان آتسامدا، تک اولاندان آز سونرا، بير اوره‌ک سيرداشي، بير صميمي دوست اوچون ائله داريخميشام کي اؤزومه گولمه‌ييم گليب. سانکي تکليگي اونونلا اولماق اوچون ايسته‌ييرميشم.!! بيرشعريمدن بو بيت ياديما دوشدو:
قوجاليغي عؤمرون قازماغي بيليب
يوخولار گؤرموشدوم دادماغا دادين.
فيکيرلشديم کي، قوجاليق عؤمرون قازماغي‌ديرسا، »حبيب فرشباف« ياشدا زنگين فيکيرلي انسانين، دؤره‌سي گرک سئونلري ايله دولو اولا. اونون سينه‌سينده سايسيز حسابسيز، ائشيتمه‌لي خاطيره‌لر وارکي، هره‌سي بير حيات درسي هم ده دئديکجه قيمتلي اؤرنکدي. آنجاق کرونا تهلوکه‌سي ده بؤيوک احتياط طلب ائديردي.
صؤحبت آراسيندا ويترينده‌کي اشيالاري بيزه گؤسترمک ايسته‌دي. هاميسي دوستلاري وئرَن هديه‌لر ايدي: »بو شکيل نادر عکسلردندي کي 50نجي ايللرين آخرلرينده انگيليستاندا چکيليب. » سعيد«2له»حمزه«3دي. بوبشقابداکي‌لار هاميسي زندان اثردي.
ديش خميري‌نين قابيندان، چوخ مهارتله دوزه‌لن قيزل گولي، خورما دنديک‌لريندن دوزه‌لميش تسبيح‌لري، نارين مينجيقلا توخونان بالاجا پول کيفين کي »عزيز آنا«سؤزلري اوزه‌رينه يازيلميشدي، گؤستردي. اولارا باخاندا يامانجا داريخديم. تکرار اولمايان عؤمرون قيمتلي آنلاري، محبوسلارا نئجه بئزديريجي اولور کي بو اشيالاري دوزلتمکله اونو چورودوب ايتيرمک زوروندا قاليرلار!
او مينجق کيفي گؤتورنده، آلتيندان نئچه دنه دمير پول چيخدي. حئيران قالديم. 50 ايلدن چوخيدي کي بو قولپلي پوللاردان گؤرمه‌ميشديم. بير قيرانليق، ايکي قيرانليق، بئش قيرانليق سکّه‌لر کي، قيراغينا کيچيک بير حلقه لئحيملنميشدي.بئله پوللاري قره‌داغ کندلرينده قيزلارين، قادينلارين جيليتقاسينا تيکرديلر. يئريينده آسيلي دمير پوللار بير-بيرينه توخانيب، جينقيلداردي. او جيليتقالاردان آسيلان سکّه‌لر، قيزيل قولباغي يا باشقا زينت اشياسي اولمايان کاسيب قيزلارين، قادينلارين، ثروتي ده حساب اولاردي.  آردي وار.

منبع :