بولگه لر سرويسي:بيري وار ايدي، بيري يوخ ايدي. تانريدان سوواي هئچ کيم يوخ ايدي. بير زامان، بير پادشاه وار ايدي. اونون بير قيزي وار ايدي. او ماحالين قيزلاري بئله قرارا گلديلر کي، بيرليکده سئيرانگاها چيخسينلار. پادشاهين قيزي دا او قيزلارا قوشولدو. قيزلار بير مئشه‌يه چاتديلار. او مئشه‌ده قورخولو بير آيي ياشاييردي. آيي قيزلارا هجوم ائتدي. قيزلار قاچيب آيي‌نين تهلوکه‌سيندن قورتارديلار. آمما پادشاهين قيزي قاچا بيلمه‌دي. آيي اونو توتوب کاغاسينا (ماغار) آپاردي. قيزلارين قالاني ائولرينه قاييتدي.آيي زورلا پادشاهين قيزي ايله ائولندي. بير ايل اؤتدو، پادشاه اؤز قيزيندان بير خبر توتا بيلمه‌دي. پادشاه بوتون اؤلکه‌يه امر ائتدي کي، اهالي باشدان – باشا قارا گئينسين. هامي قارا گئييندي. پادشاهين قيزي مئشه‌ده بير اوغلان دوغدو. او، اوغلونون آديني پالاز قولاق قويدو. اوغلانين آيي دان دا قان قاريشيغي اولدوغونا گؤره، چوخ تئز بؤيودو و گوجلو بير آدام اولدو. بير گون آناسيندان سوروشدو کي؛ نييه منيم اؤزومون بير طرفي توکلو، بير طرفي توکسوزدور؟! پادشاهين قيزي دئدي: آدام اولدوغوما گؤره بير طرفي منه، او بيري طرفي ايسه حئيوان اولدوغونا گؤره آتانا اوخشاييبدير. پادشاهين قيزينين اوغلو، باشدان گليب کئچنلري آناسيندان سوروشدو. پادشاهين قيزي دا اولموشلاري اؤز اوغلونا دئدي. اوغلان اؤزو ايله قرارلاشدي کي، آيي ني تاپيب اؤلدورسون. آيي هميشه کاغاسيندان گئدنده، کاغانين قاپيسينا يئکه‌يئکه داشلار قوياردي کي، پادشاهين قيزي و اونون اوغلو اورادان قاچا بيلمه‌سينلر. اوغلان آييني اؤلدورمگه گؤره ائله بير اوخ – کامان قاييردي کي، اونون اوخو يئکه‌يئکه داشلاردان دا کئچيردي. گئجه‌له‌ميشدي. آيي گئديب دولانيب، يئييب، ايچيب کاغايا قاييديردي. او کاغايا ياخينلاشاندا گؤردو کي، اوغلو کاغانين قاپيسينا قويولان يئکه‌داشي گؤتوروبدور، آيي آجيقلانيب، قيرواقلاشيب اؤزونو کاغايا يئتيرمک ايسته‌ييردي کي، اوغلان کاغانين آغزينا قويولان داشي باشينا قالديريب، آيي يا ساري توللادي. داش آيي ني توتمادي. آيي داهادا آجيقلانيب نه‌نه بالا هر ايکيسينه هجوم ائتدي. اوغلان کامانا بير اوخ قويوب آيي يا آتدي. اوخ آيي‌نين اوره‌ييندن توتوب اونو اؤلدوردو.اونلار، آنا- بالا پادشاهين ائوينه ساري يولا دوشدولر. قصره ياخينلاشاندا گؤردولر کي، بير اکينچي قارا گئيينيب. پادشاهين قيزي اوندان سوروشدو کي، نييه قارا گئيينميسن او دئدي: نئچه ايل قاباق پادشاهين بير قيزي ايتميشدي اوندان بري بيز قارا گئيينيريک. پادشاهين قيزي دئدي کي، اگر او ايتن قيز من اولسام گليشيمي پادشاها خبر وئررسن يا يوخ؟! اکينچي دايانمادان شاهين ائوينه‌گئديب، قيزين نيشانلاريني شاها دئدي. شاه اونا دئدي: اگر دئديکلرين دوز اولسا، سنين اؤز آغيرليغيندا قيزيل وئره‌جه‌يه‌م، يوخسا يالان اولسا، اؤلومله جزالاناجاقسان.اونلار هاميليقجا قيزين يانينا گئتديلر و گؤردولر کي، پادشاهين قيزي نئچه ايلدن سونرا قاييديب گليب. اونلار سئوينجک شاهين قصرينه قاييتديلار. اوغلان شهرده درس اوخوماغا باشلادي او شرور و اذيتجيل بير آدام ايدي. شهر آداملاري اونون اليندن جانا گلميشدي. او شهرده چوخ گوجلو پهلوانلار وار ايدي کي، اونلاردا اونون اليندن گلميرديلر. بير گون پالازقولاق يولونان گئديردي، او گؤردوکي بير کيشي داغي آليب بئلينه گئدير پالازقولاق سوروشدو کي، بو داغي هارا آپاريرسان ؟ کيشي دئدي آپاريرام پالازقولاغي اؤلدورم. او دئدي پالاز قولاق منم ! او کيشي داغي سالدي پالازقولاغين اوستونه، اونا کارسالمادي. او داغين آلتيندان قالخيب کيشيني اؤلدوروردو کي، کيشي يالوار- ياخار ائله‌دي و اونا قارداش اولماق سؤزو وئردي. اونلار قارداش اولوب يولا داوام ائتديلر. اونلار بير آز يول گئتميشديلرکي، گؤردولر بيرکيشي بير چينار آغاجيني آليب چيينينه گئدير! دئديلر هارابئله ؟ او دئدي گئديرم پالازقولاغي اؤلدورم اوغلان دئدي: پالاز قولاق منم! چينارلا اونو ووردو. پالاز قولاق چيناري گؤيده توتوب سينديردي، آتدي، کيشي قورخوسوندان پالاز قولاغا سيغيندي ودئدي من ده سندنم.بئله‌ليکله اونلار اوچ قارداش اولدولار. اونلار گئتديلر، گئتديلر بير شهره چاتديلار. او شهرده آدام يوخ ايدي. شهر بوم – بوش ايدي. پالاز قولاق دئدي بيزيم يئريميز تکجه بورا دير. اونلار اورا دا ديريليک قوروب ياشاماغا باشلاديلار. هر گون بير نفر ائو ايشلرينه، قالانلاري دا ائشيک ايشلرينه و شيکارا گئديب يئمک گتيريرديلر. اونلار يئمگي حاضيرلاييب قورتاراندا، بير اوزون و هئيکللي کيشي گليب يئمگي يئييب، يولا دوشوب گئديردي. هرگون بئله‌ليکله کئچيردي. اوچوده اوتوردولار کي بير چاره تاپسينلار. بو قرارا گلديلر کي، اونو تعقيب ائديب، قصديني و کيم اولدوغونو بيلسينلر. گلجک گون پالازقولاق لا قارداشلاري او اوزون کيشينين آردينجا اولوب، گؤردولر کي طرف گئتدي – گئتدي بير قويويا يئتيشدي. او قويودان اود قالخيردي. کيشي قويويا دوشدو. پالاز قولاق دا ايشدن باش آچماق اوچون اونون آردينجا قويويا دوشدو. قارداشلاري پالازقولاغي بير اوزون ايپلن قويويا ساللادي و اونو قويونون ائشيگينده گؤزلمه‌گه باشلاديلار. پالاز قولاق قويويا ائنديکده گؤردو کي قويونون ديبينده سويوق هاوا وار و بير قوجا کيشي قويونون ديبينده اوتوروب. پالاز قولاق کيشيني گؤرن کيمي خنجريني چکيب، قوجا کيشينين قيچيني يارالادي. اونلار بير- بيريله دؤيوشدولر. پالاز قولاق کيشيني اؤلدوردو. کيشينين نئچه قارداشي دا وار ايدي. پالازقولاق کيشينين قارداشلاريني دا بير – بير اؤلدوردو.. او کيشينين قارداشلاريني اؤلدوردوکده هره‌سي‌نين يانيندا بير قيز تاپيردي. او قوجاکيشينين يانيندا بير قيز وار ايدي او، باشدان گليب کئچنلري پالاز قولاغا آچدي.پالاز قولاق سوسوزلاميشدي. گئتدي بولاقدان سو ايچسين. بولاغين گؤزونده بير اژداها وار ايدي. او اژداها سويون قاباغين آلميشدي و سو آخميردي. قارانليق شهرين آداملاري دا سوسوزلوقدان کورلوق چکيرديلر. اورانين پادشاهي پالازقولاغا دئدي: ايه‌ر اژداهاني اؤلدورسن قيزيمي سنه اره وئره‌رم. او ماحالين آداملاري سو ايچمک اوچون اژداهايا گونده بير قيز اوتوزدوروردولار. اژداها قيزلاري يئمک اوچون قيراغا گئديردي، بولاغين گؤزو آچيليردي و سو گليردي. اوگون ده نؤوبت پادشاهين قيزينين ايدي. پالازقولاق اژدهاني اؤلدورمک ايسته‌يير دي. آمّا چتين ايش ايدي. او قارانليق يئرين آداملاري دئييردي کي، اونا ياخينلاشماق اولماز و هرکيمسه اونا ياخينلاشسا، اژداهانين زهري اونو سو ائلر.پالاز قولاق اؤزونه کسرلي قيلينج قاييردي و نئچه قات تيکيلميش کئچه‌دن اؤزونه پالتار تيکديردي کي اژداهانين زهرينين قاباغيني آلسين. او ايسته‌ييردي اژدهاني اؤلدورمکله او قارانليق دونيادا ياشايان ملتي قورتولوشا چيخارتسين. او پالتاري گئييب، قيلينجي گؤتوروب اژداهاني اؤلدورمگه گئتدي.اژداها اونو کامينا چکمگه گؤره وارگوجو ايله هاواني قارنينا سوموروردو. پالازقولاق قيلينجيني ديک ساخلاميشدي، اژداها اونو ايچري چکديکجه پالازقولاغين ايتي قيلينجي دا اونو کسه- کسه ايره‌ليليه‌ييردي. دؤيوشون سونو اژداهانين ايکي بؤلونمه‌سيله باشا چاتدي !پالازقولاق اژداهانين ياري پارچاسيني گؤتوروب آتدي شهرين خارابا محله‌سينه، اژداهانين آغيرليغي خارابا محلله‌ني تورپاغنان بير ائله‌دي. اژداهانين بؤلونمه‌سيندن آداملار شادليغا باشلاديلار. پادشاه پالازقولاق دان ايسته‌دي کي اوندان بير انعام ايسته‌سين. آمما پالازقولاق دئدي کي، قارانليق شهرده ياشايان آداملاري ايشيقلي دونيايا قايتارسين.هامي قاييديشا چاره يولو آختاريردي. بونا گؤره کي بو ايش چوخ چتين بير ايش ايدي. دئييرديلر بو ايشي يالنيز زوموررود قوشو گؤره بيلر. زوموررود قوشو بير اوجا بوي چينارين قاناديندا يووا قورموش و اورادا ياشاييردي. هر ايل زوموررود قوشونون جوجه‌لريني بير آيري اژداها گليب يئيردي و زوموررود قوشو بالاسيز قاليردي. زوموررد قوشو پالاز قولاغا دئدي اگر بيزي اژداهانين اليندن قورتارسان و اوبيريسي اژداهاني دا اؤلدورسن، من ايشيقلي دونيايا گئتمگين يولونو سيزه‌گؤسترره‌م. پالاز قولاق اول کي اژداهاني اؤلدوردويي کيمي، ايکينجي اژداهاني دا اؤلدوردو و هاميني سئوينديردي.پالازقولاغين قارانليق دونيادان ايشيقلي دونيايا قاييتما زاماني گليب چاتدي، اونون اوزاقلاشماسيندان هامي ناراحات ايدي، هامي ايسته‌ييردي کي او يئر آلتي قارانليق دونيادا قالسين، آمما او قاييتماغا تله‌سيردي، بونا گؤره کي، ائشيکده، قويونون باشيندا، قارداشلاري اونو گؤزله‌ييردي.زومورود قوشو دئدي گرک يئتدي اينک کسديريب، اتلريني قيزارتديريب و يئتدي اينک دريسي حاضيرلاياسان. دريلري سو ايلن دولدوراسان. پالازقولاق اونون دئديگيني ائله‌دي و جاماعات دا اونا کؤمک ائله‌ييردي. سفر زاماني گليب چاتدي. يئمکلري زوموررود قوشونون قانادلارينين اوستونه قويدولار، پالازقولاقدا ميندي زومورود قوشونون بئلينه. زومورود قوشو دئدي هر واخت من دئسه‌م آجيميشام، قيزاريلميش اينکلرين بيريني آتارسان منيم آغزيما و هر واخت سوساميشام دئسه‌م بير تولوخ سو وئررسن ايچرم. من سيزي يئدي گئجه گوندوزه آپاراجاغام ايشيقلي دونيايا. پالازقولاق قارانليق دونيا‌نين آداملاريله گؤر- گؤروش ائديب، آيريلدي. زوموررود قوشو اوچماغا باشلادي. او هر واخت سوسوزام دئينده، بير اينک تولوغو دولوسو سو، هرواخت آجام دئينده، قيزاريلميش اينک جمده‌گي آغزينا آتيليردي. يولدا اينک جمده‌گينين بيري زووب دوشدو. زومورد قوشو آجام دئينده پالازقولاق اؤز بودونون اتيندن کسيب، اونا وئردي. زوموررود قوشو گؤردوکي بو ات آدام اتي دير. قوش اونو يئمير و قويونون آغزينا چاتانا دک آغزيندا ساخلايير. قوش دئيير مقصده چاتديق بو سن بودا، ايشيقلي دونيا، اودا قارداشلارين، گئت اونلاين يانينا، سني گؤزله‌ييرلر.پالازقولاق قيچيندان ات کسديينه گؤره يئرييه بيلميردي. دئدي: گئدرم، هله سن گئت. زوموررود قوشو گؤرور او يول يئرييه بيلمير. او پالازقولاغين بودونون اتيني آغزيندان چيخاريب، بودون کسيک يئرينه قويور، آغزي‌نين سويوندان اونون ياراسينا سورتور. پالازقولاغين قيچينين ياراسي ياخشي اولور. زوموررود قوشو اؤز قانادلاريندان ايکي لئلک چکيب پالاز قولاغا وئرير و دئير کي، هاردا چتينليگه دوشسن من سنين يارديمينا گلجه‌يم.پالازقولاق و قارداشلاري يئتدي ايلدن سونرا، اؤز شهرلرينه چاتديلار. اونلار عائله‌لري‌نين يانينا قاييداندان سونرا، شهرده آرامليقلا ياشاييرديلار و اؤزگه‌لره احترام ائديرديلر. ياشاييشدا ائله‌ديکلري آنجاق و آنجاق آيريلارينا يارديم و ياخشيليق ايدي………
بولگه لر سرويسي:بيري وار ايدي، بيري يوخ ايدي. تانريدان سوواي هئچ کيم يوخ ايدي.