بولگه لر سرويسي:اتوبوس سونونجو دوراغا ياخينلاشيردي. خانيملارلا آغالارين اورتالاريندا ايلشنسوروجو شاييردي، باغيردي: خطّين آخيريدي، قالان اولماسين! اتوبوس ساخلادي، آشاغا ائنديم. بئش ـ آلتي آدديم آتيب، دووار ديبينه چکيلديم. ساعاتا باخديم، هله واختيم وار ايدي. يولون قالانين پياده گئده بيلرديم. دکترون مطبّينه دوغرو يولا دوشدوم. اؤنده‌کي ايکي يول آيريميندا، ياشار قارشيما چيخدي. مني گؤرجک دئدي: هارا بئله؟، هاردان بئله؟ هئچ، خسته‌يم دکتره گئديرم. واختين وار سنه بير شئي گؤسترم؟ بير آز وار. نه گؤسترمک ايسته‌ييرسن؟ ياخشي اولدو. گل اتوبوس دوراغي صندل‌لرينده اوتوروب، سنه بير سؤز دئييم! باياق منه بير smsگليب. حئيفيم گلير اونو سنه گؤسترمه‌يم، بيلميرسن نمنه‌دي! دوراق صندل‌لري اوسته اوتوردوق. ياشار ال آتيب قولتوق جيبيندن موبايل‌ين چيخارتدي. اشاره بارماغين صفحه اوزره چکدي. صفحه ايشيقلاندي. بارماغين دويمه‌يه ووردو. يازي گؤرونن کيمي، اوخوماغا باشلادي: بهبهان جاده‌سينده بير وانت آشيب، نئچه تليس مين تومن ليک يئره تؤکولوب. ياشار باشين قالديرماميش، دئدي: گؤرورسن نمنه‌دي! هله بو بير شئي دئييل. بير آز اؤنجه آيري بيرsmsده گلميشدي. او بوندان دا چوخ بيليک وئره‌ندي. صبر ائله اونودا اوخويوم! بونو دئييب، گؤزلرين موبايل اوسته تيکيب، اوخودو: جاده‌لرين خرابليغيندان، ايلده نئچه مين آدام اؤلور. بيرده‌کي، »ايت‌لر ساخلانان يئردن، چوخلو آداملار گؤروش ائتدي.« بونلاري اوخويوب، سونرا باش قالديريب، دئدي: نئچهsms ده دونن گليب. بيلميرسن بو مجازي دنيا آدامين گؤزون نئجه آچير. قوي سنه بير سؤز دئييم. موبايل دوزه‌لدن بيليب نئيله‌سين. دوغروداندا اونو آلان آداملار، او الدن بو اله اولورلار. هامي بيلير هنده ورينده نه کئچير. منيم نظريمه، ايندي آداملارين بئينين موبايل دولدورور. بوsmsاو بيريسيندن دولغون، اوsms بو بيريسيندن ياخشي. بيلميرسن نه خبردي! او گون يوـ تيوب دا بير شاعير شعر اوخويوردو. وا…ي نمنه! دئمه‌لي دئييل. گره‌ک اؤزون گؤره‌سن! ياشاردان آيريليب يولا دوشدوم. دکترون مطبّينده نئچه نفر اوتورموشدولار. من‌ده اوتوردوم. بير آز سوووشدو. شماره وئره‌ن اوجا سسله دئدي: آغالار! دکتر بير ساعات يوباناجاقدير. هر کسين ايشي وار، گئديب بير ساعات سونرا، گله بيلر. هئچ کيم يئريندن ترپه‌نمه‌دي. بيري دئدي: دکتر يوبانير يوبانسين. بيز کي جاندان دوشموش، آغزي باغلي خسته‌لريک. آغزيميز نه‌دي دکتره بير سؤز دئيه‌که؟» دينمز ـ سؤله‌مز ايله‌شديک. نئچه دقيقه‌ده سوووشدو. بويون بوغازينا شال سريميش بير آغا ايچري گيردي. آياق اوسته ايکن، بؤرکون گؤتوروب، شالين آچدي. اوزون منه ساري دؤنده‌رنده، اونو تانيديم. اودا مني تانيدي. آياغا قالخيب يانيمداکي صندل‌ده اونا يئر گؤسترديم. آيدين دئدي: سن نه عجب؟ نه‌يين دي؟ دئديم: بير آز خسته‌يم. دکترده‌کي گلمک بيلمير. دئييرلر بير ساعات يوباناجاقدير. دئدي: يوبانماق بو دکترون هميشه‌کي ايشي‌دير. نئيله‌يه بيلريک؟ ايندي‌کي بئله اولدو گل من‌ده سنه بير شئي گؤستريم. باياق منه تلگرام‌دا بير شئي گليب، نمنه! گؤرمه‌سن بيلمه‌سن نمنه‌دي! الينده‌کي موبايلا نئچه دؤنه بارماق ووردو. ايندي گؤستررم دئيه ـ دئيه، بير فيلمي صفحه اوستونه گتيردي. در حال دئدي: من اؤلوم بونا بير دقّت ائله! گؤر نمنه‌دي؟ باخديم. مئشه‌دن بير فيل چيخدي نئچه آدديم آتيب ميوه‌لي بير آغاج آلتيندا داياندي. آغاجين گؤوده‌سين توتوب سيلکه‌لدي. ميوه‌لر يئره تؤکولدو. نئچه‌سين بير يئرده خرطومو ايله ايچري چکدي. آزجا سووشدو، نئچه حيوان تاپيلدي. زرّافه، کرگدن، ميمون فيله قاريشيب ميوه‌لري تالاديلار. يئييب دويانلار، قاييتماق ايسته‌ديلر. آدديم آتان چالخانيب يئره ده‌يدي. قالخدي يئرييه، يئرييه بيلمه‌دي. ناققيش گئتدي. ال ـ اياق اويناتدي. ديلين چيخارتدي. گؤزلرين سوزدوروب، خومارلاندي. آيدين دئدي: ـ «گؤرورسن نمنه‌دي! هله بو بير شئي دئييل! شماره وئرن آديمي سسله‌دي. معاينه اوتاغيننا گيرديم. دکتر خسته‌ليگيمي يوخلادي. نسخه يازماغا باشلادي. يازا ـ يازا دوداغي قاچدي. بيردن بيره گولومسه‌دي. الين ايشيندن چکيب، دئدي: آدام ائله ايشلره توش گليرکي اؤزوده بيلمير نئيله‌سين! باياق يو ـ تيوب دا منه بير شئي گلدي، نمنه! او فيلم‌ين بير يئري ياديما دوشدو. اونا گؤره گولمه‌ييم گلدي. بونو دئيه‌ن دکتر دقّتله اوزومه باخدي. باخيشيمدان نه اوخودو بيلميرم. آنجاق سؤزونون آرديندا دئدي: دئيه‌سن اونو گؤرمه‌يه علاقه‌ن وار! عيبي يوخ، بئله بير شئي‌لري گورمک اولدوقجا يارارلي دير. دکتر موبايلي يانديردي. دئديگي صفحه‌ني گتيردي. بونا باخ گور نمنه‌دي!دئيه ـ دئيه فيلمه باخماغيمي ايسته‌دي. باخديم بير اوو قاچيردي. پلنگ‌ده اونو قوواليردي. اونا يئتن‌کيمي جايناغين کوره‌يينه يئرلشديردي. اوو بير دقيقه‌ده قانينا بولاشدي. من اونا باخار ايکن، دکترده هئي دئيردي: داليسينا باخ! صفحه‌نين آرديجا آيري بير صفحه گلدي. ايت گليب جمدک اوستونده سومسونوردو. اوياندان بير پيشيک تاپيلدي. پيشيک ايته قارشي ميريلدادي. ايتين اوستونه يومولدو. ايت قورخوب ونگيلده‌دي. گئري چکيلدي. پيشيک سون يوروشو باشلادي. ايت قاييديب قاچدي. دکتر دئدي: گؤرورسن نمنه‌دي؟ مطّب‌دن چيخديم . گلديگيم يولو قاييديب، اتوبوسا مينديم.سوروجو شاييردي خانيملار اوتوردوغو يئردن سوروجويه ساري باغيردي:باغلا! دالي قاپيني‌دا باغلا! قاپيلار باغلاندي، يولا دوشدوک.سوروجو شاييردي سسلننده من اونو تانيميشديم. يوخسول، ساده‌واري بير گنج‌دي. گولمه‌لي سؤزلر دانيشار. يول اوزونو يولجولاري گولدوره‌ر. گولش اوزلو جوان‌دي. هردن بير هيرسله‌نيب، چيغير ـ باغيردا سالار. خانيملارا بو قده‌ر سس سالمايين دئيه، هر کس اؤز يئنه‌جک دوراغيندا ائنمه‌سه مندن دئييل، دئير.» اتوبوس سونونجو دوراغا آز قالميشدي. ايچري‌ده بئش ـ آلتي خانيم آغادان ساواي، کيمسه يوخ ايدي.»سوروجو شاييردي« خانيملار ايلشن صندل‌لره، دستمال چکمک ايسته‌دي. ايکينجي رديف‌ده بير تيکه قورو چؤره‌ک قالميشدي. اونو گؤردو سسين باشينا آتدي: آهان! بودا خانيملارين گؤردويو ايش! چؤره‌يي يئييب قالانين صندل اوسته قويوبلار. ايندي اونلارا دئيرم. بونو دئييب جيبيندن موبايلي چيغارتدي. قورو چؤره‌يين عکسيني سالدي، سونرا بير فاتح‌کيمي دايانيب، گولومسه‌يرک: ايندي گئتسين‌لر کئف ائله سينلر. تبريزلي آروادلارين آبيريسي گئتدي بير ثانيه‌ده دنيا بيلدي‌کي بونلارين فرهنگي نمنه‌دي! ها… ها… ها سوروجو شاييردي بئله گؤره‌نده سوروشدوم: نئجه ياني تبريزلي آروادلارين آبيريسي گئتدي؟ جواب وئردي: سن بوجور شئي‌لري بيلمزسن، عمي! بير ثانيه ايچينده قورو چؤره‌کلرين عکس تلگراما گئتدي. بيليرسن ياني نمنه؟ ياني اوکي دونيا اهلي بيزيم فرهنگيميزي گوردو. اوتوبوس دوراقدا داياندي.سوروجو شاييردي چؤره‌کلري گؤتوروب قنووا سالدي. اونو گؤرجک موبايليمي چيخاريب، قنوداکي چؤره‌کلردن عکس سالماق ايسته‌ديم. »سوروجو شاييردي« قيوراق گلدي کي: نئيليرسن عمي؟ دئديم: هئچ! چؤره‌ک پارچالارينين عکسين ساليرام، يو ـ تيوبا قويام. ايستيرم دنيا آداملاري بيزيم سوروجولري ياخشي تانيسين لار. من اؤلوم يوخ‌ها! بابا بيزيم آبيريميزي آپارما! گؤره‌سن بو نه ايش ايدي من گؤردوم، عمي؟آي عمي؟ بير ديقه صبر ائله گور نئيليرم. بونو دئييب، ال آتدي چؤره‌کلري قنودان ييغيب، دووار ديبينده‌کي زيبيل قابينا تؤکدو. چئويک قاييديب دئدي: گؤرورسن موبايل نمنه‌دي! آدامي قويمورباشين قاشيسين! لاپ ياخشي، باش قاريشيق اولماسا آدامين الينه ايش وئره‌ر! سني‌ده ساغ اول کي، موبايل‌دان دوز يارارلانماغي لاپ يئرينده منه تاپشيردين!
بولگه لر سرويسي:اتوبوس سونونجو دوراغا ياخينلاشيردي. خانيملارلا آغالارين اورتالاريندا ايلشنسوروجو شاييردي، باغيردي: