بولگه لر سرويسي:اوزون اوزادي خلوت بير کوچه‌ايدي. تئز- تئز گئري دؤنوب، نايران باخيشلارلا آرخاسيني يوخلاياراق، سرعتلي آدديملارلا ايره‌ليله‌ييردي. گئنيش بير خياوانا ياخينلاشاراق کپي‌سيني قاشلارينين اوستونه ائنديريب آرخاليغي‌نين ياخاسيني بوينونا قاتلادي. گئجه‌دن بير چوخ قده‌ر کئچسه‌ده خياوان هله‌ده ازدحاملي ايدي. بير آندا اينسانلارين سئل کيمي آخارينا قاريشاراق آدديملاري ياواشييب آخارين آهنگي‌له اويغونلاشدي. اوره‌يي يامان دؤيونوردو. گيزلي باخيشلارلا بينالارين نومره‌سيني گؤزدن کئچيره‌رک آدديملاييردي. نومره‌لر گليب داها ايکي رقملي عددلره چاتميشدي: آلتميش دؤرد… آلتميش ايکي… نومره‌لر آزالديقجا اوره‌يي‌نين دؤيونتوسو ده چوخاليردي. نهايت، بودا اوتوز ايکي نومره‌لي ايکي مرتبه‌لي کؤهنه بينا.خياوانين ائنيني آتداييب، بير آغاجين قارانليغيندا ساکيتلشدي. تام دقتله نيشانه‌لري يوخلاماغا باشلادي. هر ايکي اوتاغين پرده‌لريني ساليق، چيراقلاريني سؤنوک، خيردا اوتاغين دا پرده‌سينين قاباغيندا ايکي شمعداني گولونو گؤره‌ن کيمي کپسولونو ديشلرينين آلتينا قويوب، آدديملادي. بينانين قاباغيندا دايانيب، اليني زنگه اوزاتدي: ب‌ي‌ي‌ي‌ير – ايکي … ب‌ي‌ي‌ي‌ير – ايکي اوچ دؤنه بو ريتم ايله زنگي سسلنديکده جواب آلدي:– کيمسن؟– منم، يازين ايکينجي آيي!قاپي آچيلدي. تله‌سه‌رک ايچه‌ري کئچيب، قاپيني قاپادي. اوره‌يي قوش کيمي چيرپينيردي. بؤرکونون ديمديگيني قالخيزيب، خوتونون دسته‌گيله اوز -گؤزونون تريني قورولادي. دريندن بير نفس آليب، کؤکس اؤتوردو. پيلله‌لري يوخاري قالخاراق اوچونجو پيلله‌ده اوز- اوزه گلديلر. بير آن حئيران- حئيران بيربيرلريني سئير ائده‌رک دايانديلار. سانکي دانيشماغا بير سؤز تاپميرديلار. بيردن هر ايکيسي قوللاريني آچاراق، اشتياقلا قوجاقلاشديلار….چارپايي‌دا يئر به يئر اولدوقدا جورابينين کئشينين قاتيندان بير روزنامه عنواني‌نين قيريغيني چيخاريب، هيجانلا اونو ايزله‌ين يولداشينا نيشان وئردي. يولداشي باشيني بولاياراق بير کؤکس اؤتوروب گؤزلري ياشالدي: – پس بئله!اونلار فرصتي فوت ائتمه‌دن هر طرفدن دانيشيب، خبرلري بير بيرلرينه چاتديريب، احوالاتين هانسي بير مقامدا اولدوغوندان سؤز آچديلار. نهايت تهرانين خريطه‌سيني آچاراق، اوستونده صاباحکي گؤروشلرينين واختيني و مکانيني معينلشديرديلر.ايستر ايسته‌مز يئريندن قالخيب گؤزلريني يولداشينين گؤزلرينه تيکه‌رک، کؤنولسوزجه‌سينه آيريلماغا ايزين ايسته‌دي. يولداشي سئوگي دولو يالواريجي باخيشلاريني اونون گؤزلرينه زيلله‌ييب: – مومکونسه، بير آزدا اوتورسايدين! بلکه بير داها … – دئدي.بئله- بئله آجي فيکيرلر، ائله اونون دا اوره‌ييندن گليب کئچسه‌ده، آنجاق بو باره‌ده دانيشماغا ديليندن وار گلمه‌ميشدي. چيگنيندن آغير بير يوک گؤتورولموش کيمي، قاييديب يئرينده اگلشدي. فرصتي هئچ ايتيرمه‌دن صؤحبته باشلاديلار. دانيشديلار… دانيشديلار… سونونجو پاپيريزينين کؤتويونو کول قابيندا سؤندوره‌رک.گؤزو تاوانين ايچينده‌کي يومورتالارا ساتاشدي. بير تيکه آغزينا قويماق ايسته‌ديکده چؤرکدن قوپارا بيلمه‌دي. چؤره‌ک قوپ- قورو قوروموشدو. يئنه آياق اوسته اوز- اوزه دايانديلار؛ يئنه باخيشلاري بير بيرينه حالقالاندي؛ يئنه هر ايکيسي قوللاريني آچاراق دويمازجاسينا بير بيرلريني باغرينا باسديلار… آرتيق آيريليق آن‌لاري گليب چاتميشدي. تيترک بير سس‌له: – يولداش، هله‌ليک! – دئيه، آيريلماق ايسته‌ديکده: – يولداشي: – بس بيزيم قراريميز صاباح ساعات ….؟ – دئدي.او گولومسه‌يه‌رک يولداشينين سؤزونو کسيب: – يوخ، صاباح يوخ يولداش، ائله بو گون! – دئدي. بارماغي‌نين اوجو ايله پرده‌نين قيراغيني قاتلاييب، باييرا نظر سالدي. گونش قيزيل شفقلريله بوتون شهري نورا بوياميشدي.
اوزون اوزادي خلوت بير کوچه‌ايدي. تئز- تئز گئري دؤنوب، نايران باخيشلارلا آرخاسيني يوخلاياراق، سرعتلي آدديملارلا ايره‌ليله‌ييردي. گئنيش بير خياوانا ياخينلاشاراق کپي‌سيني قاشلارينين اوستونه ائنديريب آرخاليغي‌نين ياخاسيني بوينونا قاتلادي.
بولگه لرسرويسي:اوزون اوزادي خلوت بير کوچه‌ايدي. تئز- تئز گئري دؤنوب، نايران باخيشلارلا آرخاسيني يوخلاياراق، سرعتلي آدديملارلا ايره‌ليله‌ييردي.