کهليک
1398/05/20
بولگه لر سرويسي: بئله دئييرلر، اسکي زآممانلاردا گونلرين بيرينده بير نفرين الي بتر بوشا چيخار. بو يازيق آدام اؤزون چوخ اويان – بويانا، اودا – کؤزه ويرديقدا مع‌الاسف الينه پول توخدآمماييب، الي هر يئردن اوزولور. بئچاره کيشي بو فيکره دوشر کي اؤزون چؤل – باييرا ويرسين تا بلکه قورد – قوش داغيديب، آجي ياشاييشدان الي اوزولسون.
کيشي اؤزون چؤله ويرديقدا فيکريندن مين – بير ايکي فيکر و خيال کئچيردي. آخ نه ائديم؟ نه تهر اولاجاق؟ آرواد – اوشاق نئجه اولاجاق‌لار؟ و… بو آرا بيردن بيره بير اتلي کهليک سسي يازيق کيشي‌نين فيکرين اؤزونه جلب ائدر. بو دؤنه او تام فيکيرلرين اونودوب، يالنيز کهلييه فيکر ائدر. نه گؤزل کهليک‌دير؛ قلم قاش‌دير؛ اتلي‌دير؛ يئريشينه باخ و… بو دؤنه کيشيني تآمماح توولاييب اونو توتماق قرارينا گلر. او، حيله ايله، کلک ايله، فيشقا چالا- چالا ديلسيز آغيزسيز کهلييي خامسيديب، بيردن بيره توتار. يازيق کهليک ايسه کيشي‌نين قوجاغيندا هئي قاققيلداييب، اونون قوجاغيندا قاناد چاليب اوچماغا چاليشار. آمما نه ائيله‌مک، اولماز کي اولماز.
قارابخت کيشي ايسه “هه ياخشي اولدو، بو گونون خرجي چيخدي. اونو آپاريب شهره ساتارام”- دئيه شهره ساري يوللانير. هله تزه شهرين دروازاسينا چاتماميشدير کي، گؤرر چال – چاتداسين سسي گلير. بير ايکي نفر اورادا اولانلاردان “آي بالا نه خبر دي”- دئيه “شاه گلير” بيله‌سينه دئيرلر. آوارا – سفيل دولانان کيشي کهلييي قييناغينا ويريب، شهره ساري يئنه يولا دوشر. بو دؤنه – سالام آي کيشي! سسي بونو ديسکينديرر. سسه ساري دؤنوب بير عسگر گؤرر. بختسيز کيشي تيتره‌مه‌يه دوشوب قورخوسوندان ال – آياغي اسمه‌يه باشلار. آمما دولت آدامي(عسگر) اوزون اونا توتاراق “اده قورخما من سنين دوستونام؛ مني خاطيرلاييرسان‌مي؟”- دئيه يازيق کيشي‌نين قورخوسوندان بير آز آزالار. اونلار خوش – بئش ائديب، بير آز سونرا يازيق کيشي‌نين يادينا دوشر کي نئچه ايللر قاباق او عسکره بير خدمت ائتميشدير؛ شانسدان او عسگر اونون ياخشيليغين اونوتماييب، چاليشيردي بير تهر اونو جبران ائله‌سين. بو ايکي قديمي‌دوست بير آز خوسانلاشاندان سونرا بير- بيرلرين ياخشي باشا دوشرلر. باختي قارا کيشي باشينين حال قضيه‌سين اونا دئديکده عسگر اوزون اونا توتوب “عجب عجب اولسون، سن هئچ ده نايراحات اولما، من سنه ايندي بير ياخشي يول گؤستره‌رم” دئيه- او کيشي‌يه اورک وئرر.
شاه ايندي بورايا گله‌جک. سن بير رول اوينا تا اوندان بير پول بلکه قوپارتديق. نايران اولما من سنه اونلا گؤروشمک ايمکاني دا يارادارام. هئچ قورخما! يازيق کيشي‌نين ايکي الي اولار بير تپه‌سي؛ آي ميخي ميسمارا دؤندرن آللاه! منه اؤزون يارديمچي اول. سن گئچمه آللاهين ايشلريندن. بير نئچه ديقه سونرا بو ايکي دوست حيم بير اولوب بو قرارا گلرلر کي بير جور بو کهلييي شاها ساتسينلار.
بو سؤز يا داها دوغروسو کلک، بونلارين آغيزلاريندان تازا چيخميشدي کي سس قوپار- “شاه گلدي”! شهرين مئيدانينا حامي‌توپلاشيب شاهينان گؤروشمک ايسته‌ييرلر. آمما دارغالار بو ايمکاني اونلاردان آلارلار.هامان عسگر قاباغا يئري‌ييب، دارغالارين بؤيوگونه دئيير” – “اجازه وئرين بو آدام گلسين شاهين قوللوغونا. بونون بير جور کهلييي وارکي ديل بيلر. اونو ايسته‌يير شاها پئشکش ائتسين.
اونلار ايسه بو سؤزو ائشيتجه‌يين تعجبله‌نيب “بو اولان ايش‌دير”- دئيه توموب اجازه وئررلر. بو کيشي الين باش گؤزونه چکيب و سؤزلرين ذهنينده حاضيرلاييب، دوستونون همتي و يارديمي‌ايله شاهين قوللوغونا يئتر. اؤنجه سالام وئريب دانيشيق ايجازه‌سي آليب دئير:
– شاها سنه فدا اولوم من؛ بير کهليک توتموشام کي يالنيز سيزه لايق‌دير. بو کهليک عجيبه – غريبه ايشلر گؤرر. مثلا بونا اؤيره‌دنده کي گئت اون دانا کهليک گتير، اون بئش دانا توولاييب گتيرير. ائله اونا گؤره من صلاح گؤرورم اونو آليب آپاريب درباردا ساخلاياسينيز کي شوبهه‌سيز لازيم اولار.
شاه بو کيشي‌نين آغ يالانلارين دينله‌ديکده گولومسه‌ييب الين جيبينه آتيب، اونا بير کيسه آلتون سيککه وئره‌رک کهلييي اوندان آليب و ائله‌هامان لحظه الين آتيب اونون بوينون اوزوب، باشين بير طرفه، لشين ايسه بير طرفه تولازلايار. بو ماجراني گؤرنلر حويوخوب بير سوکوت مجليسه حاکيم اولار. بير آز سونرا قوللوقچولارين بيري شاها “سنه فدا اولوم، اولمايا سنه لايق دئييلدير کي به‌ينمه‌دينيز؟” دئير.
– يوخ، يوخ هئچ ده ائله دئييل. باخين بير کهليک کي اوز يار – يولداشين گودازا وئره، اونلاري توولاييب مفته‌سينه ساتا، جزاسي يالنيز اؤلوم دور.
بو سؤزو شاهين آغزيندان ائشيدنلر‌هاميسي يئنه توموب، يئني بير درس آلمالارين اؤيره‌نديلر…..
منبع :