هانسي روزگار اونو گتيريب بورا آتميشدي
1398/11/21
بولگه لر سرويسي: اؤلوسونو آستاجا يئردن گؤتوروب، چؤرک سبدينه قوْيدوم، ائوه گتيريم. ساغ- سوْلوم، آشاغي- يوخاري ضد- شورش پوْليسي ايله دوْلو اولسايدي بئله، اؤلوسونو يئرده بوراخاسي دئييلديم. اؤزوندن علاوه اينجه قانادلارينين رنگلرينه گؤره اونون اؤلوسوندن واز کئچه بيلمزديم.
هانسي روزگار اونو گتيريب بورا آتميشدي، بللي دئييلدي. پيادا يولوندا، کوْرلار اوچون دوزولموش ساري موزاييک دؤشه‌مه‌نين اوستونده بؤيرو اوسته دوشموشدو. بونا باخماياراق کوْرلار رنگين نه اولدوغوندان باش تاپميرلار. رنگ اؤلونو ده ديري کيمي‌گؤزه گتيرر. آنجاق رنگلي قانادلارينين آلتيندان کؤلگه‌سي موزاييکين اوستونه سَريلميشدي. قانادلارينين قرينه قهوه‌يي خاللاري ساري موزاييک اوستونده او قدر گؤزل گؤرونوردو کي، اوّلده اونون اؤلموش اولدوغونا بر‌خود اولماديم. دئديم بلکه بو کپنک ده تبريز جماعتي کيمي‌ضدشورش پوْليسيني گؤردوکده چاشيب، ساري موزاييکي گونه‌باخانلا ده‌ييشيک توتوب. اؤز فيکريمه گولمه‌ييم توتدو، آمما گولمه‌ديم. اؤز- اؤزومه دئديم: «بيردن پوْليس‌لره ائله گلر کي، من ده عصيانچيلارين بيريسي‌يم، اونلارين روبوت کيمي‌شوشه قالخانلارينين داليندا قارد توتدوقلارينا باخيب، گولورم». دوزدو کي گولوش عصيان آنلاميندا دئييل، آمما‌هانسي عاغيللي آدام تپه‌دن ديرناغا سيلاحا بورونموش پوْليسين اؤنونده گولر کي، من ده گولوم! هله بيلسه‌يديلر چؤرک آلماق ماهاناسيله زنبيلي قولوما ساليب، ايکي کند مسافه‌سينده يول گلميشم ياخيندان اونلارا تاماشا ائله‌ييم، …يوخ!… آللاه گؤسترمه‌سين او گونو! من کي بير کاره دئييلم. ژورناليستم؟ يوخ! يازيچي‌يام؟ يوخ! ايشچي‌يَم؟ يوخ! دانشجويام؟ يوخ!… بس، دوستاق‌هارا، من‌هارا؟… ايللر اؤنجه تقاعد اولموش کارمندين بيريسي‌يم. تاماشادان سونرا أليمدن نه ايش گلر کي!؟
آياغيم آلتينا باخماسايديم قبريستاندا قبيرلري آياقلاييب کئچن کيمي‌اونو دا آياقلاييب کئچميشديم. فيکريم پوْليس‌لرده اولسايدي دا، آنجاق گؤزوم يئرده‌يدي. يوخسا اونون اينجه قانادلاري آياغيم آلتدا اوغولوب، دؤشه‌مه‌نين اوستونه ياييلاجاق ايدي. گؤرمک همن دايانديم. بيليرم، بو هنگامه‌ده بيردن- بيره پيادا يولونون اورتاسيندا دايانماق پوْليس‌لرين ديققتيني چکمه‌ميش اولماز. ايسته‌ديم أييليب اؤلونو يئردن گؤتوروم، سونرا اؤز- اؤزمه دوشوندوم يئره أييلسم، پوْليس‌لر ظنّ ائدرلر أييليب يئردن داش گؤتورورم. آمما بورا تبريزدي، فلسطين دئييل کي من ده انتفاضه ساواشي اوچون يئردن داش گؤتوروب پوْليسه ساري توللاييم. اوسته‌ليک، مَه‌يَر پوْليس کيمدي کي؟ اونلار دا ائله منيم کيمي‌آنالارين اوغوللاريديلار دااا. يقين کي، تقاعد اولموش ياشلي‌لارلا ايشلري اولماز.
ساغ- سوْلوما باخديم. بير آن نظريمه گلدي ساغ- سوْلومداکي پوْليس‌لر قالخانلارين داليسيندا قورويوب قالميش قورخو شوواليه‌لريديلر. آمما بو شوواليه‌لر قوروماميشديلار، ديب- ديري، جانلي آداملار ايديلر. دايانديقلاري يئرلرينده قيميلداييرديلار، بير- بيرلريله دانيشيرديلار. حتي بير- ايکيسي ديققتله مني سوزوردو. اونا گؤره احتياط ائله‌ييب، قفيلدن يئره أييلمه‌ديم. ساري موزاييک اوسته ديزه چؤکوب، اونلارا باخمادان چؤرک سبديمي‌قولومدان يئره بوراخديم. کپنه‌يين اؤلوسونو آستاجا گؤتوروب، سبدين ايچينده‌کي سنگه‌يين اوستونه قويدوم. کپنک گئنه بؤيرو اوسته دوشوب قالدي. آدام اولسايدي دئيرديم اوخويوب ائشيتديييم ناغيللارداکي بير گؤزل کيمي‌شيرين يوخويا داليب.
گؤيلوم ايسته‌يير دئيم بو کپنک لاپ عشق رنگينده‌دير. عؤمورلرينده عاشيق اولانلار عشق رنگينين نه اولدوغونو ياخچي بيلرلر. عشق رنگي هردن اؤزل بير رنگه چالار. قاليب‌هانسي واختدا،هانسي بير حالدا عشقه ياناشاسان. حتي اؤزونه مخصوص لحني ده وار بو رنگلرين. بونونلا بئله عشق رنگينده‌دير دئسم، بيله- بيله اؤزومو سالارام ليريک بير دويغونون ايچينه. بيليرم خيابانلارين بو وضعيّتيله ليريک دويغو توتماز. هرچند بيرجه عصيانچي دا خياباندا گؤزه گؤرونمور. بونونلا بئله پوْليس‌لرين گئيينيش‌لريني، أللرينده‌کي باتوملاريني، باشلارينداکي ده‌مير بؤرکلريني گؤرنده آدامين اوره‌يينه قورخو دامير. آز قالير آدامين آدي ياديندان چيخسين،هاندا قالسين کي عشقدن، يا اونون رنگلريندن دانيشاسان. آمما اؤلوم ده عئشقين رنگلريندن بيريسي‌دير.
اؤلومو چؤرک سبديمده داشيماغا دئييل، ساعات مئيدانيني قورخو شوواليه‌لرينين محاصيره‌سينده گؤردوکده قوتومدان قوردوم. بير آن نظريمه گلدي او هوندور بينانين باشينداکي ساعاتين عقربه‌لري ده قورخودان دايانيبلار. اؤز- اؤزومه دئديم: «قورخونون بالاسي اؤلسون». آمما مه‌ير قورخو دا دوغار کي بالاسي اوْلوب، سونرا دا اؤلسون؟ قورخو دئدييين ويروس کيمدير. دوغماز، بولاشيب، ياييلار. قورخو آدامي‌أل‌بَه‌أل اؤلدورمز، آزجا- آزجا، تيکه- تيکه اؤلدورر. دوز دئميشلر، قورخو اؤلومدن پيسدي.
حيس ائليرم أن آزي بير- ايکي پوْليس مني گؤز آلتينا آليبلار. يقين يئردن کپنه‌يي گؤتورمه‌ييم ديققت‌لريني چکيب. گؤره‌سن گؤردولر يئردن گؤتوردويوم شئي آنجاق و آنجاق بير کپنک اؤلوسويدو؟
چاليشيرام سوْيوق‌قانلي گؤرونوم. اؤز- اؤزومه دئييرم: «فيکر ائله أتدن دووار چکميش بو پوْليس‌لر بولوارلارين کنارينا أکيلميش يام‌ياشيل شومشاد آغاجلاريديلار. شومشاد آغاجلارينين قورخوسو يوخدي کي!»
سنگه‌يين اوجوندان بير پارچا قوپاريب آغزيما قويورام. پليس‌لري گؤرمزدن کيمي‌پيادا يولوندان کئچيرم. بير- ايکي آدديم اوزاقلاشماميش اوشاق‌يانا بير فيکير عاغليما چاتير. گئري دؤنورم. بوتون شهامتيمي‌بير يئره توپلاييرام. فيکريم اوشاق‌يانا اولسا دا، بؤيوک بير ساواشا گئدن کيمي‌حيسيم وار. آدديم آتديقجا دئييرم بس ساواش مئيدانينا ياخينلاشيرام. مئيدانين اورتاسينا توپلانميش پوْليس‌لرين قارشيسيندا دايانيرام. پوْليس‌لرتعجوبله منه باخيرلار. بيري أليني بئلينه آپاريب، باتومون دسته‌ييني سيخير. قورخورام. او باتوم منيم آرتروزلو سوموکلريمين حسابيني بيريوللوق چوروده بيلر. اؤزمو سينديرميرام. کپنه‌يي آستاجا گؤتوروب اوْوجومدا اونا گؤستريب، يانيندا دوران پوْليسين چينينه قويوب، گئري دؤنورم. قورخورام بير ده دؤنوب باخام. قورخورام او قورخو شوواليه‌سي کپنه‌يي چينيندن يئره آتيب، آياغي ايله اونون ألوان و اينجه قانادلاريني أزه…
منبع :