غريبه ديلداماقلي گونلريميز واريدي

بولگه لر سرويسي:کيربيت چؤپونون گوگوردسوز طرفي ايله چوبوغون گيرده يئريني قورتدالاييب تميزلدي، تانباکي‌دان بير نئچه چيمديک گؤتوروب تؤکدو اورا، تانباکي کيسه‌سي‌نين ايپليگيني چکيب، آغزيني بوزوب دويونله‌دي سوخدو شالينين ايچينه، کيربيتي يانديريب توتدو چوبوقداکي تانباکي‌يا.

سون بولوم

بولگه لر سرويسي:کيربيت چؤپونون گوگوردسوز طرفي ايله چوبوغون گيرده يئريني قورتدالاييب تميزلدي، تانباکي‌دان بير نئچه چيمديک گؤتوروب تؤکدو اورا، تانباکي کيسه‌سي‌نين ايپليگيني چکيب، آغزيني بوزوب دويونله‌دي سوخدو شالينين ايچينه، کيربيتي يانديريب توتدو چوبوقداکي تانباکي‌يا.
 سونرا چوبوغون او باشيني قويدو دوداقلاري آراسيندا هوف هوف هوف دئيه ايچينه چکدي. تانباکي آليشيب ياندي، ايچيندن توستو قالخدي. مشدعلي توستونو آغزينا دولدوروب ائشييه پوفلوردو.
-اژدهايا بنزه‌دين، دئديم، وئريسن من ده پوفلييم بي دفعه؟
-آللاه آتووا رحمت ائله‌سين! اوز وئردوخ بيول دا آستار ايستيسن؟!
-يوخ آستار ايسته‌ميرم کي، فقط بيدانا پوفلييم. نيه وئرميسن؟اَييلدي، اوزونو گتيردي اوزومون قاباغينا، باخيشيني ديره‌دي باخيشيما، بورنونون اوجو آز قالدي بورنومون اوجونا ده‌يسين، سسيني ياواشلاديب دئدي:–
 وئرمرم! چونکي چاخيري تؤکسن سيچانين بوغازينا،گئدر پيشييين پئشوازينا!
نه دئديييندن هئچ باش آچماديم، قيراموم ياپيشديم کي:– بس توسسوسون پوفله منه، اييسينه باخيم.او دا چکيب پوفله‌دي منه
…-بونون ايي اننه‌نين سيگاريننان چوخ بَتردي.
- دئديم.
-اننه کيمدي؟… هه، بو، سيگاردان غليظ اولي
- دئدي. سونرا، “دا دو، بو مئژمئييني ده گؤتي گئت ايچري، قاپيني دا ايشکيلله، قيز اوشاعي قاپيدا دورماز”- دئدي.
-نيه دورماز؟ دورسا نولار مگر؟!-نولاجاق؟ دَردوش آتار تورباسينا آپارار اؤزوينن! گئد ايچيري! دئيه، اوجادان چيمخيردي بيله‌مه.چيين‌لريمي چکديم، دوداق‌لاريمي بوزه‌رک مئژمئييني آلديم گلديم ايچري، آما فيکريم قالدي دَردوش يانيندا… مامانيم گؤزون آغارتدي بيله‌مه، چونکي اکيلميشديم، سفره‌ني ييغيشديرماقدا ال يئتيرمه‌ميشديم. من ده گؤرمزليکدن گليب، گئتديم بؤيوک مامانيما کي:-گئداخ بامادورلاري تؤکاخ حووضا؟بؤيوک مامانيم:-هن بالا يوبانديخ، گونورتا اولدي. گلين اوشاقلار، دورون گلين!… فَريح، سن ناهارا باخ، بيز ده گئداخ حيه‌طه!
- دئدي خالاما.ائله بيل آري يوواسينا چؤپ اوزاتميسان، دهليزدن پؤهره وئريب، هامميميز آغناشديق حيه‌طه. حيه‌ط قاپيسي آز قاليردي چرچوواسيندان چيخسين!اننه‌م منه تاپشيرميشدي هوشدورمبازليق ائله‌مه‌ييب، باجيمدان گؤز اولام. بير بالا خالچا، بير کؤهنه ياستيق ويرديم قولتوغوما، قيرميزي امزييي باسديم باجيمين آغزينا، آلديم قوجاغيما اهمال- اهمال پيلله‌لردن ائنديم حيه‌طه. اؤنجه باجيمي راحاتلاديم سونرا گئديب قاريشديم اوشاق‌لارا.بامادورلاري تؤکدوک حووضا. ايکي اليم اولدو بير تپه‌م، “نه ياخجي پشابيمي حووضا ائلمه ميشديم باياق!” -دئديم اؤز- اؤزومه، يوخسا گلن روب واختينا کيمي هاممي ميردار خوروش يئيه‌جاقدي!اوشاقلار هاميسي دؤوره ييغيشميشديق بامادورلاري بير دانا- بير دانا يوووب آتيرديق يئکه تشتين ايچينه. هر دن ده بير ازيک- اوزويو اولاندا ياخيرديق بير- بيريميزين باش- قولاغينا! قودوروشماق اوچون هر شئيي بهانه ائديرديک. مامانيم قيرنادان شيلانک اوزاتميشدي تشته، سويو دا زينه آچميشدي. بامادورلاري تشتين سويوندان چيخارديب چکه‌لره ييغديق. اوغلان‌لار چکه‌لري آپاريب داييرديلار دوواردا گون قاباغينا. بؤيوک مامان پالاز ساليب اوتورموشدو آغاج کؤلگه‌سينده سويو گئديب کئشه‌لن بامادورلاري آرادان کسيبب آتيردي قازانا، اوستونه ده اووج- اووج دوز سپيردي. آخ! روبلوق لاله بامادورونو دوزلاييب يئيه‌سن، ائله يئمه‌لي اولار! دئييرم بس ائله ياريم سبد بامادوري اياق اوسته دوز سپيب يئديک!
-آز بامادور يئيين، سانجيلاناجاقسيز!بيز هله ده ميرتداشيمادايديق...سس-کويوموزه يازگول خانيم، بؤيوک مامانيم گيلين دوواربير همساياسي، نردووانا چيخيب، بويلاندي کي:-نه خبريزدي بالا، محله‌ني گؤتوموسوز باشيزا!
مامانين عميسي آروادي، نجيبه خانيم دئدي:-آهان! مئشه ده قورد آز ايدي بيري ده گمي اينن گلدي!
خالام اوزونو ديددي کي:-ياواششش! ائشيدر!
يازگول خانيم گولر اوزلو، شوخ بير خانيم ايدي. گؤزل ده سسي واريدي. تئز بير مئژمئيي گؤتوروب قاچيرتديم بيله‌سينه:
-يازگول خانيم بيدانا بيزه اوخو دا.-بوردان اولماز کي قيزيم!- دئدي.بير هاندا گؤردوک کؤرپه‌سيني ديبک دسته‌سي کيمي ويريب بير قولتوغونا، قاواليني ويريب او بيري قولتوغونا، بورون‌لاريندان جوت فتيله ساللانان خيردا- خيزان ايکي قيز بير اوغلو دا ياپيشيب پولوک چاديراسيندان، حيه‌ط قاپيسيندان اوخويا- اوخويا گلير:هر کس الين ايشدن چکدي، اولماز- اولماز دئيه چپيک توتدو. يازگول خانيم بورجودا – بورجودا گلير، هاممي دا اونون هاواسيله چيلتيک چاليب، بورجودور! کاسيب ديلخوشلوغو ديزدندي!!!آنام سوروشدو:-يازگول خانيم، بتر کئفين سازدي ماشاللاه، روب ايشين قورتولوب؟
-باجي منيم روببومو، آبقورامي چکيب ، قاپيميزدان گتيريب وئررلر.- دئدي شيشه- شيشه يازگول خانيم.خالام ديل- دوداق آراسي دئدي:-اوهه! عئيرانى يوخ ايشماغا، تخت روانينان گئدير سيشماغا!نجيبه خانيم لاغينان دئدي:-آي يازگول خانيم، به جووانه‌زن‌ليغيوا نه گليب؟ اؤزون چک دا روببووو، آبقوراوي. اؤزگه اؤزگه‌نين نامازيني بيليسن دا ننجه قيلار؟.....سؤز اوستو اؤرتولو دئييلميش اولسا دا، اوشاقلي- بؤيوکلو هاممي پاققا وئريب، کئچينديلر گولمکدن. اوشاق‌لارين الينه دوو دوشدو، اوغلان‌لار هره‌سي بير آغاج قيريغي کردي‌لردن تاپيب، قول- قولا وئريب حيه‌طده دسته چيخارتديلار:يازگول خانيمين روببو بو ايل بار باساجاقدي!هم روببو هم ده آبقوراسي کوفلنه‌جاقدي!... بونو دئييب حيه‌طي دودو دولانيرلار!بئناوا آرواد دئدييينه پئشمان اولدي. هله اؤز اوشاق‌لاري دا دسته‌يه قوشولوب، حيه‌طي باشلارينا گؤتوردولر.يازگول خانيمين مؤحسون اوغلو قيسلميشدي ننه‌سينين بؤيرونه، قاشقاباق ساللاييب، ايچين چکيردي. 10-11 ياشي اولاردي. آغزي- گؤزونون ياشي قاريشميشدي بورنونون زيليغينا. هر دن کؤينه‌يي‌نين قولو، هر دن ننه‌سينين چاديراسي‌نين قيراغي‌يله سيليردي اوزونو. مامانيم سوروشدو:-به مؤحسون نيه قوشولمور اوشاق‌لارا؟ کئفسيزدي؟يازگول خانيمين دئمه دردي دئشيلدي، يومروغونو دويونله‌ييب چالدي سينه‌سينه:-مؤحسونون آدي باتسين! مؤحسونو ميرده‌شير يوسون! گؤروم قيزيلا ال آتاسان ميسه دؤنسون مؤحسوووون!...-نيه؟ نولوب آخي؟ نيه به اوشاغا ائله دئييرسن؟- سوروشدو مامانيم.
هاميميز تعجوبله گؤزوموزو تيکديک يازگول خانيمين آغزينا:-گؤروم بونون جييه‌رلري پؤرته‌لنسين! سورا دا اوزونو توتوب مؤحسونه؛ آزيب چؤللره دوشه‌سن قودوخ! پامال اولاسان قودوخ حسرتي چکن! باباليم سني توتسون، مؤحسوووون!
-آي بالا اوشاغي اود ووردون اوددادين آخي! – دئدي بؤيوک مامانيم، سنين اليوين حاجاتي‌دير بو اوشاق نيه ائله دئييرسن، آللاه گؤزووه چيراق ائله‌سين.يازگول خانيم اورکله‌ندي:-آعا قولي سحر ايکي تومن تاقچايا خرجليق قويموشدو. وئرديم بو ويرغينا گئديب بير پونزا پنير آليب گتيرسين، فراسات‌سيز، بئدَستالات آپاريب پولو ايتيريب الي قولوندان اوزون قاييديب ائوه! سني گؤروم بالان باشيوا بلا اولسون مؤحسوووون!مامان منه باخدي، من اؤزومو ووردوم او يولا! لالام لال، کارام کار باخديم گؤيه، باخديم داما، باخديم او ياندا شافتالي آغاجينا، باخديم بو يانداعطيرشاهي‌ گولدان‌لارينا، دووار ديبينده‌کي چکه‌لري، هئره‌يه ييغيشان ياهي‌لاري سايديم، ... ياني کي خبريم يوخدو خبردن...-دمير پول ايدي يا کاغاذ ايکي تومن‌ليق يازگول خانيم؟-سوروشدو مامانيم.
“سنه نه آخي؟” دئديم اؤز اوره‌ييمده. “کيفيندن چيخارديب وئره‌جاقسان؟!”-کاغاذ ايکي تومن‌ليق ايدي....... ياناسان بالا، ياناسان سني، ايندي من قولويا نه جواب وئريم؟!
مامانيم باشلادي کي:-بو قيز سحر قنودا بير............دوردوم سويو سوزولموش گئتديم کرپيجين آلتيندان کاغاذ ايکي تومن‌ليغي گتيريب اوزاتديم يازگول خانيما، بئگؤيول- بئگؤيول دئديم:-پاحلاميشام ها........
يازگول خانيمين گؤزلري ايشيقلاندي، رنگي روفو آچيلدي، پولو مندن آليب، دئدي:-به به به! هم پاح‌ليييب ، هم تاحليييب بالام! گيله‌لريوه قوربان اولوم… دئيه، دوروب مني ائله باسدي باغرينا آز قالدي قابيرغالاريم اوغولسون. زهله‌م گئتميش!هاممي هايکوي ساليب شادياناليق ائله‌ييب، مني تحسين ائليرديلر. منيم اوقَتيم زهري هلاهيل دادي وئريردي!
بو هنگامه‌ده، بو حيص- بيص‌ده تاق- تاق- تاق حيط پيلله‌لريندن ديکدابان سسي گلدي. ايفاده يوکو، فيس- فيس شَلان خانيم، ميني‌ژوپ قيرميزي چارگول اتک، ال بويدا دا پوسته‌يي بولوز اينينده، گول- گول نازيک ژورژئت چاديرا باشيندا، قاشقاباغي يئر سوپوره- سوپوره گلدي کي:– نه سسيزي باشيزا آتميسيز، هاي-کويوز محله‌ني گؤتوروب! بللي دَيي روب چکيسيز، ييغوا ييغميسيز، توي توتموسوز، دسته چيخاتميسيز شاخسئي گئديرسيز…
او دئيينيردي، من، اونون چاديرا آلتيندان گؤرونن آغ بودلاري، آياغينداکي عنابي لاک‌لاري، پوش وئريلميش ساچ‌لاري و دؤش- باشينين آچيقليغينا هويوخ قالميشديم. او، حرارت ايله چيين‌باشينا آتا- آتا دانيشارکي، من بيردن سؤزونون آراسينا آتيليب دئديم:چاديراننان هر يئرين گؤرسنير هااا شلان خانيم!بونو سن ايدين دئدين؟!... قورباغا گؤلونه داش آتديلار سانکي.... بوتون سس- صدا ياتدي.
شلان خانيم بير آن دونوخدو، اوستدن آشاغيا اؤزونه موشتري گؤزويله باخيب:-گؤر من کيم‌لرينن گليب آغيز آغيزا اولموشام! – حيرص ايلن دئييب، تاق تاق تاق ديکدابانلاريني دؤيه- دؤيه اوزونو دؤندريب، پيلله‌لره ساري گئتدي. بيردن داباني ايليشدي کرپيج‌لرين آراسينداکي شيريغا، قيچي بورخولوب، بودوره‌دي. زورونان اؤزونو ساخلاشديردي. بيز پيققيلداديق. دؤندو، آجيقلي- آجيقلي “ايکي قيرانليق ائششه‌يين، اون شاهيليق دا قودوغي اولار!”- دئدي، اوتانماز- اوتانماز! و پيلله‌لردن ايتيليب گئتدي. مامانيم گينه منه ترسه باخيب، قينادي مني. بؤيوک مامانيم دئييندي:-بالا اوشاغي قيناما! شلان خانيم اوروس گلنده ماتيشقادي، عثمانلي گلنده جوجوق!خالام گيلين گولدويو بو استعاره‌لردن من گينه هئچ نه آنلاماديم. سوروشماديم دا بو ماتيشقا
- جوجوق جرياني نه‌دير.آز قاليردي قاش قارالا. ميرتابازار قورتولاندان سونرا، مئژمئيي‌لري، تشت‌لري، قازان‌لاري نئچه ياندان ياپيشيب دوزدوک شاققار گونون قاباغينا. ايکي گون گرک قالا، بامادورلار تيتتايا. بيريسي گون تيتتايان بامادورلاري ال‌لـه‌ييب، اَزيب سوزکئجدن کئچيردرديلر. سونرا تيليف‌لريني برک- برک الده سيخيب، کونده‌له‌ييب، قويارديلار بير طرفه. سوزکئجدن سوزولن دورو روببو دا مئژمئيي‌لره تؤکوب، دوزرديلر گون قاباغينا، ايکي- اوچ گونه کيمي برکييَردي، گؤتوروب بانکالارا تؤکوب زئرزمي‌يه ييغارديلار، ايل بويونجا گتيريب ايشله‌درديلر.

منبع :