بولگه لر سرويسي:چيلله‌نين ان سويوق گئجه‌لريندن بيري ايدي. سئودا قارانليق اوتاغينين بوغلانميش پنجره‌سينين قيراغينداکي اوتراجاقدا اللريني قوينونا قويوب شهره زيللندي. ايتي باخيشلاري گئجه‌نين قارانليغيندا گيزلنميش توستولري ياريب کئچه بيلسئيدي ده، باش اوجوندا آي اولدوزو گؤره بيلمه‌دي. اونا گؤره ده باخيشلاريني يول بويونجا دوزولموش ائلئکتيريک ديرک‌لرينين ساري لامپالاريندان آدديم ـ آدديم سوزدوروب و اونلارين شهرينين يولوندا اولان سئوگيليسيني دوشونمگه باشلادي. شهرده سوکوتون پچيلتيسيندان باشقا بير سس گلميردي. سئودا دويغوسال بير انسان اولدوغو اوچون قلميني گؤتوروب و سئوگيليسي اوچون بير شعر يازدي: ائله بو آنلاردا تئرمينالا گيرن بير اوتوبوسون سسي شهرين سوکوتون و سئودانين جئب تئلفونونون مئساژ سسي اوتاغين سوکوتونو پوزدو.سئودا تلسيک جئب تئلفونوندا بير نئچه توش باساندان سونرا علي‌دن «جانيم! من تئرمينالا يئتيشديم»- مئساژيني اوخويوب، شوک وئريلميش کيمي آياغا قالخيب، بينانين اؤنونده ساخلانيلميش آرابايا دوغرو قاچيب، سئوگيليسيني ائوه گتيرمک ايسته‌دي. سئودا رولون آرخاسيندا اوتوراندان سئوگيليسي ايله نئجه قارشيلاشاجاغيني دوشونوردو. جانينا دوشموش استئرسدن نه ائده‌جه‌ييني بيلميردي؛ سانکي ال آياغي دونماق اوزه‌رينده‌يدي؛ آنجاق اؤزونو الده ساخلاسين دئيه، اؤز ـ اؤزونه بير شئيلر پيچيلداياراق آيريليغين ان سون آنلاريني آراباسيلا آياقلاييب کئچيردي. اوتوبوس تئرمينالدا داياناندان سونرا علي قارا اوورکوتونو اگنينه گئييب، قارا يون پاپاغيني باشينا قويوب، قولاقلارينا قده‌ر چکيب سوروجويه «اللرينه ساغليق»- دئييب، اوتوبوسدان ائنيب، همن سيقار قوتوسوندان بير گيله سيقار چيخاريب، اووجونون آراسيندا آليشديريب «سئوگيلي يوردوم»- دئيه، اليني تورپاغا سورتوب اؤپدو. سونرا سئودانين نومره‌سيني آرادي:– سئودا آلو! آلو، هارداسان جانيم منيم؟سئودانين ديلي سؤز توتار توتماز «جانيم بئش ـ اون ديقه‌دن سونرا يانيندايام»- دئدي.– «هله ليک جانيم !»- دئيه، علي تئلفونونو جئبينه سوخوب، سيقارئتيني پوکلاياراق آدديملاماغا باشلادي.گؤيلرين سينه‌سيني سؤکموش داغلارين سويوغو سانکي اونو شيلله‌له‌ميش کيمي بير نئچه آندا اوزلريني قيزارتدي، آما علي «سئوگيليم گلير»- دئيه، وئجينه آلماييب آدديملاماسينا داوام ائتدي. بو آندا ايکي اوچ تاکسي سوروجوسو اونا ياخينلاشيب هر بيريسي بير يئره چکيب «قارداش هارا گئديرسن؟»- دئيه، سورو وئرديلر. علي، «بوراخين! من هئچ يئره گئتميرم»- دئيه، دارتينيب اؤزونو اونلاردان خلاص ائتدي؛ آنجاق سوروجولردن بيريسي يئنه اونون قولوندان ياپيشيب دئدي: – قارداش واللاه بيزده چؤرک اسيرييک،ناراحات اولما گؤرورسن کي گئجه‌نين ياريسي بو سويوغدا ايتي ووراسان قالاغدان چيخماز، آما چاره‌ميز يوخدو. عاييله‌ميزين يانيندا اوزوموز قارا اولماسين دئيه گئجه-گوندوز ايشله‌ييريک. گل من سني آپارارام، آشاغي حئسابلارام.بو سؤزلري دئيه- دئيه سوروجونون گؤزلري دولدو. علي‌نين قولونو بوراخيب، اوزونو قارانليغين قوجاغيندا بوغولموش شهره ساري دؤنده‌ريب، داوام ائتدي:– آللاه بئله ياشاييشي کسسين. نه دير آخي؟! قيزيمين جئهيزيني دوزه‌لده بيلسه‌يديم بو چتينليکدن اوزوم قورتاراردي، آما يوخ بو آجي بيتمه‌ميش باشقاسينين باشلانماسينا امينم. ائله حياتدا بودور. “بيزلر يارالي يارانميشيق، ياشاييشدا يالنيز يارادان -يارايا داشينماقدير.سوروجو بو سؤزلري دئييب اللريني کتان شالوارينين جئبينه سوخوب، قيسا بويونو آياق بارماقلارينين اوستونه چکيب، درين بير آه چکدي. بو آندا علي آرخادان سوروجونون چيينلريني اؤفکه‌له‌يرک دئدي:– هاميميز فهله‌ييک عيني بير فهله؛سنين اللرين قاباردير منيم اوره‌گيم اونون بئيني؛هاميميز فهله‌ييک عيني بير فهله. سونرا اللريني جئبينه ساليب ايکي اللي مين تومنليک چيخاريب سوروجونون اووجونا باسدي. سوروجو پوللاري گؤردوکده اونون اليني قايتاريب، «قارداش من ديلنچي دئييلم، اوره گيم دولموشدو، اونون اوچون سنله دردلريمي پايلاشديم. ندنيني اؤزومده بيلمه‌ديم، آما چوخ اوره‌گيمه ياتدين»- دئدي.علي گوجله پولو سوروجونون اووجونا باساراق:– آ کيشي مگر ايندي دئمه‌دين قارداش؟– هه، دئديم.– باخما بيز بير ـ بيريميزي تانيميريق، آنجاق هئچ نه ده اولماسا وطنداش و ديلداشيق. اونسوز دا سن منه قارداش دئدين؛ من ده ايسته‌ييرم قارداشيما بير چاي پولو وئرم؛ کيمه نه؟!– آخي..– آخيسي زادي يوخدور. هله دئنن گؤرک آدين نه‌دير آي قارداش؟!– آديم «ياشار»دير – چوخدا گؤزل، ياشار قارداش سيقار چکيرسنمي؟ياشارين دوداقلارينا بير ياريمچيق گولوش قاچار قاچماز «ياشار سيقارسيز ياشايا بيلمز»- دئيه، علي‌دن سيقاري آليب، ايکي بارماغيلا علي‌نين چاخماغي توتان الينه ووروب سيقاريني آليشديردي. سونرا اونلاردان بير آز اويانليق اولان اوتراجاغا ساري يئريييب «قارداش گل بورادا اوتوراق!»- دئدي. علي ده سيقاريني آليشديريب اونون يانيندا اوتوردو. شهرين ياريسيني اونلارين اولدوغو يئردن گؤرمک اولوردو. خيياوانلارين سويوق دؤشلرينه ساچيلميش ائلئکتريک لامپالارينين ساريمتيل ايشيقلاري داريخديرجي بير اورتام ياراتسادا، اونلار بير_بيرايله تانيش اولماق اوچون سئوينيرديلر.ياشار «قارداش! هئچ من سنين آديني سورماديم!» دئدي.– آديم علي دير ياشار بونو ائشيتديکده علي دئييب بير آه چکيب سونرا سيقاريني دريندن پوکلاياراق دانيشماغا باشلادي:– منيم گنجليک چاغلاريمدا بير يولداشيم واريدي اونون دا آدي علي ايدي. گئجه – گوندوزلريميزي بيرگه کئچيررديک. جئبلريميزده بير شئي اولماسادا اوره‌کلريميزده سئوگي و بئينيميزده ساواش وار ايدي. نه چوخ گئجه‌لري شهرين ان قارانليق بوجاقلاريندا خياللاريميزدان دانيشيب “آکين” و “گونشي ايچنلرين تورکوسو”نو اوخويارديق، آنجاق بير گون آرادان يوخ اولدو؛ ائله بيل سو اولوب يئره هوپموشدو، نه عاييله‌سينين اوندان خبري وار ايدي، نه ده کي منيم. ياشار ياناقلاريندا قيروولانميش ياشلاريني ساغ الي ايله سيليب، يومروغونو دويونله‌ييب سينيرلي شکيلده داوام ائتدي:– آما بير نئچه آيدان سونرا تاپيلدي، يازيق ائله بيل همين آدام دئييلدي. دلي اولوب خيياوانلارا دوشموشدو. عاييله‌سينه ده بئله چاتديرميشديلار کي گونشه گئدنده باشينا هاوا گليبدي. سونرالار توختاياجاق، ايندي يئددي – سکگيز ايلدير حياتيني ده‌ييشيبدي، آنجاق گون اولماز او ايگيدي خاطيرلامايام. بو آخشام دا کي سن لاپ اونون خاطيره‌سيني جانلانديردين.علي آياغا قالخيب سيقاريني آياغينين آلتيندا سؤندوردوکدن سونرا گؤزلريني ياشارين گؤزلرينده دالغالانان دويغولاردان چکيب، قارداش بيز يورولانلاردان دئييليک؛ «گلجک بيزيمدير»- دئييب، اليني ياشارا ساري اوزاديب، «سنينله تانيش اولدوغوما چوخ سئوينديم؛ من گئتمه‌لييم»- دئيه اونلا ال وئريب، آرالاندي…
بولگه لر سرويسي:چيلله‌نين ان سويوق گئجه‌لريندن بيري ايدي. سئودا قارانليق اوتاغينين بوغلانميش پنجره‌سينين قيراغينداکي اوتراجاقدا اللريني قوينونا قويوب شهره زيللندي.