هِيوا
هِيوا
1400/10/26
بولگه لر سرويسي: منيم آنام يوخدور بالابگيم هم منيم آنامدير هم ده باجيم، هم ده دار دنيادا بوتون ائليم‌دير. منه قويان حرمتي باجيما قوي، باجيم دونيادا چوخ عذاب چکيب بير تهر ائله کي، داها ناراحتچيليق حسّي ائتمه‌سين.
داود_پيرعليلو
بولگه لر سرويسي: منيم آنام يوخدور بالابگيم هم منيم آنامدير هم ده باجيم، هم ده دار دنيادا بوتون ائليم‌دير. منه قويان حرمتي باجيما قوي، باجيم دونيادا چوخ عذاب چکيب بير تهر ائله کي، داها ناراحتچيليق حسّي ائتمه‌سين.
اوچ- دؤرد آي قارداشينين خانيمي بالا بگيمه برک خدمت ائدير. او زمان گوزَم بؤرک اولاردي، يون آرخاليق توخويارديلار، يون جوراب توخويارديلار، بالابگيم ده هاميسيني اؤگرنيب، ايشله‌ييب ائوده توخونمالاريني توخويوب ييغير وئرير قارداشينا. قارداشي دا آپارير بازاردا ساتير، پوللاريني گتيريب بالابگيمه وئرير. قارداشي اؤزو ده کرپيج کوره‌سينده ايشله‌ييب ائولرينين خرجيني چيخاردير. بالابگيم گؤرور قارداشي بونون توخودوقلاري‌نين پولونو اؤزونه وئرير، قارداشي ائوينده قالديغينا گؤره، هردن بازارا گئديب ائو اوچون، يئمک اوچون قيوير- زيوير آليب گتيرير. اما قارداشينين خانيمينا دئيير کي، ائوه نه آلديغيني قارداشينا دئمه‌سين. نئچه آي اوستونده کئچندن سونرا ياواش- ياواش قارداشينين بالديزلاري، قارداشي خانيميني اؤگره‌ديرلر بونا گؤره کي، سني بيز بالا بگيمه وئرمه‌شيک، اونون قارداشينا وئرميشيک، اينديه قدر بو هاردا ايدي؟ هاردان تاپيليب گلدي؟ سن اونا کنيزدن زاددان دگيلسن.بئله سؤزلر ايله قارداشي خانيمينين قولاغيني دولدورورلار. او دا ياواش- ياواش باشلايير بونونلا ترسينه ائشمگي. داها بالابگيمه حرمت قويمور. بالابگيم اما قارداشينا دئمير قضيه ني، قورخور بيردن قارداشي ناراحات اولار ائوينده آغزي آجيليق دوشر. بير نئچه آي دا بئله گئچينيرلر. قارداشينين قونشولوغوندا بير حيط وار ايدي، اونو اجاره وئريرديلر. بالابگيم اونو ائشيديب قارداشينا ديير:
– آي قارداش بير سؤز دئسم آجيغينا گلمز ؟
قارداشي ديير:– باجي باشينا دولانيم. نيه آجيغيما گلير؟! سؤزونو دئنه.بالابگيم قارداشينا ديير، قونشولاري حيطيني اجاره وئرير اوراني بالا بگيمه اجاره ائيله‌سين. بلکه بالابگيم او ائودن چيخيب قارداشينا بيلديرمه‌سين کي، خانيمي اونا حرمتسيزليک ائدير. قارداشي بالابگيمدن سوروشور:-آي باجي نيه نه اولوب؟ منيم بير باجيني ساخلاماغا، او دا سنين کيمي باجيني لياقتيم يا چيخاريم يوخدور؟ يوخسا سنه منيم خانيميم حرمتسيزليک ائدير؟ منه دئمه‌دن ايسته‌ييرسن ائودن گئده‌سن؟ دئ گؤروم نه اولوبدور؟باجيسي هيچ دئمه‌دن بير بونو ديير:
– قارداش، من ايسته‌ييرم اؤزوم اولام، آيريسينا زحمت وئرمه‌يم، اوتانيرام.آمما قارداشي اينانمير. گئديب خانيمنينا ديير:-سن منيم باجيما نه دييبسن؟ او ايسته‌يير گئديب اؤزونه ائو توتوب تک ياشايا.خانيمي آغزيني آچير گؤزونو يومور، باشلايير بالا بگيمي پيسلمگه، او بئله‌دير، او ائله‌دير… آخرده قارداشي گؤرور کي بو، بالابگيمي يولا وئرمييب، اونا گؤره بالابگيم ايسته‌يير حيط توتوب گئده آيري اوتورا. گليب باجيسينا ديير:– باجي هرنه‌يي من ايچ ائيله‌ديم، گؤردوم سني منيم خانيميم يولا وئرمير.يئنه بالابگيم هيچ نه دئمير، فقط سؤزو بواولور کي،-من راحت دگيلم، اوتانيرام، ايسته‌ييرم بوندان آرتيق دا سيزه اذيت وئرمه‌يم. قارداش، سن اگر باجيني اورکدن ايسته‌ييرسن او حيطي منه توت. سنين ائوين ايله دووار بيردير، گؤزون ده اوستومده اولار. بير کس ده سؤز چيخاردا بيلمز. آخر قارداشينين بوينونا قويور، او حيطي بونا اجاره ائيله‌سين. قارداشي حيطي اجاره ائديب، باجيسينين ائويني ييغيب اورا دؤشويور.
بالابگيم بيراز راحتلشير. اما اوشاقلاري‌نين فکري بالابگيمي لاپ يانديرير. اوشاقلاري‌نين هره‌سينه گوزَمدن بير آرخاليق توخوموشدو، ياتاندان ياتانا اونلاري قاباغينا قويوب اونلاري اوخشايير، آغلايير و آغلايا- آغلايا يوخو توتور.
بيرگون بالابگيم عميسي قيزي گيله قوناق گئدير. اونلارين بير قونشوسو وار ايدي، او دا اوردا ايدي. اوردا بالابگيم ايله تانيش اولور. عمي قيزيسيندان سوروشور:
-سنين بو عمي قيزين ائله بيل سوبايدير؟
اودا بالابگيم-ين باشينا گلديگيني قونشولارينا نقل ائدير. قونشولاري ديير:
-منيم بير قارداشيم وار، خانيمي اولوبدور، اما بئش اوشاغي وار، ائوي ده اوزاق بير کندده دير، بيلميرم سنين بو عمي قيزين اوندان ياشا بيلر؟ قبول ائيله‌سه بونو اونا عقد ائدک “.
عمي قيزيسي ديير:-قوي بالابگيمه دييم، اگر قبول ائيله‌سه لاپ دا ياخشي اولار، تَکليکدن قورتولار، ائو- ائشيک صاحبي اولار.
قونشولاري گئدندن سونرا بالابگيم-ين عميسي قيزي بالا بگيمه ديير:– آي عمي قيزي قضيه بئيله‌دير، قونشوموز سني قارداشينا آليب عقد ائيلمک ايسته‌يير. سن بوسؤزه نه دييرسن؟
بالابگيم اونون سوزونو قبول ائتمه‌دن ديير:
آي عمي قيزي قضيه بئيله‌دير، قونشوموز سني قارداشينا آليب عقد ائيلمک ايسته‌يير. سن بوسؤزه نه دييرسن؟بالابگيم اونون سوزونو قبول ائتمه‌دن ديير:-آي عمي قيزي، منيم ايکي قيز اوشاغيم وار. ساباح اونلار بؤيوير ديير سن بيزي آتاميزين لال- کار اولماغينا گؤره آتيب گئتميسن آيري اَره.عمي قيزيسي ديير:-يازيق، حقيقت هيچ وقت پرده داليسيندا قالماز، بوتون قونشولار بيليرلر کي، خالان سنين باشينا نه اويونلار گتيريب، نه ظلملر ائيلييب. اوشاقلارين ديرچه‌لندن سونرا حقيقتي بيله‌جک، گليب سني تاپاجاقلار.بالابگيمي نئچه گون دانلاييب نصحيت وئرندن سونرا راضي ائيليير کي، اَره گئتسين. آخرده بالابگيم ديير:– عيبي يوخ، او گلسين مني گؤرسون، من ده اونو. اگر بير- بيري ميزي بَينسَک عقد ائدريک.
عميسي قيزي بالابگيم- ين هن جوابيني قونشولارينا ديير، قونشولاري دا قارداشينا سفارش يوللايير کي، بير خانيم تاپميشام سنينله ياشاماغا. حتما گليب بير- بيريني گؤرسونلر، اگر اوره کلري بير- بيريني توتسا عقدلريني اوخوتسونلار. بئش- آلتي گون بو سؤزون اوستوندن گئچير، قونشولارينين قارداشي گلير باجيسي گيله، باجيسينا ديير:– گئت قونشويا دئنه من گلميشم.باجيسي گئديب بالا بگيم-ين عميسي قيزينا قارداشينين گلمه‌سيني ديير. عمي قيزي بالابگيم- ين ائوينه گئديب اونو اؤز ائولرينه گتيريب، قونشولارينين قارداشيني دا چاغيرير. بالابگيم ايله گؤروشدورو، بير- بيري ايله تانيش ائدير. اونلار اوردا اورک سؤزلريني بير- بيرلرينه دييرلر. آمما بالابگيم گؤرور کيشينين بوندان ياشي چوخ چوخدور. بالابگيم-ين اولار ايگيرمي بئش ياشي،کيشينين ده اللي ياشي. بالابگيم ناچارچيليقدان قبول ائدير. چوخو دا بونا گؤره کي، اوشاقلار يئکه‌ليب دئسه‌لر آتاميزي بَگنمه‌ييب بيزي آتيب گئتميسن، اوندا دييرم کي ياخشي- پيس آختارسايديم نيه قوجا کيشييه گنج واختيمدا گئديرديم، اؤزو ده قيزي من ياشدا اولان بئش اوشاق آتاسينا.
عميسي قيزي بالابگيم-ين قارداشيني دا جرياندا قويور اما قارداشي ناراضي اولور، بالابگيم- ين هن جوابينا گؤره بير سؤز دييه بيلمير.
خلاصه بير قوناقليق ائديب، بونلارين دانيشيغيني ائيلييب صيغه‌لريني اوخوتدوروب، کبينلريني کسديريرلر.
کيشينين آدي آلماس ايدي. آلماس نئچه گوندن سونرا بير يونگول قوناقليق ائديب بالابگيمي بير اوزاق داغ کندينده ائوينه آپارير. بالابگيم اوردا لاپ غريب دوشور. هيچ کيم تانيش دگيل، اؤزو ده شهر اوشاغي، کندليلرين قادينلاري بير آيري گؤز ايله بونا باخيرلار. هره بير سؤز ديير. بيري ديير بو گنجليک وگؤزليکده خانيم نيه دَده‌سينه گليب، يازيق حتماً بير کسي يوخوموش. بيري ديير حتماً يوخسول آدامين قيزيدير چؤرک وئره بيلمه‌ييب اونا گؤره باشيندان ائديب. هر آغيزدان بير هاوا گلير.
بالابگيم ده کي مال- داوارا باخماييب، طويله‌يه گيرمه‌ييب، ائله بير زادلاري گؤرنده دانبات گلير(مات قالير). آمما چاره‌سي يوخدور گرک عادت ائيليه چون اؤزو بَيَنيبدير.
منبع :