آخشام ياتاندا دئييرديم کئشگه هئچ واخت اويانمايام
1398/06/24
بولگه لر سرويسي: کوچه‌يه يئتيشرکن، ننه کي حيطده حوض قيراغيندا قاب يويوردو بيزي‌هايلادي:”هله هوله آلمايين‌ها! قارنيز آغرييار. پولونوزا خورما آلين، يوخسا بير شئي کي دويورا”.
يوخولو و يورغون يولا دوشدوک. گونش تزه اوجا داملارين قيراغينا و چينارلارين باشينا دوشموشدو. سئرچه‌لر‌هاي‌هاراي سالميشديلار.
اوزاقداکي داملارين اوستوندن پشه‌بندلر گونش آلتيندا ايشيلداييب، گؤزلريميزي قاماشديريرديلار. اوچوموز ده اسنه‌ييرديک. ياي ايدي، امما هله ده سازاق تزه سو سپيلميش کوچه‌لردن جانيمي‌اوشودوردي. اوره‌ييم چيرپينيردي. تنبل ايديم. قاييديب، ائوده ياتماق ايستيرديم. اللريمي‌زنبه يارالاميشدي.
صاحيبخاناميز شهرين يوخاري باشيندا اؤزونه باشقا بير ائو تيکيردي. من و اکبر و اصغر اونا ايشله‌ييرديک. تورپاق غربيلله‌ييرديک؛ بنا الينه کرپيج و پالچيق يئتيريرديک؛ داش داشييرديق و زنبه‌يله اوتاقلارين کفين دولدورورديق. صاحيبخاناميز سؤز وئرميشدي ائوين ايشي قورتاراندا هره‌ميزه بير دست کت شالوار آلسين.
هر گون ننه ناهاريميزين پولون وئرير و بيزي يولا ساليردي. بازارچادان کئچنده باميه سيني‌لرين گؤررکن آياقلاريميز سوستاليردي. سيني‌نين بؤيرونده اوتوروب پوللاريميزين‌هاميسين باميه يئييرديک و آخشاماجا آج و پولسوز قاليرديق.
ننه درزي‌ليکله ائوين خرجين چيخارديردي. بالاجا باجيم عذرا دا اونا کؤمک ائديردي. آتا باغ اجاره ائله‌ميشدي. يايلار ايشي ائله بويودو.
عذرا آخشام اوشاقيانا و شيرين ديلي‌له بيزه دئييردي: “ناهار يئيه‌نده، ننه دئيير: آه…آي آللاه کئشگه ايکي قاناديم اولايدي الان اوچايديم و بو قاتيق-خياري آپارايديم بالالاريما. آخ الان او داش تورپاق ايچينده نه يئييرلر؟ اللاه ائله‌مه‌ميش ناخوش اولماسينلار”.
ننه بيلميردي کي بيز همن صوبح تئزدن آزاجيق پولوموزو دا خرجله‌ييريک و آخشاماجا پول چيخارتماغا هر قاپييا ويريريق.قازانج يوللاريميزين بيري ده چؤرک خانايا خمير تشتي آپارماق ايدي. بير قادين واريدي اؤزو خمير ياپيردي و آپاريردي چؤرکچي اونا مخصوص چؤرک پيشيرسين. اکبر خمير تشتين باشينا آليردي و چؤرکچي‌يه آپاريردي؛ ايکي قيران آليردي. اصغر ده آتيلميش کاغيذلاري کوچه‌دن توپلاييب، باققال يوسف عمي‌يه وئريب، ايکي قيران آليردي.بير گون يوسف عمي‌کاغيذلاري واراقلاياندا آراسيندان يئکه بير تويوق پوخو تاپدي. داها بيزدن کاغيذ آلمادي.
ناهار يورغون و آج اوتورورديق. آزجا چؤره‌گيميزله باشيميزي قاتيرديق. يدالله عمي‌کي فهله‌يدي هر گون ناهارا طالبي آليردي. بير گون دؤره‌سينده اوتورميشديق. طالبي‌ني سينديريب آچدي. طالبي قورتلاميشدي. ايچي قارالميشدي. گولدوک. يدالله عمي‌عصبلندي و دئدي: “گلن دؤنه‌دن داها طالبي آلمارام. نه دن ايچي گؤروکمه‌ين بير شئي آليم، هن؟ اوزوم آلارام. سيز ده آز گولون. مگر ايندييه‌جن قورتلاميش طالبي گؤرمه‌ميشدينيز؟”
سونرا طالبي‌ني چؤله آتدي و بيز گيزليجه اونو گؤتوروب يئديک.
بيرگون ده چوخ آجيديق. بير اوغلانجيق بير پاکات دولو خورمايلا کوچه‌دن کئچيردي. اوغلان گؤزل کت شلوار گئيميشدي و اوزون ساچي واريدي. خورما بيزيم آج قارنيميزي تحريک ائله‌دي. اکبره دئديم: “اليندن خورماني قاپيب قاچيردا بيلرسن؟”
اکبر آغزينين سويون اوتدو و دئدي:” هه.هه داداش جان.الان”
اکبر قاباغا گئديب سوروشدو: “آغاي اجاق‌زاده نين ائوي‌هارادي”؟
اوغلان اطرافا باخاندا، اکبر خورما پاکاتين قاپيب، قاچيرتدي. اوغلان‌هاي‌هارايلا ائوه گئتدي. آناسي و نئچه نفر قوهوملاريندان گتيردي. قورخودان اسيرديم. اوغلان منه اوز چئويريب دئدي: “بير قيرميزي کؤينک اوغلانيدي. ائله بو ائوده ايشله‌ييردي.هارا گئتدي؟”دئديم: “بيلميرم. اصلن اونو تانيميرام”.
اکبر اوزاقلاردان ديوارين کناريندان باشين اوزاديب باخيردي. من اونو گؤروردوم.
اوغلان آناسي‌لا گئتدي؛ امما اکبر گون باتينجا اوزاقلاردا دورموشدو. بيزيم يانيميزا گلمه‌يه اوره‌ک ائله‌ميردي.
اصغرين کيچيک بير آغاج صانديغي واريدي کي اوستا بنا آديني “بدبختليک صانديغي” قويموشدو. نييه کي نئچه تيکه قورو چؤرک صانديغين ايچينده يدي و همشه ده او صانديغين اوستونده بيزيم آراميزدا داوا- دالاش و چيرپيشما اولوردو.
صانديغي ائودن بويات چؤرکله دولدوروب، ايش يئريميزه آپاريرديق. بعضن ده اصغر پيسپيستا يا چکيرتگه توتوب بدبختليک صانديغينا آتيردي.
آخشام توز تورپاقلي و يورغون ائوه يئتيشيرديک. ايشتاهلا هر نه سوفرادا وار، يئييرديک. اصغرين تيکه بوغازيندان گئتمه ميش، خورولتوسي اوجاليردي. ننه اونو اللري اوسته يئرينه آپاريردي و غملي اوخويوردي: “آي بالاجا چؤرک گتيره‌نيم؛ آي تورپاغلي پيشيگيم. قابارلي و چاتلاميش اللرينين قورباني اولوم بالا!”
آخشام ياتاندا دئييرديم کئشگه هئچ واخت اويانمايام. صوبح يئنه گرک زورلا اويانيب ايشه گئده‌يديک.
بير گون ناهار چاغي ياريمچيق ديوارين کناريندا اوتورميشديق.هاوا بورکويدي. آغزيم تورپاق دادي وئريردي. اکبرين گؤزو قيزارميشدي، آغريييردي. آهک قيريغي گؤزونه چيرتلاميشدي.
آج و حالسيزيديق. بنا و فهله‌لر تزه تاواني دوزلميش اوتاق دا اوتورميشديلار. ناهار يئييرديلر.گونش گؤيون اورتاسيندايدي. بير کيشي الينده بير تيکه بوز روزنامه آراسينا قويموشدو، سورعتله سووشدو.
بيردن قارا چرشابلي بير قادين گؤردوم. حيطه طرف گليردي. اوزاقدان منه ايشاره ائله‌دي. ياخينا گئتديم. ننه‌يدي. پورتوميشدي و اوز گؤزوندن تر آخيري. او قدر يولو پيادا گلميشدي!! نيگران اولدوم.ننه چرشابين قيراغا ويردي. اونون آلتيندان باغلي بير منديل منه وئريب، دئدي: “بوگون آلچا شورباسي پيشيرميشديم. سيزسيز يئيه بيلمه‌ديک.
عذراني ائوده قويدوم. سيزين پايينيزي گتيرديم. ايستيکن يئيين. ياخشي شوربا اولوب.
نوش اولسون جانيزا بالالاريم”.
ننه‌نين تانيش اييي ايسته‌ملي شوربا اييي‌له قاريشيب، حالدان حالا چئويردي مني. دئديم: “ننه‌جان اللرين آغريماسين”.
اکبر و اصغرده خبردار اولدولار، گلديلر. ننه تورپاغلي اوزلرين اؤپدو و اکبرين قيزارميش گؤزون گؤررکن، اوزونه سيللي ووردي. ياش گؤزلرينده دالغالاندي و گئتدي.
باغلي دستمالي آچديق. اوستونده‌کي ايچينده دؤيولميش ات اولان بشقابي کنارا قويدوق.
چورگي ات سويوندا تيلتا ائله‌ديک. اصغر بير تيکه دؤيولو ات‌دن يئدي. اکبر باشينا بير قاپاز سالدي. دئدي: “اؤنجه گرک سويون يئيه‌ک. نه دن الي اوزونلوق ائله‌دين؟ مگر بيري اته ال وورموشدي سن ده ويردين؟”
اصغرين گؤزوندن آغزينداکي تيکه‌دن شيشميش تورپاغلي اوزونه ياش آخدي. اوزولدوم و اکبرين سينه‌سينه يومروق ووردوم. اکبر تپيک‌له شوربا کاساسين حيطين اورتاسينا توللادي. قان گؤزلريمي‌آلدي. داها نه ائده‌جه‌ييمي‌بيلمه‌ديم. اليمي‌دؤيولموش اته ساليب، چنگه‌له‌ييب تورپاغلارا توللاديم.
اوچوموز ده آغلاديق. اوستا بنا يدالله عمي‌دن سوروشدو: “نه اولوب بو اوشاقلارا؟ نه دن بو گون ايت پيشيک کيمي‌بوغوشورلار؟”
يدالله عمي‌جاواب وئردي: “نه بيليم. بلکه دده‌لرينين مئراثي اوستونده ساواشيرلار.
بلکه ده بدبختليک صانديغين آچيبلار”.
گؤزلريمي‌کؤينه‌گيمين قولويلا سيليب، غربيلي گؤتوروب، تورپاق جوماسينا طرف گئتديم….
منبع :