باليق دا بيلمه‌سين، خالِـق ده!

بولگه لر سرويسي: گونلرين بير گونو بير آتلي يوْلدا پيادا آدام گؤرور. پياده چوخ يورولوب، الدن دوشموشدو، يئريمگه طاقتي يوخموش. آتلي، آتيني ساخلايير، اوزون يولا پيادا چيخان يورغون آدامي دا آتي‌نين تَـرکينه آلير، يولا دوام ائدير. بير آز يول گئدندن سونرا، پيادا نامردجه‌سينه، گؤزلنيلمه‌دن آتين صاحبيني ايته‌لَـيپ، آتدان سالير، سرعتله ايرَ‌لي چاپير.

يازان: سئوينج_ائل‌سئور

کؤچوردو: #شبنم_توحيدي

بولگه لر سرويسي: گونلرين بير گونو بير آتلي يوْلدا پيادا آدام گؤرور. پياده چوخ يورولوب، الدن دوشموشدو، يئريمگه طاقتي يوخموش. آتلي، آتيني ساخلايير، اوزون يولا پيادا چيخان يورغون آدامي دا آتي‌نين تَـرکينه آلير، يولا دوام ائدير. بير آز يول گئدندن سونرا، پيادا نامردجه‌سينه، گؤزلنيلمه‌دن آتين صاحبيني ايته‌لَـيپ، آتدان سالير، سرعتله ايرَ‌لي چاپير.
يئره ييخيلان آت صاحبي، آتي‌نين آردينجا قاچاراق اوجادان اوغرونون دالينجا قيشقيرير:
– آي نامرد! مادام کي، آتي آپاريرسان، آپار! حلال ائيليرم. آنجاق مبادا بير آداما بو بارده سؤز ائده‌سن. يوخسا بوندان سونرا هيچ کيم يولدا قالان بير آداما کمک ائتمه‌يه‌جک!
بو احوالاتي بيلميرم ننه‌مدن ائشيتميشم، يا بابامدان. بلکه ده هارداسا اوخوموشام، ياخود تلويزيوندان دينله‌ميشم. نهايت کي، يادداشيمدا ايليشيب، قاليب. تئز- تئز يادا ساليرام.
بير نئچه گون بوندان اوّل، قاچا- قاچا بانکوماتلاردان (دستگاه خودپرداز) بيرينه چاتماغا چاليشارکن، ديک‌دابان آياق‌قابيمين بير تايي آياغيمدا پارالاندي. سحر ساعت دوققوزا ايشله‌گيردي، کوچه دئمک اولار، بوم‌بوش ايدي. ائويمدن هارداسا 9-8 کيلومتر اوزاقدايديم، چانتامدا دا جمعي اوچ مانات يول‌پولو واردي. بانکوماتا چاتيب، کارتي يوخلاييب، تکنيکي سببلردن پول چيخارا بيلمه‌يه‌جگيمي اؤگرننده، قانيم لاپ قارالدي.
اوشاق مکتبده‌يدي، اونو آتيب گئده بيلمزديم. آنجاق مکتبه قدر ياريم کيلومتر يولو پيادا گئتمک لازم ايدي. بو جيريق آياق‌قابي‌يلا نه‌اينکي يئريمک، هيچ آدديم آتماق ممکن دَگيلدي.
اون ايل اوّل اولسايدي، آياق‌قابيلاريمي چيخاريب، اليمه آلار، ماهني اوخويا- اوخويا آياق‌يالين يولا دوزلرديم. آه، گؤزل گَـنجليک!
بير دفعه »تارقووي«نين اورتاسيندا باشيما گليب. آياق‌قابيلاريم ووروردو، چيخاريب اليمه آلديم، ايستي داشين اوزو آياقلاريمي يانديرماغا باشلادي، هوپپانا- هوپپانا يولا دوزلديم.
کوچه بويو، مغازه‌لرين چوخو باغلي ايدي. يگانه آچيق آياق‌قابي مغازه‌سينه گيرديم، معلوم اولدو کي، بو مغازه‌ده کارتلا آليش-وئريش ائتمک ممکن‌سيزدير. اوندا باشينا گلنلري ساتيجي خانيما دانيشديم، دئديم کي، منه بير آياق‌قابي وئر، ايلک بانکوماتدان پول چيخاران کيمي گتيريب وئرجگم. ملي کارتيمي دا گيروو گؤتورمه‌سيني ايسته‌ديم. خانيم اصلاً راضيلاشمادي. «اولماز، بيردن کارتينيز سيزه لازم اولار. من سيزه اينانيرام، هانسي آياق‌قابيني اورگينيز ايسته‌يير سئچيپ گؤتورون» – دئدي.
بير آياق‌قابي سئچديم و مکتبه، اوشاغين دالينجا تَـلسديم. هارداسا ايکي ساعته ياخين لَـنگيميشديک مکتبده، بو وقت عرضينده چوخ ناراحت اولدوم. بيردن خانيم گئج گلديگيمي گؤروپ، هيچ گئري قاييتماياجاغيمي، اونون پولونو قايتارماياجاغيمي دوشونر دييه! تيکان اوستونده ايديم، بير آن اوّل مغازه‌يه قاييديپ، خانيمين پولونو اؤدَمک ايسته‌ييرديم.
مکتبده اوغلومون درسي بيتَـن کيمي بانکومات آختاريب تاپديم، پول چيخارديب، مغازه‌يه تـلسديم. خانيم مني گؤرجک چوخ خوشبخت اولدو. حتي اللاها شُـکر ائتدي. گؤرونور گئجيکديگيمي گؤروپ ايستر- ايستمز ناراحت اولموشدور.
خانيمين يانينا تـلسَرکن يولدا، يوخاريدا دانيشديغيم احوالاتي خاطيرلاديم. هيچ اونودا بيلمه‌ديگيم احوالاتي! خانيمين پولونو باجارديقجا تئز چاتديرماق ايسته‌ييرديم. او احوالاتداکي آتلي‌نين اوغرويا دئديگي سؤزلري يادا ساليرديم: مني آلداتديغيني هيچ کسه دئمه! بيردن داها باشقالارينا کمک ائتمزلر.
خانيمين پولونو گئجيکديرمز اولمازدي. او، بير دقيقه ده اولسون، ائتديگي ياخشيليغا گؤره، پشيمان اولمامالي، شُبهه‌يه دوشمه‌مه‌ليدير!
هله ده تعجب ائديرم، او خانيم مني نئجه تانيدي؟ نئجه آرخايين اولدو کي، من گئري قاييداجاغام. بلکه سادجه بختيني سينادي؟! بير دفعه آلدانسام، داها هيچ کيمه اينانمارام دييه، يوخلاماق ايسته‌دي بلکه؟!
بلکه سادجه ياخشيليق ائتمکدن حضّ آلان بيريدي؟! هله ده انسانلارا، ياخشيليغا اولان ايناميني ايتيرمه‌گن، قورويوب ساخلايان بيري؟! کاش او، هيچ وقت ايناميني ايتيرمه‌يه‌يدي! هميشه بئله اينانا بيله‌يدي، گووَنـه بيله‌يدي انسانلارا! بلکه ده هارداسا انسانلار وار، اونلارين ايناملاريندان سوء-استفاده اولونسا بئله ياخشيليق ائتمکدن، گووَنمکدن، اينانماقدان واز گئچميرلر. بيلميرم، بلکه ده خانيم او نادر انسانلاردان ايدي. بير چوخلارينين عَوام، منيم صاف، تميز دئديگيم انسانلاردان.
هره بير سببدن ياخشيليق ائتمه‌گه جان آتير. کيمي فکرلشير کي، بونونلا گناهلاري تميزلَـنير. کيمسه اونون دا قارشيسينا ياخشيليق چيخسين دييه، ياخشيليق ائتمک‌چون اليندن گلني ائدير. باشقا بيري «ياخشيليغي آت دريايا، باليق بيلمه‌سه ده، خالق بيلير« دئيير.بير باشقاسي دا دئيير کي، »باليق دا بيلمه‌سه اولار، خالق ده بيلمه‌سه!« اساس اودور کي، من اؤزوم بيليرم و بو مني خوشبخت ائدير.
سون گونلر سوسيال شبکه‌لرده کتاب اوغورلوغو گوندَم اولدو. چوخ درينه وارماق ايسته‌ميرم، مسئله‌ني چوخونوز بيليرسينيز. بونونلا باغلي دئمک اولار، هر کس فکر سسلنديردي. معلوم اودو کي، چوخ آدام عؤمرونده بير دفعه ده اولسون کيمدنسه کتاب آليب اوخويوپ، گئري قاييتماييپ.
سوسيال شبکه‌ده گئدن صحبتلردن بئله آنلاشيلدي کي، اوّللر دفعه‌لرله آلداديلديغينا گؤره، داها هيچ کيم باشقاسي‌يلا کتاب بؤلوشمور. حالبوکي چؤرَگي پايلاشماق قدر واجبدير کتابي پايلاشماق دا!…
کتابلارين چوخ داها ساتيلديغي، کتابخانالاردا تاپيلماديغي بو دؤورده اونلاري بير- بيريميزله پايلاشساق، بؤيوک ياخشيليق ائتميش اولاريق دوستلاريميزا. گؤره‌سن، ايتيرديگيميز اينامي نئجه قايتارا بيلريک؟
آتلي ايله پياده‌نين احوالاتيندان نتيجه چيخارساق، دوغرو اولماغي هم ده اونا گؤره ايستمه‌لي‌ييک کي، انسانلار بير- بيريندن شُبهه ائتمه‌گه باشلاماسين. ايچي ياخشيليق، خيرخواهليق دولو احوالاتلاري داها چوخ دانيشماليييق.
انسانلار تزه‌‌دن ياخشيليغا، دوزلوگه، خيرخواهليغا اينانسينلار. بير- بيرلرينه اينانا بيلسينلر. يولدا قالانلارا يارديم ائتمکدن، داردا قالانلارا ال اوزاتماقدان چکينمه‌سينلر.
 تأسفلر اولسون کي، بو گوْن بير چوخ مرحمتلي آدام ياخشيليق ائتمکدن اونا گؤره چکينير کي، اؤز باشيني بلايا سالماسين، وجداني سيزيلدايا- سيزيلدايا، اورگينه داش باسا- باسا هر گون بير آز داها بيگانه‌لشير. اونلاري قينايا بيلميرم. من اؤزوم ده بير چوخ حاللاردا چکينيرم، چونکي! بيز کمک ائتمک ايسته‌ديگي حالدا، اؤزو بلايا دُچار اولان، حيله‌يه آلداديلان نه قدر انسان حاقيندا احوالاتلار ائشيتميشيک.
جمعيتميز نه زمان، نيه بو حالا قالدي؟ بيز نيه بو وضعيته دوشدوک، اوتوروب دوشونمه‌ليييک!

منبع :