چهارِ غربي
چهارِ غربي
1396/08/21
بويون سحردن ايندييه‌جن چهارِ غربي لاپ نال‌چه‌يرلرين عاشورا آخشامينا اوخشايير.
گؤزوم چيخدي قاپي گؤزوندن بوْيلانيب باخماقدان. آمما بو دئشيک ده اولماسايدي اؤزومو لاپ کور کيمي‌حيس ائدرديم. گئنه بو گؤز، باشيمي‌قاتير. نئجه ده اولسا تک‌ليييمين يولداشي‌دير بئله. هردن اؤز- اؤزومه دئييرم آخي سنه نه چهار غربي‌ده نه کئچير؟ سونرا دئييرم: نئجه‌کي منه نه؟
قونشو قونشونون کيملي‌ييندن نه‌چي اولدوغوندان خبري اولماز بَه؟ مال دؤولتينه، وار- يوخونا باش اوزالتميرام کي ايستيرم بيلم کيمدي؟هاردان گليب، اصل نسبليدي يوخسا گؤبه‌لک کيمي‌ائله آپارتوماندا گؤيه‌ريب؟
آنام دا- آللاه سيزين ده اؤلنلريزه رحمت ائله‌سين- ائله منيم کيمي‌قونشوباز ايدي. ياي- ياز، قيش- پاييز وئجينه دئييلدي. ايکيندي چاغي ساماواري شاق- شاق شاققيلداردي. قونشولار قيريخ قوشون کيمي‌بيربه‌بير گليب أذان آللاه أکبر دئييله‌نه‌جان واختلاريني بيزده سوْوارديلار. بير گون قاپي- قونشودان خبر اولماسايدي، آنام دئيردي: »گئنه بويون نال‌چه‌يرلرين عاشورا آخشاميدي!« سونرا ساماوار باشيندا قاليب قارالميش چايي آرمودي ايستيکانلارا سوزوب مژمئيي‌ني ايته‌لردي اوتاغين اورتاسينا قونشولارين جؤورونو بيز چکرديک.
گؤيلوموز اولماسايدي بئله،»ايچميرم« دئيه بيلمزديک. جورأتيميز‌هاردايدي سوروشاق آبا، »نال‌چه‌يرلر« ياني نمنه؟ انقلاب گونلري او کوچه‌ني اوْدلاييب قادينلاريني اوردان قوْواندان سونرا باشا دوشدوم کي تبريزين نجيب‌خاناسي ايميش.هر دؤنه آنامين سؤزو ياديما دوشنده اؤز اؤزومه دئييرم: »رحمت‌ليغين قيزي، سؤزوم يوخ کي يئر- يورد مال- دؤولت عوضينه اوشاخلاريوا بير خزينه سؤز ميراث قويوب گئتدين، آمما يئر قورتولموشدو ائويميزين سس‌سيز- ساکيت ايکيندي چاغلاريني نجيب‌خانانين عاشورا گونونون آخشامينا اوخشاداسان؟…«
اؤز آراميزدي، بو قديم آداملار دا چوخ أنايين ايميش‌لر‌ها… ياشاييشين هر اوزونو يارپاق دولماسي کيمي‌مثل‌لر، متل‌لر، کينايه‌لر ايچينه بوکوب أطراف آداملار تيکه توتارميشلار. آمما دوغرودان دا بويون چهارِ غربي لاپ ائله نال‌چه‌يرلرين عاشورا آخشامينا تايدي.
سحر يوخودان دوراندان ايندييه‌جن اوْن ده‌فه‌دن چوخدو کي گئديب قاپينين گؤزوندن باخميشام. نه ايزي وار، نه توْزو. سس- صداسي خيپ ياتيب. بوراجان نه سو سسي قولاغيما ده‌ييب، نه موسيقي سسي، نه ده تووالتينين‌هاواکئش تيريلتيسي. کئچن گئجه هئچ تووالته ده گئتمه‌ييب. عادتي‌دير گئجه ياريلاري بيردؤنه توووالته گئديب، منيم قوش يوخومو باشيمدان اوچوردار. قانيمدا دئييل هر ايشه باش اوزالديم، يوخسا ايسته‌سم قولاغيمي‌ديوارا داياييب، سحرلر اوزونه نئچه اوْووج سو چيرپماسيني، ديش فيرچاسينين سسيني بئله ائشيده بيللم.
گئجه ياريلاري تووالته گئدنده‌هاواکئشي ايشلتمير کي تيريلتيسي آپارتومانا دولماسين آمما خبري يوخدو کي قارين- باغيرساغينين تيريلتيسي ياتاق اوتاغيمين ديواريني تيتره‌دير.هاني او قديم حيط‌لر… تووالت حيطين لاپ ديبينده اولاردي. تووالتده آدامي‌قارقا – قَجير کيمي‌داغيتسايديلار دا، ائو ايچينده‌کيلرين خبري اولمازدي. ايندي بيول بو دار- دوده‌نک آپارتومانلاردا نه گل وار، نه گئت. نه سلام وار، نه عليک. آمما قونشو قونشونون جوجه باسديرماسينين سسيني بئله ائشيدير.
دئييرم ائوين تيکيلمه‌سين، نه خبريندي ايکي گوندن بير، ايکي کوْل ساريمساقلا بير قوجاق ايسپاناخ آليرسان! نه بيليم، بلکه ده أت- تويوغو تحريم ائله‌ين وئجي‌ين، مئجي‌ينلردندي اولار‌هاااا. آپارتومان‌نيشينليک آدامين باشينا هر اويون گتيرر.
هله آپارتومان‌نيشينليک بير يانا کهليک باشيني قارا سوخان کيمي، آدام باشيني رنگ به رنگ کيتابلارين ايچينه سوخوب دؤوره‌دن خبري اولماسا، ائله بئله اولار. دئييرم آخي يازيق بئچارا گؤزوو آچ دونيايا باخ نئينيرسن بو قدر کيتابي؟ يقين او کيتابلاردي کي بئينيني خارابلاييب، أت تويوق عوضينه ايسپاناخ- لوبيا ايله قارنيني دوْيورو.خالقين ائوينه قوجاق- قوجاق ائو أشياسي، دؤشه‌نک، قوطو- قوطو قاب- قاجاق داشيياندا، چهارِ غربي‌يه ده مئيوه قوطولاريندا کيتاب داشيديلار. اوْن قوطوسونو اؤزوم قاپينين گؤزوندن سايديم. هله ائوينه داشيديقلاري بس دئييل دؤرد قوطوسونو دا دام يولونا قويوب. من خالقين ايشينه بورنومو سوخان دئييلم‌ها، آمما ايکي گون قاباق چهارِ غربي ائودن ائشييه چيخجاق، دام يوْلونا ايشيم دوشدو.
گؤز اوجو قوطولارين ايچينده‌کي کيتابلارا باخديم. يالاندان فايدا يوخ، حتي بير ايکيسيني ده واراقلاديم. آمما منيم کاريما گلن بير کيتاب يوخ ايدي.بير آيدي ماهانا آختاريرام اونو دانيشيغا توتوب، جيکک- بؤرکوندن باش آچيم. آمما قويروق أله وئرمير کي وئرمير.
دئييرم آخي اونون قونشولوق ده‌بيندن باشي چيخمير، منيم أدبيمه نه گليب؟! گون اولوب بير ايکي ساعات پنجره‌دن کوچه‌ني گودموشم بلکه ائشيه‌دن گلنده اونونلا بير ايکي کلمه دانيشيب، قونشولوق دئينيمي‌يئرينه گتيريم.
بونونلا بئله ايسته‌مه‌ميشم اؤزومو سينديريم. اونا گؤره ماهانا ايله قاپيني آچيب، باشماق يئريني قوردالاميشام بلکه تانيش اولماغيميزا بير امکان ياراندي.
او ايسه هميشه ألينده موبايل پيلله‌لردن يوخاري قالخيب، باشيله سلام وئريب، موبايل ايله دانيشا- دانيشا ائوينه کئچميشدي. هردن بيريسيله دوغرودان دانيشماغينا دا شک ائليرم. دئييرم بس من باشماق يئرينده قوردالانان کيمي‌او دا منيمله دانيشماماق اوچون موبايل ايله دانيشماغي ماهانا ائلير.
نامردين قيزي آدام دئييل کي، ساعاتدي ائله بيل. هر ايشي واختي واختيندادي. سحر يئددي ده يوخودان خورتدايير. سککيزده موسيقي سسي قالخير. آديم کيمي‌أمينم چاي- چؤره‌ييني موسيقيله يئييب، ايچير. بيلميرم او سئگاه سيزيلتيسيله نئجه ايشتاهاسي کور اولمور. منجه موسيقي کي چالديرمادي، آدامي‌اختيارسيز يئريندن قالديريب گؤبک آتديرمادي، موسيقي دئييل کي، زيريلتيدي، سيزيلتيدي. قادام بئله موسيقي‌يه!
ساعات دوققوزدا سس بيردن- بيره خيپ ياتير. دوققوزدان اويانا مني هؤوشنه باسير. قانيمدا فضوللوق يوخدو‌ها، آنجاق بير قونشو حؤکمونده او ائوده نه‌لر کئچديييني، اونلارين ياخچي- يامانيني بيلمه‌لي‌يم يا يوخ؟ گون‌اوْرتاياجان قاپي‌يا آياق دؤيوب، قولاقلاريمي‌شوشلورم بلکه چهارِ غربي‌دن بير سس گلسين.
او قدر قاپينين گؤزندن باخيرام کي گؤزوم سولانير. منه دئين يوخدو سن کي اونون ساعاتلاريني يادداشيوا تاپشيريبسان داها نييه يومورتان ترسه دوشور؟ نئيله‌ييم، اونسوز نه ايشيم اوْلا بيلر؟… بير گون بازارليق ائليرم، هفته‌باشيناجان کئچينيرم. بير گون پيشيريرم، اوچ گون يئييرم. و ايللا منيم نه وئجيمه‌دي خالقين ياشاييشينا باش اوزالديم.
گون‌اوْرتادان بير ساعات کئچميش چهارِ غربي‌دن قاب- قاجاق سسي، يئمک اييسي قالخير. من ايسه بورنوم ايي چکه- چکه اؤز يانيمدا اونون نه پيشيرديييني تخمين وورورام. گون‌اوْرتادان اوچ ساعات او يانا گئنه تووالتين‌هاواکئشينين سسي قالخير…
دوغرودان نييه بويون چهار غربي‌نين سسي چيخمير؟ گؤره‌سن باشينا بير اويون گليب؟ بلکه ييخيليب باشي بير يئره ده‌ييب هوشو باشيندان چيخيب؟ آمما ييخيلسا تاپپيلتيسينين سسيني ائشيده‌رم دااا.
بلکه ياتديق يئرده اؤلوب؟ اؤلوب ائله‌سه کيمه خبر وئرمه‌لي‌يم؟ کيمي‌وار کي؟ داشيناندان بويانا ميلچک ده قاپيسيندا اوچماييب. هئچ آديني دا بيلميرم‌هاندا قالسين قوْهوم طايفاسيندان خبريم اولسون!… دئييرم دوروم گئديم قاپيسيني دؤيوم.
ياخچي، قاپيني اوزومه آچسا نه دئييم؟ دئييم آديني بيلمه‌ديييم قونشو، سس- صدان يوخدو، گلديم گؤرم اؤلوبسن يا قاليسان؟ دئمز منيم اؤلوب قالديغيمدان سنه نه فضول خانيم؟بلکه من کار اولموشام چهار غربي‌نين سسيني ائشيتميرم!؟ قيناما، اولار‌هاااا
منبع :