ايکي پنجره؛ اوستاد حبيب ساهير حاققيندا خاطيره‌لر
ايکي پنجره؛ اوستاد حبيب ساهير حاققيندا خاطيره‌لر
1400/11/24
بولگه لر سرويسي:نئچه گون بوُندان اونجه، ميانالي دوُست‌لارين طرفيندن، اوُستاد حبيب ساهير حاققيندا قوُرولان بير جانلي اينستاگرام پروگرامينا چاغيريلديم. دوُست‌لار منه دئديلر اوُستاد ساهير باره‌سينده، تخميناً قيرخ بئش دقيقه دانيشماليسان و من ايسه نه دانيشاجاغيمي دوشوندوم. آشاغيدا يازديغيم يازيدا، هَمَن جانلي پروگرامدا دانيشديغيم سوزلرين بير حيصه‌سيني تقديم ائتميشم.
مرتضي مجدفر
بولگه لر سرويسي:نئچه گون بوُندان اونجه، ميانالي دوُست‌لارين طرفيندن، اوُستاد حبيب ساهير حاققيندا قوُرولان بير جانلي اينستاگرام پروگرامينا چاغيريلديم. دوُست‌لار منه دئديلر اوُستاد ساهير باره‌سينده، تخميناً قيرخ بئش دقيقه دانيشماليسان و من ايسه نه دانيشاجاغيمي دوشوندوم. آشاغيدا يازديغيم يازيدا، هَمَن جانلي پروگرامدا دانيشديغيم سوزلرين بير حيصه‌سيني تقديم ائتميشم.
***
منيم ايلک گوروشوم اوُستاد ساهيرله، 1357 نجي ايلين اسفند آيي‌نين 13 ونده اوُلموش و او تاريخدن باشلاياراق، اوُستادين عومرونون سون گون‌لرينه قدهر داوام اتئميشدير. آنجاق اوُستادلا سيخ گوروشلريم 1358 نجي ايلين ياييندان باشلاياراق، 1364نجو ايلين يايينا کيمي و هر هفته جوما گونلري اولموشدور. دئمک، من هر هفته جوما گونلري، سَحَر ساعات سکگيز- دوققوزدان ساهيرين ائوينه گئديب، آخشام ساعات آلتي‌يا قدهر، هاوا قارانليقلاشانا کيمي، اورادا اولارديم. ساهيرله مصاحبت، اونون شعرلريني يئني‌دن باشقا کاغاذلار اوزه‌ره يازماق، خاطيره‌لرينه قوُلاق وئرمک، کيتابلارين، کار- کاغاذلارين مرتب ائتمک و بئله‌بئله ايشلر، منيم گونلوک واختيمي دولدوروردو. هم ده يئني چيخان کيتاب و نشريه‌لري هفته ايچينده آليب، توپلاييب، ساهيره آپارارديم. بوُنلاردان علاوه، ساهير يازان شعرلري، حئکايه‌لري و يادداشت‌لاري ايلکجه دوکتور صديق چيخارتديغي »يولداش«، »انقلاب يولوندا« و »يئني يول« مجله‌لرينه، هم ده تهراندا و تبريزده بوراخيلان «اولکر«، »گونش«، »کوراوغلو«، »دده‌قورقود«، »فروغ آزادي« و… نشريه‌لرينه آپاريب تحويل وئريب، يا پست ائدرديم. بوُ آرادا، تکجه 1360نجي ايلين سون آيي و 1361نجي ايلين بيرينجي دورد آييني، مشهدده معلم‌چيليک فاکولته‌سينه گيردييم اوچون، مرتب اولاراق ساهيرين يانينا گئده بيلمه‌ديم و گوروشلريم آرا- سيرا و تکجه تهراندا اولدوغوم زامانلارا عاييد اولدو. بير ده، 1364 نجي ايلين مرداديندان، ساهيرين اولوم گونونه قدهر، اونونلا قوُردوغوم ايلگي‌لر کسيلدي. او گونلر، منيم تکجه 22 ياشيم وار ايدي. مرداد آييندا، بيزيم ائويميزه، بير تانيلمايان تئلفون نومره‌سيندن زنگ آچيلدي و منه دئديلر بير داها ساهيرله گوروش‌سن، سنه آغير شرايط ياراناجاقدير و بئله‌ليکله قورخو، بير گنجي، قوجامان بير اوُستادين گوروشوندن محروم ائتدي.
»ميچ آلبوم« آدلي بير معاصرآمئريکالي ژورناليست يازيچي وار. بوُ يازيچي، فارسجايا ترجمه اولونموش »سه‌شنبه‌ها با موري«(سه‌شنبه گونلري موري ايله) آدلي کيتابيندا، قديمکي اوُستادي »موري« ايله هفته ده بير دونه گوروشوندن سوز آچير. او، آلتي‌يوز کيلومئتير موري ايله فاصيله‌سي اولان بير شَهَرده ياشايير، آنجاق هر هفته سه‌شنبه گونلري سَحَر، اوچاق ايله مسافرت ائديب، موري‌نين شهرينه چاتير و آخشام هاوا قارانليقلانا قدهر اونونلا گوروشور و خاطيره‌لرينه، تاپشيريقلارينا و اويودلرينه قوُلاق وئرير. بوُ گوروشلرين سون هفته‌لري، خصوصيله موري‌نين خرچنگ واسيطه‌سي ايله دونيادان کوچمه‌يينين زاماني بيلينديکدن سونرا، چوخ قيزغين، هم ده حسرتلي کئچير. ميچ آلبوم، اوُستادي‌نين درسلريندن و اويودلريندن، جاوان اولدوغو و ژورناليسم بيليم‌يوردوندا تحصيل آلديغيندان کاميلجه‌سينه فايدالنماديغي اوچون، حاييفسيلانير و نهايت موريني الدن وئرير. کيتاب چوخ اوخوناقلي و گئديشي يونگول واري و آخيجي اولان بير کيتاب دير. بوُ کيتابدان، فارسجايا چئوريلميش نئچه‌نئچه ترجمه نسخه‌لريني الده ائتمک اولار، هم ده کيتابين متني، پادکست صورتينده، گئنيش صورتده ياييلميشدير. بوُ رومانين اوخوماسيني تووصيه ائديرم.
بوُ کيتابدان الهاام آلاراق، بير اوُزون رومان يازماقدايام:»جومالار ساهيرله«. بوُ کيتابدا يئدي ايل ساهيرله گوروشمه‌لريمدن، روايي شکيلده سوز آچميشام. بوُرادا او کيتابدا يازاجاغيم و هَمَن لايو اينستاگرام اوتوروموندا سويله‌دييم بير خاطيره‌يه اشاره ائديرم:
ساهيرين اللري عومرونون سون ايللرينده چوخ آرتيق تيتره‌ييردي و يازديغي شعرلري اوخوناقلي خطله يازا بيلميردي. ساهير، يازديغي بوتون شعرلري منه اوخوياردي و سونرا مندن ايسته‌يردي هَمن شعري بير داها اونا اوخويوم. حتي 1360 نجي ايلده منه اتحاف ائتدييي »سحر ايشيقلانير« کيتابي‌نين ايلک صحيفه‌سينده يازيلان خط، چوخ نازيک حرفلرله يازيلميش و ائله‌جه ده اوخوناقلي دئييل(يازي‌يا آرتيريلميش تصوير). ساهير عومرونون سون گونونه دک، ديري باش ايدي و هيچ بير زامان ذهني- حافيظه‌سي چاشيب، قاريشماميشدي. حتي تأسفله ساهيري حياتيندا گورمه‌ينلر و بوُ گونلر، اوزلريندن خاطيره توخويوب، ساهيري ويلچرله ميانا، سونرا ايسه ترکه آپاران کيمسه‌لرين دئديينين عکسينه، ساهير، عومرونون سون گونونه دک اوز آياغي اوسته ياشادي و ابدا ويلچره مينديريلمه‌‌دي و واکرله يئريمه‌دي.
گونلرين بير گونونده، ساهير منه »ايکي پنجره« آدلي بير شعر اوخودو. سونرا ايسه مندن ايسته‌دي شعري بير داها اونا اوخويوم. ساهيرين ال يازمالاري‌نين سونوندا، شعرلرده يا يازيلاردا، عموميتله سون بيتين يا سون سطيرين، سول طرفينده، نئچه تاريخ گوزه دَيردي. بيرينجي تاريخ، شعرين يا يازي‌نين اصلي سويله‌نيش يا يازيلما تاريخي و يوخاريدان آشاغي‌يا دوزولن ايکي، اوچ يا آرتيق تاريخ‌لر ايسه، ساهيرين توسطيله شعر و يازي‌نين رئداکت اولونموش تاريخ‌لري ايدي. ايکي پنجره شعري‌نين سونوندا، 1355 قيش يازيلميش و سونرا آلتيندا 63/12/17 قئيد اولونموشدور. دئمک بو شعر تکجه بير دونه رئداکتا اوغراميشدير.
شعري اوخودوقدان سونرا، اونو اوُستادا قايتارماق ايسته‌ديم. ساهير ايسه، چوخ تواضعکارليقلا دئدي:» بو سنين کي… اوزومه بير باشقاسيني يازميشام..«
او شعري ائوه گتيرديم و گوزومون ايشيغي کيمي، آنجاق کار‌کاغاذلاري‌مين آراسيندا ساخلاديم. ايللر سونرا ساهير حياتين دييشدي و 1374نجو ايله چاتديق. اوستادين اولوموندن اون ايله ياخين کئچدي و من همشهري غزئته‌سينده »ائيتيم، کولتور و اينجه صنعت« صحيفه‌لري‌نين مسئولو اولدوم. اجتماعي باخيمدان، هله ده شرايط آغير ايدي. هر حالدا، 1374نجو ايلين تير آييندا، ساهيرين حافظدن ترجمه ائتدييي غزل‌لردن ايکيسيني، فارسجا متني ايله بيرليکده، اوز مسئوليتيمله چيخان »ادب و هنر« صحيفه‌سينده، »حافظ الفت« باشليقلي بير يازيدا نشر ائتديرديم.
منبع :