اؤتن آيلاردا ايش گليب او يئره چاتميشدي، گوجلو ابوطاليب زميلرينده ايشله‌ينده، ايکي نفر ياخين آداملاريندان، قمه‌دن-کرکي‌دن گؤتوره‌رک دؤوره‌سينه دولاناراق اوندان مواظيب اولوردولار. ائله‌جه، ابوطاليبين طايفاسي اونو بوشلاماييب آرخاسيندا دوروردو. ابوطاليبده طايفاسينا گوونرک، هده-قورخولاري سايميردي. سونوجدا، ابوطاليبله اوغلونا خاطير کندده ايکي تيره‌ليک يارانميش، بيرطرفده يالنيز ابوطاليبين طايفاسي و قارشي طرفده کندين باشقا طايفالاري بيرلشميشديلر. بئله‌جه، او گون تک قالان طايفا قورخوسوندان سسيني چيخاردانميردي. دئمک ابوطاليب گئتمه‌لي ايدي. هاندان‌هانا، اوچ نفر آتا مينميش توفنگلي مامور، بير گوروهبانلا ايکي سرباز، گلديلر. اونلار کند ايچينده آتلاريني چايين ساغ اليندن سوروب، قالا قاپيسينا يئتيشنده اوراداکي کؤرپودن چايين سول الينه گئچديلر. گئديب قالاقاپيسيندان گؤرسنن ابوطاليب‌گيلين حيطلرينه گيرديلر. بير موددت سونرا، ابوطاليبله عاييله‌سيني دؤوره‌له‌يرک ائويندن ائشيگه چيخارتديلار. او زاماندا، کندده ائوده قالان قالماميش،‌هامي‌قالاقاپيسيندايدي. بو باساباسدا، بيردن بيره، چايدا پالتار يويان بير دول قادين، ابوطاليبين اوغلونو گؤستره رک گوروهباني خيطاب ائديب اوتانمادان دئدي: “جناب سروان، بو کؤپک اوغلو بير دفعه ده منه دولاشيبدي!!” سربازلار دونوخوب قالارکن، گوروهبان اودغونوب جوابيندا دئدي: “ائله ذاتلارا بيز يئتشمه ريک، محکمه يئتيشر!”‌هامي‌هويوخ قاليب ابوطاليبله عاييله عوضوولري باشلاريني آشاغي تيکديکده، ابوطاليبين اوغلو غورورلا باشيني قالديريب، بير آز قادينا، بيرآزدا جماعته باخدي. اوسته لييب اوز توتوب گوروهبانا دئدي: “جناب سروان، او آروادا بير دفعه يوخ، اوچ دفعه دولاشميشام!! اولوکي ياديندان چيخيب!!” اويان-بوياندان ابوطاليبين اؤلوسونه-ديريسينه يامان-يوغوز ياغديقدا، گرگينليگي حيس ائدن گوروهبانين رنگي قاچدي. سانکي ساندي بيرآزدا دايانسالار، ابوطاليبگيلي اللريندن آليب اؤلدوررلر. اونا گؤره توفنگيني گؤستره رک جماعته قيشقيردي: “ياخين گلمه يين! … اوزاقلاشين!” آردينجا سربازلاريني‌هارايلادي: “تئز اولون سورون گئده ک! دايانمايين!” سوندا چايين سول اليندن يولا دوشوب ابوطاليبگيلي يوردلاريندان اوزاقلاشديرديلار.

بلکه ده ابوطاليب گيل، هله ياري يولا يئتيشمه ميشديلر کي، بير سيرا کيشي، ابوطاليبين حيطينه ساري يوللانديلار. گئديب ديواريندان آشيب تاختا قاپيسيني آچيب ابوطاليبين ائوينه تپيلديلر. اونلارين آردينجا چوخلو آدام حيطه دولوشدولار. دئيه سن، هر نمنه ابوطاليبين ائوينده اولسايدي، آپاريلميشدي. تکجه، پيه سينده قارا اؤکوزو قاليردي. اونودا، ائله بيل، ائله او گون عم اوغلانلاريندان بيري، ريضا اوغلو قاسيم، گليب آپاراجاق ايميش. آنجاق دونن گئجه قاسيم يارالانيب گله بيلمه ميشدي. دئييرديلر، دونن دوکانلارين بيرينده، ايکي نفر قاسيمي‌قارشلاييب دئميشديلر: “طايفازين چوخوندان پول ييغميشيق! سنده پول وئر بيزه، وئرک مامورلارا صاباح عم اوغلوو ابوطاليبي کنددن آپارسينلار!؟” جوابلاريندا، قورخماز قاسيم اونلارين ده ده ننه لريني قاريشديرميشدي! بئله ليکله ياخالاشميشديلار. او حينده، بير باشقاسي داليدان بالتاني قاسيمين باشينا اندريب ساغ قولاغيني باشيندان آييرميشدي. او اوچ نفر قاسيمي‌قانينا بولاشديريب قاچيب گئتميشديلر. … آنجاق دونن قاسيمي‌ايشدن سالانلار، بوگون ابوطاليبين ائوينه گيرنلر آراسيندا گؤرسنيرديلر!

ابوطاليبين حيطينه گلن جماعتين بعضيسي تئزراق قاييتماق ايسته‌ييردي. آمما بعضيسي ائوي بوجاقلاريناجان آختاريردي. گورونوردوکي، بونلارين آراشديرمالاري نتيجه‌سيز قاليردي! هله بعضيلري دام-ديوارلارا ديرماشيردي. اونلارين بايراقلاري يوخ ايدي، يوخسا ابوطاليبين دامينا سانجارديلار! بالا-بالا گلنلر حيطي بوشالديب قاييديردي. او دورومدا، بير نفر پيه ده اؤکوزو گؤستررک يانينداکي يولداشينا دئدي: “وآلله بونو کسمه‌سک منيم اوره‌گيم سويوماز! عمه‌م آغلايا-آغلايا دئيردي، داعوادا او طاليب‌گيلين بابالاري منيم بابامي‌اؤلدورموشدولر!!” آردينجا جماعته قيشقيردي:”اولان،‌هارا گئديرسيز بس؟! گلين بو اؤکوزو چيخارداق کسک!!” بير باشقاسي ياخينلاشيب اونون فيکيريني بينيب اؤکوزون بئليني تومارلاييب دئدي: “سن اؤلمه، اتي بير کندي گؤرر! آرتيقدا قالار! چاتي گتيرين!” بئله ليکله يييه‌سيز اؤکوزون دؤوره‌سيني آدام آلدي.

اونلار، يارديملاشاراق، اؤکوزون بوينونا چاتي باغلاديلار. بنديني کسديلر. حئيوانين صاحابيني يامانلايا-يامانلايا، اونو پيه‌دن حيطه و حيطدن کوچه‌يه چيخاتديلار. سوره‌رک قالا قاپيسنا گتيرديلر و چايين قيراغينا يئتيرديلر. اورادا چاتيني اؤکوزون قاباق قيچلارينا دولاييب ترپنمه‌سينه ماجال وئرمه‌ييب ديلسيز-آغيزسيز حئيواني بؤيرو اوسته ييخديلار. پيچاغي بوغازينا قويوب قيبله‌يه ساري کسديلر. داغيليب گئتميش جماعتين چوخو، بير-بيرينه “قاييدين ابوطاليبين اؤکوزونو کسيرلر! ” دئيه دؤنموشدولر. دول آرواددا آيري پالتار گتيريب اوولکي يئرينده يويوردو. يئر شوخوملايان اؤکوزو کسندن سونرا ، دريسيني سويدولار . اتيني شاققلاييب دوغراديلار. قوربان پايي تکين اورادان گئچنه پاي وئرديلر. بئله ليکله بو احساندا بير کندي اورتاق ائتمگه چاليشديلار! ابوطاليببين اليندن آجيقلي کيشيلر، اؤکوزه ايشاره ائدرک، اؤيونرک گلن-گئدنه دئييرديلر: “گئت کؤپک اوغلو، آدامين باشينا بو اويونلاري گتيررلر!!” کيشيلرين بو سؤيلميني، اوراداکي اوشاقلاردا بؤيوکلنرک يانسيلاييرديلار. ياز گونونده، فيض‌اله‌نين اوغلو ايسکندر بو اولايلاري ياخيندان ايزله‌ميشدي. آخشام چاتسادا، هله گنج ايسکندرين ائولرينه قاييتماغي گلميردي. او چاغدا، اؤکوزو کسنلرين بيري، حئيوانين بير پايجا قالان جيگريني ايکي اللي گؤتوروب، اونا ياخينلاشيب دئدي: “ايسکندر، گالا بو جيگلريده آپار وئر فيض‌اله عمي‌يه! سنين‌ده ده اوو چوخ ياخچي آدامدي!” و بئله ليکله ايسکندر جيگر الينده ائولرينه دؤنمه‌لي اولدو. يئتيشيب‌ دده‌سينه گؤندريلن پايي تقديم ائله‌مک ايسته‌دي. آنجاق فيض‌اله اليني قايتاريب آجيقلا اوغلونا دئدي: “اولان، آپار جيگري آت چايا! ييخيلان آغاجا بالتا ووران چوخ اولار!!” ايسکندر دينمز-سؤيلمز دؤنوب چايا طرف گئتديکده، کندده آلله آدامي‌تانينان فيض اله آرتيردي: “اوغول، من بيلميرم ابوطاليبله اوغلو ناميس اوغروسو اولدولار يا اولماديلار! آنجاق ابوطاليبين اؤکوزونو کسنلر مال اوغروسودولار! اونلارا قوشولما اوغلوم!”