ايچيميزده اؤلن اوشاقدان باغيش ديله‌مه‌لييک
ايچيميزده اؤلن اوشاقدان باغيش ديله‌مه‌لييک
1397/06/18
بولگه لر سرويسي: هردن اؤز-اؤزومه دئييرم: من شعر يازماغي اوشاق‌لاردان اؤيرنملييم. هردن شعرلريمي‌اوخدوقدان سونرا جيريب زيبيل قابينا آتماق ايسته‌ييرم! چوخ واخت‌دا ائله بئله ائله‌ييرم. دوغروسو اوشاق حاقلي‌دير شعريمه قولاق آسماسين، يادا قولاق آسديقدا يورولوب قاچماق ايسته‌سين، باشيني باشقا زادلارلا قاتماق ايسته‌سين؛ مثلن کؤينه‌ييندن چيخميش ايپي چکيب اوزون اوزون اوزاتسين، منيم شعريم اوزانديقجا داها چکيب اوزاتسين. يادا بارماق‌لارينداکي تيليشه‌لري ديشي ايله قوپارتسين. وآللاه اوشاق حاقلي‌دير شعريمي‌اونا اوخويارکن حيطده کي پيشييه فيکيرلشسين.
اوشاق اؤزو مندن گؤزل شعر دئيرکن اوتوروب منيم شعرلريميدينلهمهيه نه گره‌يي وار؟! شعرلريم‌دن يورولور وآللاه، اؤلمکدن يورولان کيمي!
اوشاغين خيالي اؤزل هم‌ده گوجلودور. خيالي تر-تميزدير، خيال کيمي‌خيال‌دير. اؤز دوشونجه‌سيندن، اؤز سئزدييندن و اؤز باخيشيندان قايناق‌لانان خيالدير. اوشاغين خيالي يالنيز و يالنيز اؤزونه عايددير. خيالينين دوغالليغي اؤز دوغاسيندان واسيطه‌سيز قيدالانديغينا گؤره‌دير، ائله اونا گؤره ساختا دئييل، ائله اونا گؤره ده مندن داها ياخشي داها باشاريلي شعرلر قوشا بيلير.
بو گون دينقيلي »سونايين« آناسي اونا دئدي: “سوناي گئت اوتاغيندان ياشيل باليشي گتير منه”. اوندان قاباق سونايي نئچه دؤنه بير شئيي گتيرمک اوچون يوللاميشدي. بئش ياشيندا اولان دينقيلي سوناي آناسينا دئدي: ” آنا! نه قدر ايش دئييرسن منه! يورولدوم اؤلمکدن”
سوناي »يورولماقدان اؤلدوم« دئمک ايستهييرسه ده، اونو ترسينه دئيرک ايستر-ايستمز شعر ديلينه وارير!
»يورولماقدان اؤلمک«هامينين دئدييي و آنلاديغي بير سؤزدور، بير حالدا کي »يورلدوم اؤلمکدن« عادي ديله يوخ؛ شعر ديلينه عايد بير سؤزدور. اوشاق بونون فرقينده دئييل، او بو تونجهنين نه قدر شاعيرانه اولدوغونو بيلمه‌دن اونو ديلينه گتيرير. بلکه ده فرقينده‌دير و نه دئديييني ياخشي آنلايير؟! و معنا ايله دويغو باخيميندان نه قدر آنلاملي و ائتگيلي بير جمله ايشلتديييني‌هاميدان ياخشي بيلير؟!
و بيز بو گونلر نه قدر يورلموشوق، نه قدر يورولموشوق اؤلمکدن! سيزي بيلميرم من کي چوخ چوخ يورولموشام. راکت‌لر، بومبالار، قورشونلار، قمهلر …پاتلامالار چاتلامالار…قاچاقلار، زيندان‌لار، اويوشدوروجولار، تئرورلار…اووو…وه… اؤلدورورلر اؤلدورورلر اؤلدورورلر… يورولماييرلار اؤلدورمکدن.
من آنجاق يورولموشام بو قدر اؤلمکدن، اوشاق‌لارين اؤلمه‌سيندن، اوشاق‌ليق‌لارين اؤلمه‌سيندن. هر بير اوشاق اؤلدوکجه من‌ده اؤلورم. و بوگون‌لر نه قدر اوشاق اؤلور، نه قدر اوشاقليقلار اؤلور! نه قدر شعر اؤلور! بيري ديب اوتاغينين ديب بوجاغيندا اؤلور، بيري ايسه تئرور سالديرماسيندا، بيري ده خياوان قيراغيندا ساققيز ساتارکن. جانيخديم بو قدر اؤلمکدن، يئتر آرتيق.
قيشدير. گئچه سحره‌دک قار ياغيبدير. ناهار اوچون ائوه دؤندوکده اوچ ياشيندا سوناي قيزيم حيطده اؤزو دئميشکن:”قار-قار” اوينايير. مني گؤرجک چوخ ائهمالجا گؤتوردويو الينده کي قار دنهلريني منه گؤرسه‌ديب دئيير: »بو نه‌مه؟/ قار؟/ چوخ دوزي /من قاري چوخ سئويرم آتا/ قارقا دييير: قار …قار( او آندا قارقا سسي گلير)/ قار چوخ آغ‌دي آتا/ باخ يوموشاق‌دي/ چوخ يوموشاق‌دي/ حئيوان قار«
اوشاق‌لارين شعرلريني غفيلدن دويار-دويماز آزاراق دينجهليرم. اؤزومو موتلو حيس ائديرم و دونيايا گلديييمدن و بو گؤزلليک‌لري گؤردويومدن ممنون اولورام . اؤز-اؤزومه دئييرم شاعرلر بو گؤزللييي گؤرمهسهلر، اوشاق‌لارين شعرلريني اونلارين گؤزلريندن دويماسالار، شهرين اوستونده بومباسيني سالماق اوچون تله‌سن او دمير اوچاق قولچاق‌لارين هيچقيرتيسيني آغلاييشيني‌هاردان ائشيده‌جک؟
ياشاديغيميز دونيا بوروشدنمي‌يوخسا قيزيلدان؟ اينگيلس‌لي شاعير و يازيچي »فيليپ سيدني« دئيير: »دونيا بوروشدن‌دير؛ تکجه شاعيرلرديلر کي قيزيل دونيا ياراديرلار.« دوشونورم بير شاعير نئجه آلتين بير دونيا يارادا بيلر؟
»ويليام ووردزوورث« دئيير: »شاعير انسان طبيعتيني ساوونان قايادير.« دوشونورم بير شاعير اؤز قلم کاغاذي ايله،هابئله يازديغي شعرلري ايله نئجه انسان دوغاسينين قوروجوسو اولا بيلر؟
ژاپون‌لو شاعير»مي‌چيو مادو«نون قاريشقالار حاققيندا بئله بير گؤزل شعري وار: قاريشقايا باخيرام/ چوخ واقت حيس ائديرم/ بو دينقيلي ياراديقدان/ عوذور ديله‌مه‌لييم./ياشام‌هامييا بيردي/ بؤيوک يوخسا کيچيک/ فرق ائدن/ يالنيز گؤودهلرديلر/ و منيم گؤودم/ آبدالجاسينا اوندان يئکهدير.*
بيزاينسان‌لار‌هاميليقدا؛ شاعيرلريميزدن توتوب سياستچي‌لريمزه‌دک، اکينچي‌لريميزدن توتوب تاجيرلريمزه‌دک و س، بير بؤيوک معذرت بورجلويوق طبيعته، و طبيعتده اولان هر بير شئي‌دن- آغاج‌لاردان، حئيوان‌لاردان، چؤلون او کرتنکهلهسيندن، دنيزين باليغيندان، داغداکي او ماميرلي داش‌دان- عوذور ايسته‌مه‌لييک، قاريشقادان دا.
بيزکيشي‌لر بير بؤيوک معذرت بورجلويوق تاريخه. تاريخ بويو چتينليک چکن و اسير کيمي‌ياشايان و ساواش‌لارين اودونا يانان قادين‌لارلا اوشاق‌لارا. بيز دونيانين هر بير بوجاغيندا آج-يالاواج، هئچ اوشاق‌ليغين داديني دادمايان اوشاق‌لاردان عفو ديله‌مه‌لييک.
دونيا بيز کيشي‌لرين الينده اولدوغونا گؤره عوذور ديله‌مکدن باشقا نه چاره‌ميز وار؟ »ناظيم حکمت« دئميشکن: »دونياني وئرک اوشاق‌لارا هئچ اولماسا بيرگون« و وئرک آنالارا.
بيز ايچيميزده اؤلن اوشاقدان بير بؤيوک باغيش ديله‌مه‌لييک، اومورام باغيشلاسين بيزي.
منبع :