خان‌يم هئي!

بولگه لر سرويسي:بوزقورد گؤز ائيله‌دي:– آلوولو باشي بوراخ‌منه، اؤزون گير باغا آذري قورتار!

عليرضا ذيحق

بايجان گيردي باغا، جنّتين‌لاپ اوجاغي. بولاغ‌‌لارين قايناغي. آغاج‌‌لاردان بال سوزوردو؛ آرخ‌‌لاردان شراب آخيردي. آمما اوچ بوللور حاصار، دوستاق اولوب جان‌سيخيردي. بيرينده حوري‌ ميثاللي گؤزه‌ل‌لر دوز آي پارچاسي. ساچ‌‌لار قاپ قارا شَوه کيمي يا قيزيل چا‌‌لارلي‌ گونش کيمي دارانميش و هؤروکلو. گؤزلري سورمه‌لي و قاش‌‌لاري کامان. ياناق‌‌لار آلما کيمي قيزارميش و دوداق‌‌لار ايسه،
اولدوزکيمي پارلايان گولوش‌لر. اونلار اهريمن‌لردن، قادين‌‌‌لارين اؤزگورلوک حاق‌‌لاريني ايسته‌ين کس‌لر. ايکينجي حاصاردا قوللو بودلو پولاد ايراده‌لي ايييت‌لر. آزادليق هايلايان و ظولمه قارشي دوشونن قافالي دويغولو ارکک اينسان‌‌لار. اوچونجونده هله باش بير ياسديقا قويماديغي، قول بوينونا هؤرمه‌دييي و‌ لب ‌لبينه سورمه‌دييي ايلديريم کيمي آت چاپان و سلجان خاتون تک قيلينج چکيب اوخ آتان سئوگيليسي اينجه بئل آذرخاتون. حاصار‌‌لار آمما سئحيرلي. ‌نه اوخ باتير،‌ نه قيلينج کسير و نه سونگو اثر ائيلير. او تَردن و تلاش‌دان بير گؤلون کناريندا يورقونلوقدان و چاره‌سيزليکدن‌ دينجه‌لرکن قاناد قانادا وئره‌ن ‌ملَک‌لرگؤله قونوب چيممه‌يه باشلادي‌‌لار.‌ ملک‌لردن بيري سسلندي:
– اي جاندان دويوب يول آزان و عشق آتشي‌له يانان ووقارلي ايييت. ال ال اوسته قويوب اوتورماقدان بير زاد چيخماز. اژدهانين اؤلوم جارلايان و آلاو پوسکوره‌ن باشيني قوپارتمايينجا سن بو سِحره غاليب گلنمه‌يه‌جکسن؛ آمما اونودما کي اونون باشي يئره ساوريلينجا اونلارجا قارا دونلو ‌سيلاحلي اهريمن ظاهير اولاجاقدير. تک باشينا اونلارلا قارشي قارشي ساواشماق ‌مومکون دئييل. هالاي پوزان و دلي دولو ياراقلي يولداش‌‌لار ‌لازيم. اژدهانين ‌لئشين‌دن تؤره‌نن اهريمن‌لر اؤلمه‌يينجه بو بوللور حاصار‌‌لار ‌سينماياجاق‌‌لار.
بونلاري‌دينله‌ين بايجان ائله ساندي هر گؤردويو و ائشيتدييي يوخو کيمين ايدي. آمما باش قالديراندا ‌ملَک‌لرين قاناد قانادا چاليب اوچما‌‌لاريني گؤردو. اوره‌يي دولدو، گؤزلري ياشاردي و غملي – غملي بو سؤزلري آوازلا ‌ملَک‌سيمالي آذرخاتونا اوخودو :
دنيزين اولدوزو گؤيلرين ‌نورو
بولاق گؤرمه‌ديم گؤزلريندن دورو
داغ‌‌لاردا ‌مارال‌‌‌لار اولوب‌‌لار سورو
اصلان تک يورويوب گليرلر گؤزل!
ايکي گون اولدو اوچ گون، ‌نه بوزقورددان خبر اولدو ‌نه بايجان‌دان. ايييت‌لر سيلاحلانيب ساواشا گئتمه‌يه قرار قويدو‌‌لار. تورک ائللرينده بير دده بابا سؤزو وار دئير: «‌سيلاحسيز ائل، چيپلاق قادين دئمکدير». اونون اوچون ده ياراقلانيب قورشانيب دمير‌ناللي يئل تک قوشان آت‌‌لاري‌لا چاپماغا باشلادي‌‌لار. آت‌‌لارين آياق‌‌لاريندان قيغيلجيم قالخاراق توز- دومان هر يئري بورودو. اونلار هله چاتمادان بوزقورد گؤرودو بو اژدهايا باتماق اولموري و بايجان قان- تر ايچره بوتون دؤيوش و چابا‌‌لاري‌لا اونون جانين آلانميري. بوزقورد بير يول تاپيپ اژدهاني غضَب‌لنديره‌رک داليجا ساليب، بير اوچوروما ساري يولا دوشدو. هر ايکيسي قاچا- قاچ دا بوزقورد دوش ها دوش ده آياق ساخلادي، آمما اژدها تووون آلانماييب اوجا بير داغدان دره‌يه دوشوب پارام پارچا اولدو. بايجان ‌ماجراني ياخيندان گؤره‌رک گؤردو اونلارجا قارا دونلو اهريمن، اوزاقلاردان قارا بولود کيمي اوزه‌رلرينه چؤکورلر. بايجان قاشقاي آتين چاپيپ بوز قورد ايله بيرليکده باغا ساري گؤتورلنديلر. اهريمن‌لر ده يئتيريب قيلينج چکيب اونلاري قيرماق ايسترکن اوغوز پهلوان‌‌‌لاري داد‌‌لارينا چاتدي‌‌لار. بايجان‌لا چييين به چييينه وئريب ساواش آچدي‌‌لار. قيلينج‌‌‌لار چکيليب اوخ‌‌لار ياغدي‌‌لار. آت‌‌لار کيشنرکن جان قورخو بيلمه‌ين اوغوز ائللري‌نين دؤيوشجول ايييت‌لري دومانلار ساليب، هره بير اهريمني اؤلدوررکن قانلاريني گؤيه فيشقيرديب. ساعات‌‌لارلا دؤيوش داوام ائتدي. تکجه بيري قالميشدي کي ‌نه آذر اونون اليندن گله بيليردي ‌نه بايجانين اوخ‌‌لاري اونا اثر ائديردي. جنگاورلر اونلاري دومان‌‌لار ايچره گؤرسه‌لر ده بو گئجيشمه‌نين و يئنيلمز‌لي‌يين ‌سيرريني هله بيلميرديلر. بو آرادا بوزقورد او قارا دونلونون گؤزلرينده الماس کيمي پارلايان بير ايشيق سئچدي. يورويوب‌ مئيدانا گيردي و قارا دونلونو‌نون اوزگؤزونو هدف توتوب پنجه‌لرينيد سالدي اهريمن‌ين گؤزلرينه و اونلاري يئريندن ‌ديديب قوپارارکن، قارا دونلو ضربه‌لر ائنديرسه ده گؤزلري بوللور کيمي‌سينيب تيکه پارچا اولدو.
ائل ظفر چالدي، آمما بوزقورد قان‌‌لار و يارا‌‌لار ايچينده سون ‌نفس‌لريني چکه‌رک بايجانا آنلاتدي کي کوچوجوک ياورو‌‌لاريني، بسله‌نمک اوچون قورد‌‌‌لار سوروسونه تاپشيرسين. هاوا بوزاريردي کي بوزقوردا اؤلوم قاليب گلدي، آمما تورک ائللرينده ابديته قده‌ر بوزقورد‌‌لار ياشاياجاق‌‌لار. بايجانين گؤزلري قان ياش ايچره ايدي کي ايييت‌لر چاتاراق اونلارين سردار‌‌لاري اوختاي‌لا آيدينا خبر وئرديلر هوندور بيرداغين اته‌يينده بوزقوردو توپراقا وئره‌لر. سحر اِئرکن، ايييت‌لر باغا گيرمه‌دن بير گور چايين کناريندا‌ دينجه‌ليب يارا‌‌لاريني باغلارکن گؤيده يوزلر قارانقوش گؤروندو. بيري قوندو بايجانين چيينينه و يوزلري بير سالخيم‌لي بؤيوک قامتلي سويود آغاجي‌نين قول- بوداغينا.
بايجان يئريندن قالخيب قوش‌‌لارا ساري گئتدي و گؤردو چاي‌دا بير خنجرلي بالاجا قارا باليق گؤيدن هله کؤچمه‌ين آي‌لا ‌دانيشيري. بالاجا قارا باليق ‌دنيزه گئتمکدن دئييري و اؤزگور ياشاماغ اوچون ‌نه تهلوکه‌لري آتلاتماق‌ لازيم‌دير. او دئييردي:
– اؤلوم هرآن‌ مني جايناغينا چکه بيلر، آمما اؤنملي اودور کي ‌منيم ياشاماغيم يا اؤلوموم خالقين سعادتينده ‌نه قده‌ر رول اوينايا بيلر.
بايجان ايسته‌دي بالاجا قارا باليغي سؤزه توتا کي گؤردو او درينلره جومدو و بالاجا بير قيرميزي باليق آرديجا گئديري. قارانقوش‌‌‌لار اوچدو‌‌لار و چيينينده اوتوران قارانقوش آيريليق‌ نغمه‌سي سؤيله‌ييب سمادا قاناد آچدي. چاي ايسه کئچميشدن ايندي‌يه‌جان گليب، گله‌جه‌يه يول دؤيوردو. ‌نييه کي ‌دنيزه چاتماغا بالاجا قارا باليغا يارديم ائتمه‌لي ايدي. اوختاي بايجانا ياخين گلينجه کيشنه‌ين آت‌‌لار اونلاري سسليرديلر.
اوختاي‌لا بايجان دوروب گلرکن آيدين اونلارا توش گليب بايجان اونلارا‌ دنيزدن و بالاجا بير قارا باليق‌لا قارانقوش‌‌‌لاردان سؤز آچدي. ايييت‌لر يولا دوشوب باغا ساري گئدرکن بير جنت گؤردولر. شلاله‌لردن شراب آخيب‌ مارال‌‌‌لار اويناشيردي‌‌لار. هريان يام- ياشيل و آل- الوان ‌مين‌لر رنگه چالان گول‌لر اوزه‌رينه قونان آري‌‌‌لار پتک‌لره بال داشي‌ييردي‌‌لار و بوللور حاصار‌‌لارا گونش ووردوقج .  آردي وار

منبع :