بولگه لر سرويسي: بيلمک اولماز ييغديقلارين اونلارا قيسمت اولاجاق، يا يوخ. يا دا بئله دئيه‌ک، اونلار سنين بو فداکارليغينا چاليشيب-چابالاماغينا لاييق اولاجاقلار، يا يوخ؟ اونوتما کي، يارادان هر کسين قيسمتيني اؤزو معين ائله‌يير، اؤزو وئرير. سن هئچ ناراحات اولما. بونلار اوچون ده بو گون سنين‌له قوشا آدديملايان اينسان‌لارين قيسمتينه، سون تيکه‌سينه گؤز تيکمه، أل اوزاتما! بئله گئتسه سن جرجه‌نک اولا بيلرسن!– آي آنا، او نه دئمکدي ائله؟ – نه قدر ده گولموشدو.– بير آز فيکيرلش، تاپارسان! – آناسي چوخ ناراحاتليقلا دانيشيردي.
– بير آياغين کندده صحرالانميش تورپاغين اوستونده، بير آياغين پا آوروپادا. آرادا قالان بدنين وضعيتي سنجه نئجه اولا بيلر؟ نه قدر دؤزه بيلر؟ بونون آدي نه‌دير؟
– گون‌آيدين، افنديم! – طب ايشچيسي‌‌نين بوغوق سسينه خيالي محاکيمه‌لريندن آيريلدي. يالنيز گؤزلريني چئويره بيلدي.سالاملاشماق ايسته‌دي. درديني سوروشماق ايسته‌دي… اونون اوزونه باخان قيز نه گؤردوسه گولله کيمي اوتاقدان چيخدي:– دوکتور! دوکتور! – سس سالوندا عکس-صدا وئريردي. آز سونرا بير اوردو حکيم اونو يئنه احاطه‌يه آلميشدي:– دئمک کي، ويروس اؤزونو تانيتماقدا، گؤسترمکده‌دير!
– ياني؟؟– گؤرمه‌ييرسيز، آدام قاراليب، چورومکده‌دير!– دئمک، بؤيله‌مي؟– ائوئت، افنديم!
– دوکتور، بو کي اؤلمه‌ميش، ديري، نئجه چورويور؟!– بيلميرم کي!– آنکارا-دان دوکتور »آکباش«ي دعوت ائتسک‌مي، افنديم؟آمريکادان يئني گلميش... بيلير بو خسته‌لييي.اولور، اولور. اوندا تئز اولون! - حکيم‌لر سورعتله گلديک‌لري کيمي، سورعتله ده گئتديلر. کيشي بو دفعه عمللي-باشلي »اؤلدو«و سونرا خيريلدايا-خيريلدايا يئنيدن »ديريلدي«. - يوخ، قوربت‌ده جان وئرمرم اؤلومه! بوردان چيخماق گرکدي! يوخسا اونو ديري-ديري باسديراجاقديلار! ايندي کيمه دئسين درديني، نئجه آنلاتسين وضعيتيني؟ اونو بوردان کيم چيخاردا بيلر؟ خئيلي فيکيرلشدي. اونون يئرينه، وظيفه‌سينه گؤز ديکن معاوينينه‌مي زنگ ائله‌سين؟ يا أل‌آتدان اونون عليهينه مطبوعاتا ماتئريال سيزديران، اونا کلک گلن شريکينه‌مي؟ يا ايشچي‌لريني اونا قارشي قويان آپارات رهبرينه؟ بلکه اونا ياخين اولان ناظيرلييه خبر وئرسين؟ يوخ، آلتميش بئش ياشين اوستونده‌دير. خسته اولدوغونو بيلسه‌لر درحال وظيفه‌دن چيخاراجاقلار. گويا کيمي‌سه تاپسا دانيشا بيله‌جک‌مي؟ يا عادي بير مئساژ يازماق گوجونده‌دي‌مي او؟ آمان آللاهيم، اينسان نئجه ده ضعيف مخلوق ايميش!! بير ويروسون الينده قالان دونيا!! سن نئجه ده قورخاق و عاجيزسن!!
گؤزله‌مکدن باشقا چاره‌سي يوخ ايدي. دريندن نفس آليب گؤزلريني يومدو. دئيرلر، شاهلار، پاشالار قورخو آلتيندا ساخلايان، اونلارا قان اوددوران، يئددي مين يئددي يوز يئتميش يئددي دليسي ايله مئيدان سولايان کوراوغلو ايکي دفعه عاجيز دوروما دوشوب، دونيانين أليني اوزوب، اؤلمک ايسته‌ييب. بير دفعه کئچل حمزه اونو آلداديب، قولو-قانادي اولان قيرآت-يني اليندن آلاندا، اؤزونو ده دييرمانين کونجونده تک قوياندا. هئچ هارا، هئچ نه‌يه ألي يئتمه‌ين کوراوغلو »چونکي اولدون دييرمانچي، چاغير گلسين دن، کوراوغلو!« – دئيرک يالنيز اوخوماقلا اؤز-اؤزونه تسکين‌ليک وئريب. بير دفعه ده اودلو سيلاحي ايلک دفعه گؤرنده. قارشي-قارشييا قيلينج‌لا مردجه‌سينه دؤيوشن ايگيد کولون داليندان ايسته‌نيلن نامردين بير گولله ايله اونو اؤلدوره‌جه‌ييني آغلينا سيغيشديرا بيلمه‌ينده… دئييلنه گؤره، کوراوغلو الينده سيلاحي اولان آدام‌ين اوستونه قيشقيريرميش کي، او سيلاحنان مني وور! کيشي ده يالواريرمش کي، سن نه دانيشيرسان، او سني اؤلدوره بيلر!– اولا بيلمز. او بير قيريق دمير پارچاسي کوراوغلونو اؤلدوره بيلمز! سن بير هله وور گؤروم!آخيردا علاج‌سيز قالان کيشي، – باخ، بو اينه‌يي وورورام، اؤلسه جريمه‌سي سن‌ليکدير، دئيير. کوراوغلو صبرسيزليکله راضي‌لاشير. کيشي اينه‌يه بير گولله وورور. اينه‌يين يئره ييخيليب چاالاديغيني گؤرن کوراوغلو دونيانين چوخ ده‌ييشديييني، داها اونون کيمي قولوگوجلو قهرمان‌لارا احتياجين قالماديغيني آنلايير.قاريشيق سس‌لره گؤزونو آچدي. حکيم يئنه اونو دؤوره‌يه آلميشدي. ايلاهي، ايري گؤزلوک‌لرين آلتيندان اونا ائله باخيرديلار، ائله بيل زوپارکا (باغ‌وحش) ايندييه کيمي گؤرونمه‌ميش جانلي گتيرميشديلر! دئمک، اونون آخيري چاتيب! کيمسه اونو تانيمير، کيم اولدوغونو بيلمير. يقين کي، اوستونده ميلچک کيمي، دووشان، ياراسا (خفاش)? سيچان کيمي تجروبه آپاراجاق‌لار، سونرا دا بير دري‌نين ديبينه باسديراجاقلار… نه واختسا آروادي کمادان آييلسا، اوغلو حبس‌خانادان چيخسا، باکي‌يا گله بيلسه، قيزي دا شرکتي ترک ائله‌ييب نورمال حياتا قاييدا بيلسه… اونو آختاريشا وئره‌جکلر… والسلام!..
– افنديم، تجروبه‌لي حکيم خسته‌نين اوزونه، رنگينه باخان کيمي هاراسي‌نين خسته اولدوغونو بيلمه‌لي‌دير!– دوکتور، بيز اونون اوزونه‌مي، رنگينه‌مي باخديق؟ بوراسي بير قرنطينه!!
– اولسون قرنطينه. گؤرورسوز کي، بو آدام ترپنه بيلمير، دانيشا بيلمير، فيکيرلشمه‌ديز بونون باشقا بير خسته‌لييي اولا بيلر؟ خسته‌ليک تکجه ويروس‌دان‌مي عيبارت‌دير؟– افنديم، قصورا باخمايين، دوشونه‌مه‌ديک… دوشونمه‌يه بئله زامانيميز اولمادي…...– دئيين کي، قورخدوق! هئچ اونون يانينا دا گئتمه‌ديک! نه اولوب؟ بو طاعون-دومو، وبا-دي‌مي؟ اورتا عصرلردي‌مي؟ بو قدر طب‌ين، طب آلت‌لرينين اولدوغو، اينکيشاف ائتدييي زاماندا ياشاييريق! آخي دئييب کي، بو عادي گريپ‌ين يئني نؤوعو! دئمک، اول‌کي معالجه‌نين ايکي‌قاتيني آپاراجاغيق، ياناشي خسته‌ليک‌لريني ده معالجه‌سيني تشکيل ائتمک شرطي ايله. ايندي ايسه درحال عملياتا حاضيرلايين. بو، قلب کريزي (حمله قلبي) کئچيريب. غفيل اؤلوم‌لرين دوخسان بئش فايزيني تشکيل ائدن اورک دامارلاريني قان لاختاسي ايله توتولماسي. شانسلي آدامميش کي، ساغ قاليب.بئشينجي_بؤلوم حکيم‌ين خوش، اورکلي، آرخايين دانيشيغي ماليک-ي خئيلي ساکيت‌لشديردي، ايچدن جانلانديردي. دئمک، گؤزله‌ديک‌لري حکيم آذربايجانلي ايميش. بو حکيم‌ين سسي اونا يامان تانيش گليردي... سليس (روان)? آيدين، اؤزونه- اؤزونه ايناملي، آرتيق سؤز ايشلتمه‌دن، توکنمز انرژيسي، دقيق دانيشيغي ايله هارداسا يادداشيندا ايليشيب قالميشدي. هه-هه... او ايدي! اون ايل بوندان قاباق... هانسي‌سا رايون خسته‌خاناسيندا حکيم ايشله‌ييردي. دئييلدييينه گؤره، طب اونيوئرسيته‌سيني آنکارادا بيتيرميشدي.
تعميردن سونرا خسته‌خانانين – تشخيص مرکزي‌نين آچيليشيندا اونلار دا ايشتراک ائديرديلر. مرکزه ده‌يري اون مين‌لرله اؤلچولن يئني مودئل آپارات تشخيصي هديه ائديلميشدي. بو جيهازدان هله شهر خسته‌خانالارينين چوخوندا يوخ ايدي… آما بيز نه ائتديک؟ باکي‌يا قاييداندان اوچ گون سونرا خسته‌خانا قارشيسندا شرط قويدو کي، يا جيهازين (وسايل) پولونو ييغيب وئرسين‌لر، يا دا اؤزونو قاييتارسينلار. اوندا بو جاوان حکيم ناظيرليييه گلميشدي. دانيشيردي کي، او پولون وئريلمه‌سي رايون حکيم‌لري‌نين گوجو خاريجينده‌دير. بو مومکون دئييل. هم ده آخي بو بيزه هديه‌دير… جيهازي ال‌لريندن آلسالار مسئله بؤيويه‌جک، خبر يوخاري‌لارا دا چاتاجاق. »باجاريرسان، گئت، چاتدير!«، – هده‌لي جاوابيني وئرديلر. او گون سونرا آپاراتي باکي‌يا قاييتاريب اؤزل کلينيک لردن بيرينه ساتديلار! بو آزمايش کيمي سونرا بو حکيم‌ين اؤزونو ده باشچي‌نين ألي‌يله ايشدن چيخارتديلار.باخ، بئله! ايشدن چيخاندان سونرا، گؤرونور، آنکارايا قاييديب… اوردا ايشله‌ييب، آمريکايا تجروبه‌يه گئديب… حتتا سوي‌آديني دا ده‌ييشيب – آکباش… تورکيه‌ده مشهور آدلارداندي… يقين کي، اونون سئودييي حکيم‌ين – اوستادي‌نين سوي‌آدي اولوب.
کيشي تزه‌دن اؤلوب، اؤلوب… ديريلدي… اگر حکيم اونو تانيسا قتلينه فرمان وئره‌جک!.. آللاهيم، بو نه بلادي، امتحاندي، جزاءدي او چکير؟ ايل‌لرنن بوينونا ييغديغي، يوکله‌دييي گوناهلارين جزاءسيني بو اون دؤرد گونده‌مي چکمه‌لي‌دير؟! ؟يوخ… حکيم اونون کيم اولدوغونو، هاردان گلديييني بئله سوروشمادي. بو دفعه ده کيشي خجالتيندن اؤلوب… ديريلدي. اونون سسينده‌کي دوغماليق، شيرين‌ليک، ايستي‌ليک، حيات‌سئورليک ماليک-ه ده سيرايت ائله‌ميشدي. داها اؤلوم حاققيندا دوشونموردو.
– تئز اولون، واختي هدره وئرمه‌يه‌ليم. زامانيميز يوخ. – تورک حکيمي ده جانلانميشدي. يانينداکي‌لارا گؤستريش وئريردي.
***
…گؤزلريني آچاندا اؤزونو گؤي‌لرين يئددينجي قاتيندا حيسس ائلدي. بؤيوک، گئنيش، ياراشيقلي پنجره‌دن پالاتايا (بخش) ياز گونشي‌نين ايليق، سيجاق شعاع‌لاري شفق سپيردي. شهر اوندان آشاغيدا خفيف دومانا بورونموشدو. أل ايچي کيمي تميز، آيدين گؤرونوردو. گؤره‌سن بو خسته‌خانا نئچه قات‌دان، مرتبه‌دن عيبارت ايدي؟ آخير کي!.. عملياتدان، دئمک کي، ساغ-سالامات چيخيب! بو گون‌لرده او نئچه دفعه اؤلوب، ديريليب… داها اؤلوم اوندان چوخ-چوخ اوزاقلاردا قاليب! او کفني ياريب، جيريب، چيخيب!!!.. گونش گئتديکجه گؤزلرينده بؤيويوردو… ايشيغي-شفقي ايله، ايستي‌لييي- حرارتي ايله…...ياخشي اينسان‌لار دا، دوغرودان-دوغرويا، گونش کيمي‌يدي! هئچ کيمدن ايشيغيني، ايستي‌سيني، محبتيني أسيرگه‌مير…...
بوتون بونلارا رغمن، ماليک-ين اوره‌‌يينده، ويجدانيندا بير سيزيلتي، حوزون ده واردي… هردن سانکي او، بوشلوغا دوشوب چيخيردي.. سون