ايبليس
ايبليس
1401/02/25
بولگه لر سرويسي: امتحانلاري قورتاريب يئنيجه ائويميزه يئتيشميشديم. هله گونون باتماغينا بير-ايکي ساعات قاليردي. ائوه يئتيشمکله باشيمي يئره قويوب گون باتاناجاق ياتديم. آخشام واختي اويانييب خؤره‌ييمي يئديم. بير آز اوردان –بوردان دانيشاندان سونرا اوتاغيمدا تک قالميشديم.
يازار: همت شهبازي
بولگه لر سرويسي: امتحانلاري قورتاريب يئنيجه ائويميزه يئتيشميشديم. هله گونون باتماغينا بير-ايکي ساعات قاليردي. ائوه يئتيشمکله باشيمي يئره قويوب گون باتاناجاق ياتديم. آخشام واختي اويانييب خؤره‌ييمي يئديم. بير آز اوردان –بوردان دانيشاندان سونرا اوتاغيمدا تک قالميشديم.
گئجه‌ياريسي اؤز بويومدان اوزون بير دؤشه‌يين اوستونه اوزانميشديم. سانکي اؤلوم دؤرد–دؤره‌مده گزيردي، اونونلا يان–يانا اوزانميشديم. دؤشه‌يين اوستونه اوزانماميشدان قاباق شعر کيتابي اوخويوردوم.
»يوللار دره‌لي‌دير، يوللار تپه‌لي…«
اوره‌ييم سيخيلدي. سانکي ايچيمده اؤتن ايستک‌لريمله وارليغيم آراسيندا بير غم کؤرپوسو قوردو:
»حيات …!حيا…ت! حيا…آ…ت! آت مينن انسانلارکيمي بعضي انسانلارين بوينونا مينير. حياتين يوللاري چوخ واخلار دره‌لي، تپه‌لي‌دير… يوللارين کاناريندا بيتگي‌لر ده اولور. اونلار گؤر نئجه گؤزل ياشاييرلار. چوخ واخلار اونلارين ياشاييشينا پاخيل‌ليغيم گلير. يوللاري گئديرسن، گئديرسن ائي… اوجو يوخ، بوجاغي يوخ… يول قيراغي طبيعتي، گول-چيچک‌لري، قويون– قوزولاري، چوبانلاري گؤرورسن… حتتا يان–يؤره‌نه دوشن کؤلگه‌لري ده گؤرورسن،کؤلگه‌لرکيچيلير، اوزانير، آدامين او اوز بو اوزونه کئچير، چوخ آداملاري قورخودور، چاشديرير… ائي… نه بيليم بلکه ده ائله حيات بير-بيرينه اوخشار کؤلگه‌لردير انساني چاشديرماق اوچون يارانيب…« بيردن اؤزومه گلديم، فيکيرلريمين اوجو قيريلدي. بو ايسه مني کد‌رلنديردي. آخي بيليرسيز بير ده بو خياللارين اوجونو توتماق اولمور. انسانين همصحبتي اولمايان يئرده، اونون اوچون أن گؤزل همصحبت ائله اونون اؤزودور.
اوتاغيمين بير گوشه‌سينده بير نئچه کيتاب واردير. گاهدان اونلاردان بيريني اوخوماق اوچون گؤتورورم آنجاق حوصله‌م داريخير،کيتابي اؤز يئرينه قؤيورام.
گؤزلريمي اوتاغيما گزديرديم، اونون چوخ يئرينه ايري- اسکيک گچ وورولوب، آنجاق اوتاغيمين کيچيک پنجره‌سي‌نين دؤرد- دؤره‌سينه گچ چکيلمه‌ييب‌دير. قيرميزي کرپيچ‌لري آداما گؤز بَره‌لدير. يورقان اوستومده، ياسديغيمي ديک قويوب سؤيکنميشم. گؤزلريمي پنجره‌يه سوزورم. قارانليق‌دير. گئجه‌نين ياريسي، گؤيده بير اولدوزدا بئله گؤرونمور. هردن، بير ايت هورور، گؤرورسن بير آيريسي اونا جاواب اولاراق باشقا يئردن هورمک سسي گلير.
يوخوم گلميردي. آياغا قالخديم. شاپ-شاپ شاپيلدايان ساماوري سؤندوردوم، بير چاي دمله‌ديم. ايستکان- نلبکي‌لري گتيريب، بير چاي سوزدوم.
ائويميزين کاناريندان آز سويو اولان کيچيک بيرآرخ آخير. اوندان کئچمک اوچون کؤرپو ده بئله لازيم دئييل. آرخين اوزونلوغوندا بير نئچه سؤيود آغاجي سيرا ايله بيتميشدي. سؤيودون بعضي‌لري بؤيوک، بعضي‌لري ايسه چوخ کيچيک‌دير. بؤيوک سؤيودلرين هاميسي بير ايلده بؤيوموشدور. چوخلو خول-بوداق آچميشدير. آرخين سويونون چوخونو دا ائله بو قارينپا سؤيودلر ايچيردي. بونا گؤره‌ده بير ايلده بئش دفعه او کيچيک سؤيودلردن يئکه اولموشدولار.
هر گئجه قول- قانادلي بير بايقوش او کيچيک سؤيود آغاجلاري‌نين بيري‌نين اوستونه قونوب بانلاييردي آخي آنام هميشه اونون دوز-چؤره‌ييني، خؤره‌ييني کيچيک آغاجلارين اوستونه قويوردو. بونا گؤره ده بايقوش هئچ واخت بؤيوک آغاجلارين اوستونه قونمازدي، چونکي اؤز خؤره‌يي‌نين يئريني بيليردي.
هميشه‌کي کيمي بوگئجه ده بايقوش اؤز يئرينه قونوب بانلاييردي. آنامدان ائشيتميشديم بايقوش چوخ شوم اولور. دئييلن‌لره گؤره او بانلايان چاغدا گرک دوز-چؤره‌ييني وئره‌سن. منيم 17ياشيم وار ايدي. بو ناغيللارا اينانماق منيم اوچون چتين ايدي.
«نئجه اولار دؤز-چؤره‌ک قالمايا، داشييب بايقوشا يئديرده‌سن؟ »- دئييرديم.
اليمده‌کي چاييم سويموشدو. داها ايچمه‌ديم. بايقوش ايسه بانلادي… بانلادي… آخيردا يورولوب گئتدي. من ده اوستومه يورقاني چکيب اليمده کيتاب اوزانديم.
«اؤز-اؤزومه شعرلري اوجادان اوخويوردوم. بعضي مصراعلاري ياديمدا قالماق اوچون تکرار اوخويوردوم. بيردن گؤزوم پنجره‌ميزه ساتاشدي. پنجره‌نين قاباغيندا، گچ چکمه‌دييميز قيرميزي کرپيچ‌لرين اوستونده بارماقلاري قارا توکله دولو بير ال گؤردوم. ياني بئله حيس ائتديم کي او ال، آدام الينه بنزه‌ر بير ال‌دير. آياغا قالخديم، پنجره‌يه ياخينلاشديم. دوغوردان دا بيرآدام ايدي. او اليني پنجره‌نين قاباغيندان چکدي. آنجاق من باخيشلاريمي پنجره‌يه ديکميشديم. اونو نئچه دفعه گؤردوم‌کي پنجره‌نين قاباغيندان او اوز بو اوزه گئديردي. ايندي ده ياديمدادير. گؤزلري چوخ قورخولو، بايقوشون گؤزلرينه اوخشاييردي. آنجاق بايقوش دئييلدي. چونکي او ال، او هئيکل آدام هئيکل ايدي. او اوزون گئييملي پالتارلار گئيميشدي. کيتابلاردا اوخودوغوم درويش‌لرين گئييمينه اوخشار پالتارلاري آياغينين اوجونادک دوشموشدو. هله باشينداکي بؤرکوندن، ايري-ايري دَ‌بَريشيکلريندن، قورخونج هئيکليندن، يالان اولماسين کوراوغلو دا اولسايدي قورخاردي.
اؤزومو ايتيرميشديم. هئچ بيلميرديم اليمي هارايا آتيم. قورخومدان يورقاني باشيما چکديم. آنجاق او، پنجره‌ني دؤيدو. چيغيريرديم، آنجاق سسيم چيخميردي، هله اوسته‌ليک لاپ ياواشدان سوروشدوم: -سيز…کيم…سيز؟ … نه…ايستير…سيز؟
حتتا ظن ائله‌ديم کي ياواشدان سوروشدوغوم بوسورغو اوچون سسيم چيخماميشدي. آنجاق او باشيني پنجره‌دن ايچه‌ري سوخاراق دئدي:
-من کيمه‌م؟ ها… ها… ها… ايندي گؤرسه‌ده‌رم سنه. دور آياغا گؤروم، دور! تئز اول ! وئيسَل- وئيسل دانيشما گؤروم! دور آياغا گير بو تابيتين ايچينه. سنه گؤرسه‌ديم کي من کيمم؟
قورخو بوتون سوموکلريمه يئريدي. ائله‌بيل مچيد قاباغيندا اونونلا گؤروشموشدوم. تابيتيني مچيدين قاباغيندا چارپايي‌نين اوستونه قويموشدو. تابيتين بير طرفي د‌رين، او بيري طرفي ايسه کيچيک و داياز ايدي. قورخا- قورخا سوروشدوم:
-عز… را… ئيل… سيز مه‌يه‌ر؟
-نه عزرائيل! عزرائيل کيمدي منيم يانيمدا؟ اونو من ائله آللادارام ها.- دئيه‌رک هيرسيندن ساغ اليني يومروق توتاراق سول الي‌نين ايچينه ووردو. اوزون پالتارلي، ناغيللاردا اوخودوغوموز، ائشيتدييميز ايبلبسه اوخشايان، بايقوشا اوخشار بئله بير آدام عؤمرومده هئچ گؤرمه‌ميشديم، آنجاق ندنسه سير-صيفتي ائله‌بيل کي دئييردي بونو من هارداسا گؤرموشم. قورخومدان زاغ- زاغ اسيرديم، و بير ده اونون حربه-زورباسينا گؤره باشقا بير يولوم اولمادان تابيتا اوزانديم. داها بيلمه‌ديم مني هارايا آپاردي. تابيتين قيراغي يوموشاق ايدي. ايچينده ايسه، هئچ بير يوموشاقليق ايزي گؤرونموردو.
ايندي داها تابيتين آغزيني آچيب، مني ده همان مچيدين قاباغينا گتيرميشدي. تابيتين آغزيني آچاندا دؤرد گؤزل گئييملي و آغ اوزلو جاوان قيز گؤردوم. اونلار اللرينده شام توتوب، گوله-گوله کئچديلر. او، مچيدين ايچينه کئچيب الينده آغ کفن ايله گلدي. بو آندا، اليمده اوخودوغوم کيتاب اليمدن زوويه‌رک يئره دوشدو.
منبع :