تاختالي کؤيدن مکتوب‌لار

بولگه لر سرويسي: سئويملي ائششک آريسي مکتوبومو آلينجا بيليرم تعجبلنه‌جکسن. »بيز اونو نال‌لاري دا چوروموش بيليرديک، گؤره‌سن هانسي آخيردان چيخدي«-دئيه، حئيرتلنه‌جکسن. حئيرتلنمه! تاختالي کؤيده‌يم. سنه بو مکتوبومو دا اورادان يازيرام.

يازار : عزيزنسين
چئويرن: اسماعيل شيخلي
بولگه لر سرويسي: سئويملي ائششک آريسي مکتوبومو آلينجا بيليرم تعجبلنه‌جکسن. »بيز اونو نال‌لاري دا چوروموش بيليرديک، گؤره‌سن هانسي آخيردان چيخدي«-دئيه، حئيرتلنه‌جکسن. حئيرتلنمه! تاختالي کؤيده‌يم. سنه بو مکتوبومو دا اورادان يازيرام.
 بير زامان يئر اوزونده ياشايان بوتون بؤيوک‌لر ايندي بوراداديرلار. من ده اونلارين آراسيندايام. سن ايندي منيم داليمجا »ساغليغيندا قدريني بيلمه‌ميشيک « ـ دئيه، ديزلرينه دؤيسن حاقلي‌سان.
»کور اؤلندن سونرا بادام گؤزلو اولور« سؤزلري‌نين معناسيني او کور قالميش دونيا قده‌ري بيلينمه‌ين‌لرين سون منزيلي تاختالي کؤيه گلينجنه، چوخ باشا دوشدوم. آنلاديم کي منيم اؤلومومدن سونرا بورنومون اوجوندان اوزاغي گؤرمه‌ين گؤزلريمه »سورمه‌لي گؤزلر«، »باخيشي‌لا جان آلان گؤزلر« ـ دئيه، تعريف‌لر سؤيله‌ميش‌لر.
دونيادا اذيت چکدييينه گؤره اؤزونو اوزومه! اؤلندن سونرا قزئتلرده سنين حاقيندادا »بيزه عوضسيز بير ايتگي اوز وئرميشدي« ـ دئيه، يازاجاق‌لار. ساغليغيميزدا بيز يوخسوللارين قدريني بيلميرلر؛ هئچ يئرده يئر وئرميرلر؛ اؤلندن سونرا سن ده ساغلارين قلبينده ياشاياجاقسان، او دونياداکي يئرين ايسه ائششک جنتي اولاجاق. من بورادا ياشايارکن ساغليغيندا يئري ـ يوردو اولمايان، اما اؤلندن سونرا يئري بوش قالان »عوض ائديلمز« ائششک قارداشلاريندان بيري باشينا گلن‌لري دانيشدي: ايستي بير گونوموش. ائششه‌يي يامان يوکله‌ييب‌لرميش. يوکون آلتيندا لهلييه ـ لهلييه گئده‌ن ائششه‌يين يولو بير دنيز کنارينا دوشور. ساحيلده‌کي يايلاقدا هوندور ائوين قاباغيندان کئچرکن اوستو چئييرلي ائيواندا دايانان بير ائششک گؤرور. ائششک ديش گؤينه‌دن بوز پاپروزونو توستوله‌ديرميش. يوک التيندا لهليين، قان- تره باتميش ائششک ائيواندا خفيف کوله‌يين آلتيندا اوتوروب، ايچگي ايچن ائششه‌يه حسرتله باخاراق: ـ »اؤزونو نه يامان دارتيرسان؟! نه اولوب؟ يئر اوزونده سن ده ياشاييرسان، من ده« ـ دئييب، ائيوانداکي ائششک يوک آلتيندا لهليين ائششه‌يه بئله جواب وئردي:
– دوزدور، سن ده ياشاييرسان من ده؛ اما سن ائله ياشاييرسان و من بئله.
تاختالي کؤي‌ده مامور باسديريلماديغيندان بورادا ايش‌لر چوخ تئز و قايداسيندا گئدير. انسانلاري حوصله‌دن چيخاردان پوچتا خدمتي بورادا يوخدور. تاختالي کؤي‌ده ياشايانلاردان بيري، دونيادا ياشايانلاردان بيرينه مکتوب گؤندرمک ايسته‌ديکده، مکتوبدا يازماق ايسته‌دييي فيکيرلرين هاميسي مکتوبو آلاجاق آداما عيان اولور. باخ بو ساعات منيم سنه يازماق ايسته‌ديک‌لريمين هاميسي سنه عيان اولدوغو کيمي ….....
سئويملي ائششک آريسي!
سنه بو مکتوبومدا نئجه اؤلدويومو باشا سالاجاغام؛ بلکه بونلار دار گونونده سنه لازيم اولدو. دينله!:
»دوغرودان اؤلموشم. منيم اؤلوموم ايستي بير ياز گونو بوز کيمي کومپوت قاشيقلاديغي يئرده بيردن »اوه اولدوم« ـ دئيه، جان وئرنلرين اؤلومونه بنزه‌يير. منيم اؤلوموم تامام باشقا جور اولدو. بيليرم »اؤلومله ظارافات اولماز« ـ دئيه‌جکسن. دوزدور، بيزيم کيمي‌لرين کي ظارافاتدان کئچيب؛ اؤلوموموز ده ظولوم اولور«.
بيليرم منيم اؤلومومدن سونرا ايکي آدام آرخامجا آغلاياجاق. اونون بيري واصيل، او بيري ده وئدات‌دير. بيرينه بئش يوز، بيرينه ايسه اوچ يوز ليره بورجوم وار. اونلاري هر دفه گؤرنده اؤلوب يئره کئچيرديم. ائله بيل هر دفه اؤلوب ـ ديريليرديم. بئله ياشاماقدان اؤلمه‌يي اوستون توتدوم و اؤلدوم.
اولجه ائوده اؤلمک ايسته‌ديم و سونرا دوشوندوم کي گلن ـ گئده‌ن اولاجاق و منيم يوخسوللوغومو، مفليس‌ليييمي گؤروب اله سالاجاق‌لار؛ ريشخند ائليه‌جک‌لر. اونا گؤره ده ائوده اؤلمه‌مه‌يي قرارا آلديم؛ يازي يايلاقدا، قيشي قيشلاقدا ياشايا بيلمه‌ديم. هئج اولماسا بو ايستي هاوادا ايندييه قده‌ر گؤرمه‌ديييم بير يايلاقدا اؤلوم- دئيه، اؤلوسونو گؤسترمک ايسته‌مه‌ين نجابتلي پيشک‌لر کيمي باش آليب اوزاق ـ صفالي، هم ده گؤزه‌ل منظره‌لي بير يئره گئتديم. اؤلمزدن اول اؤزوم ـ اؤزومدن سوروشدم:
– سؤيله گؤره‌ک سون آرزون ندير؟
قلبيمدن بير سس گلدي:
– ياشاماق!
– »بونون اوستوندن کئچ!« دئديم. سنه وئرديييم سئوال اعدام اولونانلارا وئريلن سئوال کيمي‌دير: »حياتا کئچه بيله‌جک آرزون وارسا اونو دئ!.« قلبيمده‌کي سس بوغوق ـ بوغوق: »ياشاماق!«- دئيه، قيشقيردي:
– سوس! سنين بو آرزون »بير صينيفين ديگر صينيف‌لر اوزه‌رينده آغاليغيني قوروماق دئمکدير«.
قلبيمده کي سس سئوال کيمي اونو اوسته‌لدي:
– بو نئچه ايلده آت قويروغوندا ميلچک کيمي ياشادين. بو دونياندان نه قاندين کي، اوندان ال چکمک ايسته‌ميرسن آي آلدانميش؟!
گؤزلريمي يومدوم و ابدي استراحته چکيلديم. يول کنارينداکي خنده‌يه اوزانديم. يولدان کئچن بير آدام داياندي، بؤيرومه بير ايکي تپيک ووروب منده بير حرکت گؤرمه‌ديکده اوست باشيمي تؤکوشدوردو. جيبيمي ائشه‌له‌ينده قيديغيم گلدي، آما اؤلو اولدوغوما گؤره سسيمي چيخارتماديم. او جيبلريمده پول تاپمادي. ساعات، اوزوک، آليشقان، خودنويس کيمي شئي‌لر ده گؤرمه‌ديکده اوزومه توپوردو. يولدان کئچه‌نين بيريني ساخلادي.
– »بوردا بيري اؤلوب، آما اونو آدام سايماق اولماز«ـ دئدي. پليسه خبر وئرديلر. پليس گلدي جيبلريمي توکوشتورن آدام، در حال ديللندي:
– اوستونده هئچ نه‌يي يوخدور. کيمليييني تعيين ائتمک ممکن دئييل.
–»من بو ساعات، بو ساعات اونون کيم اولدوغونو تعيبن ائده‌رم «ـ دئيه، پليس آرخايينليق‌لا ديللندي.
– بلکه تعيين ائده بيلمه‌ديز؟
– »بيز بونلاري بوش يئره گزديرديک«ـ دئيه، پليس ياخاسينداکي نومره‌ني و بئلينده‌کي تاپانچاني گؤستردي:
– بيز يئلدن نم، سئلدن يئم چکيريک.
– آخي بونو نئجه ائدجک‌سينيز؟
– دانيشديراجاغام.
– اؤلو ده دانيشارمي؟
– بو بيزيم صنعتيميزدير. ديريني هامي دانيشديرار، اوغولسان اؤلونو دانيشدير. ايندي من بو اؤلونو دانيشديريم سن ده گؤر بيز اؤلولري يوخ ، قبير داشلاريني دا دانيشديريريق. هم ده ائله دانيشديريريق کي، ائله بيل کئف مجلسينده غزل اوخويور.
آراديلار، آختارديلار. جيبلريمده فاتئحلي بيرقيزا و بورسالي معليمه يازديغيم شعرلري تاپديلار. پليس شعرلري گؤرونجه:
– »حريف شاعير ايميش»ـ دئدي. ـ «بو شاعيرلر دانيشماغا باشلاديلارمي يئدي دولتين پليس‌لري تؤکولوب گلسه ده، سوسدورا بيلمزلر.«
پليس شعرلري گؤتوردو. مني خندکده قويوب گئتمک ايسته‌ينده، خئيرخواه بير آدام نه اوچون شعرلري گؤتوروب مئيتي خندکده قويماسي‌نين سببين سوروشدو. پليس جاواب وئردي:
– شعر دئدييين شئي چوخ قارما- قاريشيق‌دير. اوندان باش آچماق چتيندير. يئني شعرلر تاپماجا کيمي اولدوغوندان نه يازان باشا دوشور، نه ده اوخويان. اونا گؤره بيزده ان چوخ شعر اوخويانلار سياسي پليس‌لردير. بلکه بو شعرده ده زيانلي بير فيکير وار. بونو آيدينلاشديرماق اوچون سياسي شعبه‌يه آپارمالي‌يام.
اونلار چيخيب گئتديلر. من يئنه ده خندکده قالديم.
باخ، سئويملي ائششک آريسي! من بئله اؤلدوم، آما بونونلا ايش بيتمه‌دي. اؤلمک سنه آسان گلمه‌سين. يوخ، گونلرين بير گونو انشالله اؤلنده باشا دوشه‌جکسن کي آنادان اولدوغونا بير پئشمانسان‌سا، اؤلمه‌يينه مين پئشمان اولاجاقسان. دونيانين ائله بير يئرينه، ائله بير دؤورونه گلميشيک کي، نه آدام کيمي ياشايا بيليرسن، نه ده اؤله بيليرسن.
سونراکي مکتوبلاري‌ دا مئيتيمين باشينا نه‌لر گلدي؟ يازاجاغام. مني آختاريب سوروشانلارا سلاميمي يئتير. »مني سوروشان اولسا « دئديم ياديما دوشدو: (آمانين بيرگونودور گؤزونو يئييم بورجلو اولدوغوم آداملارا يئريمي دئمه! سن تانيييرسان. اونلاردان بيري وار بورجونو آلماق اوچون اؤلوب، بير باش يانيما گلر. مني بورادا يعني »ابدي استراحتگاهيمدا دا« راحات قويماز. سن آللاه ائله‌لرينه منيم عنوانيمي وئرمه!
دوستون، اؤلموش اِششک.

منبع :