ايکى قارداش

بولگه لر سرويسي: آز سولوقلانميشدى کى، بيردن قاپى جيريلدادى. ايچه‌رى نه گيرسه ياخشى‌دى؟!. اؤنجه کؤلگه‌لرى، سونرادا کي، شير، تولکو، جاناوار. باش-باشا وئريب باجادان دوشن ايشيغين اطرافينا ييغيشديلار. شير:

شهرام گلکار

بولگه لر سرويسي: آز سولوقلانميشدى کى، بيردن قاپى جيريلدادى. ايچه‌رى نه گيرسه ياخشى‌دى؟!. اؤنجه کؤلگه‌لرى، سونرادا کي، شير، تولکو، جاناوار. باش-باشا وئريب باجادان دوشن ايشيغين اطرافينا ييغيشديلار. شير:
– ائه قارداشلار نه ياپيب نه ائديب، گونونوزو نئجه کئچيردينيز دئمه‌سک دانيشماياجاق‌سينيز‌مى؟! آغيز آچين دا، قانيميز دورولسون. بلکه گئجه‌نين آياغى يونگول اولسون. آغريميزى حيس ائتمه‌يک.
جاناوار يئرينده ساغ-سول ائيله‌ييب. ايکى قولونو دور آغاجى تک ستون ائديب دئدى:
– قارداشلار دونيادا ائله حاللار، ماجرالار وار کى، ائله دونيانين اؤزو کيمى حيرتلنديريجى‌دير! بوردان ايکى آغاج آشاغيدا، اؤروشده ييغجام قويون-قوزو سوروسو اوتلايير. سورونون ايچينده قارا، اويناق، شن بير شيرين قويون واردير. او قويونون کله‌سيندن بيشيريلن کله-پاچانين سويو شاهين نئچه ايلليک ناخوش قيزينين درمانى‌دير. مندن باشقا کيمسه بو ايلگينج ماجرانى بيلمير!
-»بو نه دى کى«، تولکو دئدى. باخيشلارى اؤزونه سارى دؤندردى. او يان-بو يانا اوغرون باخيب، اطرافى اؤترگى گؤزدن کئچيرتدى. باشلادى اوتوردوغو يئرده سؤزونون داوامينا:
– پادشاهين سارايينين گون‌چيخان آرخا کونجونده سايجا ميثلى يوخ قيزيل گؤمولوب؛ کى جمع سولطانلارين خزينه‌سينده بئله اونون يارى‌سى قدر ده قيزيل اولماييب. کيم اونو بولوب چيخاردا بيلدى، دونيايا حاکيم ده ائله او اولاجاق!..
(بو آرادا فاغير قارداش باندا نفسيني ايچينه چکير؛ سس سالاسى هئچ بير حرکت ائتميردي. حئيوانلارين دويوم گوجو ايتى‌دير دئيه، يئرينى ده دييشميردى. اونون شانسيندان چايدان قالخان توند پيس قوخو، هاواداکى بوتون قوخولارى قانادلارينين آلتينا آليب حيس ائتديرميردى).شير دئدى:– دينمه‌سن دونيا دولانمير. هله يوواندان چيخيب اولوب-بيتنده پايين اولماسا، دونيادان دا پايين اولماز! گره‌کير کى، اولوبسان‌سا، بو دونيايا گليبسن‌سه، اورتاليقدا اولاسان. چاى دوزو گون- باتانين خئيلک ايره‌لى‌سينده، دوپبه‌دوز چايين دؤنومونده، چايلا قارشى-قارشي‌يا اوبا يئرله‌شير. اوبايلا چاى آراسيندا، چايا ياخين يولغونلوقدا تک-تنها بير سيچووول وار. هر گون گونش چيخمادان آلتينلارى آغزينا آليب داشييير داش اوستونه. پيله‌ييب، اوفله‌ييب، آلتينلارى گونش ايشيغيندا پارلادير. بير گئندن، بير ياخيندان باخير گؤزو پارلايير. گونش باتانا ياخين يئنه قايتارير يئرينه گتدييي آلتينلارى.
اوغلان قورخودان اوره‌يينى يئيه-يئيه صاباحى ايپله چکيردى. بير ياندان سؤيونوردو. او بير ياندان اله کئچر دئيه، بوغازينين سويونو اودخونا بيلميردى.
آلاتوران شير، تولکو، جاناوار دييرمانى ترک ائتديلر. اونلارين اوزاقلاشماسينى گؤزله‌دى. او قدر جانينين فيکرينده ايدى کى، باييردا باغلانميش ائششه‌يين فيکرى بيردن-بيره دلى‌جه‌سينه باسينجلاندي بئينينه. – »من اون‌سوز چؤللوکده نئيله‌رم« – دئييب، قاچدى دييرمانين آرخاسينا. ائششک ايکى قايانين اورتاسينا سيغينيب. گؤزدن ايراق اولوب، چايين قوخوسو دا ايشينى گؤروب. آنلاياجاغينيز جانيني بير تهر قورتارا بيليب!
گئده‌يه دونيانى وئرديلر سانکى. ائششه‌يين باش-گؤزونو تومارلادى. سودان اوتدان وئردى يازيق حئيوانا. اؤزو ده ال-اوزونو يودو. بير تيکه يوخادان يئييب. قيرواق ال-آياق ائيله‌دى. دارين گون باتانا سوردو. -»من گئديب اوبادان يئمک آلارام. سيچووول دا او واختا دک قيزيللارى داش اوستونده اوتوردار«- دئدى. ائله او جور ده ائتدى. يئمه‌يى خورجونا قويدو. سيچووولا يئتيب بيرداش توللادى. سيچووول يوواسينا گيردى. اوغلان قيزيللارى توپلادى. بير کيسه‌يه يوکله‌دى. گئتدى جاناوار دئين سورونون آرخاسينجا. نئچه آغاج رد ائله‌دي. آخير گلدى سورونون اوتلاديغى اؤروشه. قارا قويونو جمع سورونون ايچيندن همن سئزدى. دئدى:– چوبان سالام، يورولماياسان؛ برکتلى اولسون.
– ساغ اول. آللاه کؤمه‌يين اولسون.
– منه قارا قويونو نئچه‌يه ساتارسان آى چوبان قارداش؟
– منيم دئييل. من ساده‌جه اوتاريرام. ييه‌سى باشقادير يولچو!– سن ايسته‌سن حل ائدرسن. ايکى قيزيل وئره‌جم. جمده‌يينى سنه وئريب، کله‌سينى آپاراجاغام. آپار کاباب ائله منيم شوتوما؛ حالال خوشون اولسون.
چوبان گؤردو هاردان باخسان منفعتدى. دئدى:
– آللاه خئيير وئرسين. بير تهر ييه‌سيني راضى سالارام.ائششه‌يى سارايا سارى توشلادى. آز گئتدى چوخ گئتدي؛ يئتيشدى سارايين ياخينليغينا. اؤيرندى پادشاهين قيزى ناخوشدى. چاتديردى کى، من دردينى بيليرم. دئديلر:– اؤدولو شاهين قيزيني آلماق، جزاسى دا دار آغاجيندان آسيلماق‌دي.دئدى:– من قيزى توخداديب، ساغالداجاغام! منه قيزى گؤسترين.
قارا-قويونون کله‌سيني پيشيرتدي. سويونو قيزا ايچيرتدى. قيز توختادى. ائولنديلر.
شاه دئدى:– ائولي‌ليک هديه‌سى اولسون دئيه، ديله مندن نه ديلرسن!
دئدى:– پادشاه ساغ اولسون! او کونجده‌کى کوللويو وئر قوى ائو تيکيم اورادان.
شاه دئدى:– بو يئکه‌ليکده مملکتين هاراسيندان ايسته‌سن، آلا بيلرسن. چکينمه، آغزينى ايسلاتسان يئتر! نييه آخى ايشلکچي‌لرين ده گؤزونده کيچيکسنميش بو کوللويو سئچيرسن سن؟
دئدى:– کوللوک منى گؤرر. سيزه ياخين اولاجام ها، او منه بسدى!
شاه بير داها بو جاوانا حئيران اولوب؛ کوللويو اوغلانا وئردى.
يئزنه تئز دام تيکديريب. قيزيللارى آنبار ائتدى. قيزيل اوردان آغريني غمى اوزاق ائيله‌دى. شادليق گتيردى اوغلانين ائوينه. هر کس اونلارين ائوينه واريردي‌سا، سرمست اولدو.
بير گون اوغلان دولاشاندا، چيخدى سارايين اؤنونه. گؤردو سفيل وضعيت‌ده بير ديلنچى اوردان کئچير. ديلنچى بونا دوروخدو. اؤزونو ايتيريب بيلمه‌دى نه دئييب، نئجه ائله‌سين. تا کى، شاهين يئزنه‌سى اونو چاغيردى. يئزنه شاشقين دوشوب قارداشينى زور اولسا دا تانيدي. آلدى باغرينا. ائوينه قوناق ائيله‌دى. ناهار وئردى. چيميزديردى. اينينه گئيمه‌يه تميز پالتار وئردى. باشينا گله‌نى دئدى. بير ده کورن بير آت وئردى. ديلنچى قارداش آخشاما قالمادي. »مئشه‌يه گيرن دونوزا، يابايا توش گلرم« دئييب؛ واخت ايتيرمه‌دن دييرمانين يولون سوردو.
آج-گؤز قارداش يئتيشدى لاپ وعده‌سينده دييرمانا. او يان، بو يانى بلله‌دى. سس‌سيز-سميرسيز يوخارى قاتدا يئرلشدي. اؤز اوره‌يينده دئدى: – »ايندى اوچ حئيوان گليب، وئرر قيزيلدان خبر.« سؤزو داها بيتمه‌دن، شيرين زهيملى هنيرتى‌سى، جاناوارين قاني بيم-بيز، توکولري اؤلوم قورخوسوندان بيز ائدن اووولتوسو، بير آز سونرا تولکونون ده اؤزو گلدى. بير-بيريندن ايشگيللي ابشگيللي دارين گلميشديلر دييرمانا اونلار. – (کيم گؤره‌سن خطا ائديب؟-گؤزلرى‌يله بير-بيرينه دئييرديلر). تولکو اطرافداکى نسنه‌لره ده شوبهه‌يله ياناشيردى. نهايت صبرى چاتماييب ديله گلدى:
– او کوللوکده‌کى قيزيلى آللاهدان خبرسيز کيمسه حاصارا ساليب، دام سالديريب. قيزيلينى گؤزدن، ايزدن، ايي‌دن ايراق آنبار ائديب. تکجه ياشاما گومانيم، يئگانه اوميد قايناغيم، هم ده کى شن‌ليک سببيم‌ميش سن دئمه. ايندى من نئيله‌ييم دوستلار!؟.جاناوار دئدى:– دئمه آى تولکو. او گون سورودن دئديم آ. قارا قويونون کله‌سيندن دئديم آ. گؤردوم چوبان اود قويوب ياغينين توستوسونو هاوايا سووووروردو. قويونون دا کله‌سى اورتاليقدا يوخ ايدى. سورونون داى يانيندان بئله کئچمه‌يين کارى يوخدور. سن دئمه او قويونون شوخلوغو ياييليرميش اورداکى هر بير شئيه. کؤنلومون سئوينجى ايميش. اوره‌ييمين خوشلوغونون آچارى ايميش. بئله، گون باتمير يولداشلار! ايندى من نئيله‌ييم آخى!؟.
شير کؤکس اؤتوردو درين؛ ياسلى حئيوان کيمى ايدى. آغزى سؤزه آچيلميردى. چوخ اوغراشدى اؤزو ايله. آخير بير تهر دئدي:
– اولان ايش دئييل دوستلار! بو گئنيشلييه دونيادا، کؤنلوم بير سيچووولون خوشلوغونا خوش ايدى. اونو دا هانسى‌سا بير ايمان‌سيز داش آتيب يازغي‌سينا، نه‌يي وار آپاريبدى. اونو دا منيم کيمى قويوبدو بؤيرو اوسته. بالاجا پاريلتى‌يلا خوش ايدى گؤزلريميز؛ اونو دا چالدى فلک. قويمادى بو دونيادا راحاتجا خوش گون گؤره‌ک!
تولکو دئدى:– يوخ قارداشلار بئله اولماز. بوندا بير کؤپويچولوق وار. سسيميزى، سؤزوموزو دينله‌ين بو مکاندا بير قولاق وار. دورون! ياپيشمايين يئره.آلت-اوست ائتديلر هر يئرى. تاماقچي قارداشى تاپيب، تيکه-تيکه ائله‌ديلر. اتيندن ده يئمه‌ديلر.

منبع :