بولگه لر سرويسي:من بير آغاجام، چوخ يالقيزام، ياغيش ياغديقجا آغلاييرام. سيز آللهي بو دانيشاجاقلاريما قولاق وئرين. قهوه‌لرينيزي ايچين، يوخونوز قاچسين. گوزلرينيز آچيلسين، منه جين کيمي باخين. سيزه نه اوچون بو قدر يالقيز اولدوغومو سؤيله‌ييم. ?-استاد نقالين آرخاسيندا آغاج رسمي اولسون دئيه جيلاسيز قالين کاغيذدا نئجه گلدي رسم ائديلدييمي سويله‌ييرديلر. دوغرودو. ايندي يانيمدا نه باشقا کيچيک آغاجلار، نه ده يئدي يارپاقلي چؤل اوتلاري، نه ده بعضا شيطانا و اينسانا بنزه‌ين قات- قات قارا قايالار، نه ده گؤيده قيوريم – قيوريم چين بولوتلاري وار. بير يئر، بير گوي، بير من، بيرده اوفوق خطي. آمما حئکايه‌م داها دا دولاشيقدير. ?- بير آغاج کيمي ايلاهدا بير کيتابين بير پارچاسي اولماغيم شرط دئييل. آمما آغاج رسمي تک هر هانسي کيتابين صحيفه‌سي اولماغيمدان خوشوم گلمير. بير کيتابدا بير شئي گوسترميرمسه، بوت پرستلر و کافيرلر ساياغي رسميمين ديواردان آسيليب منه سجده ائديليب، سيتاييش اولوناجاغي آغليما گلير. ارزروملو اوستالا ائشيتمه‌سين، بونونلا گيزليجه اؤيونورم و سونرا اوتانيب چوخ قورخورام.?-يالقيزليغيمين اصيل سببي ايسه هانسي حئکايه‌نين پارچاسي اولدوغومو منده بيلمه‌مه‌ييمدير. بير حئکايه‌نين پارچاسي اولاجاغام، آمما بير يارپاق کيمي اورادان دوشدوم، اونو آنلاييرام. بير حئکايه‌نين پارچاسي اولاجاقايديم، آمما اورادان يارپاق کيمي دوشدوم. اونو دانيشيم:آغاجدان دوشن يارپاق کيميحئکايه‌مدن دوشمه‌نين حئکايه‌سي. ايرانين شاهي، شاه طهماسب صفوي، کي هم عثمانلي‌نين بؤيوک دوشمني ايدي، همده جهانين، نقاشليغي سئون پادشاهي ايدي، بوندان قيرخ ايل قاباق قوجاليب، عاغليني ايتيرمه‌يه باشلارکن هر شئيدن اول ايلنجه اوستالارينين گؤستريشي ايله عثمانلي‌نين عسگرلريندن اوزاق اولسون دئيه پايتختيني تبريزدن قزوينه کؤچورتدو.. داهادا قوجالارکن بير گون جين وورماسيلا بحرانا دوچار اولوب شارابدان، اوشاقبازليقدان و نقاشليقدان توبه ائلهدي کي بو پادشاهين قهوه ذوقوندان سونرا عاغيليني ايتيرديينه ياخشي بير دليلدير. بئله‌جه، ييرمي ايلدير تبريزده، جهانين ان بؤيوک و فوق‌العاده معجزه ائدن صحافلار(جيلدچيلر)، خطاطلار و تذهيب‌کارلار و نقاشلار قوش بالالاري کيمي شهر- شهر داغيلديلار. بونلارين ان استعدادليلاريني، شاه طهماسيبين داييسي اوغلو و دامادي سلطان ابراهيم ميرزه، والي اولدوغو مشهد شهرينه چاغيردي و اونلاري نقاشخاناسينا يئرلشديريب، تيمور زامانيندا هراتدا ان بؤيوک شاعير اولان جامي‌نين «هفت اورنگ»نين، يئدي مثنوي‌سينيني يازديريب، ناخيشلي رسيملي ميثيلسيز بير کيتاب حاضيرلاماغا باشلادي. عاغيلي و هوشلي دايي اوغلونو هم سئون و همده قيسقانان، قيزيني اونا وئرديي ايچون پئشمانليق چکن شاه طهماسيب بو معجيزه کيتابي ائشيدن کيمي خسته‌لندي و عصبانيتله داييسي اوغلونو مشهد ويلايتيندن قائن شهرينه، سونرا ايسه، کيچيک سبزوار شهرينه سورگون ائتدي.مشهدده کي خطاطلار و نقاشلار دا بئله‌جه باشقا شهرلره باشقا مملکت‌لره، باشقا سلطانلارين، شهزاده‌لرين نقاشخانالارينا داغيلديلار.امما بير معجيزه‌يله سلطان ابراهيم ميرزه‌نين ميثيلسيز کيتابي ياريدا قالمادي. چونکي حقيقي بير کيتابداري واريدي. بو آدام آتينا مينر ان ياخشي تذهيب‌کار اوستاد اوردادير – دئيه شيرازا گئدير، اورادان ان ظريف نستعليق خطي يازان خطاط ايچون، ايکي صحيفه آلير اصفهانا گؤتورور، سونرا داغلاري کئچيب بخارايا چاتيب اوزبک خاني‌نين يانيندا ناخيش ووران بؤيوک اوستاد نقاشا رسمين ترتيبيني دئيير. آداملاريني جيزديرير. هراتا ائنيب بو سفر ياري کور قديم اوستادلاردان بيرينه اوتلارين و يارپاقلارين قيوريم – قيوريم قيوريلشيني ازبردن نقش ائتديرير، هراتدا باشقا بير خطاطا باش وورور رسمين ايچينده کي قاپينين اوستونده کي لوحه ده کي يازيني آلتين يازديريب يئنه قاين شهرينه گئدير و آلتي آي يولچولوق ائده‌رک يارييا قدر يازديرديغي صحيفه‌لري سولطان ابراهيم ميرزه يه گؤستريب آفرين آليردي. بو گئديشله کيتابين هئچ قورتارماغيني آنلاديلار و تاتار قاصيد‌لر توتدولار. هر بيرينين الينه، اوزرينه ايسلانيب يازيلاجاق صحيفه‌يله بيرليکده صنعتچي‌يه ايسته‌نيلن شئي تعريف ائده‌ن بير مکتوب وئرديلر. بويله‌جه بوتون عجم اؤلکه‌سينين، خراسانين، اوزبک مملکتينين، ماوراءالنهرين يوللاريندان کيتاب صحيفه‌لريني داشيان قاصيدلرکئچدي. قاصيد‌لر کيمي کيتابين حاضيرلانماسي دا سورعتلندي. بعضا اللي دوققوزونو يارپاقلا يوز آلتميش ايکينجي يارپاق قارلي بير گئجه قورد اولامالارينين ائشيديلديگي بير کاروانسارا دا قارشيلاشير، دوستلوقلا صوحبت ائدرکن عيني کيتاب اوچون چاليشديقلاريني آنلاييب، بير کيتاب اوچون گتيرديکلري صحيفه‌لرين هانسي مثنوي‌نين هانسي طرفينه دوشدوييني، بير بيرلرينه گورا يئرلريني آنلاماغا چاليشيرلاردي.بوگون بيتيريلديگيني کدرله ائشيتدييم بو کيتابين بير صفخه‌سينده ده من اولاجاغديم. نه يازيق کي سويوق بير قيش گونو مني آپارارکن، قاياليق کنچيدلردن کئچن تاتار قاصيدين يولونو حرامي‌لر کسدي. زاواللي تاتاري اولّجه دؤودولر سونرا سويدولار، ناموسونا توخوندولار، غدارجاسينا اؤلدوردولر. بونا گؤره من هانسي صحيفه‌دن دوشدوگومو بيلميرم. سيزده ن خاهيش ائديرم منه باخيب دئيين: گؤره‌سن ليلا چاديريندا چوبان قيليغيندا زيارت ائده‌ن مجنونا مانع اولاجاقديم ؟ اوميدسيز اينامسيزين روحونداکي قارانليغي باشا سالماقدان اؤترو، گئجه‌نين ايچينه قاريشاجاقديم ؟ بوتون جهاندان کئچيب، دنيزلر آشيب، قوشلار، ميوه‌لرله دولو بير آدادا دينجه‌لن ايکي سئوگيلينين سعادت سئوينجه شاهيد اولماق ايسترديم.! هيندي فتح ائدرکن باشينا گون ووروب گونلرجه بورنو قانايا – قانايا اؤلن اسکندرين سون آنلارينا کؤلگه اولماق ايسترديم. يوخسا اوغلونا عشق و حيات نصيحتلري وئرن آتانين گوجونوو ياشيني نيشان وئرمه‌يه ياراياجاقديم ؟
بولگه لر سرويسي:من بير آغاجام، چوخ يالقيزام، ياغيش ياغديقجا آغلاييرام. سيز آللهي بو دانيشاجاقلاريما قولاق وئرين. قهوه‌لرينيزي ايچين، يوخونوز قاچسين. گوزلرينيز آچيلسين، منه جين کيمي باخين. سيزه نه اوچون بو قدر يالقيز اولدوغومو سؤيله‌ييم.