قوناقليق

بولگه لر سرويسي: دوغروسو سعيد‌گيلين گليشي بيزيم گئنيش، آغير‌باش عايله‌ميز اوچون ده بير يئني‌ليک اولدو.

شهرام گلکار

بولگه لر سرويسي: دوغروسو سعيد‌گيلين گليشي بيزيم گئنيش، آغير‌باش عايله‌ميز اوچون ده بير يئني‌ليک اولدو.
 آيري-آيري ائولر اولساق‌ دا، چوخدان‌دير باجي- قارداشليقدا بئله باش- باشا اولماميشديق. بيزلرين تفرئحي بونلار دئييل‌مي! بو گل- گئت، قوناقليقلاري دا ياشاماساق، اينانين ديقلاييب، آرادان گئده‌ريک.
بعضي اولايلار اؤز-اؤزونه آلينان‌تک، بو ايکي يانلي قوناقليق دا بيزي تام افاده ائده بيلمه‌ديييم بير سئوينجه بوروموشدو. آنامين جوشقوسونون حدّي يوخ ايدي. آخي ائيواز دا گئديشيندن خئيلک سونرا، باکي‌دان يئني‌جه گلميشدي. سينيرلار تزه‌جه آچيلميشدي. چوخونلوقلا آل- وئرچيلر گليب گئده بيليرديلر.
بيز داها چوخ ائيوازا گؤره گئتميشديک اورا. سعيدله خانيمي رعنا بيزيم عايله‌يه، اؤزلليکله ده آنام‌ اوچون لاپ بالالاريندان دا عزيز ساييليردي. رعنا ننه‌مين خالاسي اوغلو کاميل‌ين قيزي‌يدي، جبهه‌ده يولداشي آناسيني سؤيدويو يامانين قارشيليغيني آلينجا، تَتييي چکيب، حاق‌سيز يئره بئناواني وورموشدو. رعناني بؤيوک آناسي بؤيوتموشدو.
قوهوموموز دا اولسا، اون ايلي اؤتموشدو رعناني گؤرمه‌يه‌لي. دهليزده هامي‌نين يانيندا بويويلا-بوخونويلا قارا چادرانين ايچينده، قارالارا بورونموش آغ- آپباق کرم‌سي نور شاخي‌ييردي بيله‌سن. داها ايي بيريسيني حاق ائدير کيمي دوروردو بلکه، بيلمک اولمور! نه قدر اؤزونه گووه‌نن، دويغولارينا حاکيم، اؤتکم و ده ظريف گؤستريردي. گؤزلرينه صاحيب، باخيشلاريني جيلوولايان، اللرينه، حرکتلرينه ماليک کيمي گؤرونوردو. گؤزونه باخاندا، ايچي آنلاشيلمايان بيري‌سي؛ بيزه يوووشمازليغي چوخ غريب ايدي. کيم دئيردي کي، اونون کيمي بيريسيني، ايندي ده چارداق‌دا قالان سعيده وئره‌رلر.
هر کسين باشي بير طرفده صؤحبته قيزيشميشدي کي، بيردن سعيد برکدن دئدي:
– ائيواز قارداش آنلاشيلان آل- وئرچي‌سن، دئييل مي؟ائيواز سيخيلا- سيخيلا دئدي:
– ائله‌دي.
– نه آليب، نه ساتدين؟ بلکه دئيه‌سن. بوردا دئييله‌نه گؤره خئيلک پول آپاريبميش‌سان. قازانج گؤتوره بيلدين مي؟
آنامين‌ دا، “اختيار”ين‌ دا اوره‌ييندن، ائله‌بيل هاي وئردي! ايندي سوروشا بيلمه‌ييب، دينله‌يه بيلمه اولاناغي يارانان، ايللرين اوتانجدان چکينيب آوارا بيلمه‌ديک‌لري ماراقلي يانيتي عايله‌نين اصيل پاي و حاقّ صاحيبي اولان عوضولرينه مجبور وئره‌جک اوزه‌ره ايدي. ايکي‌سي ده قولاقلاريني شکله‌دي.
ائيواز بارداشيني تزه‌له‌ييب، ايکي اليني بير- بيرينه سورته- سورته؛
– نه دئييم واللاه، فايداسيز الدو، دئدي.
سعيد سؤزلو آدام کيمي يئکه قارني ايله يئرينده قورجالانيب، گؤزونو آدامي اله ساليرميش‌جاسينا تئز- تئز قيرپيردي. سؤزلري ده کانکا دريز دزگاهي تک تلم- اطرافي دوشونمه‌دن تله‌سيک دوغراييب آنيندا آتيردي چؤله. ايسته‌دي يئنه دانيشا، رعنا اونا اؤزل ايمالي مولاييم باخيشلا آنلاتدي کي، يئتر! يوخسا سعيدين سؤزلويونده سينير دئيه بير سؤزجوک يوخ کيمي گؤروکوردو.
بو کز ننه‌سي چيمخيردي:– آي بالا چؤره‌يين يانيغين آدامين باشينا قاخيللار. او قدَر پول ايلن بورادا شهَرين بير طرفينه يييه‌ دورماق اولاردي. يومورتلامادي يومورتلامادي، بس بونون فالاسينا نه گلدي!؟
ائيواز بو دفعه قيزارا- قيزارا دئدي:
– هامي‌سيني وئرديم دَري‌يه. دئمه دَري‌ده ده چؤرک يوخ ايميش.
سعيد بو کز بينه‌ني زارافاتا قويوب، دئدي: ?
– اينينده‌کي گؤدکجه ده کئچه‌دن دئييل. آنلاشيلان آل- وئر ائتدييين دَري‌نين ده کاري يوخ ايميش.آنا‌م يئنه قاييديب دئدي: واللاه اولاسي ايش دئييل! ايسته‌ييرسن حيط‌ده‌کي چاققال- چوققالي قوواسان، ائوين ايتي دابانينا ياپيشيب قويمور دَبه‌ره‌سن. او قدَر پول تکجه دري آل- وئري‌ ايله توکه‌نيب، بيته‌مز.
ائيواز ايسته‌ييردي يئنه باشدان-ائتدي نه‌سه دئيه؛ آناما ياپيشيقلي اوتورموش بؤيوک قارداشيم اختيار، سينير چاشنيلي، ياري جيددي ياري شوخلوق بيردن اليني ايکي-اوچ کره قوجا آنا‌مين قاسيغينا چيرپيب دئدي:
– آرواد، نييه باشا دوشمورسن؛ بو دري‌يه وئريب باخ، بو دري‌يه.
سعيد اوشاق‌تک برکدن قاققيلداييب دئدي:
– دئديم آخي، قارداشيم ماياني باتيرماز!
اوردان- بوردان خيمير- خيمير اؤته‌رگي گولوش سسي، خفيف پيققيلتي دويولدو دا، بيتدي ده. آردي‌جان آجيناسي حوزونلو سوکوت ائوين بور- بوجاغين اووسونلادي.آز سونرا قورونتي‌دان چيخميش يئنه پيققيلتي سسي، هامي‌نين باخيشين سعيده ساري يؤنلتدي. دوزو ائيوازين نيققيلتي‌سي سعيدين آزغينليغيني بيره‌- مين چوخالديب تميز دؤشونو آچميشدي. ذاتن اورتام يئترينجه گريلميشدي بوندان اؤته نه اولا بيلر کي دوشونوردو.
سعيد دئدي:
– آنا، سن آللاه مني باغيشلا.
آنا اؤز دردينه داليب، آني اونوتقانليغا بوراخيب آخيمدان اوزولوب دئدي:
– آللاه باغيشلاسين بالا.
سعيد دئدي:
– هاميني‌ دا آلداتماق اولسا، سني آلداتماق اولماز!
آنام قافاسي بير گليب بير گئدن حالي ايله گويا اؤز قارنيندان چيخان بالالاري دئييل ده تکجه‌نه داها بو گون يولدان گلميش قوناق بونو دوشونورموش کيمي ايچدن قايغيلي قايغيلي سوروشدو:
– گؤره‌سن نييه؟ –
سعيد چؤل ادبياتينا اويغون، اؤنونو آرديني دوشونمه‌دن دئدي:– نه اؤپمه‌لي اوزون واردير، نه‌ده کي سي…
اختيار سعيدين سؤزونو آغيزيندا پارا قويوب ايسته‌دي دورا …، هامي رعناني گؤسته‌ريب، هيم ائله‌دي، ديشي بوغارسيغيني کسه کسه اوتوردو قالخديغي يئرينه…

منبع :