چوخ ائولرده بو گئجه ککليک لر قابلامالار دا ، قايناماق دا اولاجاق لار . اينسان ، قارني اوچون هر رذالته اَل آتير . يارالي قوشلارين باشلارين اوزوب قانلاري سوزه سوزه چي يين لريندن آسلاييب کئف ائده – ائده  قارلارا ايز ساليرلار .ککليک لر اينسانلاردا ن قاچسالاردا يئنه گئديب اونلاري تاپيرلار . ککليک اوووندايديم . 

گؤزلريم ايليم – ايليم اونلاري آختاريردي . آما ته تي يه چکمک بيله مه ندنسه عذاب گليردي . بو گون بيله مه نم نه اولموشدور. دونياني شعر کيمي لطيف گؤروردوم . اونلارين گؤزه ل لييي کؤنلوم ده سئويملي بير جوشقو ياراديردي . نه محکوم ايديلار نه سوچلو . 

هئچ بير اتهام لاري يوخ ايدي . پوسقودا ياتارکن اؤزومو اعدام ليق اولان آداملارين سينه سيني دئشه ن عسگر لر کيمي حيس ائديب توفنگيمي يئره قويدوم . اونلاري قاچارکن قووالاماق ايسته ديم . نئچه سي کي منيم کيمي اووا چيخميشديلار مني گؤره رکن هويا باسيب ياري يولدان قايتارديلار . قان تؤکمه يين اونلارا باشقا بير لذتي وارايدي . شيکاردان داد داماغ آليب قالانميش تونقال لاردا قيزيشماق شاختانين کسکين لي ييني آزالديردي و بير سيرا آداملارهدف سيزجه سينه گولله آتيرديلار . هم مه شه اَلي دولو قاييداراق ، بو دفعه اَلي بوش دؤنمه ييم اؤزوموده حيرته دالديرميشدي .

گونش ساريمتيل ايشيقيني بولوتلار آلتيندان سوزدوره رک ، يول اوسته عجيبه بير قالاباليق ياشانيردي . اؤنه گئديب آدديم لاريمي ايتيلده رک ، قانا بَلَشميش بيريني گؤردوم . ناغافيل بيرگولله اونون گيژگاهينا توخونوب يومروق بويدا باشيندا يئر آچميشدي . او اؤزوده شيکارچي ايدي . 

بيله سيني ياخشي تانيرديم . حتتا ائوي نين دامينا اوچ جئيرانين بورنوزونو تيکميشدي . جماعت ژاندارمري يه خير وئرسه لرده هله گليب چيخان اولماميشدي . اَل ده توفنگي اولان بير – بير اَکيليردي . و اونون باشيندان آخيب دونان قان ، باشي اوزولموش ککليک لرين قانلي بدن لريني قانا بولاميشدي . قانين ، قانين لا فرقي يوخ ايدي .