ياش سئوگي

بولگه سرويسي: بي‌بيم‌گيل هر ايل داغا، يايلاغا گئدرديلر. دده- بابادان قالما نئچه هؤروک يورد يئرلري وار ايدي يام- ياشيل ياماج‌دا. دوم- دورو آينا کيمي ده بولاق¬لار وار ايدي. هر ياي بيزده نئچه گون بي‌بيم‌گيلين اوباسينا قوناق گئدرديک.

 رضوان_جاناي

بولگه  سرويسي: بي‌بيم‌گيل هر ايل داغا، يايلاغا گئدرديلر. دده- بابادان قالما نئچه هؤروک يورد يئرلري وار ايدي يام- ياشيل ياماج‌دا. دوم- دورو آينا کيمي ده بولاق¬لار وار ايدي. هر ياي بيزده نئچه گون بي‌بيم‌گيلين اوباسينا قوناق گئدرديک.
چوخ خوش کئچردي، چوخ دا سئوينرديک. قوزو¬لارين ملشمه‌سي، اينک¬لرين بؤيورتو¬سو، کهليک¬لرين قاققيلتي¬سي … تولوق چالخاماسي‌ني دا سئورديم؛ بولاق¬دان سو گتيريب، تؤکرديلر تولوغا، چالخالارديلار کره اولاردي. بيرآز دا آيران. او کره‌لره، او آيران¬لارا چاتان اولماز. آنجاق کي اوردا، ائل- اوبا ياشامي¬نين، باشقا عالمي وار ايدي، گلنده آغلايا- آغلايا گلرديم ائوه.
ايکيندي چاغي سورو گلردي اوبايا، قيز- گلين بايدا الينده گئدردي ساغينا‌. سونرا قوزو¬لارين سوروسو اميشه گلردي. ملشمه‌سي يورد يئرين آلاردي.
گون¬لرين بيرينده هاي دوشدو: »آي آمان! کؤرپه‌لردن يه¬ليگ اولون قارتال گليب!«
آنام مني بئله چکدي چاديرين ايچينه کي، يالنيز بير آن آغ باش يئکه قوش گؤردوم، چوخ قورخدوم آما گؤزل قوش ايدي. چوبانين هارايي گليردي، دئييردي»بير اوغلاق آلدي جايناغينا!«
چاديرين جيريغيندان باخيرديم سورو داغيلميشدي آرخاجا، چوبان دَيه‌نک الينده ساغا- سولا قاچيردي، بير کئچي يامان مله‌ييردي! هئچ کيمدن سس گلميردي. آنام چاديردان چيخدي من ده داليسيجا. هامي قارتال¬دان دانيشيردي، بيري، يامان قانادي وار ايدي دئييردي، بيري جايناغيندان دانيشيردي، بيري اوغلاق‌دان دئييردي، من او گؤزل آغ باشا فيکيرلشيرديم.
چوبان دَيه‌نک¬له سورونو ييغيب آرخاجا آپاردي. يورد دا ايش¬لر يئني‌دن باشلاندي. آنام اوتورموشدو سوزمه‌لري گيرده‌له‌ييردي قورود کونده‌لسين. من يانيندا اوتورموشدوم. دئديم:
– آي‌آنا؟
– جانا قاداسي؟
– عُقاب‌ين باشي نييه آغ‌ ايدي؟
– قورخدون بالاسي؟
– هه… آما چوخ گؤزل ايدي، بس نييه ککولو آغ‌ ايدي؟
– دور گئت بيرآز دوز گتير سپيم قورودا.
– گتيريم دئ دا آنا.
– گتير قاداسي!
ته¬ليمه- ‌‌تله‌سيک قاچيب دوز دولون گتيريب ديرسک¬لنديم آنامين ديزينه.
– آي آنا باشينا دؤنوم دئ دا!
آنام قارتال‌ين آغ باش اولدوغونو بئله دانيشدي:
اوزون ايل¬لر اؤنجه قارتال‌ين باشي دا، دؤشو کيمي، قانادي کيمي‌ ايميش. همئشه ده گليب بير بولاق¬دان سو ايچرميش، ندنسه او بولاغا دادانميشدي دئييرلر؛ بير بايرام گونو گلر بولاق¬دان سو ايچه. قارا گؤز يارپيزلار تزه چيخميشدي، کؤرپه-کؤرپه. بير آغ کپه‌نک ده او يارپيزلار اوسته ايسلاق قانادلاري¬يلا دوشموش¬ايميش.
قارتال گلنده هاوا بئله ترپه‌نر سانکي يئل اسير، کپه‌نه‌يين ياش قانادلاري بيرآز قورويار. قارتال سويون ايچيب اوچار، بيرداها هاوانين يئل¬لنمه‌سي کپه‌نه‌يي ساغالدار. کپه‌نک اؤزونه گلنده قارتال گؤيون اوزونده گئديردي.
آما کپه‌نک ايچينده باشقا بير دويغو ياشاييردي. ديلي توتار- توتماز بولاق¬دان سوروشار:
– قارتال بيرده نه زامان گلر؟
بولاق دئير:
– صاباح بو زامان يئنه بوردا اولاجاق، ايل¬لردير بوردا سو ايچر.
کپه‌نک دوشونر: »گرک بوردا قالام، بيرده بو مؤحتشم قوشو گؤرم.« او اوزدن يارپيزلار آراسيندا باشين قاتار. صاباحيسي گون قارتال گلنده کپه‌نک سئوينجيندن بيلميردي نئيله‌سين! يارپيزلارين آراسيندا اوتوروب باخار او ساناز قانادلارا، ايچينده دئير: »کئشکه بو قوشون کؤکسونده بير له¬لک اولوردوم.«
او گون¬دن بري دا کپه‌نک بولاق¬دان آيريلماز. هر گون يارپيزلار يانيندا اوتوروب قارتالي گؤزلرميش. گون¬لر دال- بادالا کئچر. بير گون بولاق دئير:
– قاداسي بس سنين يئرين- يوردون يوخ؟
کپه‌نک دئير:
– سؤزون دوزو قارتالا وورغونام!
بولاق بو سؤزه مات قالار کي، »ايلاهي کپه‌نک هارا قارتال هارا؟«آما بير سؤز دئمز. بيلر کي، بيتمه‌ين سئودايا ايليشيب آما دا اور¬ک بيتيب- بيتمه‌مک بيلمز کي!
هاوا پاييزلاييردي، بولاق کپه‌نه‌يه دئير:
– قارتالين بو گون سحر کؤچمه‌لي دير آي بالا، اؤزونه بير فيکير قيلماليسان.
کپه‌نه‌يين ايکي قانادي اولار بير جاني کي، نه ائلييم نه ائله‌مييم، بيردن سانکي ايتييين تاپميشدي، گولوب قارتالين گلمه‌ييني گؤزلر.
صاباحيسي گون قارتال گلنده، ديمديييني اوزادار سويا، کپه‌نک اؤزون آتار سو ايچينه کي، قارتال اونو دا سو ايله بيرليکده ايچسين. کپه‌نه‌گين بو ايشي قارتالين ايتي گؤزلريندن گيزلي دئييلدي، بير گؤز قيرپيميندا باشي اوسته آليب کپه‌نه‌يي سودان چيخاردار.
قارتال سو ايچمه‌دن چکيلر قيراغا کي، کپه‌نک قوروسون.
کپه‌نک آرزي‌سينا چاتميشدي، قارتالين له¬لک‌لري آراسيندا يئرلشميشدي، بوندان گؤزل نه اولا بيلردي کي؟ کپه‌نک سئوينجدن له¬لک‌لر آراسيندا قورودو!
قارتال کپه‌نه‌يين سئوگي¬سيني آنليردي آما دوشونوردو: »من هارا؟ کپه‌نک هارا؟ منيم يئريم دومان¬لي داغ-لارين قوينودور، اونون يئري…«
بورا يئتيرنده آنامين بوغازيني هيچقيريق توتموشدو، سسي توتولدو، قالانين دانيشا بيلمه‌دي، ساده‌جه دئدي آغ کپه‌نک آغ له¬لک اولدو قارتالين ککولونده.
 

منبع :