بولگه لرسرويسي: شاختا-سازاق يوخوسونو قاچيردي. آياقلاري ديزلرينه‌جن آغريييردي، دده‌سينين ديزلري‌نين آراسيندا بوزوشوب، قالميشدي. کوره‌ييني دده‌سينين بوش و چوخور قارينينا سؤيکه‌ميشدي. آجيندان اوره‌يي اويولوردو. جانيندا هئي قالماميشدي. اينجارسيزجا گؤزلريني آچدي. اويان‌لاردا، دده‌سينين ياپينجي‌سينين ائشييينده چوغون سوسموشدورسا، آمما هله‌ده شاختا-سازاق يامانجا کسيردي. ايکي گون ايدي کي اونلار کئچه ائوجييه سيغينيب بير-بيرلرينه ياپيشيب، قالميشديلار. دده اوغلان‌جيغازين ترپه‌نيب، تيتره‌مه‌سيندن دبريشدي و بوغوق بير سسله دئدي: »سيرو! ائشيک يامان ساووق‌دور.« اوغلان‌جيغاز ياري آچيق گوؤزلري‌ايله ياپينجي‌نين ياخاسيندان قارشيداکي ياماجا باخدي ياماج آغ-آپپاق آغارميش، بلکه‌ده بير آز آچيق ماوي‌يه چالان ايدي. اوزاقلاري سيخ دومان بوروموشدو. »باپير، آجام!« دده اليني ياپينجي‌دان ائشييه اوزالديب، بير سيخما قار گؤتوروب، اللري ايله قاري سيخدي و »سيرو«نون آغزينا ساري توتدو: »يئ«- دئدي. اوغلان‌جيغاز قار کومبه‌سيني ديشله‌ين کيمي‌ايتي قانادلي »جت« باغيردي، يئر تيتره‌دي. بيردن-بيره بوغوق و يوموشاق بير سسله نه‌سه بير شئي ياپينجي‌يا چيرپيلدي و ياپينجي‌نين اوست دئشيييندن قورخموش بير قوش اؤزونو اوغلان‌جيغازين قاباغينا آتدي. دده‌سي اوغلان‌جيغازين چيينيندن بويلانيب، قوش‌جيغازي سوردو: »آخ، چوکر شيله نه‌دن قورخوبسان هه؟ طيياره‌دن قورخدون، يوخسا لئيدن‌مي، هه؟« دده، قوشو »سيرو«نون اليندن آلدي و ايکي بارماغي‌لا قوشون چينه‌دانيني يوخلادي: »آجدي، باخ قارني بوشدور.« »سيرو« دارتينيب، اليني جيبينه سالدي: » آخ، بير شئييم يوخدور کي، يئيه بيله‌سن؟« اليني جيبيندن چيخارتدي، نارين بير شئي‌لر بارماغينا ياپيشميشدي بارماغيني قوشون ديمدييينه ساري توتدو: »آل چوک رشيله! يئه!« قوش ديندي: »قييامت! قييامت!« اوشاغين گؤزلري قوشا تيکيلي قالدي. قوش سئرچه‌دن بير آز ايري اولاردي. گؤده قويروغو، اوزون قانادلاري آزجا گوجلو آياقلاري وارايدي. اونون يومرو و توتغون بنؤوشه رنگلي باشي وارايدي. بدنيني آغ-آغ خال‌لار بوروموشدو. دده گؤزلرينده دهشت يووا سالميش قوشو تومارلادي. اونو آغير-يونگول ائله‌دي: »اتي حلال قوشدور.« – دئدي اوغلان‌جيغاز قوشو دده‌سينين اليندن قاپدي: »آجدير! باپير، آجدير!« و قوشا »عزيزيم« دئدي. ايکي بارماغي‌لا ياپينجي‌نين قيراغيندان بير چيمديک قار گوؤتوروب، قوشون ديمدييينه ساري اوزاتدي. قوش تئز باشيني سيلکه‌له‌دي و اريميش قار اوغلان‌جيغازين اوزونه سيچرادي. دده آخينا-آخينا يورغونلوقلا دئدي: – »اتي حلال‌دير بو قوشون، سيرو حلال‌دير!« اوغلان‌جيغاز دئدي: »هه!« »بو گون اوچ گوندور کي بير شئي يئمه‌ميشيک.« اوغلان‌جيغاز قوشون مور رنگلي باشيني تومارلادي: »عزيزيم!« و اؤز باشيني دده‌سينين خيسين-خيسين نفس آلان سينه‌سينه دايادي: »باپير، دوغرودور کي، آتام، آنام و زيور قوناقليغا گئديب‌لر؟« »دوغرودور، دئديم کي. گئديب‌لر قوناقليغا.« »هارا؟« »او دونيايا داي!« »اولماز بيزده گئده‌ک اونلارين يانينا!« دده بوغوق بير حالدا اوؤسکوردو: »واختيندا! هر کسين واختي چاتدي گئده‌جک.« »بس بيزيم واختيميز‌هاچان چاتاجاق؟« »تئز يا گئج چاتاجاق، داريخما.« اوغلان‌جيغاز ياواشجا پيچيلدادي: »قوناقليق« دده‌سي بير آز ساکيت‌لشدي، يئنه سوروشدو: »دوغرودور باپير؟« دده باشيني بولادي و فقط »آها!« دئدي. اوغلان‌جيغاز ياپينجي‌نين دئشيييندن، گؤزلريني سيخ دومانلي ياماجا زيلله‌دي. کندلرينده، تپه‌نين اته‌يينده دده‌سي ايله بيرليکده، ال آغاجي اللرينده، يازدا تزه چوغارميش بيتگي‌لري د‌ريردي‌لر کي بيردن »جت« لر گلدي‌لر. دهشتلي باغيرتيلاري‌لا هر يئري تيتره‌تدي‌لر، کندي اودا چکدي‌لر، اوزونو آوارا قوشلار بورودو. بير عيدده آدام قورخولو حالدا اودلاردان چيخديلار. تپه‌لره قاچديلار، اونون آتاسيندان، آناسيندان، کيچيک باجي‌سيندان خبر-اتر اولمادي. »جت«لر يئنه قاييتديلار يئني بير پارتلاييش کندي تيتره‌تدي، قاچديلار. گئجه‌ني سحره کيمي‌قاچديلار، آلا-تورانليقدا قارا سانجيليب، قالديلار. دده‌سي ياپينجي‌سيني اونون و اؤزونون اوستونه چکدي. او حالدا اوتوردولار و اونلاري يوخو آپاردي. بير آز سونرا شاختا-سازاق اونلاري اوياتدي. هر يئري دومان بوروموشدو، طيياره‌لرين باغيرتي‌سيندان، اوزاقلاردا کي پارتلاييش‌لارين، سفيل بير قوشون اينيلتي‌سيندن سووايي بير سس ائشيديلميردي. دوؤردونجو گونو يئنه‌ده دده چوک رشيله‌نين چينه‌دانيني ايکي بارماغي‌لا يوخلادي و اينجارسيزجا دئدي: »اتي حلال‌دير بو قوشون، اوؤلوم آياغيندادير، باخ!« قوش اوؤلومجول بير حالدا اينله‌دي: »قييامت! قييامت!« اوغلان‌جيغاز دئدي: »باپير گوؤزلرينه باخ! يامانجا قورخور‌ها، باخ آياقلاري اسير.« دده دئدي: »سيرو باپيرووون اللرينه بير باخ، باخ گوؤر نئجه اسير!« اوغلان‌جيغاز چاتلاق-چاتلاق و قورو دوداقلاريني دده‌سينين اللري اوسته قويدو، اونون دريسي قيريشميش، ايري دامارلاري قارالميش، اللريني اوؤپدو:»اينجي‌يه‌جک باپير؟« »يوخ، زيورجن اينجي‌مه‌يه‌جک.« اوغلان‌جيغاز قه‌هرلندي قه‌هريني اوددو و قو شو دده‌سينين اووجونا قويدو: »آل، باپير آمما اينجيتمه، اينجيتمه باپير.« دده دوداق آلتي نه‌سه پيچيلدادي، قو شو سينه‌سينه سيخدي و بير الي‌له ال آغاجيني ياپينجي‌يا داياق ائله‌ييب ياواشجا ياپينجي‌نين ياخاسيندان ائشييه چيخدي. ياپينجي کيچيک بير اوتاق کيمي‌قارا سانجيليب قالميشدي: -»سن ائشييه چيخما، ائله بورداجا قال سيرو.« اوغلان‌جيغاز بير سوؤز دئمه‌دي. قويدو کي دده‌سي اوزاقلاشسين. او ياپينجي‌نين دئشيييندن باخيب، گوؤردو کي دده‌سي تيترک آدديم‌لارلا قارين اوستونده اوزاقلاشير. اونون پيچيلتي‌لاري بوغلانا-بوغلانا يان-يؤوره‌سينه ياييليردي. دده داياندي، گئري دؤنمه‌دن، اؤسکوردو. سونرا قارين اوستونده اوتوردو. هر ياني سوکوت و سويوق بوروموشدو. بيردن دده‌نين ديرسک‌لري دالدان آهنگدار بير حرکت‌له ساغا-سولا دارتيندي. بير بنؤوشه رنگلي له‌لک اوچوب‌هاوادا آسيلي قالدي. »سيرو« له‌له‌يين يوموشاق‌ليغيني اللرينين داليندا دويدو. »سيرو« ياپينجي‌نين ياخاسيندان سويروشوب ائشييه چيخدي. گليب دده‌سيندن آزجا آرالي داياندي! ايکي جه دامجي قاني دوشموش قوشون مخمل باشيني گوؤتوروب تئز جيبينه قويدو و اوره‌يينده پيچيلدادي: »اينجيدين عزيزيم هه! اينجيدين؟« ياواش-ياواش ياپينجي‌يا ساري يوؤنه‌لدي. ياپينجي‌نين ايچينده اوتوران کيمي‌يئنه‌ده دئشيکدن دده‌سينه باخدي. دده‌سي يئرينده‌جه اوتوروب قوشون له‌لک‌لريني يولوردو. دده آستاجا آياغا قالخدي. آياغي بودره‌دي، ييخيلدي، ييخيليب، دورا-دورا دده‌نين‌هاوايا سووورموش له‌لک‌لرين ايچيندن سوووشوب اؤزونو ياپينجي‌يا چاتديردي. »سيرو« ال-آياغين ييغيشديريب، دده‌سينه يئر ائله‌دي. دده اوتوردو و يئنه‌ده سيرونو اوؤز ديزلري آراسينا آلدي. ديش‌سيز آغزيندا بير شئي خيرچيلدايا-خيرچيلدايا دئدي: »سيرو سنه‌ده ساخلاميشام.« اوغلان‌جيغاز هوؤنکور-هوؤنکور آغلادي: »يوخ باپير، يوخ، من فقط قار يئيه‌جه‌يم!« او اليني اوزالديب ياپينجي‌نين قيراغينداکي قاري چنگله‌دي. دده ياپينجي‌دان سويروشوب باييرا چيخدي: -»سيرو، من گئديرم بلکه بير شئي تاپديم، سن بورداجا قال، مني گؤزله!« اوغلان‌جيغاز تک قالدي قوشون باشيني جيبيندن چيخاريب اوؤپدو و دئدي: »گؤزه‌ليم، عزيزيم!« باشي قاباغينا قويدو، گؤزلريني، قوشون دهشتدن آچيلا قالميش قيرميزي گؤزلرينه زيلله‌يه‌رک سوروشدو: »چوخ اينجيدين هه؟ قورخدون هه؟«قوش قورخو دولو گؤزلريله باخدي. اوغلان‌جيغاز‌هارداسا، اوزاقلاردا اونون سسيني ائشيتدي: »قييامت! قييامت!«
بولگه لرسرويسي: شاختا-سازاق يوخوسونو قاچيردي. آياقلاري ديزلرينه‌جن آغريييردي، دده‌سينين ديزلري‌نين آراسيندا بوزوشوب، قالميشدي. کوره‌ييني دده‌سينين بوش و چوخور قارينينا سؤيکه‌ميشدي. آجيندان اوره‌يي اويولوردو. جانيندا هئي قالماميشدي.