بولگه لر سرويسي:بيري وار ايدي، بيري يوخ ايدي. آللاهدان سوواي هئچ کيم يوخ ايدي. کي بير ار و آرواد بير ويلايتده ياشاييرديلار . بو کيشي چوخ زحمتکش, تلاشلي و اوره‌يي تونوک بير آدام ايدي. آرواديني دا چوخ – چوخ ايستيردي. آرواد کيشيسيني چوخ ايسته‌ميردي و آديدا سرينه‌ايدي. بو آرواد او قدر بو کيشيه کنايه ويريردي کي دئييردي سنين عاغلين يوخدو، بير شئي بيلميرسن و او قدر بو کيشييه دئيينيردي کي بو کيشي بيلدييني ده الدن وئرميشدي و قوجاليردي و ديشلريني ده ياش- ياش الدن وئريردي. بيرگون کيشي گئتميشدي يئرلرين اکسين. چوخ يورغون ايدي. آخشام چاغي چؤلدن گلدي ائوه. بو آرواد بير آز قورو چؤره‌ک گتيردي قويدو بونون قاباغينا. اما بو کيشي چوخ عصباني اولدي دئدي آي بي مروت من بير بئله ايشله‌ييرم و ديشم ده يوخدو، آخي من بو قورو چؤره‌يي نه تهري يئييم.؟ منيم اکديگيم- بيچديگيم چوخ ياخشي بوغدادير بو چؤره‌يي ائله بيل قره‌جه‌دن پيشيرميسن. چوخدا قره و برکدي. او واخت آرواد دئيير اصلا سن دانيشما. خوشوم گلمير. کيشي چوخ عصباني اولور ايستير کي آرواديني دؤيسون. آرواد دئير کي منيم گوناهيم دئييل کي چؤره‌گيميز بئله اولور و اينک‌لريميزين سودي خراب اولور. سنين باجين بغداددا بيزيم ائويميزين بره‌کتين قاچيرديبدي. کيشي عصباني اولور بير آز يول آذوقه‌سي گؤتورور يوللانير بغدادا. بير آي- ايکي آي طول چکير يئتيشير باجيسينا. خبر آپاريرلار کي موشتولوق وئر نئچه ايلردن سونرا قارداشين گلير سني گؤره. کيشينين باجيسي چوخ خوشحال اولور، دورور گئدير قارداشينين پيشوازينا. تا کي يئتيشير قارداشينا. قارداشي بونو سالير آغاجين آلتينا کي سن او ايشي نييه گؤروبسن کي منيم ائويمين برکتي قاچسين! باجيسي آغلايا آغلايا سوروشورکي آي قارداش باشيوا دولانيم آخي منيم گوناهيم ندير؟ دئيير سنه دئديم کي او ايشي نييه گؤرميسن منيم ائويمين برکتي و اينک‌لريميزين سودو خراب اولوبدي. جاماحات ييغيشير و اوضاعني گؤرور. اما کيشينين باجيسي چوخ هوشيار ايدي. دئيير قارداش بو سؤزي سنه کيم دئيير؟ دئيير منيم آرواديم. دئيير:يورولوبسان کئچ گئدک ائوه اوردا دانيشاق. گليرلر ائوه. بو کيشينين باجيسي اولان محله ده بير دوعا يازان وار ايدي, گئجه اوني ائولرينه چاغيرير حال قضيه‌ني بونا دئيير. بو درويش دئيير آي کيشي سنين آروادين سنه کلک ويريبدي.سنين ائوينين برکتي يئرينده‌دير و اينک‌لرينده سودي خراب دئييل. او اونلاري اؤزو اويناشيلن يئيير، سنه ده آرتيق قير-مقيردي دان وئرير کي مريضله‌ييپ اؤله‌سن. کيشي بيرآز فيکيرله شير دئيير من بس نه ائله‌ييم؟. منه بير يول گؤستر. بو درويش کيشي بونا دئييرکي من سنه بير دوعا يازارام و سنه بيرده چئپيش وئرم او چئپيشين آدي حاخ چئپيشيم و حوخ چئپيشيم دي. بو چئپيش ده چوخلو حيکمت واردي. سن بو چئپيشدن هرنه ايسته‌سن اولار. قضيه ده قورتاراندا گؤررسن چئپيشده دوشدو يولا گلدي. کيشي بير ايکي گوندن سونرا باجيسيندان قدردانيق ائلر گويلون آلار. درويشدن ده تشکور ائدر، باربندلين جمع‌لر، چئپيشيده گؤتورر دوشر يولا. اوز ولايتينه طرف يوللانير، گلير يولدا چوخ آجيير، اوتورور دئيير حاخ چپيشيم حوخ چپيشيم منه بير دست ياخچي لباس باشماق پاپاخ و بير دست آرواديما لباس باشماخ و بارماق اوزويو و بيردادا آجميشام ياغچي بير قوزولو پيلاو اول چئپيشيم. کيشي گوردو بلي بير سوفرا آچيلدي بو ايسته‌ديگي طعام و وسايل‌لار و لباسلار يون به يونلن حاضير آمادا اولدو. کيشي اولده بيرشوکر ائلر و خوشحال اولور قوزولو پيلاودا يئير وسايل‌لاري دا گؤتورور يولا دوشنده گؤرور چپيشده هوپبيلدي يولا دوشدي بونين يانينا. داها کيشي مطمئن اولدي کي ايش ده حوققا يوخدو. شاد خورامان گلدي بير موددتدن سونرا يئتيشدي ائوينه. آروادا چوخلي ساوقات گتيرميشدي پالتاردان قيزيلدان باشماقدان……. آروادا دئيير آي آرواد سن دوز دئييرسن من گئتديم باجيمي دا اؤلدوردوم برکت قاييتدي ائوه. ايندي بير چئپيش آليپ گئتيرميشم داها سن زحمته دوشميئسن هرنه يئماق ايچماق ايسته‌سک حاضير اولاجاق. داها هئچ غم و غصه اولميياجاق. بير نئچه دفعه ده امتحان ائدرلر حاضير اولار يئمک و ايچمک, اما بيرگون کيشي گئدير ائشيگه زمي‌لرينه باغينا باش ويرسين او واخت بو آروادين ...دئيير واختي کي سن دوز دئيرسن ناهار چاغيدي بو چئپيشدن بير ياغچي شوربا و ايستي چؤره‌ک ايسته، ويراخ بير گئينه. آرواد دئيير حاخ چئپيشيم حوخ چئپيشيم بير ياغچي شوربا و ايستي چؤره‌ک اول چئپيشيم. او زامان چئپيش مسخره حالتينده دئيير يه يه ائلمه. آرواد عصباني اولور. چئپيشه بير اوخلاو ويرير, اوخلاو پاپيشير چئپيشه, آرواددا اوخلاوا. آروادين ... توللانير آروادي قوجاقلاييرکي چئکسين چئپيشدن آرالاسين,... ياپيشير آروادا. او زامان آروادين قونشو آروادي باشيني يويوردي. قيزين يوللور بو آروادا کي بير يومورتا وئرسين باشيمي يويورام. قيز گئدير صحنه‌ني گؤرور. آرواد دئيير آي قيز تئز اول بو کيشيني چک داليا, تا قيز گلير کيشيني دالدان قوجاقلير. قيزدا ياپيشير کيشيه. او زامان قونشو آروادي کي قيز يوللاميشدي کي گلسين ايکي دانا يومورتا آلسين، قيز يوبانميشدي آرواد ياپيشدي قيزينا. قضادان همان زمان بير درويش قاپيلاردان کؤمک‌ليک ييغيردي کي ماجراني گؤرور کي بوردا بير نئچه نفر ياپيشيبدي بير- بيرينه. اما آخيرداکي بيرگؤزه‌ل خانيم دي. بو طرفه باخير او طرفه باخير گؤرورکي بيرکس يوخدي. گلير ياپيشير آروادين بدنينه. اما سيزه کيمنن دئييم ائو ييئه‌سي ايشدن گلير ائوه, ماجراني گؤرور, چوخ آرامليقلا اليني اوزونو يويور, چاريقلاريني چيخاردير, بير آز استراحت ائدير. سونرا دورور دهره‌ني گؤتورور دئيير حاخ چئپيشيم گوناهسيزلاري آت, گوناهليلاري توت. چئپيشيم چئپيش هاميني بوشلور, اما آروادي و .... ساخلير. درويش, قيز, قونشي آروادي قاچيرلار و اما کيشي بوردا دهره‌ني چئکير آروادي اويناشي قول – بود دوغرايير و اؤلدورور. وسايليني گؤتورور دئيير حاخ چئپيشيم و حوخ چئپيشيم مني بغدادا قوي چئپيشيم. بير آزدان سونرا کيشي گؤزونو آچير گؤرور بغداددا دير.
بولگه لر سرويسي:بيري وار ايدي، بيري يوخ ايدي. آللاهدان سوواي هئچ کيم يوخ ايدي. کي بير ار و آرواد بير ويلايتده ياشاييرديلار .