ساري اينک آذربايجان ناغيللاري بولگه لر سرويسي:??بيري وار ايدي، بيري يوخ ايدي. تاريدان سوواي هئچ کيم يوخ ايدي. بير ناخيرچي وار ايدي. او ناخيرچي نين بير آروادي وار ايدي، بير ده بير قيزي. قيزي نين آدي فاطمه ايدي. ناخيرچي نين آروادي نئچه ايلدن سونرا اؤلدو. اونون بير اؤلن آروادي نين »دده وئردي«سي اولان بير اينَگي وار ايدي. او، اؤلندن سونرا اينک فاطمه يه ايرث قالدي. او اينک بير سئحير ائديجي ايدي. ناخيرچي يئني‌دن ائولندي. تزه آروادي چوخ اؤزوندن راضي، عصب سيز و قاش– قاباقلي ايدي. او، فاطمه يه اذيت ائديردي. فاطمه نين بير اؤگئي باجيسي وار ايدي. اؤگئي باجي نين آدي سريه ايدي. سريه ده آناسي کيمي چيرکين و گؤزو گؤتورمز و گيجيکچيل ايدي. آمّا فاطمه ايسه، گؤزل و مئهريبان ايدي. ناخيرچي نين آروادي بير گون ارينه دئدي: مال لاري صاباح فاطمه اوتاراجاغا آپاراجاق!صاباح اولدو و فاطمه مال لاري اوتاراجاغا آپاراندا ننه ليگي اونا بير بؤيوک باغلاما دا چييدلي پامبيق وئردي و امر ائتدي کي بو باغلامادا اولان پامبيغي دا چييدلر، اييرر و دؤيچه لريني ده توولار و کلف ائديب گتيررسن. فاطمه مال لاري اوتلاغا يايدي و پامبيق باغلاماسيني قاباغا آچاندا مال لار اونا ماجال وئرمه ديينه گؤره، آغلاماغا باشلادي. ساري اينک اونون کؤمَگينه گليب دئدي: نييه آغلاييرسان؟ فاطمه دئدي: نييه آغلاماييم، ننه ليگيم منه بير بئله پامبيق وئريب، گرک آخشام بونلارين کلفيني ائوه آپارام. مال لار دا ياواش اوتلامير بيلميرم اونلاري هايخيرام، يوخسا پامبيغا يئتيشم. اينک دئدي بو کي بير ايش دئييل! بو پامبيق لاري وئر من يئييم و ناهار واختي اونلارين کلفيني سنه وئريم. آمما من پامبيق لاري يئينده منيم پيله مي يئل اؤزو ايله بير قاري نين ائوينه آپاراجاق. سن ده پيله نين آرديله گئديب او قاري نين ائوينه چاتارسان. او قاري سندن سورغولار ائده جک. سن آنجاق هن دييرسن. فاطمه پيله نين آرديله گئديب، قاري نين ائوينه چاتدي. قاري اوندان سوروشدو: قيزيم دئه گؤروم منيم باش توک لريم تميزدي يا سنين آنانين ساچ لاري؟ فاطمه گوله –گوله دئدي: سنين کي!– منيم ائويم و قاب قاجاغيم تميزدي يا سنين آنانين ائوي؟ فاطمه دئدي سنين.قاري دئدي سن قاييداندا قارشيوا آغ- آپ آغ آخارسو چيخاجاق. سن او سو ايله ال- اوزووو يويارسان. آي کيمي پارلاق اولارسان. سونرا قيرميزي سو آخاجاق اونونلا دا دوداغيني و ياناق لاريني يويارسان. سونرا دا قارا سو ايله قاش لاريني و کيپريک لريني يويارسان و داهادا گؤزل لشرسن. فاطمه قاري نين دئديک لريني يئرينه يئتيردي و چوخ گؤزل اولدو. او ناخيرا چاتاندا، گؤردو کي، کلف لر حاضيردي. او کلف لري ده گؤتوروب مال دسته سيني ده ييغيب کنده آپاردي. فاطمه نين اوگئي ننه سي اونو گؤردوکده داها دا گيجيک ائله دي. صاباحيسي مال لارين اوتاراجاغا آپارماسيني قيزي سريه يه تکليف ائتدي. سريه يه ده بير باغلاما پامبيق وئردي و اونلارين کلفيني آخشام اوندان آلاجاغيني بيلديردي. سريه مال لاري اوتاراجاغا چاتديراندان سونرا ايشه باشلادي، او ايشين آغير اولدوغونو گؤروب آغلادي. ساري اينک گليب اونا دئدي نييه آغلاييرسان. او دئدي آخي بير بئله ايشي گؤره بيلمه يه جم. آنام دا منيمله ساواشاجاق. ساري اينک دئدي سن منيم سؤزومه باخسان، آخشام کلف لري ائوه آپاراجاقسان. او ائرته‌سي گون فاطمه يه هر نه دئميشدي سريه يه ده دئدي. فاطمه نين باشينا گلن ايش لر اونون دا باشينا گلدي. سريه پيله نين آرديله گئديب قاري نين ائوينه چاتدي.قاري اوندان سوروشدو؛ منيم باش توک لريم تميزدي يوخسا سنين آنانينکي؟ سريه دئدي : آنامين ساچ لاري. قاري دئدي منيم ائويم تميزدي يا سنين آنانين ائوي؟ سريه دئدي آنامين ائوي. قاري سريه يه دئدي کي، قاييداندا قارشينا آغ سو چيخاجاق اونونلا ساچ لاريني قاش و کيپريکلريني يويارسان. سونرا قارا سو ايله ده ال –اوزونو و بدنيني يويارسان. او ائله ائتدي و چوخ چيرکين اولدو. گليب اوتاراجاغا چاتاندا نه کلف لردن خبر وار ايدي نه ده مال لاردان. آغلايا– آغلايا ائولرينه گئديب اولان لاري آناسينا دئدي. ناخيرچي نين آروادي بيلدي کي، بو ايش لر فاطمه نين اينَگي نين ايشيدي. صاباحيسي گون اؤزونو ناخوشلوغا ووروب دئدي: دوختورلار دئيير سنين دردي نين درماني ساري اينک اتي دير. ناخيرچي آروادين آليندان باش آچمادان اينه يين باشيني کسمک ايسته ييردي کي، فاطمه ده بو سؤزو ائشيدن کيمي ناراحات اولدو.فاطمه گئديب سؤزو ساري اينگه چاتديردي. ساري اينک دئدي منيم اتيم اونلارين آغزيندا زهر اولاجاق. سنين آغزيندا ايسه، دادلي اولاجاغام. سن منيم اتيمي يئييب، سوموکلريمي بير توربادا آوخورومدا تورپاق آلتدا باسديرارسان. سونرا منيم سوموک لريم بير دست لباس و بير جوت باشماق اولاجاق. اونلارين هر ايکيسي قيزيل اولاجاق. اونلارين يانيندا بير دسته ده قيزيل گول اولاجاق.بير گون کندده توي ايدي، سريه و آناسي تويا گئتدي فاطمه ني ده بير چالادا دوستاق ائتديلر. فاطمه چالادان چيخيب قيزيل باشماق و لباسيني گئييب تويا گئتدي. او بير الينده قيزيل گول لري و بير الينده ده بير آز دوز گؤتوردو. تويا چاتاندا توز-تورپاقلي دوزو سريه نين و اؤگئي آناسي نين گؤزونه سپدي و قيزيل گول لري تويا گلن آدام لارا وئريب ائولرينه قاييتدي. او قاييتديقدا بير حوض گؤردو گئديب اوندان سو ايچنده باشماغي نين تايي دوشدو سويا. او ائولرينه گلدي لباس لاريني سويوندو و آپاريب يئرينده قويدو و ائوده اوتوردو. شاهين اسماعيل آدلي بير اوغلو وار ايدي. اسماعيل آتيني سووارماغا آپاراندا حوضداکي باشماق تاييني تاپيب اونون يييه سينه وورولدو. او، او قدر وورغون اولدو کي، سئوگي نين شدّتيندن آزارلادي. دوختورلار دئدي کي بونون درماني قيزيل باشماق تايي نين صاحبي نين تاپيلماسيندان آسيلي دير. تدبير ائدن لر بئله قرارا گلديلر کي، بوتون جاماعاتي ميدانا توپلاسينلار و او قيزيل باشماق تايي هر کيمين آياغينا گلسه، او قيز شاهزاده نين آداخليسي اولسون و ائولنسين لر. سريه و آناسي بو خبري ائشيدن کيمي فاطمه ني قويودا حبس ائديب، اؤزلري ميدانا گئتديلر. باشماق هئچ کيمين آياغينا گلمه دي، بو آندا فاطمه نين خوروزو بيردن بيره بانلاماغا باشلادي و قيشقيردي کي، فاطمه ني ائوده حبس ائديبديرلر. خوروزون سؤزونو ائشيدن شاه امر ائتدي کي، ناخيرچي نين ائوينه گئديب اونو دا گتيرسينلر. مأمورلار گئديب فاطمه ني گتيرديلر و باشماغي امتحان ائتديلر. فاطمه نين آياغينا اولدو. فاطمه ني شاهزاده اسماعيلين آداخليسي ائتديلر. بير گون سريه آناسيله فاطمه نين گؤروشونه گئتديلر و اونو دولانماق بهانه سيله دريا کنارينا آپارديلار. اونلار فاطمه ني دريايا آتديلار. سريه فاطمه نين لباسيني گئييب شاهين ائوينه قاييتدي. شاهين اوغلو اونلارين حوققاسيني آنلادي و صاباحيسي گون فاطمه نين خوزوزو بانلاييب دئدي کي، فاطمه دريادا بير باليغين قارنيندا ساغ دير. شاه بو خبري ائشيدن کيمي اوزگونچولري دريايا يوللادي. اوزگونچولر فاطمه ني تاپيپ گتيرديلر. فاطمه اريله بيرگه ياشادي آمما سريه ايله آناسي ني دار آغاجيندان آسديلار.
ري وار ايدي، بيري يوخ ايدي. تاريدان سوواي هئچ کيم يوخ ايدي. بير ناخيرچي وار ايدي.