هر يايليغين بير حئکايه‌سي وار

بولگه لر سرويسي: ايکيندي چاغي اونودولموش بير قادينين ايزيني تاپماق اوچون اونون يوز ايل بوندان اول ياشاديغي آقاسي کوچه‌سينده‌کي ائوينين قاباغيندان يولا دوشوب، امير کوچه‌سينده‌ قاري مسجدينه چاتميشام. مسجيدين قاپيسي آچيقدير. آياغيمي تکجه قارامتيل پيلله‌‌سينه قويوب، قاپيدان ايچري بويلانيرکن اؤزلويومده دئييرم: »گؤره‌سن زري خانيم مسجيدين ايچريسينه کئچيرکن همين بو قارامتيل پيلله‌يه آياق باسيب يوخسا يوز ايلين ايچينده مسجيدين بيناسي کيمي بو پيلله‌ ده تعمير ائديليب؟«

رقيه کبيري

ايچري آلاقارانليقدير. قو دئسن، قولاق توتولار. زري خانيم حاققيندا سوروشماق اوچون آلاقارانليق ايچينده بير آلـلاه بنده‌سي آختارسام دا، هرهانسي بير آلـلاه بنده‌سي گؤزه گؤرونمور. آلاقارانليغين ايچينه کئچمک ايسته‌دييمده ندنسه بئينيمده بير همهمه سسي قالخيب، تاريخين قالين صحيفه‌لريندن ذهنيمه بير جيغير آچيلير.
مسجيدين قارشيسينداکي چيمن‌لييه توپلانميش انسان‌لارين أللرينده‌کي فنارلار چيمن‌لييي ايشيقلانديريب. کيشي توپلوسو آراسيندا بسته‌بوي، نسبتا کؤک، نارين گوللو آغيميتيل چاديراسينين ايکي اوجونو قولتوق آلتيندا توتوب، آغ يايليغيني بوخاغي آلتدا سانجاقلاميش بير قادينا گؤزوم ساتاشير. دئيه‌سن آختارديغيمي تاپميشام. زري خانيمين گؤرکمي حاقيندا ائشيتديکلريمه گؤره او زري خانيمين اؤزو اولماليدير. اونون ساغ بؤيرونده دايانميش بير آيري قادين دقتيمي چکير. قادينين گئيينيشيندن چوخ دوروشوغو مني ماراقلانديرير. جماعت فنارلاريني أللرينده ساللارکن او سول چيينينه قويدوغو فناري ساغ ألي ايله توتوب ساخلاييب، سانکي چييني طاقچادير. آيين ياري پارچاسي‌نين ايشيغي گؤزه گؤرونن کيمي قادينين چيينينده‌کي فنارين ايشيغي دا زري خانيمين اوزونون ياريسيني آيدينلاشديريب، او بيري ياريسي ايسه کؤلگه‌کيمي گؤرونور. بونونلا بئله زري خانيمين سيماسي آي کيمي گؤزل و اوره‌يه اوخشايان دئييل. چاتما قاشلارينين بيري زيل قارا او بيري ايسه کاس کيمي نظره گلير. چيينينده فنار توتموش قادينين دورشوغوندان زري خانيمين قوللوقچوسو اولدوغونو تخمين ويريرام.
چيمن‌ليکده ايينه سالماغا يئر يوخدور. خبر بومبا کيمي شهرده پارتلاييب. خبري ائشيدن کيشي‌لر افطار آچيب- آچماز بير فنار گؤتوروب، مسجيده ساري يولا دوشوبلر. شاه بندرخانايايئتيشن تلگرافا گؤره داشناک‌ قشونو آندرانيک‌ين سرکرده‌لييي‌له آراز چاييندان کئچيب، خوي قالاسينا ساري حرکتده‌دير. جماعت جنگ شوراسي‌نين حؤکمونو گؤزله‌ييرکن بيربيرلري ايله دانيشماقداديرلار.
»آلـلاه بالام دئييب دا، او طرفدن جيلولار بو طرفدن ده آندرانيک قشونو…«
»دئييرلر شرفخانادا ايکي گئمي دولوسو عسگر يئنديريبلر«.
»دونن ديلمقان‌نان گلن بير چوداردئييردي گينه ده جيلولار اورمودا عثمانلي اردوسونا هجوم آپاريبلار.«
»شيطانين دا عاغلينا چاتمازدي قافقازدان خويا قشون چَحسيننر، والـلاه بو اوروس‌لار شيطانين أليني دالدان باغلييب‌لار!«
»دولودان قورتولماميش دامجييا راست گلن کيمي بيز ده جيلولارين مصيبتيندن قورتولماميس داشناک‌لارا راست گلديح، ايندي بيولوم گل بو موصيبتيني ييغيشدير. آلـلاه اؤزو داديميزا چاتسين.«
»اؤزو ده أکين- بيچينين لاپ شيرين فصليدي، من بولورم عثمانلي اردوسو خويا چاتماميشدان آندرانيک قشونو قاريقشا کيمي بدن‌نين دووارلارينا داراشاجاخ.«
»بدن ألدن گئتسه أکينچي‌نين ائوي ييخيلار، اصنافين دا توفاغي داغيلار.«
»ايندي‌نين اينديسي توخ قارين چؤرح يئينميريح، هاندا قالسين بدن ده ألدن گئتسين!«
»من دئييرم اؤلونجه ساواشمالييخ.«
»سن دئمه‌يه ده‌يي کي، گؤزله گؤرَح شورا نه دئيير.«
»ائشيتميشم حاکيمين مصلحتي ايله خوي‌دا ياشايان ائرمني‌لري اعتبارلي آغ سَققل‌لرين ائولرينه کؤچوردوبلر، قورخورلار بو هاياهايدا ائرمني مسلمان دعواسي دا دوشسون.«
»يئتيم، سن ائرمني‌لرين جانينن فيکيرينده‌سن يوخسا چاخير قيتليغي‌نين دردي دولوب قارنيوا؟«
»قاراداش بَه‌يَم رمضانليخدا ساواشماخ حرام دئيي؟«
»عمي، رمضانليخدا چاخير حرامدي ساواشماخ يوخ«،
»داشناک قوشونو ائرمني‌دي عمي، حرام حلالي نه قانير!«
»قارداش اوغلو، سن دئدييين حرام آيلار محرم، رجب، زيل‌قعده [ذي‌القعده]، بير ده کي ذيل‌حجه‌دي،[ذي‌الحجه‌دي] رمضانليخ يوخ.«
»بَه‌يَم اوروج- آغيز دا ساواشماخ اولار آخي!«
»دئييرلر شاه بندر أمر وئريب ساخلووعسگرلري أرسي گردنه‌سينده پوسقو قورسونلار.«
»عثمانلي قشونو آراسيندا چوودوشوب کي بو سفر ايش ياشدي، شاه بندر اؤزو ده گئديب علي احسان پاشايا عرض- حال وئرسين.«
»يئتيم، اولمويا شاه بندر جانيني گؤتوروب، آرادان أکيليب! سن اؤل اولار هااا.«
«قارداش اوغلو باخ بورا گؤروم، سن بولوسن او آروادينان فنار توتان قاراواش کيمدي، نه‌چي‌دي، کيمين آروادي دي؟ بير بئله کيشي ايچينده اونون بيردا نه ايشي وار؟»
»دايي نئينيسن کيمدي! هر کيميدي بيزيم کيمي ائوينده دينج اوتورانميييب دا.«
زري‌ خانيمين قولاغي دانيشانلارين آغيزلاريندا، گؤزو مسجدين قاپيسيندا بوتون جماعت کيمي شورانين فرمانيني گؤزله‌يير. جوان بير تاجير يئريندن قالخيب، هيجانلا دانيشماغا باشلاياندا جماعتين سسي خيپ ياتير.
»قارداش‌لار، من مصلحت گؤرورم قافقازدان گلن قشونا مغلوب اولماميش شهريميزين آغ سققل‌لري آندارنيک‌ين پئشوازينا گئديب، اونا باغيشلاديغيميز پيشکئش‌لرينن شهريميزي غارتدن، اهل عياليميزي دا اؤلومنن، اسارتدن قورتاراخ. بد‌ن باشينداکي قوروخچولاريميزين ساييجا بئله سيلاحيميز يوخدو، بيزلر اوروج آغيز هانسي يار- ياراغينان او سيلاحلي قشونون قاباغيندا داياناجاييخ؟ سيزجه پاسلانميش شامخال‌لارينان آندرانيک قشونونا غاليب گلمَح اولار؟ آندرانيک‌ين شراپنل توپلاري‌نين قاباغيندا بيزيم ده گولـله‌سيز بير توپوموز وار. ناجاخ، شَه‌نه، بئل، کولوح‌نن بئله بير قوشونون قاباغيندا دايانماخ اولار؟ هئش خبريز وار آندرانيک هانسي خاريجي قووه‌لرين حمايه‌سي آلتيندادي؟«
قادين سسي‌نين اوجالماسي عادت اولماسا دا، زري خانيم سس‌سيز قالانمادي. قولونو چاديرا آلتيندان چيخاريب، اوجادان سسله‌ندي: »جوان، أيينيمده‌کي بو قره‌ني گؤروسن؟ اورمودا جيلولارين قيرقينينا گلن قوهوملاريمين قره‌سي‌دي. هه‌يه، سنين سؤزللريننن بئله آنناديم کي اورمو- سلماس قيرقيني ياديننان چيخيب. دئه گؤروم سن جماعتين جانينين هايينداسان يوخسا مقام منصبه، سيکّه‌لرين جينگيلدي سسينه فيکرلشيسن؟ سن ائولرين غارت اولماسيني دوشونورسن يوخسا ارزاق آنباريوي؟ بَه‌يه بيزيم قانيميز اورمو- سلماسدا قيريلاننارين قانيننان رهليدي؟ سن ساواش گؤرمويوبسن جوان! دئيي‌سَن بَ آندرانيک شهري چاليب چاپاننان سورا سني ده اهل عياليوي دا ساغ قوينونا آلاجاخ؟«
جماعت زري خانيمين سسيني ائشيتمکده سس صاحيبي‌نين کيم اولدوغونو بيربيرلريندن سوروشور. تاجير ايسه اؤزونو سينديرماييب اونون جوابيندا دئدي»:خانباجي، گئجه‌نين بو واختي سنين بيردا نه ايشين وار؟ سن گئت ائوينده نوه‌لرينه ناغيل دئه. آرواد ندي جنگ شوراسي‌نين ايشينه قاريشماق ندي؟«
آردي وار

منبع :