شهريم ديل آچان گئجه

بولگه لر سرويسي: مدرسه‌نين سالونون‌دان چيخيب، قفس‌دن آزاد اولموش قوش کيمي، قاپييا ساري اوچورام. آيدا »لاله« دئيه حيطين او تاين‌دان سسلييير.

ريحانه پورغني

بولگه لر سرويسي: مدرسه‌نين سالونون‌دان چيخيب، قفس‌دن آزاد اولموش قوش کيمي، قاپييا ساري اوچورام. آيدا »لاله« دئيه حيطين او تاين‌دان سسلييير.
دوروب، قيزلارين ايچين‌ده، گؤزلريم‌له اونو آختاريرام. گيله‌نار آغاجي‌نين آلتين‌دا، يئتيشمه‌ميش تورش گيله نارلاري يئيه، يئيه منه أل ائليير. آغزيم سولانير. باشيمي ساغا-سولا ترپه‌ديب، سول أليمي، نه دئيرسن؟ دئيه آچيرام.
-تا تاا تا تاا، مين اوچ يوز يئتميش بئش، درس ايلينين سونوو. بيله‌جه، دبيرستانين ايلک صينيفين بيتيرديک. آيدا گؤيه آتيليب، قيشقيرير. هارا قاچيرسان، دئيه‌سن سون ايمتاحاني وئرميشيک ها، گل بورا ايندي قيزلار دا امتحان‌دان چيخارلار ، بيراز دئييب-گولک.
-يوخ، من قالا بيلمه‌رم، تله‌سيرم. گئدريم ائوه چمدانيمي باغلييام. آخشام چيخيريق سلماسا، خاور ننم گيله.-ياخچي بابا گئت. سلماس دليسي. اوردا نه وار بير بئله سئوريسن اوراني.
-روحوم، عشقيم، خاور ننم. باغيريب گولدوم. و اونون صانديغي، ديل آلتي ميزيلداديم. بو ايل من اون بئش ياشيما دولموشدوم و او صانديغين قاپيسي منه آچيلاغاعيدي.
-خاور ننه دئينده گور نه گؤزلري پار-پار پاريلداير. سن الله بو دفعه خاور ننه‌ن تبريزه گلنده، منه ده دئنن گليم گؤروم بيله‌سين. بلکه اونو نيه بوقدر چوخ سئودييني بيلديم.
-ساغ أليمي قووزاييب، آيدايلا خداحافيظ له شيرم.
باقاژي چمدانلا تيخيلميش، ياشيل رنگلي دؤرد يوز بئش پژوموزدا اوتوروب سلماسا ساري يولا دوشدوک، آتام بير کاست آتدي ماشينين ضبطينه، »کوچه‌لره سو سپميشم/ يار گلنده توز اولماسين«، رشيد بهبودوفون ماشينا جالانميش يوموشاق سسييله و ماشينين نَني کيمي ييرقالاماسييلا، بئشيک‌ده لايلايلا خومارلاشان اوشاق کيمي، گؤزلريمي يوموب درين بير يوخويا دالديم، گؤزلريمي آچان‌دا، يام-ياشيل آلما باغلارينين آراسين ‌دان کئچن يول، سلماسا ياخينلاشما موشتولوغونو وئريردي بو شهره گلنده آنامين اوزونه بير آيري گؤزلليک اوتوروردو. قومرال گؤزلري داها آيدين باخيردي. گولوشو داها دادلانيردي. آغ دريسي، جانلانيب، آينا کيمي دورولاشيردي. بلکه ده آنامين بو فرحلي احوالي، اوشاقليق چاغلاريم‌دان مني بو شهره ماراقلانديريب، گؤرونمز بير ايپله مني بورا چکيردي. شهرين ايچينه گيرديک، دوم‌-دوز، گئنيش، خيابانلارين‌دان کئچديک، خيابان بويونجا دوزولموش هوندور آغاج‌لارين کؤلگه‌سي، اورتادا سرين بير تونل چکميشدي ، هردن ده ياشيل بوداق‌لارين آراسين‌دان بويلانان گونش، اوزومه دوشوب، گؤزلريمي قاماشديريردي. ميللي مسجيدين دالين‌داکي خيابانا يئتيشديک، آکاسييا آغاجي‌نين گول‌لرينين اييي، خاور ننه گيلين دربندين بوروموش. ماشين‌دان يئنيب، هر تاين‌دا بير دمير لاله گولو اولان، ماوي قاپيني چالديم.
-قاپي چالان؟ کيم‌سن؟
جواب وئرمه‌ديم. قاپي آچيلدي، خاور ننه‌نين اورتا بويلو گؤوده‌سي، آغ بنيزي، قومرال بويانميش قيسا، قيوريم ساچ‌لاري، قاپينين آراسين‌دان گؤرسندي. بوزا چالار گؤز گيله‌لري شوق دان تيتره‌دي. هميشه‌کي کيمي سليقه‌لي گئينميش.
کرم کؤينک، فون ميدي أتک. قوجاليغينا رغما هله ده فرم‌دا اولان آياق‌لارينا، أت رنگي جوراب چکميش. قولاق‌لارين‌دا دا منيم چوخ سئودييم، ياقوت سيرغالاري نارين‌دان تيترييردي.
-الله‌يم، بالا گلميش، لاله‌م گلميش.
خاوو ننه مني برکدن باغيرنا باسادي. ايچري گيرديک، حيطي بوروين مور سالخيملي، ياسمن گولونون ايي بورنوما دولدو. تزه‌جه سولانيب، سوپورولن حيطين اورتاسين‌داکي فوواره‌دن هاوايا آتيلان سو داملالاري، اوز-گؤزومه سپيلب، جانيمي تزه‌له‌ييردي. خاور ننم قيرميزي پالازي، حيطين بير کؤشه‌سينه سريب، قيزيلي ساماواريني قورموش. اوتوروب، دادلي کومور چايين‌دان ايچيب، دينجيميزي آلان‌دان سونرا، ايلک ايش دوروب خاور ننه‌نين اوتاغينا گئتديم. تاريخ قوخويان او اوتاق، مني بو دونيادان قوپاران اوتاق.
توتقون کت-شلوار، آچيق رنگلي کؤينک گئيينيب، بير جيزگيلي کراوات تاخيب، باشين بير آز سول طرفه اييب. احمد بابا، ديوارداکي، آغ-قره شکيل‌ين ايچين‌دن منه باخير. دانتل پرده‌دن سوزولن گونشين ايشيغي، شکارگاه ناخيشلي لاکي قالي‌نين اوستونه سريليب.
سول طرف‌ده بويوک بير کيتابخانا، کيتابخانانين اورتا رفين‌ده، خاورر ننه‌نين معليمليک دؤرونه عاييد، نئچه چرچيوه‌لنميش شکيل، يانين‌دا دا بير ايري گوللو قهوه‌اي مبل وآياق‌لاري گؤزلجه اويولموش، جئيران آياغينا اوخشار بير ماسا.
ساغ طرف‌ده ده اوستو، بوتالي تيرمه‌يله اؤرتولموش أسکي بير صانديق. ايل‌لر بويو ايچين‌ده‌ نه اولدوغونو مراک ائدييم، خاور ننه‌نين خزينه آدلانديرديغي او صانديق. خاور ننه‌نين، آتاسي‌، احمد بابانين صانديغي.

منبع :