جانتيق
جانتيق
1395/04/27
آذربايجان ناغيللاري
بولگه لر سرويسي:جانتيق بير آز دا يول گئتدي، گؤردو کي، دوغرودان دا بير دامين اوستونده بير قوش اوچور، قوشون دا بوينوندا بير دسته آچار وار. باخيب گؤردو کي، دامين يان-يؤره‌سينده بير چوخ آدام وار، داش اولوب قاليب. “يا مدد”، - دئييب اوخو قوشا طرف دوزلتدي. بير اوخ آتدي ديَمه‌دي. جانتيق ديزينه کيمي داش اولدو. ايکينجي اوخو آتدي، بو دا ديَمه‌دي، جانتيق قورشاغا کيمي داش اولدو. وار قوووه‌سين ييغدي، اوخو دوزلتدي، اوچونجو اوخو آتدي. اوخ دوز قوشون دؤشونه ديَدي. قوش دامين اوستونه دوشدو. جانتيق سيلکله‌نيب داشدان چيخدي. تئز داما چيخيب آچارلاري گؤتوردو. قاپيلاري آچدي، قيرخينجي اوتاغا گلدي. قيرخينجي اوتاغي آچاندا نه گؤردو... همين دده‌‌سي‌نين ائوينده گؤردويو شکلين اؤزو بوردادي. مرمر هوووز ايچينده سود، هر طرف گول-چيچک. پري خانيم دا بير طرفده بو گوللرين آراسيندا.
جانتيق آز قالدي اؤزوندن گئتسين. پري خانيم جانتيقي توتدو. بلي، پري خانيملا جانتيق اؤپوشدولر، گؤروشدولر. جانتيق قيزين گؤزلليگينه حئيران قالميشدي. پري خانيم دئدي: - ايندي جانتيق، مني آت دالينا، قاچ! يوز آدديم دالا باخما، يوخسا دالا باخسان، داش اولارسان. جانتيق پري خانيمي دالينا آتدي. ائله کي، قاپيدان چيخدي، گؤردو کي، بوتون يئر، گؤي، داغ، داش، آغاجلار، مئشه‌لر، ائولر هاميسي چاغيريرلار “توت قويما”. سس-کويدن آز قالير قولاق توتولسون. جانتيق دالا باخماييب قاچدي. يوز آدديم گئدندن سونرا پري خانيمي يئره قويوب، يولا دوشوب گئتمه‌يه باشلادي. آز گئتديلر، اوز گئتديلر، دره، تپه دوز گئتديلر، گليب بير شهره چاتديلار. بير ائو توتدولار، بوردا قالديلار. بونلارين ائوينين دالي دره ايدي. ائولري‌نين ده قيرخ پيلله‌سي واردي. هيتلريندن قشنگ سو آخيردي. بونلار بوردا بير نئچه واخت ياشاديلار. بير گون پري خانيم هيتده‌کي سودا باشين يويوردو. جانتيقي چاغيريب دئدي: - جانتيق، سن سويون قاباغيندا دور، قويما منيم باشيمين توکونو سو آپارسين. چونکي هانسي باغا منيم باشيمين توکوندن گئتسه، او باغ يايدا دا، قيشدا دا مئيوه وئره‌جک. بلي، جانتيق سويون قاباغيني توتوب الينه بير چوبوق آلدي. سودا آخان توکلري چوبوقلا بير-بير توتوردو. دئمه جانتيقين گؤزوندن بير توک يايينيب کئچير، خبري اولمور. ايشين ناتارازليغيندان دئمه بو سو دا پادشاهين باغينا آخيرميش. ائله کي، توک گئدير باغا، قيشدا دا باغ اوزوم گتيرير. پادشاهين باغباني بير گون قيشدا باغا گئدير، گؤرور کي، باغ ائله اوزوم گتيريب کي، مئينه‌لر باشين يئره قويوب. باغبان لاپ معطل قالدي، قوپ- قورو قورودو. اؤز-اؤزونه دئدي: جهنّمه نه اولور-اولسون، پادشاها اوزوم آپاراجاغام. باغبان ائششيي يوکله‌دي، پادشاها اوزوم آپاردي. پادشاه گؤردو کي، بودو، باغبان ائششه‌يين هوشلويا-هوشلويا گلير. ائله کي، باغبان اوزوملري پادشاهين يانينا گتيردي، پادشاه گؤردو کي، تزه اوزومدو. پادشاه چوخ تعجبلندي کي، قيشين بو واختيندا باغبان تزه اوزوم گتيريب. باغبانا دئدي: - بو ندي؟ بو اوزومو هارادان گتيرميسن؟ باغبان قورخا-قورخا دئدي: - قيبله‌ي-عالم ساغ اولسون، بو ايل قيشدا دا باغ اوزوم گتيريب. من ده سنه سووقات گتيرديم. ائله کي، پادشاه بونو ائشيتدي، غضبله‌نيب دئدي: - ائي ملون، يقين کي، باغ هر قيش اوزوم گتيريرميش، سن گيزله‌ديرميشسن. يقين بو ايل چوخ گتيريب گيزله‌ده بيلمه‌ميسن، منه ده گتيرميسن. او ساعت امر ائله‌دي، باغباني زيندانا سالديلار. اؤزو ده بو سيرّي بيلمک اوچون کي، نه تهر اولوب قيشدا بيرجه بونون باغي اوزوم گتيريب، وزيري، وکيلي، کوپه‌گيرن، کوپه‌مينن قاريلاري باشينا ييغدي. آرادان بير نئچه گون کئچندن سونرا قاريلار بو سيرّي آگاه ائله‌ديلر کي، شهرده بير قيز وار، اونون باشي‌نين توکوندن سيزين باغا گليب، اودو کي، باغ قيشدا دا اوزوم وئرير. قاريلار جانتيقله پري خانيمين بو شهره تزه گلديگيني و پري خانيمين گؤزلليگيني پادشاها دانيشديلار. ائله کي پادشاه بو قيزين گؤزلليگيني قاريلاردان ائشيتدي، دئدي: - هر نه تهر اولور-اولسون، گؤي گؤبه‌يين يئره ده قويسا، قيزي منه گتيرمه‌ليسيز.
وزير، وکيل چوخ تدبير گؤردولر، آخيردا ايشي بو قرارا قويدولار کي، بو ايشده قاريلاردان باشقا هئچ کيم ايشله‌يه بيلمز. بير کوپه‌گيرن قاري دئدي: - من گئديب قيزي گتيره‌رم. بير گون جانتيق اووا گئتميشدي. کوپه‌گيرن قاري گليب جانتيقگيلين قاپيسيندا بير تسبئح قيريب يئره تؤکدو، باشلادي اونو ييغماغا. ائله بو واخت جانتيق اوودان گليردي، گؤردو کي، قاري ننه تسبئح ييغير، دئدي: - قاري ننه، نه وار؟ نه ييغيرسان؟ قاري دئدي: - آ بالا، قادان-بالان آليم ائله کربلادان گليرديم، اوشاقلار مؤهور-جانامازيمي قيلديلار. ايندي اونو ييغيرام. بلي جانتيق قاري ايله تسبئح ييغدي، سونرا قاري ننه‌ني ائوينه گتيردي. ائله قاري دا اللهدان بونو ايسته‌ييردي. پري خانيم گؤردو کي، بودو، جانتيق گلير، يانيندا دا بير قاري. ائله کي، بونلار قيرخينجي پيلله‌يه چيخدي، پري خانيم قاري ننه‌نين دؤشوندن بير تپيک ووردو. تپيک ائله برک ديَدي کي، قاري ننه قيرخ پيلله‌دن آشاغي گئتدي. ائله کي، پري خانيم قاري ننه‌ني ووردو، جانتيق دئدي: - پري خانيم، قاري ننه‌ني نييه دؤيورسن؟ پري خانيم دئدي: - قاري قيسميندن آداما خئيير گلمز. اودو کي، من ووردوم. ائله کي، قاري ياخشي اولدو، ايندي ده باشقا بير جيلده گيريب جانتيقگيلين قاپيسيندا تسبئح قيريب مؤهور-جاناماز داغيتدي. يئنه جانتيق گلدي، باشلادي قاري ننه‌يه کؤمک ائله‌مه‌يه، دئدي: - قاري ننه، بو نه ايشدي؟ مؤهور-جاناماز نييه بورا داغيليب؟ قاري ننه يئنه دئدي: - آ بالا، قادان-بالان آليم! ائله خوراساندان گليرديم، بو اوشاقلار، مرديمازارلار منيم جانامازيمي داغيتديلار، ايندي ده من اوتورموشام ييغيرام. جانتيق يئنه قاري ايله تسبئح ي ييغدي، سونرا قاريني ائوه گتيردي. پري خانيما دئدي کي: - سن منيم جانيم، قارييا ديَمه!
بلي، قاري ننه ائوه گلدي، يئديلر، ايچديلر، بونلار اوتاقدا، قاري ننه ده قفخانادا ياتديلار. ائله کي، سحر اولدو، جانتيق گئتدي اؤز ايشينين دالينجا. قاري ننه پري خانيما ياخينلاشدي، باشلادي ياواش-ياواش پري خانيمي يئريندن ائله‌مه‌يه، دئدي: - آ قيزيم، سنين ارينين آدي ندي؟ پري خانيم دئدي: - جانتيقدي. قاري دئدي: - ياخشي، آ قيزيم، جانتيق نه دئمکدي؟ جانتيقين معناسي ندي؟ پري خانيم دئدي: - قاري ننه، من بونون معناسيني بيلميرم. قاري دئدي: - آ قيزيم، قادان-بالان آليم، گؤرونور کي، جانتيق سني ايستمير. او سني ايستسيدي اؤز آدينين معناسيني سنه دئيردي. پري خانيمي فيکير آپاريب دئدي: - ائله دوغرودان دا جانتيق مني ايستمير. يوخسا او مني ايستسيدي ايندييه کيمي اؤز آدينين معناسيني منه دئيردي. باشلادي قاشقاباغين تؤکمه‌يه. ائله کي، آخشام اولدو. جانتيق گلدي گؤردو کي، پري خانيمين قاشقاباغي يئرنن گئدير. جانتيق بو ايشه تعجب ائله‌دي. هميشه جانتيق ائوه گلنده پري خانيم جانتيقين قاباغينا چيخاردي. قوللارين بوينونا سالاردي. آردي وار
منبع :