بير تپه اوسته آرازا ياخين

بولگه لر سرويسي:بيرگون بير اؤلونون يوخوسونون اوجوندان توتوب اوجوزلوغا دوشموشدوم.

اسماعيل خرمي

بولگه لر سرويسي:بيرگون بير اؤلونون يوخوسونون اوجوندان توتوب اوجوزلوغا دوشموشدوم.
 نه قدر چاليشديم اؤزومو باهالانديرا بيلمه‌ديم. سانکي اؤزومو بير مئيوه و يا ات کيمي‌بير باققال توکانيندا گؤروردوم. الي جئبينه گيرن مني پاکئتلره دولدوروب تره‌زييه آتميشديلار. عاييب اولماسين‌دييه پوللاريندا من ائله اؤزوم حسابلاميشديم. چوخ اوجوزايديم. بيرآز سئوينيرديم بو اوجوزلوقدان. اؤز اؤزومه دئييرديم:
– نئينک، قوي يازيق و يوخسول اؤلولرده بير زاد آلا بيلسينلر.
آنجاق منيم اوجوز ساتيلماغيمدان اؤزوم اوتانيرديم.
– آي اؤلونون اؤلوم يوخوسو، مني يوخودا گؤروبسنسه اؤلو گؤزلرين آغريماسين. آخي بئله اولماز! من اؤلو سن‌ي. مني تره‌زييه قوياندا سنه کيم اجازه وئردي منه قيمت قوياسان؟ بو قدرده چنه ويرماق اولار؟ گوناه سني يوخودا گؤرنده‌. بئبئله آخماق آداملاري قويوب گرک سنين يوخونون اوجوندان ياپيشيديم؟ بيردفعه ليک گئت اول قوي يوخولاريميزدا، تکليفين بيلسين.
دوزون خبر آلسانيز، هئچ بيلميرديم اؤلو مني يوخودا گؤرموشدو و يا من اونو و بلکه ده من اؤزومده اؤلموشم! چاشيب قالميشديم. ياديما جليل محمدقلي زاده‌نين‌ اؤلولر پيئسي دوشور. شيخ نصرالله‌نين‌ اؤلولري‌ديريلتمه ماجراسي. بيز حاضيرلانماميش قيام قيامت اولارها؟ بو آرادا منه قارانليق قالان بودورکي اگر من گؤردويوم اؤلودورسه اونو‌هانسي شيخ‌ديريلديب؟‌ديريلدبسه بو زاماندا اونا ائو، ايش‌هاردان تاپاجاق؟ يوخ من اؤلويمسه بو يازيني نئجه يازا بيليرم.‌ديز اوستو بيلگي ساياريم قاباغيمدا، بارماقلاريم دويمه‌لرين اوستونده، هله بعضا سهو يازديغيم سؤزجوکلري يانيمدا دوروب يازيما باخان اوغلوم منه خاطيرلاتماسي، يازا يازا نئچه کره سو ايسته‌دييمي‌و يا تئلئفونا جواب وئردييمي، ياديما ساليرام. او دونيادا بيلدييمه گؤرا نه بيلگي سايار وار نه تئلئفون نه ده بونلاري يازماغا احتياج.
بونا گؤرا قراره گلديم او اؤلونو، بيرده تاپيب گئرچه‌يي اؤزوندن اؤرگه‌شيم. هر نه دن اؤنجه مزارليغا باش ويرمالييام آغ مزار،آغ مزار شهرين قوتاراجاغيندا بير تپه اوسته آرازا ياخين، دؤره‌سي آغاجلارا بورونموش يئرده قرار تاپيب. بورا مزارليق اولماسايدي‌دينجه‌لمه‌يه جان وئرردي. باش داشلاري اوخويا اوخويا گئديرم..
 من بيلن داشلارين چوخونون اوستون سهو يازميشديلار، يادا قوجالارلا گنجلرين يئرين سهو سالميشديلار. ياش باخيميندان واقتسيز کؤچنلر چوخ ايديلار. بوگون بيلمه‌ديم نه گون ايدي آنجاق بير اؤلونوده تاپما بيلمه‌ديم. منيم طرفيمدن سورغو سوالا توتولماقدان‌دييه‌سن قورخموشدولار! يادا بوندان ياخشي مزارليق تاپيب بورالاردان گئتميشديلر! بلکه ده اولار کوچه- کوچه دوشوب مني آختاريرميشلار!‌دييه‌سن دوننه قاييتمالي اولاجام، البته اگر دونن وارسا! دوننه گئتمه‌يينده يولون آغيللي باشلي بيلميرديم. دانيشديغيم ماجرا نئچه گون، نئچه ايل، نئچه عصيرلر اونجه باش وئريبسه؟ اوندا پيس گونه قالديم!‌هانسي گونون‌هانسي گئجه‌نين‌ و ايللرين اته‌ييندن ياپيشيم منه يارديم ائتسينلر! تاريخي اوخوماغا ماراقلي دا اولسام، دقيق‌هاراسيندان باشلاماغيم بير آز چتين اولاردي. بو آغ مزاردادا چتين بير نفر تاپا بيلرم کي تاريخي ياخشي اوخوسون! بلکه بيريندن سوروشام؟ کيمدن سورسام دقيق ايسته‌ديمه چاتا بيلرم؟ ياشلي آداملارين چوخو آلزايمئر ايچينده، گنجلريميزينده دونن ناهارا نه يئديگي يادلارينا گلمير. ياخچيسي بودورکي، مزار قازان قادينا، هه دوز ائشيتدينيز قادين، منده سيز قدر تعجوبلنديم، تاپشيرديم کي يوخوما گلن اؤلونو و ياخود مني يوخوسوندا گؤرن اؤلونو، و يا منيم اؤلومومو گؤرسن، اونا‌دييه‌رسن صاباحلاري، شهرين يوخاري باشيندا يئرلشن کاج پارکيندا ساعات بئشده منه چايا قوناقسان.
گئجه‌ني بير جور بير تهر سحره يئتيرديم، عزيز و حورمتلي اؤلو قارداشدا يوخوما تشريف گتيرمه‌دي. مني ده‌ دييه‌سن يوخوسوندا گؤرن اولمادي. بو يوخو، يا هر نه، ايکي باشلي بير ايشه اوخشايردي. دئييرم بلکه او گؤردويون منده گؤره بيلرم.
بوگون، دوننکي گونون صاباحي گليب چاتميشدي. ساعات بئشه آز قاليردي. تلم تله‌سيک اؤزومو کاج پارکينا چاتديرديم.‌ دينج يئر يوخ ايدي. پارکدا لات لوت جوانلار فيرلانيب پارکا گلن قيزلارا قادينلارا و حتي ياشلي آداملارا ساتاشيرديلار. ايکي ايشسيز جاوان اوغلان نم‌ نه اوسته ساواشيرديلار. پوليسلر کناردان باخيب هئچ نه ائتميرديلر. من پوليسلره سؤيله‌ديکده کي ندن قاريشماييرسينيز! دئديلر: هله جنايت باش وئرمه‌ييب. تعجوبلنسمده منيم اليمدن بير ايش گلمه‌ييردي. پوليسله چوخ آغيز آغيزا وئرمه‌سم ياخشيدي، بيلر کي من اؤلو آختاريرام. بيردن اؤنون قاتيلي کيمي‌اؤزومو توتسالار نئجه؟.
بيرده منه نه! بو قالماقالدا هئچ اؤزومو آختاريب تاپا بيليرم مي؟ آستاجا اونلارين يانيندان ايزداهاملي بير يئره سوزولدوم. بير قاريشقا کيمي‌اؤزومو جاماعاتين ايچينده ايتيرديم. اللي آتميش نفره ياخين پارکين بو طرفينده بير آغايا قولاق آسيرديلار. هله يوخوما گيرن اؤلودن خبر يوخ ايدي. دئديم اؤلو گلينجه گؤروم ندن دانيشيرلار؟
– من سيزه سؤز وئريرم گله‌جه‌يينيزي تام ايسته‌دينيز کيمي‌دوزلده‌جم. آزادليق سيزه فدا اولسون. اونون کيلوسو نئچه‌دي ؟ مال دولت سيزه قوربان. بو قدر نئفتيميز، يئر آلتي معدنيميز، اکين تارلالاريميز، کارخانالاريميز و نلر نلريميز وار.
سؤزه قولاق آسانلار گوروتولو سسلرله باشلاديلار ال چالماغا، فيت چالماغا. جاماعتين ايچيندن کؤک بير کيشي‌ديله گلدي.
– آي باجي قارداشلار آخي محرمچيليک‌دي، عاييبلار اولسون. مگر بيلميرسيز کي ال چالماق حارامدير؟ هئچ اولماسا بو قادينلاردان اوتانين! لوطفا صلوات دئيين!
صلواتين سسي مندن اوزاقلاشيردي، يولومو اليمه آليب اؤلو دوستومو آختارماغا داوام ائديرديم. داها دوزون دئسم، آختاريش داوام ائديردي. بلکه اؤلوده مني آختارير.
دؤرد بئش گنجه‌جيک پارکين داريسقال بير بوجاغيندا بوزوشوب اوتورموشدولار. ايچگيلي کيمي‌نظره گليرديلر. گيزلي- گيزلي قارا بير پاکئتين ايچيندن بير شوشه‌دن سوزوردولر. آغ الکولون شيشه‌سي کناردان بللي ايدي. دالبادالا ساغليق دئمکلرين ائشيديرديم.
– بونو قالديريرام ايشسيزليين محوينه!
– بونو ايچيرم پولسوزلوغون آرادان قالديليرماغينا!
– منده آرتيريرام سيزين ساغليغينيزا!
تئز- تئز اليمي‌جئبيمه آپاريب، پوللاريمي‌يوخلاييرديم. نارکامانلار، جئبگيرلر و خوشا گلمه‌ين آدام چوخ ايدي.‌ ديلنچيلرينده پارکا گليش واقتيدي.
داريخماغا باشلاميشديم. بيزيم اؤلودن هله خبر يوخ ايدي. گؤزله‌مه‌يه مجبور ايديم. بيردن مزار قازان قادين، منيم سيفاريشيمي‌اؤلويه چاتديرماز‌ها؟. يوخ اولا بيلمز. من اونا حؤرمت اولاراق بير گؤزده ويرميشديم. اونوندا خوشونا گلديکده گولومسه‌ميشدي و منه امين اول‌!- دييه سؤز وئرميشدي.  آردي وار

منبع :