خليل ابد

بولگه لر سرويسي: ماشيندان ائنيب آيفونون زنگين باسير. بير آز کئچير، او طرفدن سس گلير:

بولگه لر سرويسي: ماشيندان ائنيب آيفونون زنگين باسير. بير آز کئچير، او طرفدن سس گلير:
-کيمسن؟ قاپي دؤين؟
– رحيم آقا؛ منم.
– سلام، گل ايچري!
بونو دئييب قاپيني آچير.
– يوخ، زحمت وئرميرم. گئديرم خليلي گؤرم؛ دئديم بلکه سن ده ايسته‌دين گله‌سن.
– هانسي خليل؟
– خليل ابد.
– نيگرانچليق وار؟
– يوخ.
– بيرآز دايان گئيينيم، گليم.
اوستا رحيم آيفونون دستکيني قويوب، پئنجه‌ييني گئييب ائشييه چيخير؛ ماشيندا اوتورور ، خليل‌گيله ساري يولا دوشورلر.
– آي بالا خئير اولا، بيردن نه اولدو خليل ياديوا دوشدو؟
– خاص بير شئي يوخدو؛ اوزون زاماندي گؤرمه‌ميشم، نه واختديدا گؤيلومه دوشوب. بيرده ائشيتديم خسته‌لنيب، دئديم بوردويام گئديم گؤؤوم.
– نه‌ييدي؟– ائشيتديغيما گورا افسرده اولوب.
– افسرده اولار دا. بئناوا بالا اولان گوندن بير خوش گون گؤرمه‌دي. چؤره ک آتلي اولدو خليل پيادا!– دوز دئييرسن، چوخ چتين گونلر ياشييب. بونونلا بئله چوخ مؤحکم و ايمانلي آدامدي. ائشيتديم افسرده اولوب تعجبلنديم.
– تعجبلنمه، نييه تعجبله‌نيرسن؟ اوميدي بير سازمان ايدي، بيرده يولداشلاري. سازمان کي بئله اولدو، يولداشلاريدا گئت به گئت خليلي اونوتديلار باشقالاريني اونودان کيمي. داي قاپيسين دؤين اولمادي، بيريسي گليب اوتوروب اونونلا دانيشيب چايلاشمادي. آخي خليلين الي داليدي، چؤره‌يي ياوان. بو وضع اوضاعدا کيمدي خليلي آختاريب تاپان؟!– رحيم آغا ائله‌ دئمه‌؛ »پيس يئرده آخشاملاديخ«؛ »هاميني قورت يئدي، امما بيزيم کيمي توکو داغيلان اولمادي«. من هئش کسي قيناميرام، هاميميز گرفتار اولموشوق. منيم زوروم اؤزومه چاتار کي بيليرم قصور ائله‌ميشم. خليل او جور يولداش دئييلدي.– ددن رحمتده، گينه سن نئچه ايلدن سونرا اونودا ياد ائلييبسن.– اوستا رحيم سن اؤزون نئجه؟ سن هئچ گؤررسن؟– نييه، من هردن گؤرورديم. بير زامان 17 شهريور خياوانيندا بير دوکتورون شماره وئره‌ني‌ايدي. هردن گئديب اوردا گؤررديم. هردنده نئجه اولا اونوندا گوذاري بو قره آغاج قفه‌خاناسينا دوشردي. امما بئش آلتي آي اولار کي گؤرمه‌ميشم.ايکي يولداش، ايکيسيده سوسوب فيکره دالديلار. کئچن گونلر بير کينو فيليمي کيمي گليب گؤزلرينين اؤنوندن کئچيردي. خليل‌له ياشاديقلاري گونلر؛ فهله‌لر سنديکاسيندا چاليشديقلاري آن‌لار؛ اورتاق يولداشلاري کي داها يوخايديلار. حيات اونلارا بير دؤيوش مئيداني کيمي گؤرونوردو. بو دؤيوشده بعضي دوستلارينين باشي داردان اوجا دوردو، بعضيلريده حياتلا وداعلاشيب حسرتلرينه قووشدولار؛ بعضيلريايسه سورگون دوشوب وطندن آيريلديلار…
بو آندا رحيم عمي الين اوزالديب دئدي:– او قاباقدا کي بلوکدي.
– هن اودرو با، خليل اؤزوده پنجره‌دن بيزه باخير.– دئميشدين گله‌جاغيق.
– هن، گون اورتادان قاباق زنگ وورموشدوم. آمما دئمه‌‌ميشديم کي سنينله گله‌جاغام.
– پيس اولمويا؟
– بابا نه پيس اولاجاق. باخ گؤر نه اوزو گولور. بوغلاري دا قاققيلدير.
قاپي آچيلير. خليلين يولداشي فاطمه خانيم قوناقلاري قارشيلاييب گيلئيلهنرک دئيير:
– نه عجب! سيز ده بيزه گلرديز. قورخمويون کاسيبليق آنفولانزا دئييل سرايت ائله‌‌سين. گؤر نه زاماندي بيزدن چيخديغيز؟ منيم کي ياديمدان چيخيب. بو اوشاقلار لاپ خيرداييديلار. ايندي اؤزلري اوشاق صاحابيديلار
خليل ديله گلير:– آي آروات، هله گيلئيلنمه، واخت چوخدو، قوي بير قوناقلار ايچري گيرسينلر، ايلشسينلر.اوچ يولداش قوجاقلاشيب دؤنه- دؤنه اؤپوشورلر، هر اوچونونده گؤزلري ياشا دولور، خليل کؤوره‌ليب دئيير:– آخ، به سيز هارداسيز؟ والله من داغيلديم آدامسيزليغدان، يورولدوم تک قالماقدان. بس دئميرسيز منيم گؤزوم يولدادير؟ بيز کي تکجه سياسي يولداش دئييردوخ. ايللر بويو چيين- چيينه ياشاديق، اوشاقلاريميز بيزه عمي دئديلر. فعاليت ائله‌‌ديخ؛ سنديکاني، تعاونيني دولانديرديق. توپ اويناديق، داغا گئتديق، نه‌لر کي ائتمه‌ديخ… ياخشي کئچين ايچري، کئچين ايچري. فاطمه چاي گتير. مئيوه گتير، باخ گؤر کيملر گليب فاطمه، يولداشلاريم گليب. جان- جييريم گليب. باخ نئچه ايلدن سونرا اوره‌ييم آچيلدي، اوزوم گولدي.
خليل دايانمادان، هر يئردن دانيشيردي؛ هردنده بير مئيوه سويوب قويوردو قوناقلارين قاباغينا: -»يئيين دا!« دئييب يئنه دئييردي، دئييردي …، سنديکادان، تعاونيدان دانيشيردي… داغا گئتمکلريندن دانيشيردي… فوتبول تيميندن دانيشيندا گؤزلري دولوب سسي توتولدو:
– اي واي! »سيفي« نئجه گئتدي؟! نه واختسيز گئتدي؟ والله حاقسيزليغيدي، آخي اونون نه واختييدي اؤلسون؟!
بيرآز دايانيب تومور، سونرا آردين توتور:
– من نئچه آي سونرا بيلديم. خسته اولدوغوما گؤره فاطمه ده منه دئمه‌ميشدي. چوخ شرمنده اولدوم، باري قبير اوسته گلرديم.
بيرآز آرا وئريب بير چاي ايچير. استکاني يئر قويوب دئيير:– چوخ دانيشديم چاي‌لار سويودو.
دوروب گئدير چاي‌لاري دييشديريب گلير. اوتورمادان اوز توتوب يولداشلارينا دئيير:
– بس سيز ده دانيشين دا. اوستا رحيم بونا نه گليب. ديليني پيشيک يئييب. گلندن بير کلمه دانيشمييب.– خليل، من قولاغ آسيرام. ياخشيسي بودور کي سوسام، تکجه قولاق آسام، سنينله اوستا رحيم دانيشاسيز. من نه دييه‌جاغام؟ بس من بو نئچه ايلي هاردا قالميشديم؟ بو نه دوستلوغودو؟ دوست، دوستون هانسي چاغيندا دردينه ده‌ير؟ ناواخت گليب اوتوروب دوستونون اورهييني دينلر؟ من دانيشماسام ياخشيدي. بوگون فقط سن دانيش، من ده ائشيديم.زامان نه واخت کئچدي، نه واخت گون باتدي، هئچ بيريسي بيلمه‌ميشديلر. بو آن خليل‌ين يولداشي فاطما خانيم دئدي:– گئتميه‌جاقسيز ها. داش کلم آشي قويموشام.
رحيم آغا ديله گلدي:– فاطمه، والله من گئتمه‌لييم. قوناغيم وار.– يوخ من ده گئتمه‌لييم. چوخ يوبانديم.– روزبه جاني اگر قويام.
– فاطمه شرمنده‌يم. گئجه يولا چيخمالييام. سؤز وئريرم يئنه گلرم. بو دؤنه گئديشيم اوزونا چکمز. گليب اوتوراريق، آش دا ايچريک، بلکه باشقا زاددا ايشديک.
– هر واخت گلسز گؤزوموز اوسته يئريز وار، والله بيزي سئوينديررسيز. بيليرسن کي سني نه قدر سؤيورم.
خليلين سؤزو بيتمه‌ميش هر ايکيسي آياغا قالخديلار. خليل ده آياغا قالخير، قوناقلاريني يولا سالماغا، فاطمه خانيم دئيير:
– بيز کي دويماديق. نئچه ايلدن سونرا خليلين ده اوزو گولدو. خليل‌ين يولداشلاري گلنده اينانين بو ائوه گولوش گلير. آغريميز قاچير.
»سؤز وئريرم تئز- تئز گلرم. سيز ده گلين!« – دئييب، باييرا چيخيرلار. قوجاقلاشيب اؤپوشوب آيريليرلار. ماشين يولا دوشور. هئچ بيريسي دانيشمير…
خئيلک زامان کئچير، اوستا رحيم سؤزه گلير:
– دئييرم انسانين اوره‌يي نه قدر بؤيوک اولارميش.– نئجه، معمار؟– باخ بو آدام هميشه يوخسولوغونان البه‌- يه‌خايدي. عؤمرونده بير خوش گونده گؤرمه‌دي، آمما اوره‌يي وارايدي باخ بو بويدا. (اللريني اووج ائله‌‌ييب گؤسترير )
– دوغروداندا اوجور ايدي.– بير نئچه ايل سنديکانين تعاوني‌سيندا اولدو، آرادا بير آخساخليق اولدو، يوز مين تومن او زامانين پولو اسگيک گلدي. بو موضوع خليل‌دن قاباغا عايديدي، امما خليل دئدي: «آبيريميز گئدر»؛ او پولون دؤرددن بيرين آلدي بوينونا و ايکي ايل قيسط‌ينان او پولو دولدو. او حالدا کي آيليغي اوچ مين تومني ايدي، او آيليغينان دا ائو دولانديريردي.
– رحيم آغا تک پول دئييل‌دي کي، جانينداندا مايا قويانيدي، قورساخلي آدامييدي.
– دوستوم بونو بيل، پولوندان کئچميين، جانينداندا کئچمز.
– بو سؤزون جوهريدي.
– خليل محله اوشاغيزيدي؟
– يوخ اولار »اميره‌قيز«دا اولوردولار بيز »سوسوزلار«دا. انقلابدان قاباق تانيمازديم.
– بس هارادان تانيردين؟– رحيم آغا نئجه تانيش اولدوغوموزدا غريبهايدي. ائله‌ اوگون بو انسان اوره‌ييمه ياتدي. انقلابدان سونرا فيکير ائليرم 58ينجي ايليدي، مدرسه اوشاقلارينان قرار قويدوق گئديب چارراه شهنازدا »کار« ساتاق. ساعات دؤرتده گئتديق فرهنگيان سيناماسينين قاباغيندا قرار اوسته. قراريميز بو ايدي کي ايوب يولداشيميزلا من نشريه‌لري ساتاق، بيريسي آنبار اولسون، بيريسيده انبارين رابطي، نشريه‌لري آز- آز آليب گتيرسين بيزه وئرسين. بيردن فالانژلار تؤکولسه‌لر هاميسي پامال اولماسين؛ ايکي نفر ده گودوکچي اولسونلار. قرار اوسته گؤردوم ايوب اوجا بوي، قارابوغ، بيزدن ياشلي بيريسينن گلدي

منبع :