آراز حووضون يانيندان اوزاغا گئتمه‌يرک اورالاردا فيرلانيردي. گؤزومو بويان-اويانا آتيب اورا گلنلره باخديم. بيري ديزي اوستو بيلگي سايار ايله باشين قاتميشدي. بيري کتاب اوخويوردو. بيري سئوگيليسي ايله دانيشيردي و…. آراز ايسه سئوگي ايله چرخ سوروردو.

اونلارا باخا-باخا اؤز  اوشاقليغيم گؤزلريمين قاباغينا گلدي. کوچه‌ده يئددي داش، پيلله‌دسته، شعبه-شعبه، زو- زو، … اويونلارين اوينايارديق. او اويونلارين يانيندا ان چوخ سئوديگيميز باش قاتما »ديغير دول«ايدي. کوچه‌ميزده يئددي-سگگيز ائو وار ايدي. هر يئر تورپاقليق‌ايدي. اون يولداش ايديق. آنجاق، يالنيز اوچوموزون ديغير دولو وار ايدي. او اوچ نفرين، بيري ده من‌ايديم. يولداشلاريمين ايچينده »بايرام« ايله‌هاميدان چوخ صميمي‌ايديك. آتا-آنالاريميز قويسايديلار گئجه‌ني ده کوچه‌ده ديغير دول‌لاريميزلا اوينايارديق. ديغير دول بيزه تکجه چرخين بير تکري دگيلدي. او، دونيا ايدي بيزيم اوچون.

گونلرين بيرينده، يئنه ديغير دول ياريشي قويموشدوق. ساعاتلارجا اويناياندان سونرا بايرام ايلکين اولدو. پول ييغيب بيله‌سينه کانادا آلديق. اوست-باشيميز بوتون توز-تورپاق اولوب آلنيميزدان تر سوزوردو. آنجاق، ديغير دول سورمکدن دويماياراق، يئنه اويناماقدان ال چکه بيلمه‌ييرديک. گون باتيب، آي گلميشدي. اوزاقدان بير کيشي بيزه ساري گليردي. بيزه ياخينلاشاندا آتامدير گؤردوم. گؤزلري باشينا چيخميشدي. ياخينيما گليب، »هئچ بيليرسن ساعات نئچه‌دي؟ نه زامان ائوه دؤنه‌جکسن؟ گل جهنم اول گؤروم!«-دئييب، قولومدان ياپيشيب سوروتله‌يه-سوروتله‌يه، ائوه سارى آپاردي. بير اليم ايله ديغير دولومدان ياپيشميشديم. ياري يولدا آتام ديغير دولا باخيب اليمدن آليب، گوجو وارکن تولازلادي. روحوم بدندن آيريلدي، سانديم. آغلامايا باشلاييب، »آتا، نه‌دن آتدين؟ قوي گئديم گتيريم. سن آللاه!«-دئييب ديغير دولا ساري قاچماق ايسته‌ديگيمده، آتام يئنه اليمي توتوب قولاغيمين ديبين قيزديردي! سونرا يئنه قولومدان ياپيشيب ائوه آپاردي.

ائوده، شام يئمه‌ميش ياتديم. صبح آتام ايشه گئدندن سونرا، کوچه‌يه گئديب، هر يئري آختارديم، آنجاق، ديغير دولومو تاپا بيلمه‌ديم. ائوه سارى قاييتديم. يولدا، اوشاقلار اويناماق اوچون مني ده چاغيرديلار. آنجاق اونلاري سايماييب، ائوه گئتديم.

 آنام نه قدر، »نه اولوب؟ نه‌دن توموبسان؟ کيمله ساواشيبسان؟ … «-دئدي. هئچ زاد دئمه‌ديم. اوتاغا گئديب، ديزلريمى قوجاقلاييب، سس‌سيزجه آغلاماغا باشلاديم. اوره‌گيم پارتلاماق ايسته‌ييردى. بيلميرديم نه ائدم. گئجه-گوندوزوم الدن گئتميشدي. دونيادا ياشاماق ايسته‌ميرديم.

ايکي گون بئله کئچيب، گئتدي. آنام گليب، ديله توتماق ايسته‌دي. بوغازيم پارتلاييب، آغلاماغا باشلاديم. آنام باغرينا باسيب، »ياشار بالام نه اولوب سنه؟ دئ گؤروم آنانا«-دئدي.

اوره‌کدن آه چکيب،»آنا، ديغير دولوم! آتام ديغير دولومو ائشيگه آتيب. من ديغير دولومو ايسته‌ييرم.«-دئديم. آنام ايسه باشيمي تومارلاييب، »اولسون، بير دنه آيريسيني تاپاريق.«-دئييب، اوره‌گيمي يوموشالتمايا چاليشدي.

بير يئدديجه ديغير دولومو ايتيرديگيمدن کئچميشدي. نئچه سفر بايرام قاپيميزا گلميشدي، آنجاق يئنه ائشيگه چيخماميشديم. اوره‌گيم چوخ داريخيردي. گون اورتا ايدى. حيه‌طده اوتوروب جوجه‌لريمه دن وئريرديم. بيردن قاپينين ايشگيلي آچيلدي. آتام ايدي. آياغا قالخيب سلام وئرديم. ياخينيما گليب، اوزومو اؤپدو.

‍-منيم گؤزل اوغلوم، سنه بير زاد آلميشام. بوگون چرخچي احمدين يانينا گئديب اوندان بير ديغير دول آلديم. گئت قاپينين داليندان گؤتور.

ـ آتاجان چوخ ياشا.  سنى چوخ سئويرم. سؤز وئريرم ياخشي اوشاق اولام!

ـ سن ياخشيسان. لاپ ياخشي اولاجاقسان انشاللاه!

سئوينه- سئوينه کوچه قاپيسيني آچيب ديغير دولو گؤتوروب بايرام‌گيلين قاپيلارينا ساري گئتديم. گؤيلرده اوچوردوم. بايرام قاپيلاريندا تک باشينا اوتورموشدو. مني گؤردوگونده ديغير دولا باخيب او دا سئويندي. ايکيميز ده، ديغير دوللاريميزى سوره-سوره ديغير دول ميدانينا گئتديک. ساعاتلارى بيلمه‌يرک، گونشين ساغ‌اوللاشما چاغيناجان، هئچ دايانمادان، اويناديق. گونش بالا-بالا داغين داليندا گيزلنيردى. بيز ايسه دونياميز ديغير دول‌دادير دئيه هله ده اويناييرديق …

اوشاقليق خاطره‌لريمده ياشاماقدان، آيريلماق ايسته‌مزديم، آنجاق، آرازين بير داها، »آتاجان« سسى ايله پارکا قاييتديم! آراز، »آتا، من دوندورما ايسته‌ييرم.«-دئييب، اليمى توتدو. آياغا قالخيب، دوندورماچى يانينا گئديب، اوشاقليغيمدان ايسه آيريلديم…