او قده‌ر تربيه‌لي- سئويملي و او عائله‌ده ده يئري وار ايدي کي سون بئشيک ساياغي اونو عزيزله‌ييرديلر. گؤزلري بال رنگينده، ساچ‌لاري پامبيق کيمي، جاني هر زمان تر – تميز. . . او ائوده دوغولموشدو.هر شئيي اؤزه‌ل و آيريجا آلينميشدي. بالاجا بير رنگلي بزکلي کومه‌سي ياتاق يئري، قاب – قاشيقي، آيين اويونو، توره‌لي اويونجاق‌لاري و. . . پاپيون‌لاري آرا بير دئييشيليردي، آمما قيرميزي اطلسي پاپيوني چوخ واقت بوينوندا گؤزه ده‌ييردي. سئوه – سئوه ائله بويونا اوخشاييرديلار، قونوم قونشونون بالالاري بو شانس‌لي دوم آغ پيشيگه قيسقانيردي‌لار! اودا اؤزونو نئجه ازديرمه‌ييني ياخشي بيليردي. عائله‌نين کولتورونو آنلاييب، يول -رويه اويره‌نميش سهوي چوخ آز اولوردو. . . يئنه تاپيلدي!! آراليق – آرسيز – آريق ائرکک پيشيک. . . توستو رنگينده گؤزلري، پير – پيزاقلي توک، چيرکلي جان و آياقي‌نين بيري ايسه آخساييردي. بير نئچه گون اولاردي، گليب بو ائوين هره‌سينده چابالاييب، ميريلداياراق سوناني گزيردي، بلکي ده چاغيريردي. . . بو چولاق ائرکک پيشيک آنجاق بورادان اوزاقلاشميردي، سوپورگه ساياغي بيغ‌لاري داها دلي دولو گؤرسه‌نيردي. سونا چوخ سايميردي، هنده‌ورينه دولانميردي، آمما سايمامازليق دا دئمک اولمازدي. . . بير گؤزو ائو‌ييه‌سينده، اوشاقلاردا، بير گؤزوده چولاق ائرکک ده قالميشدي. نه ائده‌جه‌ييني بيلميردي، آنجاق داورانيشيندان اونا ساري گئتمه‌يه ماراقلي ايدي. نه قده‌ر چاليشيردي حيه‌ته يول تاپسين، اولموردو. دووار چوخ اوزون، قيقاجي، دمير نرده‌لر اوخ شکلينده، يان با يان دايانميش، يولونو دوتموشدو. آتلانيردي! قالخيردي، ائنيردي، قاچيب – دايانيردي، عصبلشيردي، ميريلتيسي اوجاليردي، هلاک اولوردو. . . آنجاق هر يئري ايزله‌يه‌رک، يول آختاريردي. سونانين قوخوسو، ائله دولموشدو بوتون وجودونا، قرارسيز ايدي. . . بورنونون پنه‌لري آچيلميشدي، آياغيني سورويه‌رک آنجاق بير ديقه دينج قالميردي، دار – دودوک ده اولسايدي، بير (يول) دالي سوره ايدي! بور – بوجاغا گيريب چيخيردي، هره‌نين انين – اوزونون، يئنه يوز دؤنه گونده قاچيردي. . . بئله کي گؤرونوردو سونادان کئچه‌ني دئييلدي. سونا گيزلي شکيلده باخيب، قاييديردي. دايانيردي، بير ايکي آدديم دووارا ساري گئديب پنجره‌دن کولگه گوره‌رک قاييديردي. آرا بير يوخو دوتوب ساعات لارلا هره‌ده ياتيردي، ائو‌ييه‌سي اونو بو ائوه آليشديرماماق ايچين هئچ نه وئرمه‌ييب، قووالاييرديلار.سسي گلجه‌يين، ندنسه سونانين اوره‌يي چيرپينتيا دوشوردو. نه حيه‌ته چيخا بيليردي، نه باشقا بير ايش گؤره بيليردي. سس‌سيز – سميرسيز، ال آياغين گؤزه‌ل ايپک کيمي‌توک‌لرينين آلتينا‌ييغيب ائيلشيردي.آغيز – بورنونون سويو دئييب – قاريشميشدي بير بيرينه، جاني زيغلي، گؤزونه داش دئيميش کيمي‌قانلي، توز – تورپاق و يارالي ايدي. داها دؤزومونو الدن وئرن کيمي، چابالاييردي، باغيريردي، بوغازيندان غيژيلتي سسي گليردي، سانکي بوغولوردو! سونا دايانا بيلمه‌دي، آستا – آستا حيه‌ته ساري گؤزلري بير – بيرينه ساتاشدي. دووارا ياخين کولگه‌يه ساري گئتدي، باشيني قالديريب ياواشجا هره‌يه باخيردي. اؤز الينده دئييلدي گؤز‌لريني پنجره‌لردن، حيه‌تدن، دوواردان بئله چکيردي هره‌يه. . . پاپيونون شکيلي دوشموشدو شوشه‌يه، ايشيلداييردي. اؤزو – اؤزوندن چوخ خوشلانيردي! ايسته‌ميردي بو ائوي الدن وئرسين، ده‌يرلي اولاجاق‌لاريني، يئر – يوردونو، بو گؤزه‌ل عائله‌نين محبت‌لريني… امک ايتيرمک ايسته‌ميردي، بيريانداندا قورخوردو، بيلميردي اوره‌يي يانير يوخسا ايسته‌يير. . .اهمال – اهمال آدديملاياراق، بير گؤزو ائوده، بير گؤزو اوندا دووارا ياخينلاشيردي. اوره‌يي اوزولدو سونانين! ديکسيندي! ال آياغين ايتيردي! ائرکک پيشيک اؤزونو آتميشدي حيه‌ته. نئجه آتلانديغيني – گلدييني بيلمه‌دي، آمما گؤردوکي سورونه‌رک، آغاجين آلتينا گيردي!ائودن سس گليردي، سانکي سوناني چاغيريرديلار! اسيردي، دهشتدن گؤزلري ايريلميشدي ائرکه‌يين ميريلتيسي دايانميردي، گؤزون تيکميشدي دوز سونانين گؤز‌لرينه، ايسته‌ييردي ياخينلاشا، سونا قاچيب، سؤيود آغاجي‌نين کناريندا گيزلندي، گلدي! تاپدي! سونا راحاتسيزجا گيجه‌ليردي، کردي‌نين اورتاسينا هئچ گيرمزدي، هوولوندن کردي‌دن بئله، قيزيل گول‌لرين داليندا گيزلندي، يئنه گلدي! بو دؤنه توخونماق ايسته‌ييردي، سونا قاچدي – او قاچدي. اوره‌يي آز قاليردي آغزيندان چيخسين. . . قاپي‌نين آلتيندان اوزولدو کوچه‌يه! ائله او آن، دؤنوب باشيني ساليب حيه‌ته ، سوناني اؤزونه ساري چکيردي، امر ائده‌جک کيمي، غورولداييردي. . . سونا همي‌اوره‌يي اوزولوب قورخوب، همي‌گئري قاييديب، ائوه ساري گئده بيلميردي.اونا عادي اولاراق، قاپي نين او سووشولماز يئريندن چيخميشدي. آمما سونا ايچين چوخ چتين ايدي! باشيني کوچه‌يه چيخارميشدي، آمما جانيني قوتارا بيلميردي، ازيليب داغيليب، گوج ايله آنجاق اودا چيخدي.ائودن جييه‌ر قوخوسو گليردي، سوناني گزيرديلر، پيله کاندان آياق سسي گلدي. . . سونا چيخدي!بيرينجي دؤنه ايدي اذن‌سيز و يالنيزجا چؤله چيخيردي، چيخدي! پاپيونو ايليشدي قاپي‌نين قيفيللانان يئرينه، دارا چکيلن کيمي‌دوگونو داراليب، بوغازيني‌سيخدي!دوشدو چولاق ائرکه‌يين دالي سوره، او قاچيردي، بودا تؤشگونو درمه‌دن، ترله‌ييب، تيتره‌يه‌رک آرخاسيندان گئديردي.بيلميردي‌هايانا، آنجاق اونونلا برابر گئتمک ايسته‌ييردي. او تله‌سيک، کوچه به کوچه، دام – دووارلاردان، قاپي باجادان، ائنيش – يوخوشدان، دوشوب چيخاراق قاچيب و بونودا دالي سوره قاچيريردي. خارابا قالميش بير يئره چاتديلار، در – دمير، آهن، آت آشغال، لئش – لوش ايچينده گؤز‌لردن اوزاق، بوجاقدا اوچورولموش بير يئرده سيغينديلار. هئچ دؤزمه‌دن، باخمادان، دايانمادان، جومدو سونانين اوسته. . . چيرپينيردي، آتلانيب – دوشوردو، عجايب سس‌لر بوغازيندان چيخيردي! سونانين نفسي تيخجينميشدي قاچماق ايسته‌ييردي، آماني قيريلميشدي بوغولوردو! بير نئچه آن جان‌لاري قيزيشدي. . .سونرا نريلتيسي کسيلدي! سوسوب، اورادان اوزولوب يولا دوشدو، اوزاقلاشدي! سونا سيزيلداييردي، يورغون – آرغين زيريلداييردي، مله‌ييردي، پاپيونو آچيلميشدي. . . اوز گؤزو چيرکلي، جاني ازيلميش، آج – سوسوز، ييخيليب قالميشدي.هاوا قاراليردي چاره‌سيزجه مليل – معلطل قالميشدي. دونوخموشدو خاراباليغا! هئچ بير ده‌يرلي شئي گؤزونه دئيميردي، نه قده‌ر گؤزو گزدي، اونو تاپابيلمه‌دي، گورمه‌دي، ائشيتمه‌دي. او قده‌ر قاچميشدي، ائنيب – قالخيب، جيزيليب، ديديلميشدي، اينجيميشدي، ديدرگين حال دا يوخوسو دوتدو! ياتدي. . .صوبح آچيلارکن ائرته‌دن گؤزونو آچدي.هر شئي فرق‌لي، هر شئي غريب، ائو يوخ، حيات يوخ، ياشام يوخ، نه يئمک – نه ايچمک، نه اؤزونو ازديرمک قوجاقلاردا نازلانيب اويناماق، نه چيچک نه آغاج نه حاووز! هئچ نه. . . گؤز‌لريني يوموب يئني‌دن آچدي، يوخو گؤروردو؟ يوخ. . . يادينا بير شئي‌لر دوشدو. دوردو ياواش – ياواش آدديم‌لاريني آتيب يولا دوشدو! ائوه قاييتماق ايسته‌ييردي. تانينماز بيلينمز کوچه – باجالاردان باش چيخاريردي اوخشاديب، کوچه‌لره دؤنوردو، بلکي ائوي تاپسين دئيه! داها آرتيق تورا دوشوردو، اوشاقلار دوتماق ايسته‌ييردي، داش آتيب، دالي سوره قاچيرديلار، جانين گؤتوروب قوتاريردي. او قده‌ر سوروندو،ها جان آتدي بير شئي تاپيب يئسين، اولمادي. ايسته‌دي او بيري آراليق پيشيک‌لر کيمي‌آرسيز ياشاسين، شير – شيندير ايچره زيبيله قاريشميش دري – بوغاز گؤردو، يئمک ايسته‌ييردي، يئيه بيلمه‌دي! حالي قاريشدي، اوره‌يي بولاندي، نه قده‌ر چاليشدي آغزي آچيلمادي! آخدارديقجا ايرنج شئي‌لره راست گليردي! آچيق قاپي‌لاردان گيرمک ايسته‌ييردي، قووردولار، قويموردولار! بوتون فيکري ائوده قالميشدي. هر جوره ايدي تاپماق ايسته‌ييردي، هر شئيي الدن وئرميشدي. . . يئنيجه اله گتيريب، قدريني بيلمک ايسته‌ييردي آمما آخدارديقجا سانکي ائودن اوزاق دوشوردو هئچ بير خياوان – کوچه – دام دووار اولدوغو ائوه بنزه‌ميردي، آدام‌لار، اشياء‌لار، آرابالار. . . هر شئي غريب، هر شئي غريب! اوستو باشيني توز – تورپاق بوروموشدو! الي هئچ بير يئره بند دئييلدي، ديل – دوداغي قوروموشدو، سانکي گؤز‌لرينين اؤنونه دومان چکيلميشدي، آيدينجا بير يئري گؤرموردو ايستي – سويوخ، ستلجم ائله‌ميشدي، پاپيونون ايزي قالميشدي، آغ – آپباق جاني کول رنگينه دؤنموشدو، کول اولموشدو!سورونه – سورونه امين اولاراق، اؤزونو سؤنموش بير ماشينا يئتيردي، سويوخدان گيريب تيه‌رين يانيندا يئرلشدي. . . صوبح، سونانين قانلي تيکه – پاراسي داغيلميشدي خياوانا. . .ماشينين تيه‌رينين ايزي هله ده کوره‌يينده ايدي!چولاق ائرکک، باشقا بير (سونا) دالي سوره قاچيردي. . .
بولگه لرسرويسي:آغ آپباق، گؤزه‌ل، نازلي – دوزلو، سس‌سيز سايقيلي»سونا« خانيم! قوجاقلاردان دوشموردو. . .