اوشاغين آدي آسلي ايدي. آتاسي قيزي دوغولان گون اونا “آديوي آسلي قويورام”-دئميشدي “کرم’يوي ده الله يئتيرسين.” سورا دا قولاغينا آذان دئميشدي. آسلي چوخ دا ياشي يوخ ايدي آخي؛ او فقط اون دنه بايرام گؤرموشدو. ائله او آخير بايرامدان دا تکجه بئش-آلتي آي کئچميشدي. آسلي’نين هله ده عمي‌سي‌نين اونا وئرديگي بايرامليق پولو’نان مدرسه‌ده کيچيک قارداشينا آلديغي ميداد قورتارماميشدي. آخي قارداشي هله مدرسه‌يه گئتميردي کي! هردن مدرسه‌ده خانيم معلم‌لري‌نين اونو قاباغا چاغيريب اوخوتدوردوغو يا خانيمين اؤزو اوخودوغو تورکي شعيرلري قارداشينا او ميداد’نان يازديريردي:

“اوشودوم! اوشودوم!

داغدان آلما داشيديم

آلمالاريمي‌آلديلار

مني يولا سالديلار.”

داييسي‌اوغلو اردبيل’دن، او دانيشگاهلاريندا قوردوقلاري کيتاب ساتان يئردن، اونا آلديغي شعير کيتابين هله قوتارماميشدي. او زاد کيتاب… اول صفحه‌سينده ده “آذربايجان سنسن منيم” شعيري يازيلميشدي. آدي يادينا دوشموردو. آسلي اؤزونه دئميشدي کي شعيرلرين‌هامي‌سين أزبرلييه‌جک.‌هاميسين قره‌سينه اوخوياجاق.

آمما او ايل آسلي’نين آتاسي ياز ايشيني چوخ اکميشدي. آخي دئييرديلر باها اولاجاق. قوربان قاباغي مال-حئيوانا يئديرديب کؤکَلده‌جکلر. آسلي’نين دا يايدا ائله ايشي آتاسي’نان بؤيوک قارداشينا چاي-چؤرک داشيماق اولموشدو. درگز ووران گرک يئييب ايچه ده، يوخسا ايشلييه بيلمز کي. يئرين باشينا دا گئدنده قارداشي’نان آتاسي اوتوروب چاي-چؤرک يئيه‌نه‌جه آسلي ديميريغي گؤتوروب بير آز اونلارين بيچديکلري هَل‌لردن گه‌مه‌له‌يردي، سورا دا تئز قاييداردي کنده.

نم نه‌يچون او ايل، ائله باخ، او بايرامدان بير جور ايدي. يايدا دا آتاسي ياز-ايشي‌ني بيچندن سونرا گتيريب تايايا وورماغينا ائله،‌هاوا اولموردو. ائله بيل، ياز-ايشي‌لر کنده گلمک ايسته‌ميرديلر.

ايشلري تزه قوتارميشدي. هله تايالاري قاليردي. ائله او گون ايدي؛ آتاسي تاياني بيتيرن گون. تزه آناسي چاي دمله‌ميشدي. گلدي »کيشي!«-دئدي »دور بير چاي ايچ ده!« ائله چايلاري تزه تؤکموشدو، آناسي. بير آز دا بويمادرن’دن-کهليک‌اوتو’دان تؤکموشدو چايا. ياخشي اييي گليردي. آناسي آسلي’يا »قيزيم!«-دئميشدي. »گئت بير تويوق-جوجه‌يه دن-د?ش آت! گل!«

آسلي ائله اوردا ايدي. ديک او قاپاغان خوروزون قاباغيندا. ديک ائله او تويوقلاري‌نين لولونون قاباغيندا. ألينده‌کي بوغدالاري اويناديردي. بيردن او خوروزون باشي قالخميشدي. بير اويانا-بويانا باخميشدي. بيردن ده بانلاماغا باشلاميشدي. اونو ائشيتجک تويوقلاردا باشلاميشديلار. آسلي بيلميردي کي نه اولاجاق. ائله اونلار بانلاياندا دا کنده بير لاخلاما گلميشدي. کنددن توز قالخميشدي. آسلي’نين گؤزونون قاباغيندا، لاپ ائله او بؤيوک قارداشي‌نين همه‌شه کيفين قويدوغو يئرده داملارينداکي تير‌هاچانين ا?ستوندن جاييب توشموشدو قارداشي‌نين بئلينه. ائله اونداجا آسلي قيشقيرميشدي. آتاسين »آغا!« باغيريب چاغيرميشدي. ائله ننه‌سين ده »ننه!« دئييب چاغيرميشدي. آمما هئچ اولاردان سس گلمه‌ميشدي. ايکيسي ده، ائله‌بيل، چايلاري قاباقلاريندا، درين يوخويا گئتميشديلر. ائله اوندا، ديک او آندا آسلي’ني داريخما باسميشدي.                                                                                          

گئجه ايدي. سويوق آدامي‌کسيردي. يئل سوموک‌لرين ايچينده‌کي ايليگي ده سانجيردي. آسلي’نين بؤيرک‌لري آغريييردي. يايين آخيرلاري ايدي ده! قيرخ‌بئشي ده کئچميشدي. سويوق توشن واخت ايدي. آسلي‌گيله موسا عمي‌شئي-ش?ي گتيرميشدي. موسا عمي‌«زلزله گئتدي، داي گلمييه‌جک« دئميشدي. موسا عمي‌قاييتميشدي. هه! ائله ائولرينه قاييتميشدي. جيغاتي’نين قيراغيندان گلميشدي. او کيشي’نن دانيشاندا ائشيتميشدي. بير دفه ده گله‌جک دئميشدي.

آسلي’نين يايليغي کيچيک قارداشي‌نين قيچيندا ايدي. تزه ييخيلميشدي. ائله، او هشوو-پشوودا. آسلي’يا هئچ نه اولماميشدي. ائوده دئييل ايدي کي. آسلي’يا فقط بير شئي اولموشدو. باشي‌نين ا?ستونده، ديک او ساغ قولاغي‌نين يانيندان، آلنين اؤپه-اؤپه، قارا گيله‌لري‌نين قاباغيندان کئچه-کئچه، قاشين تومارلييا-تومارلييا و ا?زونده ا?زه-ا?زه آشاغي گلن او ساچينا تزه بير شئي چوخالميشدي. هه! ديک ائله او بيرچکلرين ايچينده تئل‌لري‌نين بيري‌نين رنگي دؤنموشدو. آناسي‌نين داغيلميش تؤوله‌لرينده‌کي اينکلريندن ساغديغي سوت رنگده. ديک ائله او رنگده اولموشدو. ائله بيل او بير تئلي ائله او آناسي اينگين امجگيندن چکيب زور’نان چيخارديب اورا دوگونله‌ميشدي.

آسلي قارداشينا آلديغي ميداد’نان داييسي‌اوغلو اردبيل’دن اونا گتيرديگي شعير کيتابين تاپميشدي. آمما گؤزلري موسا عمي‌نين يولوندا قالميشدي. بلکه صاباح گله! بلکه بير گون گله! بلکه ده هئچ گلمه‌يه! آمما، يوخ! گلر. »گللم.«-دئدي. بلکه بو دؤنه گون‌باتاندا يوخ، گون چيخاندا گلدي! آمما کئشکه گلنده، آغ يئلدن قاباق گله. ألينده ده پتوو’نان ميداد’نان او کيتاب اولا!

آسلي’نين کيچيک قارداشي اونو چاغيريردي. »گل منه ناغيل دئ!«-دئييردي. »فاطما خانيم’نان‌هادي-بودونو دئيه‌جکسن‌ها!«

آسلي قارداشي‌نين يانينا گئتدي. آمما بو دؤنه ناغيلين اوّلي آيري جور باشلييردي:

“بيري وار ايدي، بيري يوخ ايدي.

گؤزليين بير قيز وار ايدي.…”

گؤيدن اوچ آلما توشدو بيري منيم، بيري سنين بيري ناغيل دئيه‌نين.