آنجاق امامزادانين حيه‌طي، هم ده اونون قيراغيندا دوشن خاراباليق، بيز مدرسه اوشاقلاري اوچون،گؤزل بير فوتبال مئيداني ايدي. مدرسه‌دن ائوه قاييتديغيميز زامان، اورادا فوتبال اويناماغي اؤزوموزه بورج بيلرديک و بورجوموزو اؤده‌مه‌ميش ائوه دؤنمزديک. هم ده هردن بير امامزادانين ايچري‌سينه باش ووروب، اورادا احسان ائديلن پنير چؤره‌ک ايله حالوا بلله‌لريني، اورايا گلن آروادلاردان آليب، جانيميزا قوّت ائد‌رديک. امامزادانين ايچريسي چوخ دينج وايلنمه لي بير يئر ‌ايدي. بونو، فوتبالدان يورغون-آرغين دوشوب، قان تري‌نين ايچينده، اؤزوموزو ايچري سالاندا، هم ده باشماق‌لاريميزي،کيف-کيتابلاريميز‌لا برابر، قيراغيميزا قويوب، دادلي- دوزلو احسانلاري، نذر پايلايان خانيم‌لاردان آليب، يئدييميز، ايلندييميز زامان آنلاميشديم. آنجاق امامزادانين آيري صفالي زادلاري دا وار ايدي. ديلنچي‌لر، فالچي‌لار، هم ده امامزادانين هنده‌ورينده يئره دوشن مکتوبلار و يا کاغيذ پارچالاري. بيرينجي دؤنه يئردن گؤتوروب، چوخ چتين‌ليکله اوخودوغوم بو کاغيذلارين بيريندن هئچ نه آنلاماديم. اوندا سکگيز ياشيم وار ايدي. مکتوبدا بئله بير سؤزلر يازيلميشدي: »فلان کسي يوخودا گؤردوم. دئدي: هر کس بو کاغيذي سيد ابراهيمدا تاپديقدان سونرا، اونون اوستوندن يئددي دؤنه يازيب، باشقالاري‌نين آراسيندا پايلاماسا، يئددي گون قورتولمادان، درماني بيلينمه‌ين بير بلايا اوغراييب، دونيادان کؤچر. قورخون و بو مکتوبو يئددي دؤنه يازين و پايلايين«. سونرالار و يوخاري کيلاسلارا گئتديکجه، باشقا مکتوبلار دا تاپيب، اوخودوم. مکتوبلارين‌هامي‌سي‌نين مضمونلاري بير ايدي. آنجاق يوخويا گلن‌لر، اوستوندن يازيلان کاغيدلارين سايي، يايماغين کيفيتي، بلانين نؤوعو، دونيادان کؤچمه‌نين يا بلانين نه جور تعيين اولونماسي و مکتوبون قيسا يا اوزون اولدوغو فرقلي ‌ايديلر. اوچونجو کيلاسدا‌ ايديم. بير گونو ياز ايدي. مدرسه، آخشام ساعات دؤرد ياريمدا باغلانميشدي،گون باتانا قده‌ر، اويناماغا واختيميز وار ايدي. خاراباليقدا قيزغين بير فوتبال اويونو باشلانميشدي. کيف‌لريميز ايله دروازا دوزلده‌رک، ايکي قاتلي بير توپون داليسينجا اويان- بويانا قاچيرديق. صوراتلاريميز قيپ- قيرميزي و لب- لبي کيمي‌اولموشدور… لاپ کئفين جؤوهرين چکيرديک. هاوا قارانليقلاشماغا باشلاميشدي، بيز ايسه يورولماغا؛ بوندان علاوه آجالميشديق دا. مدرسه‌دن گلدييميز زامان، اللرينده ايچري‌يه احسان آپاران خانيم‌لاري گؤرموشدوک… ائله اونا گؤره فوتبالا سون قويدوق و امامزادانين ايچري‌سينه گئتديک. يئنه ده امامزادانين ايچري‌سينده اولان سرين‌هاوا، ايليق و اوره‌يه ياتان ايدي. بو سرينلييي، بير خانيمين پايلاديغي سرين هئيوا شربتي، داها دا آرتيردي. بير باشقا خانيم دا پنير چؤره‌ک تيکه‌سي احسان ائتدي: هم ايچديم، هم ده يئديم… سونرا ايسه باشماق‌لاريمي،کيفيم ايله برابر، باشيمين آلتينا قويوب، دووارين قيراغيندا اوزانديم…

بير آز سونرا،ياري آييق، ياري ياتميش حاليندا، يئنه ده دووار قيراغينا دوشن بير کاغيذ تاپديم. ائله اوجور اوزاناقلي، اونو اوخودوم. آز- چوخ اوخوماقدا باجاريق تاپميشديم و داها ياخشي اوخويا بيليرديم: »امامزادا ياتماق يئري دئييل. بونو بيلين، آنلايين و‌هامييا دئيين. هر کس بو مکتوبو اوخويا و اوزوندن يوز دفعه يازيب، باشقالاري‌نين آراسيندا پايلاماسا، يئددي گون قورتولمادان، درماني بيلينمه‌ين بير بلايا اوغراييب، دونيادان کؤچر يا دا کي اونا آغير بير ضربه ده‌ير. قورخون و بو مکتوبو يوز دؤنه يازين و پايلايين. بو سؤزلري، فلان کس ده، اونو يوخودا گؤردويوم زامان، تأييد ائتميشدي… بو سيزين قضا و قدرينيزدير.« اوزانديغيم يئردن ديک دوردوم و اوتوردوم… امامزادا دا ياتميشديم. باشماقلاريملا-کيتابيمي‌گؤتوردوم و امامزادانين حيه‌طينه چيخديم.

هاوا قارانليقلاشميشدي و اذان واختي چاتميشدير. کاغيذ هله‌ده اليمده ايدي. »يوز دفعه اوستوندن يازمالييام«‌؛ اؤز-اؤزومله دوشوندوم و قورخو جانيما دوشدو:»يازماسام، يئددي گون قورتولمادان…«؛ داها دا آرتيق، قورخو جانيمي‌بورودو. »بو منيم قضا و قدريم‌دير«؛ داها بونو آنلاماديم. بير داها کاغيذي آچيب، اوستوندن اوخودوم؛ دوز ايدي: »بو سيزين قضا و قدرينيز‌دير…« مدرسه‌نين سون زنگي‌نين چالينماسيندان و امامزادايا گلدييم زاماندان، بير ساعاتدان آرتيق کئچميشدير. گئجيکميشديم و يقين کي ائوده مني گؤزله‌ينلر، خصوصيله آنام، نيگرانچيليقدا ايديلر. ائله اونا گؤره قاچماغا باشلاديم. مدرسه‌م آتامين دوکانينا ياخين اولماسينا باخماياراق، ائويميزله فاصيله‌لي‌ايدي. سيد ابراهيمدان، راسته‌کوچه‌يه گئتمه‌لي و بو آرادا چاي‌قيراغي و کؤرپو اوستوندن ده کئچمه‌لي‌ايديم. سيد ابراهيمدان، دوه‌چي بازارچاسينا، اورادان چاي قيراغينا و سونرا کؤرپونون اوستونه چاتماغيمي، هئچ نه آنلاماديم و بير آندا اؤزومو دوز کؤرپونون اورتاسيندا گؤردوم. قضا و قدر کاغيذي هله‌ده اليمده‌ ايدي.

بير داها کاغيذي آچيب، يازييا باخديم: »بو سيزين قضا وقدرينيز‌دير…«. اووجومون ايچينده قالميش و تر ايله ايسلانميش کاغيذي آتديم چايين اورتاسينا و باهار ياغيشلاريندان دوزه‌نيلن آخار چايين سويو، اونو گؤتوردو، اؤزو ايله آپاردي… بير نئچه دقيقه سونرا، ائوده‌ايديم. گئجه ياتانا قدر، قضا و قدر کاغيذي، مني بوراخميردي. يئددي گون سونرا، آخشام باشي امامزادايا باش وورمادان، بيرباشا مدرسه‌دن ائوه دؤندوکده، يئنه کؤرپونون اوستونده دايانديم و آخار سويا گؤز تيکديم. ائله بيل سو ايله دانيشيرديم. قضا وقدر کاغيذي و يئددي گونو خاطيرلاديرديم و اؤز- اؤزومله گولومسه‌نيرديم. بيردن- بيره گؤزوم قارالدي و اليمده اولان مدرسه کيفيم،کؤرپونون اوستوندن تولازلاندي و دوز سويون اورتاسينا دوشدو. چايين سويو، سرعتله گئتمکده ايدي. کؤرپونون قيراغيندا بير داش پيلله‌کان وار ايدي. قاچا- قاچا اؤزومو اورايا چاتديرديم و بير گؤز قيرپيميندا، چايين ايچينه گيرديم. کيفيم سويون ايچينده اوزه- اوزه گئتمکده‌ايدي؛ من ايسه سويون قيراغيندا،کيفيمي‌گؤزوم ايله ايزله‌يه‌رک، قاچماقدا. سو آخيردي،کيف گئديردي، من قاچيرديم. سو چايين اورتاسيندان گئديردي، اويان- بوياني ايسه داشلي- تورپاقلي بير يول‌ايدي. من ده سولداکي يولدان گونشه ساري قاچيرديم… بير آندا آياغيم بودره‌دي و يئره ييخيلديم. بير داها قالخديم، آنجاق يئنه ده ييخيلديم. نئچه نفر مدرسه اوشاغي، هم ده بؤيوکلو- کيچيکلي، آداملار، منيم آرخامجا قاچيرديلار. ائله بيل اونلار،کيفيمي‌توتماق اوچون، منيم قاچماغيمي‌گؤرموش، چايين ايچينه دوشموشدولر… گليب منه چاتديلار،آنجاق مني دينديرمه‌دن،گئتديلر… دئمک، اونلار منيم کيفيمي‌سودان توتماق ايسته‌ييرديلر. اونلار گليب، مندن اوزاقلاشديقدان سونرا، داها هوشدان گئتديم… بير- ايکي ساعات سونرا ائوده‌ ايديم. آتامين دوستلاري مني تانيميش، چايين ايچيندن چيخارتميش، ائوه گتيرميشديلر. 

دئمه‌لي هوشدان گئتمه‌ميشديم و تکجه يورغون اولدوغوم اوچون، حالدان گئتميشديم. کيفيمي‌ده کؤرپودن بير آز قاباقليق، مدرسه اوشاقلاري سودان توتموش، ائويميزه گتيرميشديلر. آنام منه يئر سالميشدي. يورغان- دؤشکده، خانلار کيمي‌ياتميشديم. باهار اولدوغونا گؤره، منه سويوق ديمه‌ميشدي. تکجه يورولوب، قورخموشدوم. داها ياواش- ياواش دينجلمکده‌ايديم و آنام، دفتر-کيتابلاريمي، کيفين ايچيندن چيخارديب، قوروتماقدا‌ ايدي. اؤز- اؤزو ايله ده دانيشيردي و مني، شولوق اولدوغوما گؤره دانلاييردي. دفترله کيتابلاري بير- بير کيفدن چيخاردير، الي ايله صافلايير و فرشين آلتينا قويوردو. آنام، آز – چوخ اوخوماق باجاراردي، ائله اونا گؤره کيتابلارين و دفترلرين اوستونه يازيلان آدلاريني اوخويا بيليردي. داها من يئريمين ايچينده اوزانميشديم و تکجه آنامين سسيني ائشيديرديم. بير آز سونرا، آنام دئدي: »بو نمنه‌دي؟!« سونرا ايسه، قيريق- قيريق و کلمه‌لري بير-بيرلرينه ياپيشديرا- ياپيشديرا، اوخوماغا باشلادي: »امامزادا ياتماق يئري دئييل…« ائله بيل يوخو گؤروردوم. آنام اوخويوردو. من ايسه گؤزلريمي‌يوماراق، يئريمين ايچينده قويلانماقدا‌ ايديم. داها آنام يازي‌نين سون جمله‌لرينه چاتميشدي: »… بو سيزين قضا و قدرينيز‌دير…«قضا و قدر سؤزونو ائشيده‌رک، اؤزومو يورغان- دؤشکده گؤره‌رک، اوتاغين تاوانيندا گؤيلره اوچوردوم… گؤيلره.