آللـه وئره‌ن اومودون اوزولمه‌سين
آللـه وئره‌ن اومودون اوزولمه‌سين
1397/02/09
بولگه لر سرويسي: عؤمور يولداشي، اري، آقاسي، اوشاقلارين آتاسي...هانسي‌سي دانيشيردي؟ بيلمه‌سئيدي ده سؤزلر بونون ديققتيني چکيردي. او دئييردي »اؤز اؤزومه دوشونوردوم تئلويزيادا گؤرسه‌دن قويروغلو اولدوز، گونه ده‌يسيدي، گؤره‌سن داغيلاردي؟ داغيلسايدي يئر کوره‌سي گون اوزو گؤرمزدي داها، هئچ نه بيتمزدي، نه ساغلامليق اولاردي، نه... چوخ چکمزدي‌هاممي‌بيرـ بيرينين جانينا دوشردي. فيکيرلشيرديم اوندا من نئيلرديم؟ گؤره‌سن اوغلومو يئييرديم، يوخسا اوغلوم مني؟ فيکره دالماق‌دان دلي اولوردوم داها، آخيردا ان ياخشي يول، اؤزومو آرادان قالديرماغي گؤردوم؛ اوندا اوغلومو يئمزديم، اودا مني يئسئيدي گؤرمزديم.« .
بو سؤزلر بونو آپاردي چوخ چوخ ايللر بوندان اوله. بير يئرده اوخوموشدو يا بيريندن ائشيتميشدي، قوراقليق، قيت‌ليق زامانيندا بير قونشو او بيريسينين اوشاغيني کاباب ائيله‌ميشدي، اوشاغين عائله‌سي آغلاياراق دئييرميش‌لر گؤزوموزون اؤنونده اوغلوموزو شيشه چکيب يئديلر، بير شيش ده بيزه وئرمه‌ديلر. بو سؤز اوندا بونو چوخ قورخوتموشدو.
دئديک‌لر دوز اولسا، چوخ قالميردي بو گونلرين قاييتماسينا. اون ايل‌دن سونرا سو اوستونده داواـ دالاش اولسا ايه‌ر، چوخ چکمز بير دامجي دا سو تاپيلماز ساواشماغا. اوندا گؤره‌سن بونون دا يالنيز يولو آيريسيني يئمه‌ييم، آيريسي دا مني يئمه‌سين، دئيه اؤزونو آرادان قالديرماغي‌دي؟
بو گونلر همن قورخو يئنه جانينا دوشموشدي، نه ايچون اونلار بونجا قورخموردولار. بلکه ده بو قورخونون شورون چيخارتميشدي. گؤوده‌سينده اولان سولار دا ترايله شيرهاشير گئديردي، اونلارين يئرين نه تهر دولدوراجاغيدي؟ گؤرمه‌دييي نوه‌لري تيکيلدي گؤزونون اؤنونه، اونلاري نه تهر قوروياجاغيديلر، هئچ نه‌يي بيلميردي. بلکه ده اويونجاق گلير بو دوروم اونلارا. بيردن قاباغا گلسه، هئچ کيمسه‌نين حاضيرليقي اولمادان، چوخ آداملار سوسوزلوقدان دئييل، آياق آلتدا اؤلرلر.
بيردن يادينا دوشدو آد گونونده هر نه ايسته‌سه راحاتچيليق‌لا اونا ال تاپار. نه ياخشي کي آد گونو کئچمه‌ميشدي هله. گؤرمه‌ميش اولوب، بيلميردي نه ايسته‌سين نه قالسين: او گونو بوللوق، امن امانليق، راحاتليق، شنليک، ساغلامليق،... ايستهيهرم، دئدي. يئنه گؤزو دويمادي، واختيميزين بيرده ذهنيميزين رهبرلييين ايستهيهرم. دئمک اولماز بلکه ده بيرـ ايکيسينه چاتماق‌لا او بيريسي‌لره ده يئتيشديم، دئدي.
اوره‌يي داريخيب، ائشييه چيخدي، شاه‌گؤلي‌يه ساري يولا دوشدو، اينديه‌دک بئله بير زاد گؤرمه‌ميشدي،هاممي‌نين الينده بير کولونگ، اوزون ـ اوزون گورلار قازيب، دورموشدولار باشيندا. گؤره‌سن بو اوزونلوقدا گورلارين ايچينده نه وار دئيه، احتياط‌لا بيرينه ياخينلاشدي، ايييليب ايچينه باخيب، کؤکوندن قورودو. ياشيل آغاجلاري يان بايان اوزاتميشديلار. گؤره‌سن داشين اوستونده يازاجاغيديلر، ناکام آغاجلار. گؤزلريني آييرماقدا، اونلار بيرليکده باشلاديلار گورلاري دولدورماغا. داها او بيريسي‌لره باخانمادي.
سانکي آدام‌لارين ايچريلرينده کي قورولوق دئولري اويانيب ايشه باشلاميشديلار. اونلار دا آغينا بوزونا باخانمازيديلر،هاردان کئچسه‌يديلر اوراني کوله چؤندررديلر.
يئنه آد گونو يادينا دوشدو. شانس بير دؤنه آدامين قاپيسيني دؤير، ايه‌رسه آچماسان، گئدر داها گلمز. گاهدان اونو تانيماييب، الدن وئرميشم، گاهدان دا باشيمين قاريشيق‌ليغيندان اونو گؤرمه‌ميشم، يا سئچه بيلمه‌ييب، الدن وئرميشم. او گلنده اونو قوجاقلاماسام، اوتوزموشام. آد گونومو قوجاقلاييب اوره‌ييمدن کئچنلري ايسته‌يه‌جه‌يه‌م.
بلکه ده سهندين، ترسه جاذبه ايشله‌ين يئرين، اته‌يينده آنادان اولان‌لار، باشارديلار ترسه ايشله‌مه‌يي. اوندا قورولوق دئولرين ايچريلرينه قايتارا بيلرلر، دئدي.
گورلارين اؤنونده، گؤزو بير آغ ساققالي‌يا ساتاشدي، قوجاغيندا ساز بئکئف اوتورموشدو. اونو گؤرجک اوره‌کلنيب ايچريسي‌نين دئوين يئرينه قايتاريب، اونون قارشيسيندا ايلشدي. آديمي‌سن وئر، ياشيمي‌آللـه وئرسين دئدي. آغ ساققاللي سازيني الينه آلدي، اونون آديني وئريب، باشلادي:
»... يوم وئره‌ييم خانيم، يئرلي قاراداغين ييخيلماسين! کولگه‌ليجه قابا آغاجين کسيلمه‌سين! قامين آخان گورکلي سويون قوروماسين! قانادلارين اوجي قيريلماسين! قادر سني نامرده محتاج ائتمه‌سين! چاپارکن آغ بوزآتين بودره‌مه‌سين! چاليشاندا قارا پولاد اؤز قليجين کوتلمه‌سين! آللـه وئره‌ن اميدين اوزولمه‌سين! آغ آلنيندا بش کلمه دعا قيلديق قبول اولسون! ييغيشديرسين، دوروشدورسون گناهنيزي آدي گورکلي محمده باغيشلاسين«.
منبع :