سحرلر ده سني گؤرمک ايچون گؤزلريمي‌آچيرديم
سحرلر ده سني گؤرمک ايچون گؤزلريمي‌آچيرديم
1397/02/23
بولگه لرسرويسي: هر سحر آچيلديقدا، هر ايشدن اؤنجه گليب اؤنونده دايانميشديم. سلام وئريب، دردلشميشديم سنينله. هله نه ياخشي کي اوزاق اولسايدين دا وارايدين.
او گون سحر يوخولاريمين داوامي‌اولان خوليالاريمدان، چتينليکله آيريلاراق يئنه ده گلديم، گؤرمه‌ديم سني.هارا گئده بيلردين؟ يوخسا گئجيکمه‌ييمدن کدرلنميشدين؟ سن کي کوسه‌ين دئييلدين. بلکه ده بير سيرا ايشلردن اوتانيب گيرميشدين يئره؟ آخي نئيله‌‌ميشدين کي اوتاناسان دا؟ هئچ ايندي يئره گيرمک زاد دا موددان دوشوب، معلوم دا دئييل او آددا بير زاد وار يوخسا يوخ. ]او گون قوناقلاري وارايدي، مني ده چاغيرميشديلار. آشاغي قاپيلاري آچيقايدي، پيلله- پيلله سسي اوجاليردي، قاپيلارينا يئتيشديم، سسين آتميشدي باشينا، قيچلاريم تيتره‌يه‌رک اليمي‌آپارديم زنگه، سس بوندان آرتيق اوجالماسين دئيه دويمه‌ني باسديم.هامي‌گلنده‌ن سونرا، چايلار ايچيليب ـ ايچيلمه‌ميش آغزيني سيلدي و باشلادي دانيشماغا، سؤزلرينين اورتاسيندا »سايغي گؤسترمک، ان بؤيوک انساني داورانيشلارداندير…» جمله‌سينه يئتيشندن سونرا قالان سؤزلريني ائشيتمه‌ديم.[ بلکه‌‌ده سؤزلريم داريخديرميشدي سني؛ يوخ سن چوخ دؤزوملويدون.
اؤزومو بئله تکرارلانميش سؤزلرله توولاسئيديم ده، قورخومو ديرناق اوجوجا آزالدا بيلميرديم. ياخشي کي ائولره سيغيشمازسان! سيغيشسايدين ايه‌ر، مود اولاردين، گونده‌ليکده يازارديلار، تلويزيادا ديقه‌دن ديقه‌يه سني گؤستريب سندن دئيرديلر، اس ام اس وورون، گؤندراخ يازارديلار. توکان ـ بازار دولاردي سنايله.هامي، گرکلي اولوب اولماديغينا باخماياراق، اؤزوندن ده چوخ اؤزونه اوخشايانلاردان بير ايکيسيني آليب قويارديلار ائولرينين دووارلاري يئرينه؛ ائله کي اؤزون ده اؤزونو سئچنمزدين اونلارين ايچيندن. اونلاري اؤزون سانيب اؤزلويونو ايتيرردين.
بلکه ده هنده‌ورينه پرده چکيب، سني آپاراندان سونرا، يئرينده اؤزونه تايين ايشله‌ييرديلر. بلکه ده باشقا يئرده دوزلتديکلريله بوش يئريني دولدورماق ايسته‌ييرديلر.
بير گون، ايکي گون، اوچ گون، …، اون گون… هر گون گلرـ گلمز آياقلاريملا گليب، اؤنونده دايانيرديم، آمما هئچ نه گؤره بيلميرديم. گومانيم يئله گئديردي، او دا سنينله گئتميشدي. نه گون چيخيردي، نه ياغيردي، نه ده بوداقلار ترپنيردي.
گئجه‌لر »سني سحر گؤردوم بلکه» دئيه، گؤزلريمي‌يوموردوم، سحرلر ده سني گؤرمک ايچون گؤزلريمي‌آچيرديم.
سني گؤرمه‌ديييم گوندن، هر گون سني گؤزومدن ايتيرنلري، سني کدرلنديرنلري، قورخاـ قورخا قارغيييرديم، بيردن اؤز اته‌ييمي‌توتماسين دئيه. ]آرا وئرمه‌دن ديليمي‌ديشله‌ييرم، آخي دئيرلر قارغيشلي باش سالامات اولار. سالامات اولار يوخسا سالامات قالار؟ اينترنتدن تورکي مثللري آختارديم، او مثلي تاپماديم، آز قاليردي باتام قالام مثللرين ايچينده. ديليمي‌بتردن ديشله‌ديم »قارقشين ايکي باشي اولار« مثلين گؤرنده.[
بو گون سحر چاغي دا عادت اوزره گليب اؤنونده دايانديم. سئوينديييمدن نه ايش گؤره‌جه‌ييمي‌بيلميرديم. نئچه دؤنه گؤزلريمي‌يوموب، آچديم. سن يئنه وقارلا، قارلي و دومانلي، اؤنومده دايانميشدين. هيجانلاريمي‌کلمه‌ـ کلمه سنه باخاـ باخا بير بيرينين داليسينا دوزوردوم.
منبع :