قوطولو کيشي

بولگه لر سرويسي: »هئچ زامان اونودولمايان عزيز دوستوم جبرئيل زماني‌نين شرفلي خاطره‌سينه«.

حبيب فرشباف

 بولگه لر سرويسي: »هئچ زامان اونودولمايان عزيز دوستوم جبرئيل زماني‌نين شرفلي خاطره‌سينه«.
الي قوطولو بير کيشي سحر تئزدن گليب، مدرسه‌نين قاباغيندا، دووار ديبينده دايانميشدي. رياضي معلّمي اونو اوزاقدان گؤردوکده  »بو کؤپک اوشاغي‌نين اَل چکن گونو يوخدور« دئيه، باشيني آشاغي ساليب، سرعت‌لي آدديم‌لارلا مدرسه‌يه گيرمک ايسته‌ديکده، قوطولو کيشي اونون قاباغيني کسيب، يالوارماغا باشلاميشدي…
آنجاق معلم ياخاسيني اونون اليندن زورلا قورتاريب، عصبي حالدا: »آقاي محترم، من رياضي نومره‌لريني چوخدان تحويل وئريب قورتارميشام« دئييب، مدرسه‌يه وارد اولوب، کئچيب  گئتميشدي.
قوطولو کيشي کور  پئشمان يئنه چکيليب دونبه‌لن- دوز دووار ديبينده دايانميشدي.
بو ايشين اوستوندن ساعاتلار کئچسه‌ده، معلم نومره‌لري سياهه‌يه کؤچوروب، دفتردن حيطه چيخارکن، يئنه همان يئرده، گؤزو همان کيشي‌يه ساتاشديقدا، بو دؤنه اونا يازيغي گليب، مدرسه باباسيني اونون يانينا گؤند‌رميشدي.
بيرآزدان مدرسه باباسي کيشي‌نين اوغلونون آديني سوروشوب، حميد زماني  حميد زماني، دئيه  دئيه معلمين يانينا قاييتديقدا، معلم سياهه‌سينه باخارکن، بيردن  »بابا بو اوشاغين کي نومره‌سي اييرمي‌دير، تئز اول گئت کيشي‌دن موشدولوغونو آل! « دئميشدي.مدرسه باباسي سئوينجک کيشي‌نين يانينا قاييديب  »موشدولوغومو وئر آي آغا، اوغلون قبول اولوب! رياضي نومره‌سي‌ده اييرمي‌دير« دئديکده، قوطولو کيشي:
 آي آتان رحمتده آي عمي! ائله من‌ده بونون ايچون مزاحم اولموشام‌دا، آي قارداش! سنه يالواريرام هئچ اولمازسا ياريم نومره اوغلومون نومره‌سيني آزالدا بيلسن، سن نئجه بويورسان خجالتيندن چيخارام« دئميشدي.
مدرسه باباسي بو سؤزلري ائشيدرکن ال‌لريني بير بيرينه چاليب، شاققا چکيب گولرکن:
 درگاهينا شوکور الهي، هر جوره‌سيني گؤرموشدوک، داي بئله‌سينه راست گلمه‌ميشديک  دئيه‌ره‌ک مدرسه‌نين قاپيسيني باغلاييب، گؤزدن ايتميشدي.
بئله اولدوقدا قوطولو کيشي ملول  موشکول ائوينه قاييديب  »آي آروات، يازيق اولدوق، معلم نومره‌ني آزالتماق ايسته‌مير«  دئييب، شيرني قوطوسونو يئره توللاميشدي…
***
بير نئچه آي قاباق جبي کيشي، اوغلو حميدين رياضي ورقه‌سيني گؤردوکده، دوستو حبيب‌ه زنگ ائديب، اوغلو حميدين رياضي درسينه کؤمک ائتمه‌سيني ايسته‌ميشدي.
ايلک دؤنه حبيب گليب حميده رياضي درسيندن صحبت آچديقدا، حميد اونون جوابيندا: منيم نه رياضي درسيندن خوشوم گلر، نه‌ده رياضي معلم‌لريندن  دئميشدي.
آنجاق حبيبين اصراري نتيجه‌سينده حميد اوزدن گئديب، هفته‌ده بير جلسه رياضي اؤيرنمک‌له راضي‌لاشميشدي. البته گونلر گليب اؤتدوکجه حميدين رياضي درسي ياخشي‌لاشسادا، آنجاق بو مسئله اول آي‌لار چوخ چتين‌ليک‌له باش توتموشدو، بئله کي بير دؤنه حبيب گليب اونلارين قاپيسيني چالديقدا، حميد قاپيني آچماييب، حبيبين جوابيندا:
 اونلار داها بوردا اولمورلار. جبي گيل چوخدان بو ائودن کؤچوب گئتميش‌لر  دئميشدي. لاکن بئله  بئله ايشلره باخماياراق، حميد رياضي درسيني اؤيرنديکجه، اونون گونو  گوندن رياضي درسينه‌ده رغبتي آرتميشدي، بئله کي او ايندي داها کلاسين اعلاچي شاگردلريندن ساييلا بيليردي. بئله اولدوقدا، حميد سون امتحاندا اييرمي نومره‌سي آلا بيلرسه، جبي کيشي اونا بير دوچرخه جايزه‌سي وعده وئرميشدي. ائله بؤيوک مصيبت‌ده دوز بورادان باشلانميشدي.
او گون حميد رياضي امتحانيندان قاييدارکن، هله حيط قاپي‌سيندان ايچه‌ري کئچمه‌ميش، باغيرا باغيرا  »بابا! بابا! موشدولوغومو وئر، رياضي درسينده اييرمي آلميشام « دئديکده، بئچارا جبي‌نين آز قالا اوره‌يي قيريليب دوز ايچينه دوشن کيمي اولموشدو. آخي دوچرخه آلماق ايچون بير اَتک پول گره‌ک‌ايدي، بئچارا جبي بو پول‌لاري هارادان اله گتيره بيلرميش!!
جبي کيشي دردي‌نين چاراسي ايچون تکجه رياضي معلمينه اوميد باغلاميشدي، اوداکي ايندي نومره‌ني آزالتماق ايستمه‌ديکده، بئچارا جبي کيشي داها بوسبوتون باشيني ايتيريب، ايندي داها نه ائده‌جه‌ييني بيلمه‌ميشدي…
آنجاق چوخ گؤتور  قوي ائتديکدن سونرا، جبي کيشي گئديب، او گون آخشاما تي‌بي‌تي گاراژيندان بير کليبر بيليطي آلاسي اولدو. او، اوغلو حميدين دوچرخه مسئله‌سي بوسبوتون ياديندان چيخانا قده‌ر گئديب طوعلي کندينده قالماق قرارينا گلميشدي

منبع :