مني آگورادا يانديرين

بولگه لر سرويسي:برگه‌لري ميزين اوستونه قويوب، دئديم: »بويورون، بو دا ?? برگ وصيت‌نامه‌نين ترجمه‌سي. لاپ بئله معتبر دارالترجمه‌ده ترجمه ائلتديرميشم. آنجاق پورتاغال، مالت، بير ده لوکزامبورگ ديلينه ديلمانج تاپما‌ديم. دئديلر اينگليس ديلي بين‌المللي اولدوغو اوچون اونلار دا ائله بو ديلي قبول ائليرلر. لطفاً بو دفه ويزا تقاضاسيني اوروپا بيرلييي‌نين بوتون اؤلکه‌لرينه يوللايين!«

باشيني قالديريب، هويوخموش کيمي‌مني سوزرکن ميزيلداندي: »ايشميز چيخدي دا…« سونرا اومودو کسيلميش آداملار کيمي‌اوزومه زيللندي. من ده اوزدن گئتمه‌ييب، اونون گؤزونون ايچينه زيللنديم. اوره‌ييمده يالوارديم: »سني او اينانديغين، دا بو دفه داش ديغيرلاتما يورقونلوخدان اؤلورم!«
گؤزلرينين لئنزي، باشينداکي ياشيل چرقدله همرنگ ‌ايدي. گويا گؤز لئنزي ده بو مؤسسه‌ کارمندلرينين يونيفورمونو کاميل ائله‌يير. کئچن دفه گلنده قهوه‌اي چرقديني قهوه‌اي لئنزله همرنگ ائله‌ميشدي.
البته کارمند بير خانيمين چرقديله گؤز لئنزينين همرنگ اوْلوب اوْلماماسينين منه هئچ دخلي يوخدو. آنجاق پولچوک بند ائله‌مه‌ميش ويزا تقاضالاريني سفيرليک‌لره يوللاسا، قيرميزي چرقديني قيرميزي لئنزله همرنگ ائله‌مه‌سي بئله وئجيمه دئييل. بدن اؤزونوندور، اؤزو بيلر. نئجه سوسسلنديرمه‌سي ده يالنيز اونا دخلي وار.
»سيز مگر اؤلونوزو…«»اؤلونوز« کلمه‌سي آغزيندان چيخديقدا بير آن سوسدو. اونون سوسدوغو آن سردخانانين دوْلابيندا جاني بوزلاميش آنام گئنه گليب تيکيلدي گؤزومون اؤنونه. آنام ساغ ايکن، هر زامان ائوده اؤلودن سؤز گئدنده، کفنه بورونموش، اوتاغين اورتاسيندا اوزاديلميش قونشوموز ياديما دوشردي. آمما آنام عؤمرونو سيزه وئرن گوندن بري اؤلو سؤزويله باغلي، بوتون ذهني تصويرلريمين‌هاميسي ده‌ييشيليبدير.نظريمه ائله گلدي کي کارمند خانيم اؤز يانيندا اؤلويه کم‌احترامليق ائله‌ديييني دوشونوب، سؤزونو ياريمچيليق قويدو. ثانيه قدر سوسدوقدان سونرا دئدي: »باغيشلايين سيز مَه‌يه رحمتليخ آنازا يونان ويزاسي ايسته‌ميسيز؟«منسه غوصّه‌لي لحن‌له دئديم:»بعلي، آگورا، يونان اؤلکه‌سينده اولدوغونا گؤره يونان ويزاسي ايستيريخ. مرحومه وصيت ائله‌ييب کي اونو آگورادا يانديراخ!«
»يانديراخ« سؤزونو ائشيجک، ديسکيندي. بللي‌يدي کي جهد ائدير گوجونن اؤزونه غاليب اولوب، يانديرماغا گؤره بير سوال سوروشماسين.»ياخچي… به اوندا سيز نييه ايستيسيز اوروپا بيرلي‌يي اؤلکه‌لرينين‌هاميسيدان ويزا آلاسيز؟ بولارين بير- بيرينه نه دخلي وار؟«آنلاديم کي منيم دئديييمي‌باشا دوشمه‌ييب. ياس ساخلاماغا دئييل کي، غيرارادي بير تبسوم دوداغيما قوندو.»بونا دئيرلر دؤور ويرماخ. يئتر کي سيز بو اؤلکه‌لرين بيريندن ويزا آلاسيز. اوندا آنامين وصيتيني يئرينه گتيره بيللم.«»خانيم قاباقجا سيزه عرض ائله‌ميشم کي اؤلويه ويزا وئرمزلر!«
»بولوسوز نه وار؟ باشيم دا گئتسه آنامين وصيتيني يئرينه گتيرمه‌لييم. بيزيم عايله‌ده وصيتين تقدّوسو وار. وصيت‌نامه‌ده يازيلميش هر نه وارسا، ورثه‌لره تکليفدي، اجباردي. آتام اؤلمه‌ميش وصيت ائله‌ميشدي اؤلوسونو آش‌تؤکن قبريستانيندا قويلاسينلار.
هر کيمدن سوروشدوق، بو آددا بير قبريستان تانيمادي. آنام دئدي اؤلسم ده بو قبريستاني تاپمالييام. اؤلوسو بير هفته سردخانادا قالدي. آخيرده آنامين تاريخچي دوستلاريندان بيري آش‌تؤکن قبريستانين آدرسيني تاپدي. دئمه بَه لاپ بئله قولاغيميزين ديبينده‌يدي؛ آمما سونرالار قبريستانليق يئرينده مدرسه تيکيلميشدي. آنامين بير آياغي شهرداري‌ده بير آياغي دا…«
کارمند خانيم سؤزلريمدن يورولموش گؤرونن بير حالدا سؤزومو کسدي.»رحمت‌ليخ آتازين وصيت ناغيليني ساخلايين آيري واختا، سيزين ايشيزدن علاوه منيم آيري ايشلريم ده وار! من سيزه عرض ائليرم يونان سفيرلييي سيزين رحمت‌ليخ اؤلوزون ويزاسيني ردّ ائله‌ييب، آمما سيز منه حسين کورد نغيلي دييسيز!«هئچ ايسته‌ميرديم کارمند خانيمي‌حيرصلنديريم يا اونونلا لَج ائشيم، ياسلي اولاندا نه اولاردوداغيمين بوجاغينا بير بالاجا تبسوم ياراشديرماق مني اؤلدورمزدي کي! خوش‌خوشانليقلا دئديم:»يونان سفيرلي‌يينين ردّ ائله‌مه‌سينه باخمايين، بو گونلر اورانين سياسي- ايقتصادي دورمو خرابدي. دئييرلر اؤلو سهلدي، هئش ديري‌يه ده ويزا وئرمير.«»بولمورم من سيزي نئجه دوشوندوروم کي سفيرليک‌لرين هئش بيري اؤلويه ويزا وئرمز. چونکي اؤلو قئيد حياتدا دئييل، نفس چکمير، برگه‌لري امضالايا بيلمز، بانک حسابيني آليب گتيره بيلمز، ويزا اوچون گئديب تمام‌رخ عکس سالديرا بيلمز و… باشا دوشدوز؟!«
سؤزو باشا چاتاندا، چؤهره‌سي پؤرتموشدو. آز قاليردي نفسي دايانسين.دئديم:»سيزين خبريز يوخدي. ايندي اؤلولر ده تغيير وضعيت وئريبلر. نيشان بو نيشان کي نئچه گون قاباق گؤردوم آدليم آداملاردان بيريسي رحمتليخ خانيميسينين کفنه بورونموش عکسيني ايکي حالتده فيسبوکدا پروفايل عکسي کيمي‌پايلاشميشدي. بيرينجي عکسده گؤزلري آچيق ايدي ايکينجيسينده گؤزلري يومولو. ايندي آنام ياديما دوشنده دئييرم کاشکي او دا وصيت يازاندا عاغيل ائله‌ييب، يونانين بو ايقتصادي دورموندا، ويزا مشکلاتينا فيکير وئرردي.
يوخسا استاتوس قويماق بير شئي دئييل کي! اونون اؤلوم وضعيتيندن يازيلي- شکيللي ائله استاتوسلار قويارديم کي هربيري يئددي يوز لايک يئسين. آمما منيم ائله اوّل بيرگوندن شانسيم يوخدي. ناتاراز ايشلرين‌هاميسي گليب مني تاپار. آنام مني دوغاندا، بير آياغي پيلله‌نين آشاغيسيندا، او بيري….»خانيم، بو سؤزلرين يئري بورا دئييل، ناتاراز ايشلريزي لطفاً آيري يئرده تعريفله‌يين.«
آردي وار

منبع :