سؤيله ييرلر کي، بو مئشه دونياني احاطه ائدن و منيمکينه اوخشار تاختا کومالارين قارشيسيني کسن دنيزه قدر اوزانير. فقط من هئچ واخت او دنيزي گؤرمه ميشم، اونون باره سينده ده آيدين تصووروم يوخدور. من هئچ مئشه نين عکس طرفيني ده گؤرمه ميشم.

  بيز اوشاق اولاندا بؤيوک قارداشيم مني آند ايچمه يه مجبور ائتدي کي، بو مئشه ني سون آغاجينا قدر بيرليکده قيراجاغيق. قارداشيم حياتلا ويداعلاشدي، ايندي من بو ايشي باشا چاتديرماقدان اؤترو بير آدام آختاريرام و گومان کي، هله چوخ آختاراجاغام. غرب طرفده کيچيک بير چاي آخير و من يالين ال له اونون سويوندا باليق توتماغي باجاريرام. مئشه ده هم ده آجگؤز قوردلار فيرلانير، لاکين جاناوارلار مني قورخودا بيلمزلر: بالتام، بيرجه دفعه  ده اولسا، يييه سيني داردا قويماييب. ياشاديغيم ايللري سايماميشام. بيليرم کي، اونلار لاپ چوخدان اوست-اوسته قالانير. گؤزلريمين نورو گئت-گئده آزالير. يولو آزماماق اوچون ايندي داها آياق باسماديغيم کندده مني، نه يه گؤرسه، خسيس حساب ائديرلر.

  لاکين ايندي عادي بير آغاج کسن نه يه سيميجليک ائده بيلر کي؟

  چؤلده کي  قاردان قورونماق اوچون، داشلاردان داياق وورماقلا، داخمامين سينيق-سالخاق قاپيسيني مؤحکم سيخميشام.

  بو اولاي، چوخدان باش وئريب، بير آخشام آغير آدديم سسلريني، آردينجا دا قاپي نين دؤيولدويونو ائشيتديم. قاپيني آرالاديم و تانيديغيم آدام ايچري سوخولدو. ييرتيلميش پلاشا بورونموش ياشلي و اوجابويلو بير کيشي ايدي. ياناغينداکي ايري بير چاپيق صيفتيني ايکي يئره بؤلموشدو.

  گؤرونور، ايللر قدديني سينديرا بيلمه ميش، عکسينه، خاصيتينه حؤکمرانليق علاوه  ائتميشدي، لاکين هر حالدا من حيس ائتديم کي، او، عصاسيز يئرييه بيلمير.

  ايندي خاطيرلاماديغيم سؤزلرله سالاملاشديق.

  سونرا او، دئدي:

  – منيم دوغما، ايستي اوجاغيم يوخدور و هارادا گلدي، ائله اوراداجا گئجه له ييرم. ائنينه و اوزونونا کئچمکله من ساکسلارين بوتون تورپاقلاريني الک-ولک ائتميشم. – بو سؤزلر اونون ياشي حاققيندا چوخ شئيي آنلاديردي. – ايندي آداملارين اينگيلتره آدلانديرديغي او تورپاقلارا منيم آتام هميشه ساکسونييا دئييردي.

  بيز سوفره ده کي  باليق و چؤره يي ياري باياري بؤلوشدوک. يئمک واختي هئچ بيريميز دانيشماديق. چؤلدن ياغماغا باشلايان ياغيشين سسي گليردي. واختيله اؤلموش قارداشيمين مئييتيني اوزاتديغيم تورپاق دؤشمه ده اونون اوچون دريدن ياتاق يئري دوزلتديم.

  سحر تئزدن بيز منيم کومامدان چيخاندا آرتيق دان يئري سؤکولموشدو. گؤي اوزو آچيلميش و يئر تپ تزه قارلا اؤرتولموشدو.

  قفيلدن يول يولداشيم عصاسيني اليندن سالدي و گؤزلمه دييم حالدا قفيلدن منه امر ائتدي کي، اونو يئردن قالديريم.

  – من سنه نه اوچون تابع اولمالييام کي؟ – اؤزومدن آسيلي اولماياراق غيظلنديم.

  – اونا گؤره کي، من حؤکمدارام، – اؤز نؤوبه سينده او دا بوينوما ميننت قويدو.

  اؤز-اؤزومه دوشوندوم کي، يقين دلي اولوب. عصاني يئردن قالديريب اونا اوزاتديم. او، سسيني قالديرارارق دانيشماغا باشلادي.

  – من سئکگئن لرين کرالييام، – تکرار ائتدي، – دفعه لرله آغير ووروشلاردا دؤيوشچولريمه غلبه سئوينجي بخش ائتميشم: فقط، لازيمي آندا اؤز حؤکمرانليغيمي ايتيرميشم. آديم ايزئرن دير. اصلا ايسه اوديندنم.

  – من اودينه تابع دئييلم، – ديللنديم. – عيسا مسيحه احتيرام گؤستريرم.

  او ايسه دانيشماغيندايدي، سانکي مني ائشيتميردي.

  – سورگون جيغيرلاريندا سورونسم ده اصل حؤکمدارام: چونکي منده ديسک وار. گؤستريممي اونو سنه؟

  آز قالا سوموکلري چيخميش ساغ اليني آچدي، اووجونون ايچيني گؤستردي. محض بو زامان خاطيرلاديم کي، گؤردويوم آندان اونون الي يومروقلانميش وضعيتده بوکولموشدو.

  سرت باخيشلاريني گؤزلريمه زيلليه رک مني باشدان-آياغا سوزدو:

  – سن توخونا بيلرسن.

  من احتياطلانا-احتياطلانا، بارماقلاريمين اوجو ايله اونون اووجونون ايچينه توخوندوم. جانيمدان سويوق بير اوشوتمه کئچدي و اونون اووجونون ايچينده کي  پاريلتيني گؤردوم.

  ياد آدامين الي همين دقيقه  بوکولدو. او، حؤصله سيز حالدا ايضاحلارينا داوام ائتدي، سانکي اوشاغي آنلاتماغا چاليشيردي.

  – بو، اودي نين ديسکيدير، – بيلديردي. – اونون يالنيز بير طرفي وار. دونيادا بوندان باشقا ائله بير شئي يوخدور کي، آنجاق بير طرفي اولسون. نه قدر کي، بو ديسک منده دير، اصل حؤکمدار دا اؤزومم.- او، قيزيلداندير؟ – تئز ماراقلانديم.- بيلميرم. بو، اودي نين ديسکيدير. اونون يالنيز بير طرفي وار. ايچيمده ديسکي الده ائتمک آرزوسو دوغدو. اگر ديسک منده اولسايدي، اونو قيزيل کولچه لره دييشر و حؤکمدارا چئوريلرم. ايندييه قدر ده نيفرت ائتدييم سفيله دئديم:- داخمامدا سيککه لرله دولو صانديق گيزلتميشم. سيککه لر قيزيلداندير و اونلار بالتانين آغزي کيمي پاريلداييرلار. اگر اودي نين ديسکيني منه باغيشلاسان، صانديغين ايچينده کي لري سنه وئررم.- ايستميرم. – 

دئيه او، عينادکارليق ائتدي.- اوندا، – حيرصلنديم، – گلديين يئره ده سوروش. او، آرخاسيني منه چئويردي. بير ضربه بس ائدردي کي، اونو يئره سره سن: او، يئره ييخيلاندا اووجو آچيلدي و من هاوادا پاريلدايان هاله ني گؤردوم. بالتا ايله قالديغيميز يئري نيشانلاييب مئييتي بير قدر يوخاريدا آخان چايا طرف دارتديم و ائله اوراداجا اونو سويا آتديم. …داخمايا آپاران يولدا ايتيردييم ديسکي چوخ، لاپ چوخ آختارديم. لاکين من اونو تاپا بيلمه ديم. او حاديثه  چوخ-چوخ بوندان اؤنجه باش وئريب، لاکين من ائله هئي آختارماغيمدايام…