اوشاقليق دنياسينا ديرمانماق!

بولگه لر سرويسي: بو تابلويا باخديقدا ايلک اؤنجه هر شئيي آنلاديغيمي سانيرام. اوندا چاغداش ياشام ايله اوشاق دنياسي‎نين آراسيندا اولان سينيري(مرزي)، و اونلارين نه قدر فرقلي اولدوغونو گؤرورم. بو ايکي دنيانين اورتاسيندان آسيلي اولان قيزجيغاز، يول-يول کؤينه‎گي ايله ايلگيمي چکي‎بن درين دوشونجه‎لره دالديرير مني!

 محمد_عابدين‌پو

بولگه لر سرويسي: بو تابلويا باخديقدا ايلک اؤنجه هر شئيي آنلاديغيمي سانيرام. اوندا چاغداش ياشام ايله اوشاق دنياسي‎نين آراسيندا اولان سينيري(مرزي)، و اونلارين نه قدر فرقلي اولدوغونو گؤرورم. بو ايکي دنيانين اورتاسيندان آسيلي اولان قيزجيغاز، يول-يول کؤينه‎گي ايله ايلگيمي چکي‎بن درين دوشونجه‎لره دالديرير مني!
بو رسيمده من اوچون، هر شئيدن قاباريق و گؤزه چارپان ايکي بؤلومون بويا تونلاري‎دير. و بو بيربيرندن فرقلي بويا تونلارلا تابلو ايکي فرقلي يئره بؤلونور؛ اوست بؤلومده ايشيقلا ايستيليک وار و اونلا ياناشي اوشاقليق وار، آلت بؤلومه آلاقارانليقلا سويوقلوق حاکم‎دير. و اونلاري آييران بير جيزيق کي اوشاق اوندان آسلاناراق بلکه ده يوکسه‎ليب اؤزونو قورتارماق ايسته‎يير؟ يادا سادَ‎جه بويلانيب گؤرسون نه خبر وار اوردا؟ سانکي چاغداش دنيانين قاباريق و سرت گئرچکلري ايله هئچ اويمايان، رويا کيمي بير يئر‎دير اورا گولوش وار، اوشاق اويونلاريندان لاپ ايلنجه‌ليسي، لاپ سئويله‎ني»گيزلين‌پانچ« وار، باليق وار، قوش وار، هابئله چيلپاقليق لا دورولوق وار، آغاج، يوسون و کؤپوک، هاميسي بيرليک‎ده وار، و اوشاقليق وار.
آشاغي بؤلومده دکل، آپارتمان، کابل، قالاباليق خيابان، هره‌سي اؤز پئشينده اولان انسانلار-خانيملار و آغالار- وار. يوخاريدا ايسه بيرليک، و اونلا هاماش ايستيليک وارسا آشاغيدا آيرليق، و اونلا بيرگه سويوقلوق وار، و اورتادا بير بؤيوک جيزيق! آلت دنيانين آداملاري، اوست دنيانين اولدوغونون هئچ فرقينده دئييلميشلر کيمي‎ديلر سانکي؛ و يالنيز اوشاقلارين رويالاريندا بئلنچي بير يئر اولا بيلر! بلکه ده او اوشاق اونلارين اوشاقليغي‎دير؟‎
ايلگينج بوراسي‎دير کي؛ اوست دنيانين عکسينه رغماً، کي اوردا هامي (اوغلان، قيز، باليق لا قوش) بير بيرينين فرقينده‌دير( قوشون هوندرولويونه باخماياراق اودا اييليب باخارکن باشقالاري ايله ايلگيلنير)؛ آلت دنيادا هامي يالنيز اؤزو ايله مشغول اولاراق باشقالاري‌نين هئچ فرقينده دئييلميش کيمي‎دير سانکي!
بيرآز دوشوندوکجه سانيرام يوخ! ايلک باخيشدا، آنلاماديغيم شئيلر ده وار! بيرآز داها باخيب داها دوشونمه‎م لازيم.
ديرمانان او اوشاغين چاشقين باخيشلاري مني بير داها دوشوندورور. گؤره‌سن او اؤزونو هارايا عاييد بيلير؟ هانسي يئره؟ اوسته يوخسا آلتا؟ گؤره‎سن او، ديرماناراق کشف ائتديگي يئري رويا سانيرمي يوخسا گئرچک؟ گؤره‎سن چاغداش دنيانين اوشاقلاري آشاغي قاتدا قاليب يالنيز تبلتده کامپيوترده، و کافي نتلرده، گيم‎نت اويونلاري ايله ايلگي‌لنيب باشلاريني قاتيب، سانال اويونداش‌لارلا اويناماق ايسته‎ييرلر يوخسا اونلارين روحونو فولکلوريک اويونلاردا قيدالانديريب دويوزدورا بيلر؟! گؤره‎سن بو اويونلارا هيچ احتياجلا گرک وارمي؟ بونلار هاميسي بو تابلونون ياراتديغي بؤيوک سورغولاري‎دير منه.
منجه بو گؤزل رسمين رسامي بير سورئال فضا ياراتديقدا مدرن دنيانين ياراتديغي اورتامي تنقيد ائدرکن تام فرقلي و باشقا بير ياشامين اولدوغونو خاطيرلاداراق اونا يوکسلمک اوچون اوشاق اولماغي و ايچيميزده‌کي اوشاغين ياشاتماغي‌نين باشارماسيني وورغولايير. چونکو يالنيز اوشاقليق بئلنچي بير روياني بوتون اؤزلليکلريله چاغداش دنياميزدا ساغلايا بيلر. بو آچيدان بو تابلو بير پست مدرن اثر ده ساييلا بيلر.
اوشاغين کؤينه‎گينده‌کي ياتاي(افقي) جيزيقلار من اوچون ايکي آتلامي وار: ايلک بو کي نردبان آنلاميني داشييير؛ بو قاورامدا کي اوست قاتا يوکسلمک اوچون گرک اوشاقليق رويالاريندان آسلاناراق اوندان يوخاري گئتمه‎يي باجاراق.
بيرده بو کي بو جيزيقلار دوستاغين بارماقليقلارينا بير اشاره‎دير؛ آلت بؤلوم بير زيندان‎دير، اوندان قورتولماق اوچون ديکئي(عمودي) بارماقليقلاري ياتاي ائديب بير اوشاق کيمي ديرمانماليسان او نردباندان. و سونرادا اورداکي اوشاقلار کيمي دوستاقليغين زولاق-زولاق کؤينه‎گيندن آرينيب آزاد اولماليسان!
سونوندا بو کي؛ بو تابلونون من ياشدا بيريسينه، بير نوستالوژيک دويغوسودا اولا بيلير. آنجاق بيلميرم گلجکده، ايندي کي اوشاقلار ياشا دولوب منجه اولاندا، اونلار اوچون ده بئله بير دويغو يارادا بيله‏‌جکمي يا يوخ؟!

منبع :