غريبه ديلداماقلي گونلريميز واريدي

بولگه لر سرويسي:به او نيه دوشوبدي؟

اوچومجي بولوم

يازان: احمد عسگرپور

سوسن نواده‌رضي

بولگه لر سرويسي:به او نيه دوشوبدي؟
-بيز ده گئديروخ سولاشدي‌يه!-اينديکي بيز سووا گيرنمه‌روخ بس او دا چيخسين سودان!- دئيه، دئر- دئر دئيينيرديلر اوشاق‌لار،آتيليب دوشه- دوشه.-آي آتووا لعنت قيز سنين! سَتَلجم اولاجاخسان، سحري به حووضدا نه غلط دارتيسان؟!- دئيه، چيمخيردي اوستومه بؤيوک مامانيم. الينده‌کي شويو ده ايکي يول چيرپدي سويون اوزونه کي: “چيخ کؤپه‌يين بيري! چيخ ملعونون بالاسي!”، من بوروق وئرديم، شوي جانيما ده‌يمه‌سين، فواره‌نين اوجو ايليشدي اومباما، اومبام سؤکولدو، ايچيم کئچدي، گؤزوم قارالدي آغريسيندان.بير جيغان- ويغان دوشدو کي، گل گؤره‌سن!
 اوشاق‌لاري دا دئمه، ائله بيل کؤز اود اوسته بير اووج اوزرليک آتميسان. مامانيم گلدي، مني سودان چيخارديب قطفه‌يه بورگه‌له‌ينده قولومون ديبيندن گينه ائله بير قيرتيق گؤتوره بيلدي کي، اومبامين گؤينمه‌سي پاک ياديمدان چيخدي!-بو اوتدار هامميسي سنين باشيوين آلتيننان چيخيرااااا اوتون قيرناسي!- دئدي، مني گئيينديره- گئيينديره. سونرا دا قَنووا گيرمک جرياني‌ني هامي‌يا تعريفله‌دي، قال ياتدي، غائله سؤندو، ال- آياق‌لار ييغيشيلدي، هامي گئتدي ائوه؛ البته کيييييي….. بير مندن سوواي!من، او ايکي تومنلييين اسيري ايديم آخي! مثلي ده پيسدي، دئيرلر موسلمانين ايشي اولماز… کسريني ده بيليسيز اؤزوز! آخي دئين اولا دَدون ياخجي، نَنون ياخجي هاممي نئينير سن ده اوننان ائله دا…بو يان- او يانا گؤز گزديرديم، جوراب‌دان پولو چيخارتديم توتدوم قيرنانين آلتيندا پاکلاديم، تاهيني آچيب صافالداندان سونرا، آپارديم حيه‌طين او باشيندا، تويوق نيني‌نين داليندا قويدوم هئره‌يه، اوستونه ده بير دانا کرپيج قويدوم.آعاجانيمين شققاواتلي بير خوروزو واريدي، تويوق‌لار هاميسي اوندان توک سالارديلار. دوغروسو، آدام‌لار دا اوندان حساب آپارارديلار! خوروز اوغلو خوروز ايدي! حيه‌طين او باشي اونون دارالخلافه‌سي ساييليردي، قاريشقا کئچنمزدي، ميلچک بيله اذن‌سيز اوچانمازدي اورالاردا. حيه‌طين بو باشينا دا نه اؤزو گلردي، نه ده تويوقلاري قوياردي گلسينلر. بير گلير- گؤتورو واريدي گل گؤره‌سن! خوروز قاغا مني گؤروب للک‌لريني شيشيرتدي، قانادلاريني يئل‌لنديريب، بوغازي‌نين نم هاراسيندان عجاييب گور سس‌لر چيخارديب بوينونو ديک توتدو، چئري- چئري باخدي منه، هاندايدي يومولسون اوستومه. ها ديله توتدوم، ميزيقيللي کئچديم، بارماقلاريم دن تؤکر کيمي اوزالديب، هوت- هوت- هوت فيشقا چالديم… جين آتيندان يئنمه‌دي. من ده “گون او گون اوسسون پيلو اوسته بودووو ييياخ!…”- دئديم بيله‌سينه، سونرا دا ترسه طرفدن سوزولوب، اکيلديم. قطيفه‌مي سرديم شريته، اوست‌باشيمي سهمانا سالديم، آدام کيمي گلديم قاريشديم ائو اهلينه.هر ايل يايين آخير آيي‌نين اورتالاريندا، بامادورلارين يئتيشيب قيزاران چاغيندا، هاممي روب چکردي. تبريزده هانسي محله‌دن کئچسه‌يدين روب اييي گلردي ائولردن. او زامان‌لار حاضيري روب اولمازدي باققال- چاققال‌دا. هر کس ايل‌ليک روببونو ائوده دوزلدردي. حيه‌طي يئکه اولانلار اؤز کردي‌لريندن بير ايکي تشت‌ليق، بلکه داها دا چوخ بامادور دررديلر. دئيرديلر: “آللاه برکت وئرسين، بو ايل روبلوغوموزو ائودن گؤتدوخ”. چوخ‌لاري دا لاله بامادورو آليب گتيرتديررديلر روبلوغا. لاله بامادورو هم تورش اولاردي، هم اتلي اولاردي هم ده روببونون رنگي زعفران کيمي گؤزل اولاردي. گل- گئتلي ائولر گؤره‌سن اون- اون ايکي سبد بامادورون روببون چکرديلر. سبد دئدييين، اينديکي سبدلر يوخ‌ااا، آدام بويدا سبدلر اولاردي.سمواري گتيريب دسترخاني آچديلار، هامميميز، ‌ايت ايلخيسي- کؤپک سوروسي، خيردا- خيزانلي دوزولوب اوتوردوق دسترخان باشيندا، ميرتداشا- ميرتداشا چاي چؤرک يئمه‌يه؛ بو اونون پئيسه‌رينه ساليردي، او بونون تيکه‌سيني ويزيب يئييردي، بيري او بيريسينه ايلديح اوزالديردي، او بيريسي گؤز- گؤز ائله‌ييب، بو بيريسي‌نين شيرين چايينا نمکداني آغناديردي، بو دئييردي سن منيم يئريمده اوتوموسان، او دئييردي چکيل اويانا منه سورتوشمه!… بو قتدان ايستيردي، او نلبکي آختاريردي، بيري چاي قاشيغيني ايتيرميشدي، بيري الين اوزالديب پنير گؤتورنده ويريب او بيري‌نين شيرين چاييني جالاييب دسترخاني شيرتيغا چکيردي… بو ويريم شيپبيلداق ايچينده بالاجا باجيم دا نه آلدي نه ساتدي، ايمکليه- ايمکليه بويوروب يانين باسدي دوز سوفره‌نين آراسيندا اوتوروب، بئش بارماغيني دا باسدي گول مورابباسينين ايچينه سونرا دا چيخارديب باشينا مس چکديييييي!… اوز- گؤزو بوتون شيره- شاققيلداق اولدو! اينديجه دوه‌چي‌نين بوتون ميلچک- ميغميغالاري ييغيشيب، يالاسين دويسون! هايکوي‌دن آغيز دئيه‌ني قولاق ائشيتميردي. مامانيم بير اوجدان چاککاچوک استکان‌لاري نلبکيده يئيخالاييب چاي تؤکوردو هاممي‌يه.-ديش دورون گؤروم، ايندي سموار گلر اوستومه! قيز آپار او اوشاغين الينه سو آخيت قيرنادان–دئدي مامانيم.-باش قولاغيم گئتدي، بير عالم ايشيميز وار هااااا… آدام بالاسي کيمين اوتورون چؤره‌ييزي يئيين گؤروم – دئدي خالام.-مه‌يه بيز ميمون بالاسي کيمين اوتورموشوق يئييروخ؟- دئدي خالوغلوم.اوشاقلار پاققا وئريب اوجادان- اوجادان گولدولر. هره بير طرفده ميمون اداسي چيخارتماغا باشلادي! خالام توتوب خالوغلومون يانچاغيني چيمديکله‌دي.-آاااااخ اتيمي قوپاتدين-دئيه باغيردي خالوغلوم.قاپي دؤيولدو، “قاچ او قاپيني آچ مشدعلي حامبالدي” دئدي بؤيوک مامان.
هن، دوز دئييردي.مشدعلي حامبال باشين آشاغا ساليب، زيققينا- زيققينا بير يئکه سبد بامادور کؤره‌يينده، “ياللاه، ياللاه” دئيه، قاپيدان گيريب دالاندان سووشوب، حيه‌طه ساري گئتدي. پيلله‌لري يئندي آشاغا، آپاريب سبدي حووضون ياخينليغندا دايادي دووارا. سبد مشدعلي‌دن يئکه ايدي! بير به بير آلتي سبد بامادوري گتيريب ييغدي حيه‌طين قيراغينا:-خانيم من گئتديم- دئدي.-دايان بير تيکه چاي چؤرح گتيريم- دئدي بؤيوک مامانيم.مشدعلي: “زحمتيزه راضي ده‌ييلم”- دئييب، اوتدو کوچه قاپيسي‌نين سککيسينده دينجين آلا، خالوغلوم دا مئژمئييده چاي، پنير چؤرک بير ده قتدان آپاردي بيله‌سينه. من ده گئتديم. اوتوردوم قارشي سککي‌ده گؤزومو زيلله‌ديم حامبالين اوزونه؛ کوله بوي، اورتا ياشلي، چال ساققاللي اوزو قاتماقلي بيري ايدي. يئکه ال‌لري هئچ ياراشميردي کيچيک اندامينا، بيرووزا اوخشوردو! تومان کؤينه‌يينده ياماق ياماق اوستوندن تيکيلميشدي. يايين بو جيزلاماسيندا، اَينينه دري جيليققا گئييب، باشينا دري پاپاق قويموشدو. شاقاقلاريندان نوودان کيمي تر آخيردي. بير نئچه تر داناسي دا بورنونون اوجوندان داميب نلبکيده چايينا دوشدو.
-سلام مشدعل‌آعا…- دئديم بيله‌سينه.
-عليکوم اسسلام بالا.-دئدي، هئچ باشيني قالديرمادان.-به قيزيشميسان بو ايسسيده بؤرک قويموسان؟
ساغ اليني آپاريب پاپاغيني دال- قاباق ائله‌دي، باشين سالدي آشاغا، آلديرمادان چيرک – پولوک، قاتماقلي ال‌لري ايله تيکه توتدو اؤزونه.
گؤزلري قاپقارا، باخيشي ايسه، غم درياسي ايدي، جومدوقجا جوموردو آدام. آلنينداکي چوپورا بنزر مؤهور يئرينه باخيرديم. دانيشماقلا ائله آراسي يوخيدي. گويا منيم ده اوردا اولماغيم اونون راحاتيني پوزوردو، آنجاق من، بونو بيله- بيله ائله‌جه اوتوروب گينه ده هوروت- هوروت زيلله‌نميشديم اونا.-به ايچري گئتميه‌جاخسان؟- سوروشدو مندن.-يوخ. اوتوموشام چوبوق چکماغيوا باخام.- دئديم.
-نه بيليسن چيبيخ چکه‌جييَم؟-ائله بئله‌سينه!-من تياتورام(تئاتر)؟-يوخ، مشدعل آعا حامبالسان، چَح باخيم داااا نولار؟!
دوداغي‌نين بير طرفي بيلينه- بيلينميه بير آز قاچدي. “لا اله الاالله هاااا” دئدي. ال ائله‌دي جيليققاسي‌نين ايچري جيبيندن چوبوغونو چيخاتدي. سونرا دا بئلينه باغلاديغي شالي قوتدالادي- قوتدالادي، بير دانا کيربيت، بير دانا دا پارچادان کيسه چيخارتدي.-مشد عل‌آعا، او کيسه‌ده نه وار؟-قيزيل اشرفي!-هاني، گؤرست باخيم!-آللاه اوولاديوا عغيل وئرسين! نه اولاجاق؟ تانباکي‌دي تانباکي.-تانباکيني نئينه‌للر؟ نيه سوخموسان شاليوا؟- دئيه سوروشدوم.-ايرحمتليغين قيزي به دئمه‌دين چيبيخ چَح؟! مجال وئر چکيم دااا.              آردي وار

منبع :